Markus 10

Wərba na Zezu aka wən nawɗak dət gulku

(Matiye 19.1-12 / Luka 16.18)

1Zezu asilik sətəki nani, ambatək aka dələv na Zude, adan agar ki məlpa na Zordan. Ɗii akkalaŋgək azan əmpa, arban sitik va adaɗɗa ɗayɗayə.

2Farisiyenɗe* meɓɓet azoŋguk aza Zezu, azaɗaŋgək mazaɗ abani: Assohonənka: Mbari di? Ma henziŋ apanək tive sən ɗəf narɓəh guluk viyan dəgəɗ pak sa? 3Zezu azlan sitik də wəssoho: Mi Moyis van aver sukum adəv ɗerewel na ma henziŋ van di? 4Aɓɗaŋ na: Moyis appanək tive sən ɗəf mizilin, dəver sətə gən ɗerewel nappata, dərɓətə gən guluk nani. 5Zezu apsit na: Moyis aver sukum na vi ki ɓəɓal nokumi. 6Amma daga wətəŋ nan na, Maŋgəlva aɗɗak zigeɗ pakə, adak ɗəf mizilin dət gulku. 7Vi vaski ɗəf mizilin wappan affəni dət mani, wasap dət guluk nani. 8Ndəɗaŋ sula git pak wakpaŋgaŋ gəɓa zit taka, vaski asoŋ na sula əmpa ɓa amma wakpaŋgaŋ gəɓa zi taka. 9Vi vaski zəga məs Maŋgəlva asapani, ɗəf adawɗakan ɓa.

10Adan atoŋgoŋ eŋgili, gewleɗ nan assohonənək wənnani. 11Zezu anah sitike: Ko naway dəppat guluk nani, akay maɓɓata, mana'a agəɗ dənta. 12Vaski bo guluk akən təppan zilta təgəmək ɗəf maɓɓani mana'a təgəɗə.

Zezu aɗɗak zəzay aket kirin memeɗeŋɗe

(Matiye 19.13-15 / Luka 18.15-17)

13Ɗii meɓɓet akiyənik kirin memeɗeŋɗe aza Zezu vi dərəŋgiti gini. Gewleɗ nan ahayetinke. 14Adan Zezu awle, gədəvən adəka, apsit gewleɗ nan na: Məppet kirin memeɗeŋɗe dəzoŋ azawa. Kədawtekin ɓa, vi məlĩ na Maŋgəlva tay viyit kirin zemvit eŋki. 15Gesiŋ nədawnah sukum: Ko naway an dətaf məlĩ na Maŋgəlva va wiyən muzliya ɓa, atoŋ na adak ɓa. 16Yaŋ aslet kirin neki aɗiyək van aketi, aɗɗasitik zəzaya.

Ɗəf məs arya

(Matiye 19.16-30 / Luka 18.18-30)

17Adan Zezu adawmbata aka tive na, ɗəf adek dənze, akdukuk abani assohonəka: Mərbə zəga mogoni, mi nədaɗɗa nəra gən zeŋgillew an nassa ha faɗ di? 18Zezu azlan sənəka, vi mi kənah na mogow nani di? Say ɗəf takayi mogoni, ndəni Maŋgəlva. 19Kisinik ma henziŋɗe ɓa sa: Kədawbay gəbay ɓa, kələɗɗa mana'a ɓa, kədawhal ɓa, kədawa wən aka ɗəf ɓa, kədaɗɗa vurum ɓa, agakdakan affuko dət moko. 20Yaŋ amna: Mərbə zəga as pak nəsbanək daga səka suɗike nawa. 21Zezu awlak də wəŋgla, apsən na: Asna ambər sukuk zəga taka: Avəl zəga nok pakə apsit məs saheŋɗe, vasna wakərəh məzaɓan a disiŋ. Asna kəde gən wəsbaw kana. 22Adan apprəm wənnəska, makran asanəka vi məs aryayi diiɗa sawɓa.

23Zezu awlek gewleɗ nani, apsit na: Tuwãhyi məs arya dətoŋ gən məlĩ na Maŋgəlva. 24Gewleɗ agətaŋgək aka wənnan sawɓa, amma Zezu apsit əmpa na: Kirtuwa tuwãhyi wətoŋ məlĩ na Maŋgəlva sawɓa. 25Ɗəɗaah zlogomo watoŋ dəmba batal ki məs arya wətoŋ məlĩ na Maŋgəlva. 26Gewleɗ nan agətaŋgək sawɓa, yaŋ assohonən ma ziti: An vaski na, naway nawɓap wəkohi di? 27Zezu awleke, apsit na: Zəga an tuwãh azet ɗiiyi, tay tuwãh aza Maŋgəlva ɓa. Vi zəga pak tay tuwãh aza Maŋgəlva ɓa.

28Yaŋ Piyer anahsən na: Yaŋ nam pak məpanək zəga nam pak mənam tatəsboko. 29Zezu azlan sənək na: Gesiŋ nədawnah sukum: Ko naway dəpan gəla nani, ko milmiŋgiɗni, ko mani, ko affəni, ko kirtini, ko guli nani vi iya nawa gəm vi Wən Neneke. 30Fəkat warah riba təɓələn səkatə adəv pay an nanziya an kakaŋka, gəleɗe, milmiŋgiɗin, maay mani, kirni, gulyo, dəwərma mama pakə. Pay wənziya an dədazani warəh zeŋgillen məza agrak na ɓa. 31Amma ɗii diiɗa an nabe wasoŋ dərɓe, ɗii diiɗa en na dirɓe kakaŋka, wakpaŋgaŋ ɗii nabe.

Zezu arbanək wəmta nan ma hoko'ən də wəsilya nan sətəki əmta

(Matiye 20.17-19 / Luka 18.31-34)

32Yaŋ agəm tive an dədawteŋ a Zerusalem. Zezu tayabe gewleɗ nan ageslne'eŋgək diiɗa, ɗii yen disbetin dirɓeget bo geslne armeke. Yaŋ Zezu andek gewleɗ nan klaw kiyit sula, ndəɗaŋ katirgiti anah sitik an dədawrəhən. 33Apsit na: Məpprəma, mənam tatəpeŋ a Zerusalem, adak na Wapsənən Wətən Ɗəf* avet ɗii gugiriɗ net məs dəlveŋge, dit məsənaŋ zəga na ma henziŋ na Maŋgəlva. Watawaŋ kita namta kani. Wapsitin avet ɗiiyən məs dəsənən Maŋgəlva ɓa. 34Net bo wanəhaŋ wən azani, watufoŋ sənən mifɗe, warganəni, wabayəni. Amma dərɓaga wuvoŋ hoku wasil sətəki əmta.

Wəssoh net may Zak də Zaŋ

(Matiye 20.20-28)

35Dərɓagani Zak də Zaŋ kirtin Zebede azaraŋgək aza Zezu, anah sənənək na: Mərbə zəga, zəga tay məŋgəl wəssoho kəɗɗa səm gəni. 36Zezu assohotike: Mi kəŋglaŋ nəgəɗ sukum gən di? 37Azlan sənənək na: Pay kədawsok adəv məlĩ nok məs də gakdak na, məŋgəl na kəɗiyəm gən taka aka va dəzən noko, taka aka va zlaɓay noko. 38Amma Zezu apsit na: Kəsənaŋ zəga nassoh ɓa. Wakəɓapən hĩlu nawzəm saha an nədawzəməŋ sa, walla wakəɓapən baptem an na sahaŋ nədawtafəŋ sa? 39Yaŋ azlanən na: Waməɓapa. Zezu apsit na: Vaski wakəzəmaŋ adəv hĩlu na saha nawa, wakətafən baptem na saha nawa. 40Amma wənna wəsuwa aka vaw dəzəŋ də aka vaw zlaɓay wən nawi ɓa. Təki nan tay viyit ɗii məs Maŋgəlva aweli.

41Adan gewleɗ meɓɓet klaw apprəmən vaska, gidivit adek aka Zak də Zaŋ. 42Vi vaski Zezu ayek pak azani, apsit na: Kəsənənka, milyeŋge na dələv tahəŋ wəzəmən məlĩ aket ɗiiyi, ɗii gugiriɗ bo tahəŋ wərbanən gakdak neti. 43Amma awalaŋkum ageɗ na vasɓa. Ɗəffan dəŋgəl wəsan daya na, say dəsan gən məgəɗ wəza abet ɗiiyi. 44Ɗəffan dəŋgəl kawsan daykikum na, say dəsan gən ballam nokum pakə. 45Ko Wətən Ɗəffa* dəde vi ɗii dəɗɗaŋ sənən gən wəza ɓa, amma dəgəɗ gən wəza sit ɗiiyi, azanək zeŋgillen vi kaw met ɗii diiɗa.

Va Zezu ambəl gən daŋgar Bartime

(Matiye 20.29-34 / Luka 18.35-43)

46Agapaŋka a Zeriko. Adan Zezu adawgilyan sədak dit gewleɗ nani gəm ɗii diiɗa, ɗəf tay daŋgar aba tive ɗewwe wəŋgla zəga avet ɗii məzu toŋgoŋ. Iya nan na Bartime wətən Timus. 47Adan apprəm na Zezu məs Nazaret dədawtoŋgo, atəŋgək wəɗi geŋgere: Aw Zezu Wətən Davit* awəl saha kawa! 48Ɗii diiɗa ahayanənka, apsənən na asok ɓatə, amma yaŋ adaw ɗi geŋgere dayki laŋka: Aw Wətən Davit awəl saha kawa. 49Zezu aziwke amna: Məya suwa. Ayanənək daŋgar naka, apsənən na: Asok zuko tay yuko, asili. 50Yas asgan lukut metiŋ nani, asili ade aza Zezu. 51Zezu assohonəka: Mi kəŋgəl nəgəɗ suku gən di? Daŋgar azlan sənək na: Mərbə zəga nəŋgəl haraw dəkol gəni. 52Zezu apsən na: Doko wətaf nok ambəl gukuko, kakaŋka ni haran akolko, asbanək Zezu aka tive.

Currently Selected:

Markus 10: GDRNT85

Highlight

Copy