GALATENA 3

Gaɗta ɗowba vira

1Agi suu Galatina suu giniŋŋa, sa mbuɗugi irigi kina ni gege? Agi wi ki u irigi gasi ana Yesu Kristu miɗ hu gu garakŋa. 2An min ana agi hoŋ dira kay joɓpa dew wanda, agi fagi Musuk Lonara ni ko agi li u gaɗtara su? Ɗowba kay agi hum Boy ma Ayra, vi umba su? 3Agi hin mbuɗ a li giniŋga na ni nanage? Agi gijaŋ ay jew u Musuk Lonara min daɓam ki cecemi u saɓak magina su? 4Agi loɓogi tagi ki doy na ni ɦawa su? Ni ka ana agi loɓ ki ni ɦawaa naɗi. 5Lona ɦagi Musuk mamba, nam li dlara mbuɗta dukugiya, nam li na ni kay ana agi li u gaɗta su? Ɗowba kay agi hum Boy ma Ayra vi umba su?

6Boy ma Ɓiirina di kay Abraham ana nam vi u Lona, Lona ŋgaɓam a sa ma ɗegeena ni kay viimba. 7Ni agi wi ki jivi na, suu vina ni suu hu njaf ma gasina vi Abrahamma. 8Boy ma Ɓiirina di ki fok jew ana Lona min mbuɗ njaf suu ɦawana ki fokom ɗegee ni u viisira ni kay ndaɗta ndaɗ di Boy ma Ayra ay fok jew maŋ Abraham ana, «Lona hin paɗ vunum ki kay njaf suuna halaŋŋi u aŋu.» 9Abraham viya, Lona paɗ vunum ki kamu, ni kay ndaɗta suu vina halaŋ halaŋ fi paɗvunna ko nam na may.

10Lona gi vunna maŋ suu tin hurusi kay gaɗtana halaŋ, kay magaara di ana sa ma ka li u tlesuu ɓiiri hu magaara gaɗta halaŋgina kini baaya. 11Ki gasi ana sana mbuɗ ɗegee fok Lona u gaɗtaɗi, ni kay magaara di ana sana mbuɗ ɗegee fok Lona ni u vira kak iiri ni na may. 12Gaɗta ka li ni kay viraɗi, ni na ɗow ko magaara dira na «Sana vi u tlesuu ɓiiri hu gaɗtana halaŋ kak iiri usiya.»

13Kristu mbuɗ ki sa ma baayna balamaya, nam buɗuygi ki ko gaɗta, magaara di ana sa ma ki ɓali kolo hu gu garakŋa ni sa ma ki baayna. 14Dla ndaɗta li na ni kay paɗvunna vi Lona ma nam di ki fok jew maŋ Abrahamma mba li maŋ suu ka njaf suu ɦawana halaŋ u Yesu Kristu kay aygi mba fi Musuk Lonara nam di kaɗta.

Gaɗta u va ma Lona vi vunum kamma

15Gorsenna an min tinigi ndal boyna u dlara suuna ka laɗ halaŋga, lini sana vi galamba u ndaramma wa ni sa ndak a ɓeŋeɗ kiɗi, kal va ma daŋ huɗi lay. 16Lona di Abraham kay va ma nam min a ɦamma maŋ sa hu njafamma. Magaara di ka anaba maŋ suu hu njafamma ko ami bolowra naɗi, ndaɗ di ana «maŋ sa ma hu njafaŋŋa,» ni kay sa maa dew ni Kristu. 17Gola ni va ma an min damma, kay galamba Lona vaɗ ay jewra nam min ana vaɗu, basara li ki ca ni kis kis fiɗi duk dok hindi ni gaɗta hin mbay dagan ni na tuwa, ndaɗ ka ndak a ɓeŋ galamba vi Lonara u vi vun ma nam vammaɗi. 18Lini va ma Lona di kam a ɦamma ko jona na, ɦammi u gaɗta ni ka va ma nam di kam a ɦamma oloɗi, Lona tak ki kay vunum ma nam vam u Abrahamma u oora nam ɦambara.

19Ҥal gaɗta ay ni kay mege? Ndaɗ ɦal ay ki ni kay tak dla mayra ka li u minda vi Lonaɗira, ndaɗ tuɗ gak gak daɓ hu li ma njafna vi Abraham Lona vi vunum kamma. Gaɗ ndaɗta jok ay ko suu sunda huulona u sa ma duk ɦoŋgana dew. 20Sa ma duk ɦoŋgana ka li dewɗi Lona dew ni nam ɗaŋa.

Dlara gaɗta tini kaɗta

21Ni tak ki ana gaɗta ka taɓi u vun Lona ma nam vammaɗi na su? Ka na ɗowɗi! Lini gaɗta mbani a ɦal iirira maŋ suuna ni sana hin mbuɗ ki ɗegee fok Lona u ndaɗu. 22Boy ma Ɓiirina di anaba suu hu ndaŋgarana halaŋŋi mborɓiina u saɓak cora kay ɦala Lona vi vunum kaɗta mba li maŋ suu vi u Yesu Kristuna.

23Ay jew hu li ma vira bay mba tuna ni gaɗta njunuygi daŋgayna kay a juɓ vira hin tak ki tuwa. 24Gaɗta ay goloygi jew ni ndaɗu gak tew hu li ma Kristu mbana, kay aygi mba mbuɗ ɗegee fok Lona u vira. 25Cecemi lina vi vira mba wa aygi ka goloygi u gaɗta oloɗi.

26Agi mbuɗ a goryoŋ Lonana ni u vira kay taɓ maygira u Yesu Kristura. 27Agi halaŋ suu mbus batemma a taɓ u Yesu Kristuna agi cukugi dlara wilira hu Yesu Kristura kagi wa. 28Suu Juifna ka ɓorowi zeɗ zeɗ u njaf suu daŋŋaɗi, mborɓiina ka zeɗ zeɗ u suu vuɗinaɗi, suu njufina ka zeɗ zeɗ u boyoginaɗi lay. Agi halaŋŋi hu taɓpa u Yesu Kristura dew. 29Lini agi ni suu vi Kristuna agi ni hu njafna vi Abrahamma hin fagi va ma Lona vi vunum kamma ɦam ko jona nana.

Currently Selected:

GALATENA 3: BMS

Highlight

Copy