Markus 7

Wən narba net ɗiiyen laŋka

(Matiye 15.1-9)

1Farisiyenɗe* dit məsənaŋ zəga na ma henziŋ meɓɓeti, azoŋguk sə Zerusalem aza Zezu. 2Awleninik gewleɗi na Zezu meɓɓet tahəŋ wəzəmaŋ way məzawɗa vet ɓa, va an arbanən sitin ɗii ɓa. 3Farisiyenɗe pak dit Yahudiyenɗe tahəŋ wəsbanən wərba annet dəhiŋgiɗti, an wazəmaŋ way na say vet heɗesa lewlewi. 4An azoŋguk sə lumo, azəmaŋ na way tagay ɓa say an aslayaŋgək tagay. Matuya tay temtem diiɗa məs atafaŋ nasbani: Wəɗet hilŋgiɗ dit gəɓet mesteɓeɗi, dit taseɗ na təbəs peppreŋge, gəm ɓərzlimeɗi.

5Vini Farisiyenɗe dit məsənaŋ zəga na ma henziŋ, assohonən Zezu: Vi mi gewleɗ nok asbanən zəga narba annet dəhiŋgiɗəm ɓa, adawzəmaŋ məzawɗa vet ɓaŋ di? 6Zezu azlansitike: Ezay aɗɗa sukumək kleŋ na gesiŋgi. Munokum mə ɗarɗarɗe, va məverin na:

Maŋgəlva amna: Ɗiiyiŋki tahəŋ wəgakdakawən də met ɗarə,

amma makret na faraɗay səzawa.

7Wəzuliyəŋ məs adawzuliyaŋ suwənnəŋ na ɗari,

yaŋ adarbanən ma henziŋ məs ɗii adaɗɗaŋ,

va ma henziŋ na Maŋgəlva.

8Zezu apsit na: Yaŋ kəpanən ma henziŋ na Maŋgəlva, vi kasban ma henziŋ net ɗiiyi.

9Yaŋ Zezu anah sit əmpa na: Mi di, kəsənnənək wəɓon sən ma henziŋ na Maŋgəlva, vi kasban wəɗum nokum. 10Moyis amna: Agakdakan affuko dət moko, ko naway dəran affəni dət mani, say wəbayin. 11Amma munokum tatərbanən na: An ɗəf anah sənək affəni walla mani: An məs nərah səra zəga naw nabah suko, korban (va wənah na nəpsənək sən Maŋgəlva). 12Kəŋgereŋ na wəpəl sən tive sən ɗəf dəbaah sən gən affən walla sət man ɓa. 13Də wən nokum vaski kan kədawray gənən əpel na Maŋgəlva dəwəɗum nokum məs kədarbaŋ awalaŋ zukum. Gəm zəga tay diiɗa kədaɗɗaŋ va ndəni.

Zəga məs nawray gən ɗəffa

(Matiye 15.10-20)

14Zezu ayek ɗii əmpa apsit na: Məpprəm su munokum pak ɗa, məpak sləmokum amban lewlewi. 15Ko mi dəgul adəv ɗəffa sə gisbe aɓapna kawray gən ɗəf ɓa, say zəga məzu gilyan sə makra ɗəffa, ndəni dədawray gəni. 16[An ɗəf tay də sləman napprəma, say dəpprəm lewlewi.]

17Yaŋ Zezu awɗak dit ɗiiyi aguluk eŋgili, gewleɗ nan assohonənka, mbarmbari kəŋgəl wənah də wən məkpaŋga nan di? 18Zezu anahsitike: Nokum bo kəsənən ɓa'a sa? Kəpprəmən ɓa sa? Zəga məs dadawgul adəv ɗəffa daga sə gisbe pakə, aɓapna kawray gən ɗəf ɓa, 19vi agul na amakra ɗəf ɓa, amma adəvən adawtoŋgo, asna agil na agisbe də tive nan ɓa sa? Zezu anah vas na, vi zəga nawzəm pak dəsan gən mogoni. 20Yaŋ anah əmpa na: Zəga məzu gilyan sə makra ɗəffa ndəni dədawray gən ɗəffa. 21Vi daga sə dəvən sə makra ɗəffa wəɗum mbrayen adawgilyani, adawka ɗəf yokyoku, wəhala, wəbay gəbaya. 22Wəɗɗa mana'a, də wəsim zəga, mambraya, tepelkeɗi, wəŋgla mbrayen, kotoroku, wəra ɗəffa, wəɓay gən ki zuko, də dərwa. 23Zigeɗis pak sədəv ɗəf adawgilyoŋgu, ndəɗaŋ dədawray gənən ɗəffa.

Guluk zemvit ɗii meɓɓet tətafək Zezu

(Matiye 15.21-28)

24Adan Zezu asil sədaka, ambatək aka dələv amaŋgava gəla metiŋ na Tirus. Aguluk eŋgil ana ɗəfda, dəŋgəl ɗii dəsənnən gən ɓa. Amma dəɓap wəɗam ɓa. 25Ɗak məs wətət mitemta, təpprəmək halabara na Zezu: Tədek də kakara azani, təkdukuk abani. 26Guluk vat na Grekəktə daga sə Finikiya dələv na Siriya. Təkamanək Zezu vi dərɓahan gən witem səkat wətəta. 27Amma yaŋ Zezu azlan sət na: Apet kirin dəbaŋ tagay, tay lew wəgəm way net kirin kapsit kirɗe ɓa. 28Guluk nak təpsən na: Vaski mərbə zəga, kirɗe wefekeŋ məs dədaw bəta səmba vet kirni. 29Zezu apsit na: Vi wənna wəzlan məs kəzlani, doko witem wapat wətuko. 30Yaŋ timil eŋgil annat da, tərətək wətət tat ɗuffo aka zəga nafna, witem appatəka.

Va Zezu ambəl gən ɗəf məs apel kotak ɓa

31Yaŋ Zezu agil sə Tirus, atoŋguk klaka dələv na Sidon amilik kla ma pe'e na Galile atoŋguk klawalaŋ gəleɗe klaw. 32Ɗii akisənənək goryom məza apel kotak ɓa. Akkamanənək də ɗi gən van akani.

33Zezu agil gənək suweleŋgit ɗiiyi, aziwginik katər gəni, aguluk pərəm van aslmani, atufuk mefɗe arəŋ gənək hərzləməni. 34Yaŋ aɗi haran a disiŋ, anɗəska anahsənək ɗəf naka. (Effata va wənah na akolu.) 35Kakaŋkani sləman akolko, hərzləmən məs dərəm nak apəlka, apelik kotakə. 36Zezu asəɓ sitik pak adawnahaŋ sənən ko naway di ɓa. Amma də asəɓ sit pak zlaŋ na, annəhənək wənnan diiɗa. 37Ɗii agətaŋgək diiɗa aɓɗaŋ na: An məs adaɗɗa pak mogoni. Yaŋ aɗɗa goryomɗe wəpprəmaŋ ɗii məs hərzlimit mərman apeleŋke.

Currently Selected:

Markus 7: GDRNT85

Highlight

Copy