EFESNA 4

Mbalatara taɓi ni dew

1An joɓogiya an sa ma daŋgayna kay sunda an sun Bu Suunara, kay sunda an sunumba, poyogi u minda vi Lona ko nam yagi ayra na. 2Lakagi ɗiliya, u lalamba, u juɓpa, njunugi u tagiya tagiya u minda. 3Soogi tagi kay a vi taɓpa Musuk Lonara ɦagirara u heɓ mayra njunugi eg tagira. 4Mbalatara dew, Musukka dew may juɓpa dew may, ta Lona yaygi ay u ndaɗta. 5Bu Suuna dew, vira dew may, batemma dew may. 6Lona dew a Busi halaŋ kak ki kasi ni nam dew li hu lina halaŋ kak ki hu lina halaŋ lay.

7Aygi halaŋ fi ɦala zeɗ zeɗ ni va ma Kristu ɦamma. 8Ko magaara dira na,

«Hu li ma nam ful kolo dayna

nam mbaa suu daŋgayna ay ki umu,

nam ɦal ɦala maŋ suuna.»

9Nam ful kolo ni ana mege? Ni di ana nam kal kaŋga hu zulla duk ndaŋgara day. 10Sa ma kal kaŋgana ni nam ma ful kolo dayna dew tok kay oy tlesuu kolona ki hu liisi halaŋ. 11Sa ma ɦal ɦala maŋ suunana suu ɦiw nam ɦasi a suu vovoɗta, suu hiŋŋa a suu jok vun Lona, suu ɦiw a suu di Boy ma Ayra, suu ɦiw a suu pastergina, u suu haɗ suuna. 12Nam li na ni kay a min ii suu vina ki u Lona kay asi mba li sunda duk suu vi Kristuna. Kay a wul mbalata Kristu kolo hu vira. 13Lini na ni aygi halaŋ taɓ ko taygi hu vira dew, hu wiygira kay Goŋ Lonna ni aygi hin mbuɗ ni suu ŋgolona, wul ma wul kolona hin mba li ŋgaay gasi hu Kristu. 14Ni aygi ka hin li ko kemba na oloɗi, a semeɗna zuɗuy tana tani naɗi, a hum u haɗta vi suu daŋŋa zul kay ndaŋgara a ganyam suunaɗi, a cuk suuna hu dla cora asi laɗtaɗi. 15Ni na ɗow a di ki kay gasira u minda kay a wulugi kolo eg Kristu nammi yamba. 16Mbalatara zeɗ zeɗta taɓi mbuɗ eŋga ni u sun mamba, mbalatara zeɗ zeɗta ŋgafi taɓi dew u va ma njunuɗna. Lini ɓorow maɗta zeɗ zeɗta halaŋ ka li sun maɗta jiviya ni mbalatara halaŋ hin wul hu minda.

Iirira wilira hu Kristu

17Gola ni va ma an col a dam u sem Bu Suuna poyogi ko suu bay vina tuɗ u saa masira cora na oloɗi. 18Yal masina mbuɗi ndufunu iirira Lona haɗta ka hurusiɗi, kay asi halaŋ suu giniŋŋa hurusi ki sooy eŋe. 19Dlara zolona ka kasiɗi asi ɦal tasi a li cora, li dlara njenjera dam dam.

20Boy ma agi haɗam kay Kristuna ni ka naɗi. 21A gasira ni agi humun boy manna agi ni suu vi Kristuna, haɗagi gasi mayra hu Yesura ki wa. 22Hinigi dlaagira basira kiyo, ta tuɗugi hu poy mayra cora jak ki jewra, dlaagira basi ndaɗta ni ganyamba ba sana kira. 23Agi mbuɗugi tagi ki wiliya humugi u Musukka u saa magira halaŋ. 24Cukugi bakka wilira egegiya, ni ta mini tli taɗ u Lonara ndaɗta tak ki kay iiri mayra ɗegeera u gasira.

25Kay ndaɗta hinigi kaboyna kiyo, lini gegelay ni di gasira maŋ ndaramma kay aygi halaŋŋi hu mbalatara dewra. 26Lini hurugi mbuɗ ya wa ni, gol tagi jiviya kal tagi hu coraɗi, ɗik faɗta u yara hurugiɗi. 27Ҥal tagi ki maŋ Satannaɗi. 28Sa ma li kul jewna hin kulna kiyo, nam mba li sunda kay a fi va ma ŋgom iiri mamba u tamba ndak fi va ma njun u suu wihawra lay. 29Hin boy ma dawi a kal ki funugiɗi, dagi boy ma gasi a njun u suu hiŋŋa a wulusi kolo hu viisira, li jivira maŋ asi suu ka humugina may. 30Lagi dlara Musuk Lonara teteɗta yoo uɗɗi, Musukka ni va ma Lona tinigina kagina, ndaɗ ni va ma Lona tinim a ŋga buu ma nam hin a mbuɗ suu mamsina ki pasiyakŋa. 31Hinigi huu ma cona ki egegi day. Dlara ɓeŋ huna u yara, sawalla u ŋgulla. Doo tagi kay a li dla cora halaŋ. 32Lagi jivira u minda eg tagiya tagiya, ɦeɓegi hurugi ki eg tagiya, ko Lona hinigi coogira ki hu Kristura na may.

Currently Selected:

EFESNA 4: BMS

Highlight

Copy