GALATENA 4

1Gola an dagi u boy ma daŋŋa olo, goŋ sana ma yowom joomma goo tuwa ni nam fun tammi u mbaɓuna dew, lini nam goo lay nammi mala tlena halaŋ. 2Hu li ma nam goona ni nam hummi u suu ka wulumma golom tlegeyemmi asi lay, gak gak nam tew hu li ma bum ŋgaamma. 3Aygi ay ni gorkemba ko ndaɗta na may, aygi ay ni mborɓiina vi tlena hu duliyara. 4Hu li ma lina ndakŋa Lona sun goromma aya nam vuɗ ay hu cara hum u gaɗta vi suu Juifna. 5Kay a buɗ suu ay njuni u gaɗtana kiyo. Kay aygi mba mbuɗ ki goryoŋ Lonna.

6A tak ki ana agi ni goryomura ni Lona sun Musukka vi goromma ay huruygiya, Musukka sawalla ana Bunu. 7Kay ndaɗta aŋ ka mbaɓu oloɗi ni goona, aŋŋi goo ma Lona hin ɦaŋ va ma nam hinim a jona maŋ goryomma.

Pol li ndaana kay suu Galatina

8Agi ay jew ni ka wi Lonaɗi, agi ay ni mborɓiina vi logi suu bay gasina. 9Cecemi agi wi Lona wa, cecemi Lona wagi wa may, ni nanaba agi hoŋ u ŋgussa maŋira lalassa nige? Agi min hoŋogi dagan a mbuɗ tagi mborɓii masisina ni nanage? 10Agi ɦal ŋgolla maŋ buu maa ɦiw, maŋ til maa ɦiw, maŋ li maa ɦiw, maŋ basa taa ɦiw. 11An li ndaana kagiya kay sunda an laɗ kagira hin li ki ni ɦawa su?

12Gorsenna an cenegiya mbuɗugi tagi ko an na, lagi tagi ko an mbuɗ tan ki ko agira na may. Agi li va co ka egenɗi. 13Humugi gagi kay fali mayra an mba dagi Boy ma Ayra jewra ni an ay tuguɗiyo. 14Tanda tuguɗira ay egegi ni ko tukka na. Lay ni agi ŋgulun kaɗi, noyon ka kiɗi lay, agi hin van varagi ni ko sa sunda huulona na, ko Yesu Kristu u tamba na. 15Furi magira li ay ndaɗta tew ni arage? An ndak di kagi ana li gin a ndaka ni agi li hin gin tok a paɗ irigira golla a ɦanda kiyo. 16An mbuɗ cecemi a saagi ma gonokka kay an dagi gasira su?

17Suu asina njun ugi ŋgolo ni dlaasira ka jiviɗi, va ma asi mina ni kay a ɓorowogi dukugi ki u anu kay asi mba fi kogi ŋgol may. 18Gorsenna kay a fi ŋgolo ni jiviya, kay va ma jivina ni li ha ni na gak gak ka ana ni hu buu ma an dukugina ɦawaɗi. 19Goryonu an fi wihawra daŋŋa kagi olo wihaw ndaŋga ko cara a vuɗ goona na gak gak Kristu mba li kagi hurugiya. 20An min a tuɗ ha dukugiya hu li namma an min jok boy manna ɓakŋa zeɗ kay tan lan ndaana kay boy magina.

Ndal boyna kay Hagar u Sara

21Dan aya agi suu min a hum u gaɗtana, agi humugi dlara gaɗta daɗta kaɗi su? 22Ndaɗ di ana Abraham vuɗ gorra mba' maa dew u cara mbaɓura, maa dew u cara vuɗira may. 23Goŋ mbaɓurana vuɗummi u minda vi sana, goŋ cara vuɗira vuɗummi u vun Lona ma nam damma. 24Boy namma ni ko ndal boyna na, boyogi suu asina ɓak kay galamba mba'. Galam taa dew ɓak kay Hagar ta tak kay ɦinira Sinayra, vuɗ gor mborɓiina ni ndaɗu. 25Hagar ni ɦinira hu Arabi, ndaɗ ni ko ɦoŋzi ma Yerusalemma na, nammi mbaɓuna u suu hurumma halaŋ. 26Yerusalem ma ha kolona ni ma vuɗina, ni suygi aygiya.

27Kay magaara di anaba,

«Furiya ndak

ca mayra vuɗ goo kaɗira,

sawalla furira,

ndak ca mayra fi wihawra vi vuɗta kaɗira,

kay goryoŋ cara hiniɗ kira

ka ŋgol su cara u njufuɗta.»

28Gorsenna agi ni suu vuɗ u vi vunna vi Lonana ko ndal Isaak na. 29Jewra ni goo ma vuɗ u minda vi sana las goo ma vuɗ u Musuk Lonara ni hin li cecemi na may. 30Boy ma Ɓiirina di ana mege? Ndaɗ di ana dik cara mbaɓura u goroɗ kiyo. Kay goŋ cara mbaɓura ka ndak a yow jona u goŋ cara ɗumbaɗi. 31Gorsenna aygi ka goryoŋ cara mbaɓuraɗi ni goryoŋ cara vuɗira.

Currently Selected:

GALATENA 4: BMS

Highlight

Copy