Matiye 21

Zezu atoŋguk a Zerusalem

(Markus 11.1-11 / Luka 19.28-40 / Zaŋ 12.12-19)

1Adan azaraŋ go'o də Zerusalem, agapaŋgək awalaŋ gəla na Baytifage, amaŋgava gərəm na hereme, Zezu aslənək gewleɗ nan sula. 2Apsit na: Mədoŋ awalaŋ gəla an na bokum ndaka, kakaŋka ni wakərəhən koro dət wətən bəlatəkə tahəŋ mineti. Məpəle, məkisuwe. 3An ɗəf tay nah sukum ko mi pakə, mənahsən na: Wəray Ɗəfdaya taya zeti, wapan sukum.

4Agəɗ vas na vi wəpel na məs kleŋ dəsaŋ gən gesiŋ, amna:

5Mənahsən walaŋ gəla metiŋ na, Siyona.

Awla məlĩ nok tayizan anokda awkaɓ ɓa,

tay kaa'a aka koro, akat bəlatək nata.

6Gewleɗ nan ambataŋka aɗɗanənək va Zezu anahsiti. 7Akisənənək koro gəm bəlatək nata. Apakənək lukutɗe net aket korɗe Zezu apaŋka. 8Ɗii diiɗa apakənək lukutɗe aka tive, 9ɗiiyen dərɓaga Zezu dit ɗiiyen na bani tahəŋ wəpeleŋ də wənzla vamvəlla: Gakdak na wətən Davitti, Maŋgəlva dəɗɗa zəzay nan aka ɗəf məzəzan də iya na Ɗəfdaya, gakdak aza Ɗəfdaya na disiŋ.

10Adan Zezu adawtoŋ a Zerusalem, walaŋ gəla metiŋ pak aggrəŋgaŋka. Yaŋ adawnahaŋ na: Aŋ naway yaŋ di? 11Ɗii azlan sitin na: Zezu məs kleŋ na Nazaret naka dələv na Galileyi.

Zezu adəv gəla metiŋ naw zuliya*

(Markus 11.15-19 / Luka 19.45-48 / Zaŋ 2.13-22)

12Yaŋ Zezu atoŋ adəv gəla metiŋ naw zuliya. Arɓihik məvəlaŋ zəga dit məlbahaŋ zəga nadəv gəla nan pakə, aslkərək akoti net mədəɗaŋ deleɗi may mazaŋgeɗ net məvəlaŋ mukuɗuŋgileɗ na maha. 13Apsit na: Va məverin adəv ɗerewel na, Maŋgəlva amna: Gəla naw ndəni gəla na zuliya, amma nokum kəkpaŋganənək va bətəŋ net məvoŋgoŋ tive.

14Deŋgerɗe dit vədalɗe pak azoŋko za Zezu adəv gəla metiŋ naw zuliya, ambəl gitike. 15Ɗii gugiriɗ net məs dəlveŋge dit məsənaŋ zəga na ma henziŋ na Maŋgəlva gidivit adək sawɓa, vi awlanən wəza an nagət akanəŋ agəɗəŋka. Kirin bo tahəŋ wənzlaŋ vamvəl adəv gəla metiŋ naw zuliya, tahəŋ wənahaŋ na: Gakdak aza wətən Davit*. 16Apsənən Zezu na: Kapprəmək an Kirniŋ adaw nahaŋgəŋ sa? Zezu azlan sitik na: Haha, əntatə prəmni. Kəŋɗanən an məverin ɗaah ɓa sa: Də met kirni dit en muwaɗaŋ bideŋ wənna gakdokok algilyani. 17Yaŋ apeti, agil suwalaŋ gəla metiŋ, ambatka a Baytaniya adak avoŋgu.

Zezu aray gənək sukoyo

(Markus 11.12-14,20-24)

18Vit pumpum nan də mompumo yaŋ Zezu ada milyan awalaŋ gəla metiŋ may adaka. 19Awlak sukoyo aba tive, amzlaka mbrani, amma dərah uwa nan ɓa, say gaslamba nan kaaka'ə. Yaŋ Zezu anah sən sukoyo na: Kuwəna ɗaah ɓa. Go'ləŋgə sukoyo akəlka. 20Yaŋ gewleɗ nan awlanən vaska, agətaŋgək sawɓa. Assohonənək Zezu: Dewɗe sukoyoŋ aŋkəl go'ləŋ di? 21Zezu azlansitike: Gesiŋ nəda nah sukum: An munokum tat də wətafa, məza kuzuŋ ɓa, wakəɓapaŋ wəɗɗaŋ say an va nəgəɗ sən sukoyo kakayi ɓa, amma an dayki aska. An va kənahaŋgək sən gərməŋ na azar saŋka, doko pe'e, wagəɗə. 22An munokum tat də wətafa wakərəhaŋ an məs kəssohoŋ pakə.

Zezu səŋga rəh sembe nan di?

(Markus 11.27-33 / Luka 20.1-8)

23Yaŋ Zezu atoŋ adəv gəla metiŋ naw zuliya*, atəŋgək wəpel wən na Maŋgəlva daka. Ɗii gugiriɗ net məs dəlveŋge dit Yahudiyenɗe azoŋko zani, assohonənka: Də sembe nami kəɗɗe zigeɗiŋ di? Naway dəpsuk sembe nan di? 24Zezu azlan sitik na: Naw van wanəssohokum tamə. An kəzlan suwənka, naw bo wanənah sukum təki nərəh sembe naɗɗe zigeɗiski. 25Naway dəslən Zaŋ məgəɗ baptem di? Maŋgəlva sa, walla ɗiiyi? Atəŋgaŋgək wəbay ma awalaŋ ziti də wənah na: An mənahək na: Maŋgəlva dəsləna, wassohomna: Ya vi mi kətafnən ɓa di? 26Amma an mənahək na ɗiiyəŋ dəslənnəni, say mə geslne səm sit ɗiiyi, vi ɗii pak asənənək Zaŋ məs kleŋgi. 27Vi vaski azlan sənənək na: Məsən ɓa. Zezu apsit na: An vaski na naw van tam nənah sukum na sembe məs nədeɗɗe zigeɗis dəndən ɓa.

Wən məkpaŋga dit kirin sula

28Zezu amna: Mi kədaɗɗumoŋ akawənaŋ di? Ɗəf tay dit kirin sula. Yaŋ ambat aza wiyən an dabəŋ, apsən na: Doku gəɗ su wəza a guli net wəleŋɗe dəpaŋka wətuwa. 29Yaŋ azlan sən na ndaw na ɓa. Amma dərɓagani aɗumko, ambatka gulyo. 30Yaŋ affən ambat aza ma sula'ən, anahsənək an məs anahsən wiyən an dabəŋ naka. Nan azlan na: Əndawa əbba. Amma dəmbat ɓa. 31Awaleŋgit kirin sules na naway dəgəɗ əŋgla na affən di? Aɓɗaŋ na: An dabəŋ dəɗɗa. Yaŋ Zezu apsit na: Gesiŋ nədawnah sukum: Mətafaŋ zomorgol dit gil məpolkoyeɗ watoŋgoŋ məlĩ na Maŋgəlva dabəŋ kikum. 32Zaŋ adeke arban sukumək tive an mogoni kətafnən ɓa. Amma mətafaŋ zomorgol dit gil məpolkoyeɗ atafnənka. Ko dərɓaga kulanən vaska kətubiyaŋ vi kətafənən gən ɓa.

Wən məkpaŋga net məzən seŋ mbreyiti

(Markus 12.1-12 / Luka 20.9-19)

33Ya məpprəm wən məkpaŋgaŋka: Ɗəf maɓɓan tayi, agəɗək guli net wəleŋɗe abasək man də mambara, akuhuk katafay naw ɗot uwa net wəleŋɗe, arkak gəla naw ga guli nani. Appanək guli van avet məɗɗaŋ wəza, ambatək malaka. 34Yaŋ pay naɓu uwa net wəleŋɗe agapə, aslinik gewleɗ nan azet məɗɗaŋ wəza vi dəpsənəŋ gən haran nani. 35Məɗɗaŋ wəza armeninik masləŋɗe nani, avərənək an taka, an taka bo abayənka mahoko'it bo, askanənək dit kuneŋge. 36Affən guli aslinik ɗii diiɗa daykiyit en laŋ neki, aɗɗaŋ sitinik va aɗɗaŋ sitin ɗiiyen dabəŋ neki. 37Aslənək wətəni amna: Wagakdakanən wətuwəŋka. 38Adan məɗɗaŋ wəza a gulyo awlanən wətəni, anahaŋgək awalaŋ ziti: Ndəni məzəm gəla aza guliŋka. Aɓɗaŋna məbay səmə guli nan dəsaŋ gən kanamə. 39Armanənka agil gənənək ama poho na gulyo, abaynənka.

40Zezu assohotike: Kaŋ yas na, an affən guli net wəleŋɗe adek na, ma dawgiɗ sit ɗii'is di? 41Azlan sənənək na: Wabeye məza ula saha aket ɓa, wappan guli nan avet ɗii meɓɓeti, en məs napsənən uwa net wəleŋɗe va aŋgələ. 42Zezu apsit əmpana: Kəŋɗanən ɗaah an məs məverin ɓa sa?

Kunəŋ məs mərkaŋ gəla asgaŋgəŋka,

awla ndəni dəkpaŋ kuwən na sləma.

Vaski an məs Ɗəfdaya agəɗə,

as sokeneyi amaramə.

43Zezu aməs kənah na: Vi vaski əntatə nah sukum: Maŋgəlva wagəm haran nokum sədəv məlĩ nani, wapsit ɗii meɓɓeti məs dədawaŋ uwa mogoni adəv məlĩ nani. 44[Ko naway dəsbər aka kunəŋka wanzlan zəni. Ya an kunəŋ abətək aka ɗəffa, watakaɗɗan va burɗuku.]

45Ɗii gugiriɗ net məs dəlveŋge dit Farisiyenɗe* apprəmən wən məkpaŋga an Zezu anahəŋka, asənənək pak aket apeli. 46Yaŋ akayaŋ kuket narmani, amma geslne armek sit ɗiiyi, vi ɗii tahəŋ ulanən va məs kleŋ.

Currently Selected:

Matiye 21: GDRNT85

Highlight

Copy