Luka 21

Te 'ātinga a te va'ine taka'ua

(Māreko 12.41-44)

1Nānā akera a Iēsū, kite atura aia i te aronga 'apinga nui i te tuku'anga mai i tā rātou 'ātinga ki roto i te pi'a 'ātinga o te 'iero ra. 2Kua kite katoa atura aia i tēta'i va'ine taka'ua 'apingakore i te tuku'anga i ngā moni kapa rikiriki e rua ki roto ra. 3Kua karanga atura aia, “'E tika tikāi tāku e 'akakite atu nei ki a kōtou na, 'e ma'ata atu tā tēia va'ine taka'ua 'apingakore nei i tuku ki roto i tā rātou kātoatoa. 4Nō te mea, kua tuku mai tēia aronga tangata kātoatoa ra i tā rātou au 'ātinga mei roto mai i tō rātou au 'apinga ma'ata, kāreka rā aia nei, kua tuku pou roa mai aia i tāna, noa atu tōna ora'anga puta'ua ē te veve.”

Tē tuatua nei a Iēsū nō te 'akatane'a'anga o te 'iero

(Mātaio 24.1-2; Māreko 13.1-2)

5Tē tuatua ra tēta'i pae o tāna au pipi nō runga i te 'akamānea'ia'anga o te 'iero ki te au toka mēmeitaki ē te au tao'ongā rima tei 'akatapu'ia ki te Atua. Kua karanga atura a Iēsū, nā kō atura, 6“Ko tā kōtou e kite nei, tē tae mai nei te au rā ē kāre rava tēta'i toka 'okota'i e vai'o'ia ki runga a'o i tēta'i. Ka 'ope rava rātou tātakita'i i te 'uri'ia ki raro.”

Te au pekapeka ē te au tākinga kino'anga

(Mātaio 24.3-14; Māreko 13.3-13)

7Kua ui maira te au pipi, “E te Pū'āpi'i, ā'ea ēia mea e tupu ei? Ē 'e a'a te 'akairo ē tē vaitata mai nei i te tupu?”

8Kua pa'u atura a Iēsū, nā kō atura, “Kia matakite, kia kore kōtou e 'akavare'ia. 'E mānganui 'oki te ka 'aere mai ma tōku nei ingoa i te nā kō'anga mai ē, ‘Ko au ia,’ ē ‘Tē vaitata mai nei te tuātau.’ Auraka e āru atu i a rātou. 9Ē kia 'akarongo kōtou i te au tamaki ē te au 'ōrure'au'anga, auraka e mataku, nō te mea, ka nā mua rāi tēia au mea i te tupu. Kāre rā te 'openga e tae vave mai i reira.”

10I reira kua 'akakite atura aia ki a rātou, “Ka tū mai tēta'i matakeinanga e tamaki mai ki tēta'i matakeinanga, ē tēta'i bāsileia e tamaki mai ki tēta'i bāsileia. 11'E au ngāruerue'anga mama'ata tō te 'enua ka tupu, pērā katoa te onge ē te au maki mate i tērā ngā'i ē i tērā ngā'i. Ē ka tupu te au mea rikarika ē te au 'akairo mama'ata mei te rangi mai. 12Inārā, i mua ake i ēia mea kātoatoa nei, ka 'opu mai rātou i a kōtou ē ka tākinga kino mai i a kōtou. Ka tuku rātou i a kōtou ki roto i te au sūnago ra, ē ki roto i te au 'are 'āuri, ē ka kāvea kōtou ki mua i te 'ui ariki ē te au tūtara nō tōku nei ingoa. 13Ka riro mai tēia 'ei kite'anga nō te tuatua meitaki. 14#Luk 12.11,12Inārā, e 'akapāpū meitaki kōtou ē, auraka rava e kimikimi manako i mua ake ē, ka 'akapē'ea kōtou i te pāruru'anga i a kōtou 'ua'orāi; 15nāku 'oki e 'ōronga atu ki a kōtou i te au tuatua ē te pakari, kia kore rava e rauka i tēta'i 'ua atu o tō kōtou au 'enemi i te pāto'i mai ē te 'aka'apa mai. 16Ka tukuna'ia kōtou e te au metua, te 'are tuakana ē te 'are teina, te kōpū tangata ē te 'ai taeake, ē ka tāmate rātou i tēta'i pāpāki o kōtou na. 17Ē ka mākitakita'ia kōtou e te kātoatoa nō tōku nei ingoa. 18Kāre rava rā tēta'i i'o rauru i tō kōtou na ūpoko e ngaro. 19E ora rā kōtou kia mou tāmou mārie tikāi kōtou.”

Tē tuatua nei a Iēsū nō te 'akatane'a'anga o Iērūsalēma

(Mātaio 24.15-21; Māreko 13.14-19)

20“Mē kite kōtou i a Iērūsalēma i te koropini'anga'ia e te au nuku va'e'au, ka nakiro kōtou ē, tē vaitata maira tōna tane'a'anga. 21I reira, ko tei no'o i Iūdea ra kia 'oro kē atu ki te au maunga. Ē tō roto i te 'ōire ra kia 'akaātea atu ki va'o, ē tō va'o mai i te 'ōire ra, auraka e tomo mai ki roto. 22#Hos 9.7'E au rā 'aka'oko'anga 'oki tēia nō te 'akatupu'anga i te au mea kātoatoa i tātā'ia ra. 23'E 'ae 'oki tō te au va'ine nui ē te au metua va'ine 'akangote tamariki ra i te reira au rā! Ka tupu te tūmatetenga ma'ata i te 'enua nei ē te riri 'oto'oto ki runga i tēianei 'iti tangata nei, 24ē ka 'inga rātou i te matā koke ē ka 'akariro'ia rātou 'ei mou'āuri ki te au 'ētene rava rāi. Ka takataka'i'ia a Iērūsalēma e te au 'ētene e tae 'ua atu kia 'ope tō te au 'ētene tuātau.”

Te 'aere'anga mai o te Tamaiti a te Tangata

(Mātaio 24.29-31; Māreko 13.24-27)

25 # Isa 13.10; Ezek 32.7; Ioel 2.31; Apo 6.12,13 “'E au 'akairo tō roto i te rā, te marama ē te au 'ētū. Ka tupu te mamae ngākau ē te tūmatetenga ki roto i te au 'iti tangata i te ao nei nō te 'aruru'anga ē te tātāki'anga o te ngaru. 26Kua tarāvai'ia te tangata i te mataku ē te no'o tāpapa'anga atu i te au mea e vaitata maira ki te ao nei, nō te mea, ka rūrū'ia mai te au mea mana o te rangi. 27#Dan 7.13; Apo 1.7I reira rātou e kite ei i te Tamaiti a te Tangata i te 'aere'anga mai nā roto i tēta'i tiao ma te mana ē te kakā ma'ata. 28Ē tēianei, kia 'akamata'ia ēia mea nei i te tupu, e tū ki runga ma te 'akateitei i ō kōtou ūpoko, nō te mea, tē vaitata maira 'oki tō kōtou 'akaora'anga'ia.”

Te 'āpi'i'anga nō runga i te pū suke

(Mātaio 24.34-35; Māreko 13.28-31)

29Kua taki atura a Iēsū i tēia parabole ki tāna au pipi, “Ka 'ākara ana i te pū suke ē te au pū rākau rava rāi. 30Kia 'ākara kōtou i a rātou i te kao'anga i te au rau ra, tē kite atura kōtou ē, tē vaitata mai nei te 'akaa'u, te tuātau ma'ana. 31Mei tēia katoa rāi 'oki kia 'ākara kōtou i ēia mea nei i te tupu'anga, kua kite kōtou ē tē vaitata maira te bāsileia o te Atua.

32“Koia mou tāku e 'akakite ki a kōtou na, kāre rava tēianei uki e pou kātoatoa kia 'ope roa ēia mea nei i te tupu. 33Ka ngaro ake te rangi ē te 'enua, kāre rava tāku nei au tuatua e ngaro.”

Kia vai matakite 'ua rāi

34“Kia matakite ko te 'akateia'a'ia ā'ea tō kōtou ngākau i te ma'ata o te kai ē te kona ē te apiapi o te ora'anga nei, ē ka roko'ia manakokore'ia mai ei kōtou e taua rā ra mei te 'ere'ere ra. 35Ka roko'ia mai 'oki rātou kātoatoa tei no'o i te ao katoa nei i te reira. 36Ē tēnā na, e ara tāmou mārie ma te pure kia rauka i a kōtou i te 'oro mei te au mea rava rāi e vaitata mai nei i te tupu, ē kia rauka i a kōtou i te tū ki mua i te aroaro o te Tamaiti a te Tangata.”

37 # Luk 19.47 I pērā a Iēsū i te 'āpi'i'anga i te au rā tātakita'i i roto i te 'iero. Ē i te au pō tātakita'i rā, kua 'aere atu aia ki va'o, e no'o atura ki runga i te maunga i tuatua'ia ra ē, ko te Maunga o te Ōlive. 38Ē i te pōpongi roa ra, kua 'aere maira te tangata kātoatoa ki aia i roto i te 'iero e 'akarongo i aia.

Currently Selected:

Luka 21: CIMRNT

Highlight

Copy