URA TIN AYRA 14
14
Abram suɗ Lot kiyo
1Hu cokira Amrafel mul ma Sinearna, Ariyok mul ma Ellasarna, Kedor-Laomer mul ma Elamma, u Tidal mul ma Goimma, 2asi duu tasi u Bera mul ma Sodomma u Birka mul ma Gomor u Sinab u mul ma Admana, u Semeber mul ma Seboimma, u mulna Bela ni ana Soar.
3Muli suu vadl asina tok tasi hu li ma ɦuɗugumma Siddim ni fun mbo lum ŋgol ma galakŋa. 4Basara doogo yam mba' asi ni u mul ma yam ana Kedor-Laomer, hu basara doogo yam hindira ni asi mbuɗ yara u namu. 5Hu basara doogo yam fiɗira ni Kedor-Laomer mbay u muli suu umma, duu u muli suu Refana hu Aseterot-Karnaim, suu Zuzinna hu Ham, suu Emina hu Kiriyataim, 6u suu Horna, su kasi ni vo varasi kay ɦini masira Seirra, dikisi gak gak tinisi ha ki El-Paran tok eg ŋgoo bagira. 7Asi hoŋ ay dagan mba tew hu En-Misepat ni Kades, asi dik suu Amalekŋa ki hu mbas masira halaŋ, u suu Amorna suu cuki hu Hassasson-Tamarna lay.
8Mul ma Sodomma, mul ma Gomorna, ma Admana, mul ma Seboimma u mul ma Belana ni Soar, asi min tasi a tuɗ duuna hu ɦuɗugumba Siddim, 9Asi duu ni Kedor-Laomer mul ma Elamma, u Tidal mul ma Goimma, Amrafel mul ma Sinearna u Ariyok mul ma Ellasarna, muli suu fiɗina duu u muli suu vadlna. 10Li ɦuɗugum ma Siddimma zul va ma yam ana bitummana#14.10 bitummana Ni va ma dabaŋ ma suuna mbu voɗ bulna u namma. ka hu cocoo. Mul ma Sodomma u mul ma Gomorna pii kiyo cuk hu zul va ma yam ana bitummana, suu daŋŋa yow liŋŋa ŋgay tasi kay ɦinira. 11Suu su kasina ɦurum begera vi suu Sodomma u Gomorna halaŋ, u tlegeyesi suu tira lay tuɗ ki vo u asiya. 12Lot, ma goŋ wayaŋ Abramma, asi yowom u tlegeyem halaŋ tuɗ u asiya. Lot kakŋi hu Sodom.
13Sa ma pii ay kina dew mba di Abram ma Hebrena, nam ka cuki ni ii ɦoyna hu Mamre. Sa ma Amorna wayaŋ Esekol u Anerna asi banara u Abram. 14Hu li ma Abram hum ana goŋ wayammana asi vam ha wa ni nam yow suu mam suu wi yal duuna 318 suu vuɗ voo hu ziimma. Nam cuɗusi usi a duuna gak gak tew ki Dan. 15Nam ɓorow ii suu duu mamsina ki a dugusi njeŋgera. Nam u suu sun mamsina su kasi dikisi ta ta Hoba, ni ii ma mbayawna vi Damas. 16Nam ɓaɗ tlesuu asi ɦurumusi hana ay halaŋ, hoŋ Lot, ma goŋ wayammana, ay u tlegeyem halaŋ u boyogina u suu daŋŋa lay.
Melkisedek paɗ vunum ki kay Abram
17Hu li ma Abram su ay kay babali mamsina Kedor-Laomer u muli suu umma suna, mul ma Sodomma ŋgafam vogom hu li ma ɦuɗugumma Kave. Ni ana li vi mulnana. 18Melkisedek mul ma Salemma mbay u komnjoɗira u summa may, nam ay ni mul ma li ɓivunna vi Lo ma Kolona.#Heb. 7.1-10 19Nam paɗ vunum kay Abram ki ko wanda na ana,
«Ko Lona ma Kolona ma li huulona
u ndaŋgara paɗ vunum ki kay Abram.
20Gi deɓ maŋ Lo ma Kolona
ma ɦaŋ saɓakŋa a su kay suu babali maŋsinana.»
Abram ɦam keŋ ma doogona vi yam tlesuu nam ɦurumusi ayna nde nde halaŋ.
21Mul ma Sodomma di Abram ana, «Ҥan suu warna, hin begera ha maŋ halaŋ.» 22Abram hoŋ dira maŋ mul ma Sodomma ana, «An tli kon kolo suu tan fok Yawe, Lo ma Kolona ma li huulona u ndaŋgarana, 23tlegeyeŋ halaŋŋi va ma an tlam kon kaɗi. Lini zew baraw na ew lay, zew tuɓuru lay, an ka yow konɗi, a aŋ hin di ana, Aŋ ɦiz Abram kiyo, naɗi. 24Va ma an tlam kay tan kaɗi, ni ti ma zoŋi mansina tam ayna hol, u va ma ɦam maŋ suu ay unna may, Aner u Esekol, u Mamre, asi hin yow masisina.»
Currently Selected:
URA TIN AYRA 14: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
