Luka 20

Tē ui'ia nei te mana o Iēsū

(Mātaio 21.23-27; Māreko 11.27-33)

1E tae akera ki tēta'i rā, tē 'āpi'i ra a Iēsū i te tangata ē tē ako ra i te tuatua meitaki i roto i te 'iero, kua 'aere maira ki aia te kau ta'unga nunui, te au Pū'āpi'i Ture ē te aronga pakari, 2ē kua tuatua maira ki aia, nā kō maira, “Ka 'akakite mai ki a mātou ē, nō 'ai te mana kia rave koe i tēianei au mea, mē kāre ra, nā 'ai i tuku mai i tēianei mana ki a koe?”

3Kua pa'u atura a Iēsū ki a rātou, nā kō atura, “'E ui'anga katoa rāi tāku ki a kōtou. E 'akakite mai kōtou ki āku, 4i te bāpetīto a Ioane nei nō te rangi mai āina, mē kāre ra, nā te tangata āina?”

5Kua 'uri'uri manako i'ora rātou rātou 'ua'orāi, nā kō akera, “Kia tuatua tātou ē, ‘Nō te rangi mai,’ e riro aia i te tuatua mai ē, ‘'E a'a i'ora kōtou i kore ei i 'āriki atu i aia?’ 6Ē kia tuatua 'oki tātou ē, ‘Nā te tangata,’ ka pē'i'ia tātou ki te toka e te tangata tini, nō te mea, tē manako tikāi ra rātou ē 'e peroveta a Ioane.” 7Kua pa'u maira rātou, “Kāre mātou i kite ē nō 'ea mai.”

8Kua karanga atura a Iēsū ki a rātou, “Kāre katoa au e 'akakite atu ki a kōtou ē, nō 'ai te mana kia rave au i ēia mea nei.”

Te parabole o te aronga tope vine

(Mātaio 21.33-46; Māreko 12.1-12)

9 # Isa 5.1 Kua taki atura a Iēsū ki te tangata i tēianei parabole: “Kua tanu tēta'i tangata i te kāingā vine, e tuku atura ki te aronga tope vine, ē kua 'aere atura ki te 'enua mamao, e roa atura ki reira. 10E tae akera ki te tuātau kokoti'anga ra, kua tono maira aia i tēta'i tāvini ki taua aronga tautāūnga vine ra kia 'ō mai rātou i tēta'i kai o taua kāingā vine ra. Inārā, kua tuaru atura taua aronga tautāūnga vine i aia ma te 'apingakore i muri ake i te pāpā'anga rātou i aia. 11Kua tono 'aka'ou maira 'oki aia i tēta'i tāvini kē. Kua tuaru katoa atura rātou i aia ma te 'apingakore rāi i muri ake i te pāpā'anga ē te tā'akamā'anga atu rātou i aia. 12Kua tono maira aia i te tokotoru. Ē kua tuaru atura rāi rātou i aia ki va'o i muri ake i te rave kino'anga rātou i aia ē motumotu pākiakia atura rātou i aia.

13“Kua tuatua i'ora te pū o taua kāingā vine ra, ‘Ka 'akapē'ea nei rā au? Ka tono au i taku tamaiti 'akaperepere'ia, pēnei ake ko tē 'ō'ō mai rātou i aia.’ 14Kia kite mai rā taua aronga tautāūnga vine ra i aia, kua 'uri'uri manako i'ora rātou rātou 'ua'orāi, nā kō akera, ‘Ko te tangata kāinga tēia. E 'aere mai, ka tāmate tākiri tātou i aia kia riro mai te kāinga ki a tātou 'ua'orāi.’ 15E kika maira rātou i aia ki va'o i taua kāingā vine ra, ē tāmate tākiri rava atura.

“Ka 'akapē'ea maira te pū o taua kāingā vine ra i a rātou? 16Ka riro aia i te 'aere mai e tāmate tākiri rava i taua aronga tautāūnga vine ra, ka 'ōronga atu ei i te kāingā vine nō ēta'i kē.”

Ē tei te 'akarongo'anga rātou ra, kua nā kō akera, “Auraka rava ia!”

17 # Sal 118.22 Kua 'ākara atura a Iēsū i a rātou ē nā kō akera, “'E a'a 'oki te 'āite'anga o tēianei tuatua i tātā'ia ra ē,

‘Te toka i 'akaruke'ia e te aronga patu 'are ra,

ko tei 'akariro'ia 'ei toka ti'avā’?

18Ko tēta'i 'ua atu tei 'inga ki runga a'o i taua toka ra ka 'ati'ati'ia; kāreka tei topa'ia e taua toka ra e 'aka'unga'ungātītī rava'ia ia.”

Te ui'anga nō runga i te tūtaki'anga tero

(Mātaio 22.15-22; Māreko 12.13-17)

19Kua kimi rāvenga atura te au Pū'āpi'i Ture ē te kau ta'unga nunui i te 'opu atu i a Iēsū i taua ora rāi, nō te mea, kua mārama 'oki rātou ē, nō rātou 'oki taua parabole tāna i tuatua ra. Inārā, kua mataku rātou i te tangata. 20Tē 'ākara matariki 'ua maira te kau ta'unga nunui ē te au Pū'āpi'i Ture i a Iēsū, ē kua tono maira i te au tangata 'ei mata tei tāpikipiki mai ē, 'e aronga tuatua mou rātou, kia rauka 'oki i a rātou tēta'i mānga tuatua āna, kia tuku atu rātou i aia ki roto i te rima ē te mana o te tūtara. 21Kua ui atura rātou ki aia, “E te Pū'āpi'i, kua kite mātou ē, 'e tuatua tika tā'au e tuatua mai ē tā'au e 'āpi'i nei, ē kāre koe i piripiri 'ua atu, tē 'āpi'i nei rā koe i te mataara o te Atua ma te tuatua mou. 22'E tika āinei kia tūtaki tātou i te tero ki a Kaisara, ē auraka āinei?”

23Tē kite rā a Iēsū i tō rātou kāraperape, ē kua tuatua maira ki a rātou, 24“Ka 'akaāri mai ana i tēta'i moni 'ārio. Nō 'ai te tūtū ē te tātā'anga i runga a'o?” Kua pa'u maira rātou, “Nō Kaisara.”

25Kua karanga atura a Iēsū ki a rātou, “E 'apai māri i tā Kaisara ki a Kaisara, ē tā te Atua ki te Atua.”

26Ē kāre rava atura e rauka i a rātou i te 'akatā'ī'ī i aia i te tuatua tāna i tuatua ki mua i te aroaro o te tangata ra, vā 'ua i'ora rātou i tāna pa'u'anga, e mūtēkī atura rātou.

Te ui'anga nō runga i te tū'aka'ou'anga mei te mate mai

(Mātaio 22.23-33; Māreko 12.18-27)

27 # Anga 23.8 Kua 'aere maira ki a Iēsū ēta'i o te au Sādukea ra ko tei tuatua ē kāre 'e tū'aka'ou'anga, ē kua ui maira, 28#Deut 25.5nā kō maira, “E te Pū'āpi'i ē, i tātā mai a Mōse ki a mātou nei, ‘Kia mate te tuakana o tēta'i tangata, tē ora rā te va'ine, ē kāre 'e tamariki, e 'akaipoipo te teina i taua va'ine ra, ē e 'aka'uānga i te tamariki nā te tuakana.’ 29Nā, e toko'itu tamāroa i te puna 'okota'i. E 'akaipoipo i'ora te tama mua i te va'ine, ē mate atura, kāre 'e tamariki. 30Kua 'akaipoipo i'ora te tokorua 31ē te tokotoru i taua va'ine ra, pērā katoa rātou toko'itu, ē kua mate anake ra rātou ma te tamarikikore rāi. 32Ē i te 'openga i'ora, mate katoa atura taua va'ine ra. 33Ē tēianei, kia tae ki te tū'aka'ou'anga ra, e riro ei aia 'ei va'ine nā 'ai i taua aronga ra? Nō te mea ē, 'e va'ine 'oki aia nā te toko'itu rava rāi.”

34Kua pa'u atura a Iēsū ki a rātou, nā kō atura, “Tē 'akaipoipo te tamariki o tēianei ao ē tē 'ōronga'ia nei kia 'akaipoipo. 35Kāreka te aronga i manako'ia ē 'e tau rātou ki te ao ā muri atu ē te tū'aka'ou'anga mei te mate mai, kāre i a rātou e 'akaipoipo, kāre e 'ōronga'ia kia 'akaipoipo. 36Kāre 'oki rātou e mate 'aka'ou, nō te mea, e 'āite 'oki rātou ki te au 'āngela ra. Ē 'e tamariki 'oki rātou nā te Atua ra, nō te mea, 'e tamariki rāi rātou nō te tū'aka'ou'anga ra. 37#Exo 3.6Kua 'akaāri 'oki a Mōse nā roto i te tua o te pū ngāngā'ere ē, ka riro te aronga i mate i te tū'aka'ou mai, ko ia i tuatua atu, ‘E 'Atu,’ ki te Atua nō Āberahāma, ē te Atua nō Īsā'aka, ē te Atua nō Iākōba. 38Kāre 'oki aia i te Atua nō tei mate, nō tei ora rā, ē i aia 'oki e ora ai te kātoatoa.”

39Kua tuatua mai ēta'i Pū'āpi'i Ture, “E te Pū'āpi'i ē, 'e tuatua mānea tikāi tā'au.” 40Ē kāre rava atura rātou i tae 'aka'ou i te ui mai ki aia.

Te ui'anga nō runga i te Mesia

(Mātaio 22.41-46; Māreko 12.35-37)

41Kua karanga atura a Iēsū ki ēta'i Pū'āpi'i Ture, “'E a'a te mea i tuatua'ia ai ē, 'ei tamaiti nā Dāvida te Mesia? 42#Sal 110.1Ko Dāvida 'ua'orāi 'oki tei nā kō mai i roto i te puka Salamo ra ē,

‘Kua tuatua te 'Atu ki taku 'Atu,

ka no'o koe ki taku rima katau nei,

43e tae 'ua atu ki te 'ati'anga ka 'akariro ei au

i tō au 'enemi 'ei pange vaevae nō'ou.’

44Tē karanga ra a Dāvida i aia ē, ‘'e 'Atu,’ 'e a'a i'ora 'oki aia i riro ei 'ei tamaiti nāna?”

Tē 'akamatakite nei a Iēsū nō runga i te au Pū'āpi'i Ture

(Mātaio 23.1-36; Māreko 12.38-40)

45I te tangata kātoatoa e 'akarongo ra, kua karanga atura a Iēsū ki tāna au pipi, 46“Kia matakite i te au Pū'āpi'i Ture ko tei 'inangaro i te 'ā'āere ma te kāka'u roroa, ē tei navenave kia aro'a'ia i te au ngā'i 'oko'oko'anga ra, ē tei kimikimi i te au no'o'anga teitei i te au sūnago ē te au ngā'i ngāteitei i te au kaingākai ra. 47Tē pou nei 'oki i a rātou te au ngutu'are o te au va'ine taka'ua ra, ē te 'akaroa nei i te pure 'ei tāpikipiki. 'E utunga ma'ata rava 'oki tā rātou.”

Currently Selected:

Luka 20: CIMRNT

Highlight

Copy