Luka 19

Ko Iēsū ē Zākaio

1Tē tomo ra a Iēsū ki roto i a Iēriko i tōna 'aere'anga atura. 2Ē inā, tei reira tēta'i tangata ko Zākaiō te ingoa, 'e tūtara aia nō te aronga ko'i tero, ē 'e tangata 'apinga nui 'oki aia. 3Tē tautā ra aia kia kite atu i a Iēsū ē, ko 'ai 'oki aia, inārā kāre i rauka nō te ma'ata o te au tangata, nō te mea, 'e tangata poto 'ua aia. 4'Oro atura aia nā mua, kake atura ki runga i tēta'i pū rākau sukamōrea kia kite aia i a Iēsū, ko te ka 'aere mai 'oki nā reira. 5Ē kia tae mai a Iēsū ki taua ngā'i ra, kua 'ākara akera ki runga ra, ē kua karanga atura ki aia, “E Zākaiō, e 'eke viviki mai ki raro, nō te mea, ka no'o au i tēia rā i tō'ou 'are e tikāi.”

6Kua 'eke viviki maira a Zākaiō ki raro, 'ō'ō maira i a Iēsū ma te rekareka. 7Ko te aronga kātoatoa i kite i te reira, kua kō'umu'umu i'ora rātou, nā kō akera, “Tē 'aere atura aia 'ei manu'iri nā tēta'i tangata rave 'ara.”

8Kua tū 'ua a Zākaiō ē kua tuatua maira ki te 'Atu, “Inā, e te 'Atu ē, e 'ōronga atu au i te 'āpa o tōku nei 'apinga nā te aronga puta'ua. Ē mei te mea ē, kua rave pikika'a mai au i tā tēta'i kē, kia taki'ā ia tāku e 'aka'oki atu.”

9Kua pa'u atura a Iēsū ki aia, “Kua tae mai te ora ki tēia ngutu'are nei i tēianei rā, nō te mea, ko tēia tangata nei 'e tamaiti katoa ia nā Āberahāma. 10#Māt 18.10I 'aere mai nei 'oki te Tamaiti a te Tangata nei e kimi ē e 'akaora i tei ngaro ra.”

Te parabole o te moni 'auro

(Mātaio 25.14-30)

11Ē tē 'akarongo maira te au tangata i tā Iēsū tuatua, kua taki 'aka'ou atura aia i tēta'i parabole ki a rātou, nō te mea, tē vaitata atura aia ki Iērūsalēma, ē tē manako 'ua ra rātou ē, e kitea'ia mai te bāsileia o te Atua i reira rāi. 12Nō reira aia i nā kō atu ei, “Kua 'aere atura tēta'i tangata mana ki tēta'i 'enua mamao, kia rauka i aia te tao'onga ariki, ē ka 'oki mai ei. 13Kua kāpiki atura aia i tōna au tāvini e tino nga'uru ē kua tuku atura ki a rātou e 'okota'i nga'uru moni 'auro ma te 'akakite atu ki a rātou ē, ‘E tā'anga'anga i tēia e 'oki 'ua mai au ra.’ 14Kua mākitakita i'ora tōna matakeinanga i aia, ē kua tono atura rātou i tēta'i karere nā muri i'o i aia, nā kō atura ē, ‘Kāre mātou e 'inangaro i tēnā na tangata 'ei ariki nō mātou.’

15“Kua 'akaariki'ia rāi aia ē 'oki maira, ē kua 'akaue atura aia kia tikina'ia mai taua au tāvini ra tāna i tuku i te moni ra, kia kite aia ē, 'e 'ia tei rauka 'aka'ou mai i a rātou i tā rātou kimi'anga. 16Kua 'aere mai te mea mua ma te 'akakite mai ē, ‘E te 'Atu, e 'okota'i nga'uru moni 'auro i rauka 'aka'ou mai i tā'au moni ra.’ 17Kua pa'u atura te ariki, ‘Meitaki, e te tāvini meitaki ē! Nō te mea ē, kua 'ākono meitaki koe i tēta'i mea iti po'epo'e, e 'aka'aere koe i te au 'ōire mama'ata e 'okota'i nga'uru.’ 18Kua 'aere maira te rua ma te 'akakite atu ē, ‘E te 'Atu, ko tā'au moni 'auro ra kua rauka maira e rima 'aka'ou moni.’ 19Kua pa'u atura te ariki ra ki aia, ‘Ka tūtara koe ki runga i te au 'ōire ma'ata e rima.’

20“Kua 'aere maira tēta'i tāvini kē mai ma te 'akakite atu ē, ‘E te 'Atu, inā, tēia tā'au moni ra, i vai'o mārie'ia e au ki roto i te 'ōrei. 21I mataku 'oki au i a koe, nō te mea, 'e tangata roto riri koe: e rave rāi koe i tei kore i tukuna'ia e koe ra, ē e kokoti 'ua mai koe i tei kore i rūrū'ia e koe ra.’ 22Kua pa'u atura te ariki ki aia, ‘E te tāvini kino ē, ka 'akavā au i a koe i te tuatua nō roto i tō'ou 'ua'orāi va'a. Kua kite 'oki koe ē, 'e tangata roto riri au, e rave rāi au i tei kore i tukuna'ia e au ra, ē e kokoti 'ua mai i tei kore i rūrū'ia e au ra. 23'E a'a i'ora koe i kore ei i tuku atu i taku moni ki roto i te pāngika, ē kia rauka mai i reira i āku tēta'i moni tere i tōku 'oki'anga mai?’

24“Ē kua karanga atura aia ki te aronga i tū 'ua mai i reira, ‘Ka rave atu i tāna moni 'auro, ē 'ōronga atu ei ki te tāvini e 'okota'i nga'uru āna moni 'auro ra.’ 25Kua tuatua maira rā rātou ki aia, ‘E te 'Atu, tei aia takere e 'okota'i nga'uru moni 'auro.’

26 # Māt 13.12; Mār 4.25; Luk 8.18 “Kua pa'u atura aia, ‘Tē 'akakite atu nei au ki a kōtou, ko tei pu'apinga'ia ra, 'e ma'ata te ka 'ōronga'ia atu ki aia; ko tei kore āna ra, e rave kē'ia ia tāna. 27#Māt 25.14-30Inārā, ko taua au 'enemi nōku ra, ko tei kore i 'inangaro ana i āku 'ei ariki nō rātou, arataki mai ana i a rātou ki konei ē tā atu ei i a rātou i mua i āku nei.’ ”

Te tomo'anga pāpānunui ki roto i a Iērūsalēma

(Mātaio 21.1-11; Māreko 11.1-11; Ioane 12.12-19)

28I te 'akaoti'anga tēia au tuatua nei, kua 'aere atura a Iēsū nā mua i tāna au pipi i te 'aere'anga atu ki Iērūsalēma. 29E vaitata atura aia ki Betephage ē Bētānia, i te maunga ra i karanga'ia ra ē ko Ōliveta, ē kua tono atura aia i e tokorua pipi āna, 30nā kō atura, “Ka 'aere ana kōrua ki tērā ra 'ōire. Kia tomo atu kōrua ki roto, ka kite kōrua i tēta'i punua 'āsini kua 'erekia, kāre 'oki i no'o'ia e te tangata. Ka tatara mai, e taki mai. 31Ē kia ui mai tēta'i 'ua atu ki a kōrua, ‘'E a'a kōrua i tatara ai?’, e nā kō atu kōrua, ‘E tau tēia i te 'Atu.’ ”

32'Aere atura rāua tei tonokia ra, ē kua kitea'ia mai mei tei 'akakite'ia mai ki a rāua. 33Ē tei te tatara'anga rāua i taua punua ra, kua ui maira te au pū ki a rāua, “'E a'a kōrua i tatara ai i tēnā na punua?”

34Kua pa'u atura rāua, “E tau tēia i te 'Atu.” 35Kua taki maira rāua i taua punua ra ki a Iēsū. Kua tuku atura i tō rāua kāka'u ki runga a'o i te punua, ē 'akano'o atura i a Iēsū ki runga a'o. 36Ē i tōna 'aere'anga kua to'ato'a i'ora te tangata i tō rātou kāka'u i te arāta'a.

37Ē kia vaitata atura aia ki te ngā'i e 'aere mai ei te mataara ki raro mei runga mai i te Maunga ra i Ōliveta, kua 'akamata atura te urupū ma'ata o te au pipi kātoatoa i te 'akameitaki i te Atua ma te rekareka ē ma te reo ma'ata nō te au 'akairo mana kātoatoa tā rātou i kite ana, 38#Sal 118.26nā kō akera, “Kia ora te ariki ko tei 'aere mai i te ingoa o te 'Atu ra! 'Ei 'au tō te rangi ra ē te kakā i te ngā'i teitei ra.”

39Ē kua tuatua maira ēta'i o te au Phārīsea nō roto i taua urupū ma'ata ra ki a Iēsū, “E te Pū'āpi'i, e kauvae atu ana koe i te au pipi nei.”

40Kua pa'u atura a Iēsū ki a rātou, “E 'akakite atu au ki a kōtou, mē ka mūtēkī 'ua rātou nei, kua kāpiki 'ua mai ia te au toka nei i reira.”

Tō Iēsū auē'anga i a Iērūsalēma

41I tō Iēsū kite'anga i te 'ōire kia vaitata mai aia ki Iērūsalēma, kua auē atura aia nōna, 42nā kō atura, “Nāringa 'ua ake koe i mārama i tēianei rā ē, 'e a'a te ka 'inangaro'ia kia 'au! Inārā, kua 'u'una'ia te reira i tēianei i tō mata. 43Ka tae mai te au rā e takapini ei tō au 'enemi i a koe ki te koro, ka tōpiri'ia koe ki roto ē ka kōnoninoni rātou i a koe mei te au tua kātoatoa mai. 44Ē ka 'uri 'oki rātou i a koe ki raro i te one ē tō tamariki i roto i a koe na. Ē kāre 'oki tēta'i toka i roto i a koe na e vai'o'ia i runga a'o i tēta'i, nō te mea, kāre koe e mārama ana i te tuātau o tō'ou 'ātoro'anga mai.”

Te tāmā'anga i te 'iero

(Mātaio 21.12-17; Māreko 11.15-19; Ioane 2.13-22)

45Kua tomo atura a Iēsū ki roto i te 'iero ē kua 'akamata atura i te tuaru atu i te aronga 'oko'oko ki va'o, 46#Isa 56.7; Ier 7.11nā kō atura ki a rātou, “Kua tātā'ia ē, ‘'E 'are pure'anga tōku nei 'are.’ Kua 'akariro rā kōtou i te reira 'ei ana nō te aronga keikeiā.”

47 # Luk 21.37 Kua 'āpi'i atura a Iēsū i roto i te 'iero i te au rā katoa. Ko te kau ta'unga nunui ē te au Pū'āpi'i Ture ma te aronga nunui katoa e kimi rāvenga ra i te tā i aia. 48Kāre rā rātou i kite i te rāvenga, nō te mea, kua piri te tangata kātoatoa ki aia i te 'akarongo i aia.

Currently Selected:

Luka 19: CIMRNT

Highlight

Copy