Markus 9

1Zezu anah sit əmpa na: Intatə nah sukum gesiŋ, ɗii meɓɓet tahəŋ aŋka amtaŋ na ɓa sam say an awlanənək məlĩ na Maŋgəlva dazan də sembe nani.

Zezu akpaŋganək zəni

(Matiye 17.1-13 / Luka 9.28-36)

2Dərɓaga wuvoŋ slire, Zezu agəmək Piyer də Zak gəm Zaŋ, akek aka gərəm zezeke, ndəɗaŋ katirgiti. Gəɓa zən akpaŋgək ama hereti. 3Lukut nan awiɗke babar ndasl, ko ɗəf tay aka dələv na ɓap uwiɗen lukut va nan ɓa. 4Yaŋ gewleɗ nan hoku nek awlanən Eliyas də Moyis, tahəŋ wəpel də Zezu. 5Piyer apsən Zezu na: Mərbə zəga, mogoni məsam gən aŋka. Apam məzaɓ zlereɗe hoku, taka viko, taka vi Moyis, taka əmpa vi Eliyas. 6Piyer dəsən məs adawpel ɓa, vi ndəni dit gewleɗ pak ageslne'eŋgək sawɓa. 7Ernene adeke asəritike, apprəmənək wəla wəpel sit daga sədəv ernene naka: Aŋki Wətuwa an məs nəŋgələ, məpprəm mani. 8Go'ləŋ gewleɗ awlaŋgək amaŋgaveti, dulaŋ ɗəf ɓa say Zezu katər gəni gəm ndəɗaŋ.

9Adan adaprikeŋ səka gərma, Zezu abayək meti: Kədawnahaŋ sənən ɗəf zəga məs kulaŋ ɓa, say an Wətən Ɗəf* asilik sətəki əmta də zeŋgilleni. 10Asbanənək wənnani, Amma assohonənək ma ziti: Mi wəsilya sətəki əmta di? 11Yaŋ assohonən Zezu: Vi mi məsənaŋ zəga na ma henziŋ adawnahaŋ na say Eliyas dəde gən dabəŋ tagay di? 12Azlansitike: Gesiŋ Eliyas wade dabəŋ, dəzaɓet gən zigeɗ pakə, yaŋ vaski na vi mi ɗerewel adawnah na dewle Wətən Ɗəf wasə bonoy diiɗa, ɗii wazelini di? 13Naw əntatə nah sukum: Eliyas adek səkay, ɗii bo aɗɗaŋ sənənək an aŋglaŋ, va an ɗerewel anah akani.

Va Zezu ambəl gən wiyən mitemin

(Matiye 17.14-21 / Luka 9.37-43)

14Adan agapaŋ azet gewleɗ meɓɓeti, awleninik ɗii diiɗa akdahaŋgək kiyit karkar. Yaŋ məsənaŋ zəga na ma henziŋ adawbayaŋ ma dənɗaŋ. 15Adan ɗii awlanən Zezu, ageɗ sitik gərəŋ sawɓa, anzoŋguk azani vi kasɗani. 16Zezu assohotik gewleɗ nani: Mi kədawbayaŋ ma dənɗaŋ di? 17Ɗəf taka suweleŋgit ɗii məkkelit anah sənəka: Mərbə zəga, nəki sukuk wətuwa. Tay də witem akani, aɓap wəpel ɓa. 18Ko aŋga ambat pak witem tayərmani, tayəslbani afuŋ. Tayəɗɗa maslsla mani tayəmpran slayni, zən pak suroksurok. Nəkemetik gewleɗ noko dərɓahən gən witem nani, amma dəɓapənən ɓa. 19Zezu anahsitike: Munokum məs kətafaŋ ɓa. Pay gbəgbari nənzi də munokum kpak di? Aŋga nan namagaŋ wəɓəs sukum di? Məkkisuwa. 20Akisənənək wiyən naka. Adan witem awla Zezu, aɓlanəka aslbak fuŋ, akəɗəŋləŋka aɗɗak maslsla mani. 21Zezu assohonək affəni: Daga dewɗe adaɗɗan vaŋkəŋ di? Yaŋ affən amna: Daga səka muzliya nani. 22Witem təl ɓəɓɓay adaslban aka offo aret iŋkile pakə vi kaw bayən. Amma an wakəɓap na, kamə awəl saha akamə abaah səmə. 23Zezu azlan sənəka: Vimi kənah na, an wakəɓəsa di? Amma zəga pak tay tuwãh aza ɗəf məs dətaf ɓa. 24Go'ləŋgə affən wiyən aɗiyək geŋgere: Nətafəka, abaah suwa, amma tattuwãh taya zaw də wətafən.

25Adan Zezu awle ɗii diiɗa adazoŋ azeti, yaŋ anahsən witem na: Is witem mətak ɗəf dapprəma gəm daw pele, əntatə nah suko: Agil səka winəŋka, kədawgul ɗaah akan əmpa ɓa. 26Witem aɗiyək geŋgere, asərwəɗəka, agilik səkani. Yaŋ asan va məmtəni: Ɗii məs dulanən pak anahaŋgək na: Amtəka. 27Amma Zezu asil gənək wina aziwke. 28Adan Zezu atoŋ eŋgili, gewleɗ nan azoŋguk azani assohonənək katər gəni: Vi mi nam məɓap wərɓəhən ɓa di? 29Zezu azlansitike zemvin arɓəh ɗar ɗar ɓa say də wəzuliya.

Zezu arbanək wəmta nan ma sula'ən də wəsilya sətəki əmta

(Matiye 17.22-23 / Luka 9.43-45)

30Adoŋguk sədaka atoŋgoŋguk kəla ka dələv na Galile. Zezu dəŋgəl ko ɗəf taka də səŋ gən aki asan ɓa. 31Vi arban sitik gewleɗ nani apsit na: Wətən Ɗəf* wambat avet ɗiiyi, wabayini, amma dərɓaga wuvoŋ hoku wasil sətəki əmta. 32Gewleɗ nan dəpprəmən wənnan kotak ɓa, amma ageslne'eŋgək dassohoni.

Naway nawsan daya di?

(Matiye 18.1-5 / Luka 9.46-48)

33Yaŋ agapaŋ a Kafarnahum, adan aguloŋ eŋgili, Zezu assohetik gewleɗ nani: Aka wən mi kədawbayaŋ ma aka tive di? 34Amma aɓətaŋka, vi aka tive a abayaŋgək ma na naway daya aweleŋgit di? 35Zezu asənka, ayek gewleɗ klaw kiyit sula neki, apsit na: An ɗəf aŋgələk wəsan daya say dəmndagan zən dərɓeget ɗii pakə, dəɗɗa sit gən wəza pakə. 36Yaŋ Zezu agəm wiyən muzliya, aziwginik aweleŋti. Aslanək vani apsit gewleɗ nan na: 37Ɗəf an dəŋglu wiyən muzliya va aŋyaŋka də iya nawa, annaw aŋgələ. Ɗəffan dəŋgəluwa, annaw aŋgəl katərgu ɓa, amma ɗəf an dəslənu aŋgələ.

Ɗəffan məs dəzeləm ɓa ɗəf nami

(Luka 9.49-50)

38Yaŋ Zaŋ anahsən Zezu na: Mərbə zəga, mulak ɗəf tayərɓəh tuyeŋɗe də wəya noko. Amma mətakəka, vi tay də mənam ɓa. 39Amma Zezu azlansitike: Kədawtakənən ɓa. Ɗəf an dəgəɗ sokene də iya nawa, aɓap na wəɗɗa mbrayen azaw ɓa. 40Vi ko naway məs awzeləm ɓa ɗəf nami. 41Ɗəf an dəpsukum iŋkile suɗike vi iya nawa vi ɗii na Krestu kənanaŋ, fəkat ɗəf nan warəh riba nani.

Wəmzlagən ɗəffa

(Matiye 18.6-9 / Luka 17.1-2)

42Ɗəf məs dəmzla gən wiyən səmbet məs dətafaŋ ɗəɗaah wəlawsən gərəm metiŋgin awlani, kasgan a pe'e. 43Vi vaski an vok amzla gukuk adəv mbrayen, atawa. Ɗəɗaah wərəh zeŋgillok dəvok mərslan ki wugul aka offo məza amta ɓa dəvok sula gəni. 44[Adak na tentewilgeɗ net amtaŋ ɓa offo nan bo amta ɓa'a.] 45Walla an tuluk agulkuk adəv mambraya, atawa. Ɗəɗaah wərəh zeŋgillok də tuluk vədal ki wəmbat aka offo məza amta ɓa də tuluk sula gəni. 46[Adak na tentewilgeɗ net amtaŋ ɓa offo nan bo amta ɓa'a.] 47Vaski bo an horok akukuk wəɗɗa mambraya, akdaha, ɗəɗaah wərəh zeŋgillok də horok taka ki wəmbat aka offo məza agrak ɓa də horok sula gəni. 48Adak na tentewil geɗ net amtaŋ ɓa offo nan amta ɓa'a. 49Fəkat ko naway pak kawslanni də offo.

50Bəttu zəga mogoni: Amma an lelem na bəttu agraka, mbarmbar lelem nan adawsan ampa di? Məsoŋ də bəttu azokum, məsoŋ də zam awalaŋ zukum.

Currently Selected:

Markus 9: GDRNT85

Highlight

Copy