GALATENA 2

Pol u suu vovoɗ suu hiŋŋa

1Ŋgoo dagan basara doogo yam fiɗi an hin hoŋ ay Yerusalem u tami u Barnabas an tay Tit ha un may. 2An tuɗ ni kay dlara Lona takanda a an laɗta, hu tokka vi suu ŋgolona an dasi Boy ma Ayra ma an ka dam maŋ suu ka njaf suu ɦawana. An ka min ana sun manda an laɗ ki fok jewra lay ta cecem wanda lay ba ki ɦawaɗi. 3Tit, ndaran ma unna, nammi sa ma Grekŋa, asi ɦeɓem ka kay a cawam ɗiwim kiraɗi lay. 4Gorseygi suu bay gasina cuk tasi dukumi min a cawam ɗiwimu, suu asina taa tasi ay umi ko suu cegeɗta na, kay gol buɗ mayra aygi buɗ ki u Yesu Kristura asi min a mbuɗuygi ki mborɓiina. 5U boy masina na ɗow ni ami hinisi kaɗi kay gasira vi Boy ma Ayra mba col saɓak dukugiya.

6Suu masi suu ay ko suu ŋgolona nana dlaasira asi laɗta ndolon kaɗi, kay Lona ka ɓorow ii saɗi, suu ŋgolo asina an dasi ana sa joɓon kay vaɗi. 7Ni na ɗow asi wi ana Lona ɦan sunda di Boy ma Ayra maŋ suu ka njaf suu ɦawaɗina ko nam ɦal maŋ Piyer a di maŋ suu Juifna na may. 8Kay Lona ŋgaɓan a sa vovoɗta vi njaf suu ɦawana ko nam ŋgaɓ Piyer a sa vovoɗta vi suu Juifna na may. 9Jak, Piyer u Jaŋ asi ni suu ay a ŋgolora, hu li ma asi wi ana Lona ɦan sunda ndaɗta ni namu ni, asi ŋgaf kosi u ami ha Barnabas. Ami halaŋ taɓ tami halaŋ wi ana ami ni ko tami dew, koy mamira ami tuɗumi ni duk njaf suu ɦawana asi tuɗ ni duk suu Juifna may. 10Asi dami ana ami mba saa kay suu wihawra duk suu vi Kristuna hu Yerusalem, va ma an lam ŋgolna ni namma.

Pol yal Piyer hu Antiok

11Hu li ma Piyer mba hu Antiok ni an yalam ki duk suuna halaŋ kay nam li coo. 12Jew Jak bay sun suuna ay egem tura ni nam ti ko tam u gorseygi suu ka njaf suu ɦawana, hu li ma suuna mbana ni nam mbuɗ ka ti u asi oloɗi, kay nam li ndaana ko suu ɗiwisi cawina. 13Suu Juif suu daŋŋa gijaŋ li ko Piyer na may, Barnabas u tamba lay ni viɗ ki duk boy namma. 14Hu li ma an wasi ana asi ka tuɗ ɗegee u gasira vi Boy ma Ayraɗi ni, an di Piyer ki duk suuna halaŋ ana, «Aŋ sa Juifna aŋ kak duk suuna tani ka ko sa ma Juifna naɗi, aŋ hin ɦeɓ njaf suu ɦawana ana asi li ko suu Juifna na ni nanage?»

Suu Juifna u suu ɦawana suɗ ki ni u vira

15Ami ni suu Juifna hu vuɗ mamira, ka suu cora hu njaf suu hawanaɗi. 16Kay ndaɗta aygi vi ana sana mbuɗ ɗegee ii Lona ni u viimba hu Yesu Kristu dew daŋ ni ka ana nam li ni u gaɗta vi Moiz naɗi, aygi may ni vi u Yesu kay a mbuɗ ɗegee ii Lona, viiygira hu Kristu ka ana a li u gaɗta naɗi, sa ndak ka a mbuɗ ɗegee ii Lona kay lira li u gaɗtaraɗi. 17Lini ay hal a mbuɗ ɗegee u taɓ mayra u Kristura ni aygi ni suu cora ko njaf suu daŋŋa na may. Ni di ana Kristu mbuɗ sa ma cona kay boy ma namma su? Ka naɗi. 18Lini an hoŋ min va ma an ɓeŋem kina koloo ni an li ka u gaɗtaɗi. 19Kay boyna vi gaɗta ni an miɗiya, miɗ namma col ay ni ko gaɗta daŋ may kay an a kak iiri maŋ Lona. An miɗ ay u Kristu hu gu garakŋa. 20An ka iiri kay tan cecemi oloɗi, Kristu ka iiri hurun ni namu, iiri manda an a sa warna cecemi wanda an ka iiri hu vira u Goŋ Lonana nam ma mininna ɦal iiri mamba ki kanna. 21An ka hoŋ noy oora vi Lonara kiɗi, lini ana sana buɗ ki fok Lona ni u gaɗta ni, Kristu miɗ kini ɦawaa.

Currently Selected:

GALATENA 2: BMS

Highlight

Copy