EFESNA 1

Gi deɓpa

1Ni an Pol sa vovoɗta vi Yesu Kristu u minda vi Lona, maŋ suu vina vi Lona, [suu hu Efesna], suu taɓi u Yesu Kristu ɗegeena. 2Ko Lona Buya u Bu Suuna Yesu Kristu ɦagi oora u heɓpa.

Jivira Lona laygira hu Kristura

3Geleɗeygi Lona, Bu Bu Suuna mayna, Yesu Kristu, nam ma paɗ vunum ki kay taɓ maygira u Kristura, nam ɦaygi paɗvunna vi Musukka kay tlesuu kolona halaŋ. 4Kay Lona jew bay li duliyara tu ni nam manaygi ki ana aygi ni suu mamsina hu Kristu kay aygi mba li fokommi suu jivi suu bay cora egesina hu min mamba. 5Lona saa ki fok jew ana nam min a mbuɗuygi ki a goryom hu Kristu, nam li na ni kay dla ndaɗta irim jiviya. 6Geleɗeygi Lona kay ŋgolla vi oo mamba ta nam ɦaygira hu gorom ma nam minimma.

7Hu miɗna vi Kristu aygi buɗ ki hu cora wa, cooygira daɓ ki wa. Ni kay ndaɗta Lona takaygi ŋgolla vi oo mamba. 8Nam ɦaygi oo mamba ŋgolo u nera halaŋ u yalna halaŋ. 9Nam takay dlaamba ŋgayra, nam saa ki fok jew ana nam min li u vunum ma nam vam ki fok jewna hu Kristu. 10Hu daɓpa vi lina wanni Lona hin li dlaamba ŋgay ndaɗta kiyo, ni kay a tok suu ha kolona u suu kaŋgana halaŋ u mulna dew ni Kristu.

11Aygi faygi suɗta ni hu taɓ maygira u Kristura, kay Lona manaygi ay ki ni jewe, u va ma nam ŋgaamma Lona li tlena halaŋŋi u va ma nam saaram u min mambana daŋ may. 12Geleɗeygi ŋgolla vi Lona, aygi suu tin huruygi jew kay Kristuna.

13Agi tagira hu li ma agi humugi boy ma gasina ni Boy ma Ayra ma ɦagi suɗta agi hin vagi u Kristu. Lona ɓii sem ay kagi u ɦala nam ɦagi Musuk mamba nam di kaɗta. 14Musuk Lonara ni va ma mbuɗ balna ŋgayra vi suɗta ta nam di ay ki kaɗ jew maŋ suu mamma ko jona nara, nam daygi ana aygi hin fi jo namma ni hu li ma aygi buɗ kiwana. Geleɗeygi Lona kay ŋgol mamba.

Pol Cen Lona

15Kay ndaɗta cecemi an hum kay viigira hu Bu Suuna Yesu kay min magira agi min suu vi Lona halaŋ. 16An hin gi mayra gi deɓpa maŋ Lona kagira kiɗi, an cen Lona ni humun gan kagi tew tew. 17An joɓ Lona vi Bu Suuna Yesu Kristu, mala ŋgolla, a nam ɦagi Musukka hin a takagi dlara ŋgayra vi Lona a agi hin wi Lona ki jivi suwa. 18An min ana agi fagi kiɗikka hurugiya, kay a agi mba li a suu Lona yagi ay agi ka juɓumma, agi mba wi va ma ŋgol ma hu jona ma nam hinim maŋ suu mammana. 19Agi mba wi saɓak ma mbuɗ mbuɗta ma nam ɦam maygi aygi suu vinana. Saɓak namma Lona takam ki u eŋga ŋgolla 20hu li ma nam paɗ Kristu ay ki kolo hu miɗna iirina, kakam hu bikim ma njufna koloo. 21Hu li namma ni Kristu kak ki a ŋgolla kay ŋgolla halaŋ, saɓakŋa u eŋga halaŋŋi komu, kak ki kay suuna u semma ka yina yina halaŋ, ka kay suu hu duliyarana tani holɗi, ni kay duliyara hin mbay fokka lay. 22Lona cuk tlena halaŋ kaŋga u sem Kristu, nam tinim kay suu vi Kristuna a mul ŋgolna. 23Suu vi Kristuna ni mbalata Kristu, Kristu ka iiri hu tew tew, nam ndak ki kay duliyara halaŋ.

Currently Selected:

EFESNA 1: BMS

Highlight

Copy