EFESNA 2
2
Hu miɗna mbuɗ iiriya
1Agi ay jew miɗi fok Lona kay coogira, kay suluk magina. 2Agi ay poyogi jew ni ko suu hu duliyarana lira na, agi humugi ni u saɓakŋa vi mul ma hu semeɗnana, ŋgussa ndaɗta huu suu ka hum u Lonaɗina ni ndaɗu. 3Aygi halaŋ li ay ni ko asi na may, ay poyoygi ni u minda vi sa warna. Aygi ay lini u minda vi mbalataygiya, u ŋgus maygira, aygi ay ni hu njafna ki ŋgaɓi kay yara vi Lona ko suu hiŋŋa na may.
4Jivira vi Lona ta ŋgolla u min mamba nam miniygira. 5Hu li ma aygi ay miɗi fok Lona kay cooygira, nam hoŋ mbuɗuygi iiri hu Kristu, u oora vi Lona agi suɗ ki ni na. 6Hu taɓ maygira u Yesu Kristu Lona mbuɗuygi iiri u namu kay aygi mba kak ti mulla u nam hu mulla huulonara. 7Nam li dla ndaɗta na ni kay a tak saɓakŋa vi oo mamba mbuɗ mbuɗta hin mbayra, ni u jivi mamba nam takaɗ ki hu Yesu Kristura. 8Agi suɗ ay kini u oora vi Lona hu vira, suɗta ndaɗta col ay ka kogiɗi, ni ɦala vi Lona. 9Ni ka u saɓak maginaɗi, kay ndaɗta sa ndak ka a ŋga tambi. 10Lona laygi ni namu nam miniygiya, hu taɓ maygira u Yesu Kristu nam min ana aygi mbuɗ ki jivi saɓakŋa u sunda jivira, sun mamba nam laɗ ki fok jewra, ana aygi mba li na may.
Hu Yesu Kristu dew
11Agi suu vuɗ ka hu njafna vi suu Juifnaɗina, agi suu may suu Juifna yagi ana suu bay caw ɗiwra, yi tasi ana asi ni suu caw ɗiwra may, u dla mayra suuna laɗ eg mbalatasi ɦawara, humugi gagi kay dlara agi laɗ ay jewra. 12Fali ndaɗta ni agi ay ki day eg Kristu, agi li ay ni ka suu vi Lonanaɗi, kini njaf suu daŋŋa, agi li ay ka duk galamba vi Lonara nam vi vunum kaɗ u suu mamsinaraɗi, agi li poyogi hu duliyara ni bay juɓpa bay Lona lay. 13Cecemi hu taɓpa u Yesu Kristu agi suu li ay ki dayna mbay wa tok u miɗna vi Kristu. 14Kristu u tamba mbaaraygi heɓpa ni namu, mbuɗ suu Juifna u suu ka njaf suu Juifnaɗina ki hu njaf ma dewna, nam ɦal tam kiyo, gulumun ma ɓorow duk ɦoŋga u suu gonokkana nam toom ki wa. 15Gaɗta vi suu Juifna u sun masira nam bulumusi ki wa, kay taɓ njaf suu mba' asina ki dew, kay asi mba taɓ u nam hu njaf ma wilina kay a mbaa heɓpa. 16Hu miɗ ma Yesu miɗ hu gu garakŋa ma nam bulum gaŋawna kina. Hu miɗ mamma hu gu garakŋa nam taɓ njaf suu mbana ki dew, taɓasi duk ɦoŋosi u Lona. 17Ni Kristu mba di Boy ma Ayra vi heɓpa ni magi agi suu ka njaf suu Juifnaɗina, agi suu li ay ki day eg Lonana, maŋ Juif suu egem tokŋa lay. 18Ni hu Kristu aygi halaŋ suu Juifna u suu ka Juifnaɗina lay ndak tak taygi fok Lona u njunda vi Musuk Lonara.
19Ni kay ndaɗta agi suu ka njaf suu Juifnaɗina mbuɗ cecemi ka njaf suu daŋŋa oloɗi. Ka suu mbay hu li daŋŋaɗi lay, agi mbuɗ ni suu hu ndaŋgara dewra vi Lona, hu njafna vi Lona lay. 20Agi ni suu mini kolo kay u zira suu vovoɗta u suu jok vun Lona tiniɗta, ɦini mayra garaŋga col zira eŋga ni Yesu u tamba gaw. 21Hurum namu u zira eŋga halaŋ coli ni kamu nam hiniɗ wul kolo mbuɗ a zira teteɗta hu Bu Suuna. 22Hu taɓpa u Yesura agi taɓ u suu hiŋŋa dew, mbuɗ Ziŋ Lonara ta nam kak huruɗ u Musuk mambara.
Currently Selected:
EFESNA 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
