Matiye 22
22
Wən məkpaŋga də wəɓele
(Luka 14.15-24)
1Zezu apel sitik wən məkpaŋga maɓɓan əmpa, apsit na: 2Awla an va məlĩ na Maŋgəlva aslə dəndən: Məlĩ tay ɓel sən guluk sən wətəni. 3Yaŋ aslin gewleɗ nan wədawye ɗii aka zəga nawzəm nawɓel naka, amma də ngəmaŋ wəzoŋ ɓa. 4Yaŋ aslin gewleɗ meɓɓeti də wəɗi sit wənnan na: Mənah sit ɗii məyet na: Mətawi wəllet bəlateɗe dit məgetgeɗe məkərti zəga naw zəm pak mədani. Zəga pak məzaɓani. 5Amma ɗii məyet dəslgaŋ sləma ɓa ambataŋgək wəɗɗanən anneti, ɗəf maɓɓani a guli nan mbatə ɗəf maɓɓan tamə wəman vani, 6ɗii dembirgit armeninik gewleɗ na məlĩ neki azəm gitinik saha, abayninke. 7Gədəv məlĩ adəka, aslinik sozeɗ nani kawbey ɗii neti məzlani walaŋ gəla neti. 8Yaŋ apsit gewleɗ nan na: Mədani zəga nawzəm naw ɓel səkay, amma ɗiiyen məyet dərəhaŋ wəzoŋ ɓa. 9An vaski na ɗəɗaah məbal aket tiveɗ pakə, məya ko naway kərəhaŋ pakə, dəzoŋ wəzəma. 10Məɗɗaŋ wəza ambataŋka aket tiveɗi, ayeninik ko naway arəhaŋ ɗii məɗɗaŋ mambray dit məɗɗaŋ mogon pakə. Gəla aknahək dit ɗiiyi.
11Məlĩ atoŋko kawle ɗii məyeti. Awələk ɗəf aweleŋgit ɗiiyi, məs dəgul lukut naw ɓel ɓa. 12Amna: Baynawa mbari kətoŋ aŋ məza lukut naw ɓel ɓaŋ di? Dərah nawzlan sən ɓa. 13Yaŋ məlĩ apsit gewleɗ nan na: Məɓɓruk tələn də van pak məsgan ara guzliyo, də həm gən də əmpəran slayən adaka. 14Yaŋ Zezu aməs nah na: Ɗii məyet diiɗa amma məs məwelit tahəŋ diiɗa ɓa.
Wən nafaɗ garama
(Markus 12.13-17 / Luka 20.20-26)
15Farisiyenɗe* akalaŋka vi kaɗɗa kuket narma Zezu də wəpel nani. 16Aslininik gewleɗ neti dit gewleɗ na Herodə aza Zezu, apsənən na: Məsən zəga, məsənka ɗəffan təstəs kənani, istat ərban tive na Maŋgəlva də goŋga kaw geslne sən wəpel net ɗii ɓa, vi nok kaslga sləma əwelet ɗii ɓa. 17Mbar kədaɗum di anah səm ɗa: Ma henziŋ atakək əpsən zomorgol sən məlĩ na Roma sa walla də tak ɓa? 18Zezu asənək wəɗum netiŋ mbraynəŋka, apsit na: Awlet kana, məluvuluvu nokuməŋka, vi mi kədaslənaŋ pêveŋ abaw di? 19Mərban su suley an kəda faɗaŋ zomorgol dəndən vani. Arban sənənək suley na təbəsə. 20Yaŋ Zezu assoheti: Aŋ foto na naway də iya na zanəŋ məvernəŋ di? 21Aɓɗaŋ na: Foto na məlĩ na Romayi. Zezu apsit na: Məmndagan sən an dəslə aza məlĩ na Roma, məpsən Maŋgəlva bo an dəslə səni.
22Adan apprəmən wəzlan nan vaska, agətaŋka, yaŋ apanəni ambataŋgə.
Wəssoh aka wənna wəsilye net ɗii mintiti
(Markus 12.18-27 / Luka 20.27-40)
23Pay nan Sadusiyenɗe azoŋko za Zezu. (Net tahəŋ wənahaŋ na wəsilya tay səka əmta ɓa.) Assohonənək Zezu: 24Məsən zəga, Moyis anahək na: An ɗəf amtək məza əppa kirin ɓa, say məlmən dəzəm gən gəla zat guluk nani dəɗi sən gən zev ɗəf nani. 25Yaŋ ɗii meɓɓet tahəŋ awalaŋgəm də məlma zit buhul. An dabəŋ akayək gulku amtəka duwaŋ kirin ɓa, mbagət guluk katərgəta. 26Ma sula'ən azəmək gəla zata, nan bo amtəka duwaŋ kirin ɓa, vaski də mo hoko'it pakə, ha ndəɗaŋ buhul pak azəmaŋgək gəla zata dəpaŋ kirin ɓa. 27Yaŋ dərɓeget pak guluk bo təmtəka. 28Ya kaŋ an vaski na pay wəsilya səka əmta na ga nawa təl sat səmbet kandi? Vi ndəɗaŋ buhul pak aɗitənka.
29Amma yaŋ Zezu azlan sit na: Munokum tatə Zaŋ sawɓa, vi kəsənən an məverin adəv ɗerewel ɓa də sembe na Maŋgəlva pak kəsənən ɓa. 30Pay wasilyo net ɗii mimtiti, akayaŋ na guluk ɓa, wakpaŋgaŋ va maslayɗe na Maŋgəlva a disiŋ. 31Kəŋɗanən an məs Maŋgəlva apel aka wən nasilyo səka əmta ɓa sa? Amna: 32Əntə Maŋgəlva na Abraham gəm Maŋgəlva na Isak, Maŋgəlva na Zakubu. Maŋgəlva net ɗii mimtiti ɓa, amma Maŋgəlva net ɗii medereti.
33Ɗii dəpprəmənən pak agətaŋgək aka wəpel nan sawɓa.
Ma henziŋ an dəday pakə
(Markus 12.28-34 / Luka 10.25-28)
34Adan Farisiyenɗe* apprəmənən na Zezu adayək kiyit Sadusiyenɗe də wəpel nani, akkalaŋka. 35Ɗəf suweleŋgit taka, məsən zəga na ma henziŋ na Maŋgəlva aŋgəl karma Zezu də wəpel na mani, assohonəka: 36Məsən zəga ma henziŋ awani dəday kiyit pak di? 37Zezu azlan sənək na: Aŋglu Maŋgəlva Ɗəfdaya nok də makrok pakə, də zeŋgillok pakə, də wəmpəs nok pakə. 38Ndəni ma henziŋ an dəday kiyit pak də gakdak pakə. 39Ma sula'ən bo tay va ndəni. Aŋglu meggok va kəŋglu zuko. 40Ma henziŋ na Moyis də wəpel net məs kleŋɗe pak asapək adivit ma henziŋɗe suleski.
Messiya* gəm Davit
(Markus 12.35-37 / Luka 20.41-44)
41Zezu assohotik Farisiyenɗe* məs də kalaŋ adaka: 42Mbar kədaɗumoŋ aka Messiya di? Wətən naway di? Apsənən na: Wətən Davitti*. 43Zezu apsit na: Ya an vaski na mbari Davit aya na Ɗəfdaya di? Əmpəs na Maŋgəlva arban sənəka vi vaski anah na:
44Ɗəfdaya anahsən Ɗəfdaya naw na:
Asok aka va dəzəŋ nawa,
nəvoŋgiti gən məzuzelkun amba tulko.
45Ya an Davit ayak na Ɗəfdaya səŋgay Krestu adak kpaŋ wətən di?
46Ɗəf tay dəzlan sən wən ko taka ɓa, daga siskiŋ ko naway makran wəzla dassoh wənna.
Currently Selected:
Matiye 22: GDRNT85
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.
