Markus 8

Zezu azəm gitik ɗii uzinere poɗo

(Matiye 15.32-39)

1Pay nani ɗii diiɗa akkalaŋka, vas bo zəga nawzəm taya vet ɓa, Zezu ayek gewleɗ nani, apsit na: 2Nulak səsahit ɗiiyiŋki, vi tahəŋ də in pay hoku, tahəŋ də zəga nawzəm ɓa. 3An nənah sitik na mədoŋgu, nəpsit wəzəm ɓa, wadakaŋ aka tive, vi ɗii meɓɓet sə faraɗa azoŋgu. 4Gewleɗ nan azlan sənənka: Aŋga ɗəf adawrəh zəga nawzəm nawbet ɗii awraŋ di? 5Zezu assohotike: Dupeŋɗe mbarwaŋ avokum di? Azlan sənənək na: Buhulləŋ.

6Yaŋ Zezu anah sit ɗii na, məsoŋ afuŋ. Yaŋ agəm dupeŋɗe neki agəɗ sənək soko sən Maŋgəlva, arɗetike apsitik gewleɗ nani vi duɗeket sitin gən ɗiiyi, gewleɗ awɗeketinik sit ɗiiyi. 7Kilif memeɗeŋɗe tahəŋ avet suɗike. Zezu agəɗək soko sən Maŋgəlva aket kilfi anah sit gewleɗ na muɗek sit ɗiiyi. 8Ndəɗaŋ pak aziminke, abaŋka. Gewleɗ akalanənək dambirgiti, aknahək keŋkelɗe buhul. 9Ɗii məs dəzəmaŋ tahəŋ va uzinere poɗo. Yaŋ Zezu anah sit kana mədoŋgu. 10Go'ləŋgə Zezu aguluk adəv bəlay dit gewleɗ nani, alək aka dələv na Dalmanuta.

Farisiyenɗe* assohoŋgək sokene

(Matiye 16.1-4)

11Farisiyenɗe azoŋko atəŋgaŋgək wəbay ma də Zezu. Azaɗaŋgək mazaɗ abani, yaŋ assohonən dəgəɗ siti gən sokene, vi dəsənən gənna sembe nan səza Maŋgəlva ade. 12Zezu anɗəsək diiɗa amna: Vi mi ɗiiyeŋ kakaŋkiŋ adassohoŋ sokene di? Gesiŋ nədawnah sukum, arəhaŋ na sokene ɓa sam. 13Azarək sə zeti, amilik adəv bəlay agarək ki məlpa dədaka.

Wuɗo net Farisiyenɗe*

(Matiye 16.5-12)

14Gewleɗ na Zezu asgətaŋgək daw gəm zəga nawzəm aveti say dupeŋ taka adəv bəlay neti. 15Zezu asəɓ sitike, amna: Məzi zukum aza wuɗo net Farisiyenɗe də məlĩ Herodə. 16Gewleɗ aseske'eŋgək awalaŋ ziti, adawpel vasna vi dupeŋɗe tahəŋ avam ɓayi. 17Zezu asənək məs adawpeleŋ awalaŋ ziti, assohotike: Vi mi kədaw seske'eŋ awalaŋ zukum di? Vi munokum tat dit dupeŋɗe ɓa yi sa? Kəsənən ɓa'a sa? Ha kakaŋka makrokum ɓəl sa? 18Munokum tat də horokum ya kawlaŋ ɓa sa? Munokum tat də sləmokum ya kapprəmaŋ ɓa sa? 19Kaɗumonən də wənnet dupeŋɗe sle nuɗak sit ɗii uzinere sle, keŋkelɗe mbarwa kəknahaŋ də an diyo di? Klaw kiyit sula anahaŋgə. 20Ya dupeŋɗe buhul nuɗakan sit ɗii uzinere poɗo nak na, keŋkelɗe mbarwa aknahaŋ də an diyo di? Azlan sənənək na: Buhulli. 21Yaŋ anah sit na: Ya kapprəmənən ɓa'a sa?

Va Zezu akol hara daŋgar a Baytisayda

22Yaŋ agapaŋ a Baytisayda, adaki ɗii akiyaŋ daŋgar sən Zezu. Akamanənək Zezu dərəŋ gən gəni. 23Zezu armak vani akak ama poho. Atufuk mefɗe arani, arəŋ gənək haran də vani. Yaŋ assohoni: Əstat ula zəga sa? 24Daŋgar aslanək harani amna: Əntat ula ɗiiyi, amma va wəleŋɗe nədawleti, tahəŋ wədawaŋ.

25Zezu aɗiyək van akan əmpa. Haran akolko, awəlka, awlek zigeɗ pak lewlewi. 26Zezu alhanəka, dok eŋgili Zezu anahsən na: Kədodok awalaŋ gəla ɓa.

Piyer agəɗ saydawa na Zezuwi Messiya*

(Matiye 16.13-20 / Luka 9.18-21)

27Zezu dit gewleɗ nan ambataŋgək kəla aweleŋgit gəleɗe, na Kaysariya Filipi. Aka tive na, assohotik gewleɗ nani: Mi ɗii madaw peleŋ aka wənnaw di? 28Azlan sənənka: Ɗii meɓɓet aɓɗaŋ na əstə Zaŋ məgəɗ baptem, ɗii meɓɓet bo aɓɗaŋ na, əstə Eliyas. Ɗii meɓɓet əmpa aɓɗaŋ na əstə səmbet məs kleŋɗe en farə. 29Yaŋ Zezu assohoti: Ya nokum, ka nawa kəda ɗiwən di? Piyer azlan sənəka: Əstə Messiya. 30Yaŋ Zezu abay meti kədawnah sənən ɗəf ɓa.

Zezu arbanək əmta nan də wəsilya nani

(Matiye 16.21-28 / Luka 9.22-27)

31Yaŋ Zezu atəŋ wərban zəga sit gewleɗ nani: Dewle Wətən Ɗəf* wazəm saha diiɗa, avet ɗii gugiriɗ dit dayaɗe net məs dəlveŋge na Maŋgəlva, dit məsənaŋ zəga na ma henziŋ, wasganən agisbe. Wabayəni, amma dərɓaga wəvoŋ hoku wasil sətəki əmta də zeŋgilleni. 32Anah sitik kotakə. Piyer ayak Zezu katər gəni, asəɓ sənəka. 33Amma Zezu akpaŋganək harani awlek gewleɗ nani, ahayanək Piyer apsəna: Azar səzawa Satan kənani, wəɗum nok tay vana Maŋgəlva ɓa wəɗum nok venet ɗiiyi.

34Zezu ayek ɗii dit gewleɗ nani apsit na: An ɗəf aŋgələk wəsbawa, say dəpan wəɗum aka zəni, dəgəm gən wəlaŋga mizliwrihe dəsbaw gəni. 35Ko naway dəŋgəl wəkoh gən zeŋgilleni, wazani. Amma ko naway dəzan zeŋgillen viwa gəm vi Wən Neneke wakohu. 36An ɗəf azəmək dələv pakə, amma azanək zeŋgilleni madawtərsən di? 37Mi ɗəf nan adaɗɗa nawman zeŋgillen di? 38Vi vaski, ko naway məs wil adanən viwa gəm dawpel wənnaw aweleŋgit ɗii en dəpaŋka, məs dəŋgluwən Maŋgəlva ɓa dit ɗi mambrayɗe, asna Wətən Ɗəf arəmsən na wil pay adazan də gakdak na Affən dit maslayɗe en salala* ɓa.

Currently Selected:

Markus 8: GDRNT85

Highlight

Copy