EFESNA 3
3
Sunda vi Pol ta komba ni kay suu ka njaf suu Juifnaɗina
1Ni an Pol sa ma daŋgayna vi Kristu an cen Lona kagi agi suu ka njaf suu Juifnaɗina. 2Agi hum kay sunda Lona u jivi mamba ɦanda kon a laɗ dukugira. 3Lona takan u dlaamba ŋgayra irin a an wam u ŋgol mamba kiyo, an ɓiirigi magaara ha nde ni kay boy namma. 4Kay ndum boy namma wanni humugi hin gagi kay dlara ŋgayra a waɗta, ni kay Yesu Kristu. 5Ay hu jewra ni dlaamba ŋgay ndaɗta suuna waɗ ay kaɗi, cemi Lona takaɗ ki u Musuk mamba maŋ suu vovoɗta u suu jokom vunumma. 6Gola ni dlara ŋgay ndaɗta u Boy ma Ayra, suu ka njaf suu Juifnaɗina ndak a yow jona vi Lona ma nam ŋgaam maŋ suu mammana, asi taɓi hu mbalatara dewra, fi ɓorow masina u vun Lona ma nam vam hu Yesu Kristuna.
7An mbuɗ ni sa sunda vi Boy ma Ayra u ɦala vi Lona hu jivi mamba ɦan saɓak mamma li sunda. 8An ni sa ma kaɗaki duk njafna vi suu vi Lonana halaŋ ko ndaɗta na lay ni Lona ɦan a di Boy ma Ayra vi ɦizza bay daɓpa vi Kristu maŋ suu ka njaf suu Juifnaɗina. 9Kay a suuna halaŋ mba wi u tlesuu ŋgayna vi Lona kiyo, Lona ma li tlena halaŋŋa dlaamba ay dayra nam ŋgayaɗ ay na gak gak. 10Kay mulla u ŋgolla kolora halaŋ mba wi nera vi Lonara bay daɓpa zeɗ zeɗ eg suu vi Kristuna. 11Lona li na ni u min mamba nam tiniɗ ay jewra, ka daɓ kiɗira, nam daɓ dla ndaɗta ki u Yesu Kristu Bu Suuna mayna. 12U taɓ maygira u namba, u viiygira hurumba ni aygi faygi buɗta kay a col fok Lona hu vira gasira. 13Kay ndaɗta an joɓogiya, agi mbuɗugi maŋi kay las manda an las kagiraɗi, kay agi fi ŋgara ni uɗu.
Wi minda vi Kristu
14Ni kay ndaɗta an goɓ kaŋga u vun givin fok Bunu. 15Kay suuna halaŋ kolo huulona kaŋga kay ndaŋgara lay mba wam semma gasina. 16An joɓ Lona u ɦizza vi ŋgol mamba a nam mba ɦagi saɓakŋa u eŋga u Musuk mamba hurugiya. 17A Kristu mba kak hurugi u vira a sariyagi ŋgaa ki kaŋga eŋ coli hu minda. 18Suu vina vi Lona halaŋ ndak a wi minda vi Kristu bubuuɗu u fiyekeɗu, kolo day maɗta u zuluɗu. 19Ni agi ndak a wi min mamba ndaɗ ka vaɗ a sa waɗ uɗ ki gasiɗi lay, ni agi ndak waɗu agi mba oy u ndakka vi Lona.
20Nammi sa ma ndaki a li tlena halaŋ su kay suu ay saa kasina lay, joɓosi layna day. 21Ŋgolla ni maŋ Lona hu suu vi Kristuna halaŋ, u Yesu Kristu hu lina halaŋ a fafatɗa. Amin.
Currently Selected:
EFESNA 3: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
