GALATENA 5
5
Hoŋ viɗ tagi ki oloɗi
1Kristu buɗuygi ki ni buɗta gasira kakaygi ɗigili hu buɗ ndaɗta, hoŋogi tagi hu mbaɓura oloɗi.
2Humugiya dagi ha ni an Pol lini agi caw ɗiwigi kiyo ni Kristu ka li va ma jivi kagi oloɗi. 3An di ni maŋ suuna halaŋ olo, gegelay ma caw ɗiwimma lini nanagelay nam hum u gaɗta halaŋ. 4Agi suu hal a mbuɗ tagi ɗegee fok Lona u gaɗta agi ɓorow duk ɦoŋogi ki u Kristu wa, agi mbuɗ ki eg oora vi Lona wa day. 5Lini amiya ni ami wi ana Lona hin mbuɗuygi ɗegee fokommi namu ni va aygi ka juɓumma, u saɓakŋa vi Musuk Lonara ka njun uygi hu vira. 6Lini aygi taɓi u Yesu Kristu ni caw ɗiwra lay caw kaɗi lay ka li vaɗi, va ma ŋgolna ni vira u minda na hol.
7Agi gagijaŋŋa ay jiviya, sa ma hin doorogi kay a hum u gasira ni gege? 8Sa ma ganagi yagina ni ka Lona ma yagi aynaɗi. 9Suuna di ana kuffa ewra bu va ma ŋgolna kiyo. 10Kay ndaɗta Bu Suuna ɦan eŋga hurun kay boy magina nam takan ki gasi, kay saa magira hin ka ɓorow zeɗ u anɗi, sa ma ganagi yagina lini nam gegelay ni Lona hin kaam ɓakŋa kamu.
11Gorsenna lini an ka di boyna kay caw ɗiwra jivi tuwa ni an hin tan asi lasan ni kay mege? Lini gasi ni boy ma an dam ana Kristu ɓali kolo hu gu garakŋa ka jivi oloɗi. 12Suu ganagi yagina garak u va ma asi ka lamma wa, mariyaɗ ni asi caw kini masira.
13Gorsenna yagi ay ki ni ana agi li ki buɗiya hin buɗ magira a mbuɗ ki va ma co u min magira ɦawaɗi, ni na ɗow ana lagi u minda kay sun tagiya tagiya. 14Gaɗta halaŋ taɓi hu gaɗta dewra ana min ndaraŋŋa ko taŋga na. 15Lini agi lagi tagi ko mburi suu bagina na ni, ɗaŋi tagira li cora eg tagira togo, gol tagi jiviya, li ka naɗi ni agi ba tagi ki ni ɦawaa.
Li u minda vi Musuk Lonara ka u minda vi sa warna ɦawaɗi
16Humugiya, ni boy ma an min daginana, Hin Musuk Lonara takagi voɗta ndaɗu, humugi u dlara vi sa warnaɗi. 17Kay mege minda vi sa warna duu ko taɗ u minda vi Musukka, Musukka duu taɗ u minda vi sa warna may. Asi duu duk tasi ni duuriya agi ndak ka a li va ma agi minna oloɗi. 18Lini Musukka taɗagiya ni agi ka njuni gaa u gaɗta oloɗi.
19Aygi wi sunda vi sa warna tak ki ni, boy zoŋga, bay ɗegeera, u dla cora. 20Li ɓivunna lo ma ɦawana, u kumuna, suuna mbuɗ gonokka duk tasiya, asi yal tasiya tasiya, li honira duk tasiya, irsi ki ɓorowi cub cub. 21Asi ŋgiziɗ tlena vi tasiya, guruɗ tasi ki u summa, kurufukka vi tlena, tlesuu co ko asina nana. An min dagi ki cecemi ko an di ay ki jewra na olo, suu li ko asina nana ka fi Mul Lonaraɗi.
22Tlesuu Musuk Lonara lasina ni, minda, furira, heɓpa, lalamba, li dlara jivi eg saa, jivira, ɗegeera, 23ɗilira, u doo tara. Gaɗta ka co kay tlesuu asinaɗi. 24Suu vi Yesu Kristuna ci minda vi mbalatara ki u minda vi sa warna halaŋ. 25Musuk Lonara ɦaygi iirira ni aygi hiniygi taygi koɗ ndaɗ goloygiya. 26Ŋgaaygi taygiɗi, halaygi boyna duk taygi a ɓeŋ taygi ki ɦawaɗi, ŋgiziɗ tlena vi taygiɗi lay.
Currently Selected:
GALATENA 5: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
