Matiye 24

Zezu arbanək va adaɓzluwən gəla metiŋ naw zuliya*

(Markus 13.1-2 / Luka 21.5-6)

1Yaŋ Zezu agil sədəv gəla metiŋ naw zuliya, ambatka. Gewleɗ nan azoŋko zani vi karban sən wənna gəla metiŋ na zuli va mərkani. 2Yaŋ Zezu apsit na: Munokum tatə ulenin zigeɗis pak sa? Gesiŋ nədawnah sukum: Va kədaw lanənəska, apəl na kuwən məzleɓin aka kuwən maɓɓan ɓa, məzu zeleŋ waɓzlunən pakə.

An dədazan dabəŋ ki wəgrak dəlva

(Markus 13.3-13 / Luka 21.7-19)

3Adan Zezu asan aka gərəm na hereme, gewleɗ nan azoŋko zani, ndəɗaŋ ketirgiti, assohonənka: Anah səm ɗa dewɗe zigeɗis adaɗɗaŋ di? Mi dədarban na pay naziya nok agapka də əgrak dələv di?

4Zezu azlansitike: Məzi zukum, vi adaw zokuməni. 5Vi ɗii diiɗa wazoŋ də iya nawa, wanahaŋ na: Əntə Messiya*. Wazetin ɗii diiɗa. 6Akəpprəmənən halabereɗe nawgay go'o ko faraɗa, amma kədaw geslne'eŋ ɓa. Aslək dəgəɗ gən vaska, amma wəgrak dəlvi tagay ɓa. 7Ɗii meɓɓet wagayaŋ dit ɗii meɓɓeti. Məlĩ maɓɓan wakayaŋ mama məlĩ maɓɓani. Maya, də wəɓla na dələv wagəɗ a təki temtemi. 8Bonoyis pak wade va tattuwãh na uwa adazan azat ɗak dədaway.

9Ɗii wakukumən avet ɗii meɓɓeti vi dəzəm gukumən gən saha, wabay kuməni. Ɗii pak wazel kuməni vi kədasbawəni. 10Pay nani ɗii diiɗa wapanən wətaf neti, wazanən ziti, wazelenən ziti. 11Məs kleŋɗe məwaŋ wən warbanən zit diiɗa, wazetin ɗii diiɗa. 12Mambray waməs wəzzan diiɗa sawɓa, əŋgla net ɗii diiɗa wafeti. 13Amma məs dəsok zən ha gap wəgrak nani, wakohu. 14Halabara nenek na məlĩ na Maŋgəlva wapel a duniya pakə, vi dəgəɗ gən saydawa azet ɗiiyi, asna wəgrak nan wade kana.

Daryaw də mbrayen

(Markus 13.14-23 / Luka 21.20-24)

15Akulanən an məs adawnahaŋ na mbrayeni daryawi, an məs kleŋ Daniyel anahə, tay ziwe atəki an salala*. (Ɗəf an məs dəŋɗani, say dəpprəman lewlewi.) 16Asna ɗiiyen naka dələv na Zude say dənzoŋ gən aket gərmeŋge. 17Ɗəffan naka balakə adawpirken wəgəm zigeɗ nan siŋgil ɓa. 18Ɗəf məs na guliyo adawmilyan eŋgil kaw gəm lukut nan ɓa. 19Tuwãhi viyit gil dədawayɗe gəm məzuweɗ gitin pay nani. 20Məkaman Maŋgəlva vi pay nan adawsan pay na səmnya ɓa, walla də pay naffet* ɓa. 21Vi pay nani wəzəm saha wasan diiɗa, vandən dəgəɗ ɗaah ɓa va duniya asani ha gap dəpaŋka, agəɗ na dərɓagan ɗaah əmpa ɓa bo. 22Maŋgəlva aderenik wəŋɗa na pay nani, va vaski ɓa, ɗəf tay napla ɓa. Amma aderenik pay nani viyit ɗiiyen aweli.

23Pay nani, an ɗəf anah sukumək na: Messiya* tayaŋka, walla taya da, kəltafnən ɓa. 24Vi messiyaɗe məwaŋ wənna dit məs kleŋɗe məwaŋ wən wazoŋ, waɗɗaŋ sokeneɗ diiɗa vi kaw zet ɗiiyen na Maŋgəlva aweli, va waɓapəni. 25Nənah sukumək dabəŋg, məpprəm lewlewi.

26An anahaŋ sukumənək na: Krestu tayawra, kədadoŋ ɓa, walla anahəŋgək na: Tay haɗammaŋka, kəltafnən ɓa. 27Va buwən adawiɗ a disiŋ daga səmba pay nampum ha amba pay na moskoyo, vaski bo wəziya na Wətən Ɗəf* adawsani. 28Vi atəki mogugoy asani, adaki mogdokɗe adak kalaŋ.

Wəziya na Wətən Ɗəffa*

(Markus 13.24-27 / Luka 21.25-28)

29Go'ləŋgə dərɓaga pay na bonoy naka, pay wasərətə, təla akasak na ɓa, ngərzleɗ na disiŋ wabətaŋ, sembeɗ na disiŋ pak waɓlaŋ. 30Aŋki məs dədarban wənani, Wətən Ɗəf wade aka slay buwən a disiŋ, də sembe diiɗa gəm də gakdak metiŋgini. 31Kaffon gozloro metiŋgini, waslin maslayɗe nan amba tapaslay pay poɗo pak a duniya, vi kakelet ɗiiyen aweli.

Wən məkpaŋga də sukoyo

(Markus 13.28-31 / Luka 21.29-33)

32Məpprəman wənna sukoyo adarban sukum: An kiva sukoyo askəka, gaslamba nan bo andəfka, kəsəŋnənək bo mənzi go'oy. 33Vaski bo an kuleninik zigeɗis tayɗaŋ vaska, məsənna, go'oy aza wəzani. 34Gesiŋ nədawnah sukum: Ɗiiyen mederet kakaŋka amtaŋ na zam sa zigeɗis dəɗaŋ gən ɓa. 35Disiŋ də dəlva fuŋ pak wagrakaŋ, amma wəpel naw agrak na ɓa.

Maŋgəlva kaaka dəsən pay nagrak dəlva

(Markus 13.32-37 / Luka 17.26-30,34-36)

36Ɗəf tay dəsən pay adazan ɓa walla wənziya na pay nan ɓa. Ko maslayɗe na disiŋ, ko Wətən, say Affən kaaka dəsəna. 37An va dəgəɗ pay na Nuwa, vaski adaɗɗa pay wəziya na Wətən Ɗəffa*. 38Daga iŋkile dəɓlaŋ wəzoŋ ɓa, ɗii tahəŋ wəzəmaŋ, tahəŋ wəsaŋ, tahəŋ wəleŋgeŋ, tahəŋ wəkayaŋ gili dəwəke kirtit amba zile, ha pay na Nuwa atoŋ adəv bəlay. 39Dəsənən ɓa, ha iŋkile azetinik pakə. Vaski adaɗɗa pay wəziya na Wətən Ɗəffa. 40Pay nani ɗii wasoŋ sula a guliyo, kaw gəmi taka, mbək taka. 41Gil wasoŋ wəsər amazit sula, kaw gəmi taka mbək taka. 42Vi vaski məga, vi kəsənən pay nazo na Daya nokum ɓa. 43Məpprəman lewlewi: Va affən gəla asənək payan məhala adazan na, aleŋ na ɓa, appan na mahala wətoŋ eŋgil annanda ɓa. 44Vi vaski məzaɓan zukum mogoni, vi Wətən Ɗəf wade payan məs kəɗumoŋ akan ɓa samə.

Məgəɗ wəza mogoni gəm məgəɗ wəza mbrayen

(Luka 12.41-48)

45Məgəɗ wəza awani mogonəŋ di, de maɗulanəŋ di? Ndəni məs daya nan apet sən məɗɗaŋ wəza nan meɓɓet avani, vi dipsitgin zəga nawzəm də pay nani. 46Zəzay aza gawla nan an daya nan adek wərəhən daɗɗan vaska. 47Gesiŋ nədawnah sukum: Daya nan wapan zəga pak ava məgəɗ wəzaŋka. 48Amma an məgəɗ wəZaŋ mbrayni, aɗumko: Kakaŋ na daya naw aliyək dazani, 49atəŋgək wəzəmgit saha net məɗɗaŋ wəza, tay zəma, tay saa mbazla də witem dəndən. 50Daya nan wade də pay an məs dəɗum akan ɓa də pay məs dəsən ɓa. 51Daya nan wazəm gən saha an tattuwãh diiɗa, wapsən zəga an napsit muluvuluvuɗe. Nan wahəmə wampəran slayən sən bonoy.

Currently Selected:

Matiye 24: GDRNT85

Highlight

Copy