Matiye 23

Məsla zukum səzet məsənaŋ zəga na ma henziŋ dit Farisiyenɗe*

(Markus 12.38-39 / Luka 11.43,46; 20.45-46)

1Yaŋ Zezu apel sit gboŋ net ɗii dit gewleɗ nani, amna: 2Mərbaŋ zəga na ma henziŋ dit Farisiyenɗe məpsiti tive napprəman ma henziŋ na Moyis sit ɗiiyi. 3Məgakdeketi məsban an adawpeleŋ, amma kədasbanən wəza net ɓa samə, vi aɗɗanən an məs adarban sitin ɗii ɓa. 4Vi net tahəŋ winanən zəga gakdaka tahəŋ wəslan sitin aket ɗiiyi, amma neti awrəŋ gənən ɓa ko də mətəl ɗəffa abaahaŋ sitin ɗii ɓa. 5Tahəŋ wəɗɗanən wəza net pak vi ɗii dulenən gəni. Tahəŋ wəhewin ləlayeɗ gugiriɗ də gəla verse məverin adəvən wəɗɗenin amirbisti gəm aza veti, tahəŋ wəɗɗanən moksoy na lukut net zezeke. 6Aki wəzəm dawzləra bo aŋglaŋ dəsoŋ gən atəki na sləma dit maZaŋgeɗ məɓeyti, adəvit gileɗe naw pel wənnet Yahudiyenɗe, vi ɗii dulenən gəni. 7Aŋglaŋ ɗii disɗetin gən a lumiɗi də wəsɗa an də gakdaka, də wəyet na mərbaŋ zəga. 8Amma nokum, kəda ngəmaŋ wəyəkum na mərbaŋ zəga ɓa, vi munokum pak məlma zukum kənanaŋ, munokum tat də mərbə zəga taka. 9Kəda yaŋ ko ɗəf taka a duniya əbba ɓa. Vi munokum tat də Affukum taka a disiŋ. 10Kədawkayaŋ iya aka zukum na ɗii gugiriɗ ɓa, vi munokum tat də ɗəf metiŋ taka, ndəni Messiya*. 11Ɗəffan metiŋ nawalaŋkum, say dəsan məgəɗ wəza abokum. 12Ko naway dəɓay gən ki zəni, kamndagani dərɓe. Ko naway dəmndan zən dərɓə, kawɓay gəni.

Zezu ahayetik məsənaŋ zəga na ma henziŋ dit Farisiyenɗe*

(Markus 12.40 / Luka 11.39-42,44,52; 20.47)

13Wakpaŋ azokum bonoy, munokum məsənaŋ zəga na ma henziŋ dit Farisiyenɗe, muluvuluvuɗe kənanaŋ, munokum tatəmpan madamba na məlĩ na Maŋgəlva viyit ɗii meɓɓeti. Munokum sən kikum bo kətoŋgoŋ na ɓa, ya kəppetinna ɗiiyen dəŋglaŋ wətoŋ dətoŋgoŋ gən ɓa.

14[Wakpaŋ azokum bonoy, munokum məsənaŋ zəga na ma henziŋ dit Farisiyenɗe*, muluvuluvuɗe kənanaŋ, munokum tatə tafənən zəga net gil net gəbayɗe pakə, munokum tatə ənziyaŋ dawzuliya vi ɗii dulukumən gəni. Vi ni wakərəhaŋ kita an tattuwãha.]

15Wakpaŋ azokum bonoy, munokum məsənaŋ zəga na ma henziŋ dit Farisiyenɗe muluvuluvuɗe kənanaŋ. Munokum tatə mbat malaka aka dələv pak də aket iŋkile vi kawrəh ɗəffan nasbokum. An kərəhaŋgək bo, munokum tatə kpaŋganən wətən offo day kikum təl sula.

16Wakpaŋ azokum bonoy, munokum deŋgerɗe məkdəhaŋ deŋgerɗe. Munokum tatə nahaŋ na: Ko naway də suway də gəla metiŋ naw zuliya* nan ɗari, amma an asuwayək də meleŋge nadəv gəla metiŋ naw zuliya, asna wəsuway nan warma. 17Dərweŋge, deŋgerɗe, mi də sləman day di? Meleŋge sa, walla gəla metiŋ naw zuliyəŋ məzə kpaŋgan meleŋgeŋ salalaŋ sa? 18Munokum tatə nahaŋ əmpa na: Ko naway dəsuway də təki nawtaw wəla zəga sən Maŋgəlva, wəsuway nan ɗari, amma an asuwayək də zəga an məpsən nawtaw wəlan a təki nani, asna wəsuway nan warma. 19Deŋgerɗe, mi də sləman day di? Zəga napsən sa, walla təki naw taw wəla zəga an məs dəda kpaŋgan zəga napsən salalaŋ sa? 20Ɗəffan dəsuway də təki nawtaw wəla zəga, nan asuwayək də təki nawtaw wəla zəga də zəga an mətaw wəlan nakan pak asuwayə. 21Ɗəffan dəsuway də gəla metiŋ naw zuliya, də gəla metiŋ naw zuliya asuwayə, asuwayək də Maŋgəlva ana dəvən pakə. 22Ɗəf dəsuway də disiŋ, asuwayək də təki nasso na məlĩ na Maŋgəlva, gəm də Maŋgəlva an məs dədawsan akan pakə.

23Wakpaŋ azokum bonoy, munokum məsənaŋ zəga na ma henziŋ na Maŋgəlva dit Farisiyenɗe*, muluvuluvuɗe kənanaŋ. Munokum tat əpsənən klaw na zəga nokum sən Maŋgəlva səzet teɓ na Minti teɓ na anisa, teɓ na algaru, amma munokum tatəsgətaŋ ki wən an metiŋgin nadəv ma henziŋ wəɗɗa an dəslə, də ula saha, dəwəsso adəv təstəssə. Eskiŋ zigeɗ nasba pay pakə. Amma kədaw gəsetin meɓɓet ɓa. 24Deŋgerɗe, məkdəhaŋ deŋgerɗe, munokum tatə gəmən birte səra zəga naw saa nokum, amma munokum tatə saa nən də zlogomo pakə.

25Wakpaŋ azokum bonoy, munokum məsənaŋ zəga na ma henziŋ dit Farisiyenɗe, muluvuluvuɗe kənanaŋ. Munokum tatə ɗetin gəɓet hilŋgiɗ naw saa zəga nokum dəgəɓet tasewiɗ nokum, amma gədivit aknahək də wəhala gəm hara nokum. 26Munokum Farisiyenɗe deŋgerɗe kənanaŋ, məɗet gidivit zigeɗ naw saa zəga nokum dabəŋ tagay, asna gəɓet bo wasan mogoni.

27Wakpaŋ azokum bonoy, munokum məsənaŋ zəga na ma henziŋ dit Farisiyenɗe, muluvuluvuɗe kənanaŋ. Munokum tat va magamasɗe məɗɗe sit ɗama ulaŋ mogeti, amma adivit aknəhaŋgək dit tentulegeɗi də zəga mənnakan pakə. 28Vaski bo, apaka ɗii mogokum kənanaŋ, amma amakrokum aknahək də muluvuluvu, də mambray pakə.

Kita net muluvuluvuɗe

(Luka 11.47-51)

29Wakpaŋ azokum bonoy, munokum məsənaŋ zəga na ma henziŋ dit Farisiyenɗe* muluvuluvuɗe kənanaŋ. Munokum tatərkanən magamasɗe net məs kleŋɗe, munokum tatə bayaŋ sitin gawla sit magamasɗe net ɗiiyen təstəssə. 30Yaŋ kədawnahaŋ na: Va mənam tat pay net diŋgiɗəm na, məsler na dənɗaŋ kawbay məs kleŋɗe ɓa. 31Munokum sən kikum bo kəsənənək na diŋgiɗit ɗii dəbeyin məs kleŋɗe kənanaŋ. 32An vaski na məsban wəza an net diŋgiɗkum atəŋgaŋgəŋka, kəkgraka nən gəni. 33Dohoŋɗe kənanaŋ, zemvit barwayɗe. Mbarmbar kədawtakən zukum daw mbat aka kita na offo məza agrak ɓaŋ di? 34Vi wənnani məpprəma: Wanəslin məs kleŋɗe dit məsənaŋ zəga, gəm məsənaŋ zəga na ma henziŋ azokum. Wakəbeyin ɗii meɓɓeti, wakilewin ɗii meɓɓet aka wəlaŋga məzliwrihe, wakəvirin ɗii meɓɓet adivit gəleɗe nawpel wənna Maŋgəlva nokum, akəsbetin awalaŋ gəla ha awalaŋ gəla maɓɓani. 35Mbel net ɗiiyen təstəssəŋ dəziyaŋ aka dəlvəŋ pakə, daga mbel na Abel məs təstəssə, ha gap mbel na Zekari wətən Baraki an məs kəbayaŋ akawalaŋ gəla də təki nawtaw wəla zəgaŋka, wazoŋ akokum pakə. 36Gesiŋ nədawnah sukum: As pak wade aket ɗiiyen dəpaŋka.

Zezu ahəmgənək Zerusalem

(Luka 13.34-35)

37Midi, Zerusalem, Zerusalem, kəbeyək məs kleŋɗe, kəskek mesliŋɗe na Maŋgəlva dit kuneŋge. Nəgayək wəkkelet ɗii nok təl diiɗa, va gəmnda ada kelet kirtin amba perslekeni, amma kəŋgereŋ ɓa. 38Apprəma gəla nokum wakpaŋ va ki məskiya. 39Əntatə nah sukum: Abeŋ na kuluwən na ɓa, ha gap pay kəl nahaŋ suwən na: Zəzay aza ɗəf dədazan də iya na Ɗəfdaya.

Currently Selected:

Matiye 23: GDRNT85

Highlight

Copy