Matiye 20

Wən məkpaŋga net məɗɗaŋ wəza a guli net wəleŋɗe na mbazla

1Də aŋki məsla məlĩ na Maŋgəlva: Affən guli net wəleŋɗe agilik də mompumo pum vi kaw kay ɗii na wəza na guli nani. 2Aslerik dənɗaŋ kawfaɗ sit an va adaɗɗaŋ ɗay ɗayə, pay taka pak suley suley, akek aka wəza na guli nani. 3Agil kəmpa də təbəs vaytakə, awlek ɗii meɓɓeti tahəŋ ziw ziw a gəla lumu, wəza net tay ɓa. 4Apsit na: Nokum bo məduwaŋ a gulyo anawda, anəfaɗ sukum an məs dəslə azokum. 5Adoŋko a gulyo ananda. Yaŋ affən guli agil tataŋ pay əmpa, agilik də təbəs hoku'e aɗɗak va an laŋka. 6Agilik də təbəs sle əmpa, arəhik ɗii meɓɓet tahəŋ ziw ziw a gəla lumu, wəza net tay ɓa əmpa. Assohotike vi mi kədasɓətaŋ mekeleŋ məza wəza ɓaŋ di? 7Azlan sənənək na: Vi ɗəf tay dəssohom aka wəza ɓa. Anahsitik na: Mide, mədoŋ məgəɗ wəza a gulyo nawda.

8Adan pay atəpə, affən guli anahsənək ɗəfdaya na wəza nani: Aye məɗɗaŋ wəza, afaɗ sit deleɗ neti, atəŋ aket ɗiiyen dəzoŋ dirɓe a gulyo, kəbay gən mok aket ɗiiyen dəzoŋ dabəŋ a gulyo. 9Ɗiiyen məs dədoŋ a guli də təbəs sle azoŋko, arəhaŋgək ko naway suley suley. 10Yaŋ ɗiiyen dədoŋ a guli dabəŋ azoŋko azet na warəhaŋ diiɗa, amma apsitik net bo suley suley. 11Atafənək də wəɗɗa wərwər aka affən gulyo. 12Aɓɗaŋ na: Awla məs dəɗɗaŋ wəza adəv təbəs taka kaaka'ə, yaŋ kəfaɗ sit daka daka də mənamə, mənam akən məzəm saha dasɓəta ara pay kəkaha daɗɗa wəzaŋka. 13Amma affən guli azlanək sən ɗəf taka səmbeti, amna: Baynawa, nəgəɗsuk mataka taka ɓa. Məsler də'is aka suley pay taka ɓa sa? 14Agəm suley noko, doko, naw nəŋgəl kaw faɗ sən ɗəffan dəgəɗ wəza dirɓe dirɓe va nəfaɗ sukəŋka. 15Walla nəɓapna wəɗɗa wəza dit suleyɗe naw va nəŋgəl ɓa sa? Walla kotorok kəgəɗ vi nəgəɗ mogoni? 16Zezu abayək ma wəpel nan də wənəh na: Vaski bo ɗii na dirɓe wakpaŋgaŋ ɗii nabe, ɗii nabe wakpaŋgaŋ dirɓe.

Zezu arbanək əmta nan ma hoko'ən də wəsilya nan sətəki əmta

(Markus 10.32-34 / Luka 18.31-34)

17Adan Zezu ada dan a Zerusalem, andek gewleɗ nan klaw kiyit sula katirgiti. Adan adawmbataŋ, apelsitike, amna: 18Məpprəma, mənam tatəpeŋ a Zerusalem, adak na wapsənən Wətən Ɗəf* avet ɗii gugiriɗ net məs dəlveŋge, dit mərbaŋ zəga na ma henziŋ na Maŋgəlva. Watawaŋ kita namta kani. 19Wapsitin avet ɗiiyen dəsənən Maŋgəlva ɓa, waranəni wavərnəni wakpanən akawlaŋga məzliwrihe. Amma pay mo hoko'o wasil səki əmta.

Wəssoh nat met may Zak də Zaŋ

(Markus 10.35-45)

20Yaŋ met kirtin Zebede təzar aza Zezu dit kirtita. Tukduko bani vi kassoh zəga vani. Zezu assohotəka: Məkəŋgəl di? 21Təpsən na: An akətaf su na nəŋgəl kirtiwiŋ taka dəsan gən aka vok də zəŋ, taka aka vok zlaɓay adəv məlĩ noko. 22Zezu azlan sətək na: Kəsənaŋ an kədassohoŋ ɓa. Wakəɓapən wəsa huloŋ na bonoy məs nədaw sa van sa? Aɓɗaŋ na: Waməɓapa. 23Zezu azlan sitik na: Wakəɓapən wəsət huloŋ na bonoy nawa, amma wəsuwa aka vaw dəzəŋ walla aka vaw zlaɓay, əntə nədapsit ɓa, amma ɗiiyen məs Affu awel tay viti, ndəɗaŋ dədawrəhaŋ.

24Adan gewleɗ klaw apprəmən vaska, gidivit adək aka ɗəf də məlməni. 25Yaŋ Zezu aye pakə, apsit na: Məlĩ net ɗii watak kiyit də gagay nani, ɗii gugiriɗ bo tahəŋ wərbanən gakdak neti. 26Amma wən adaɗɗa vas awaloŋkum ɓa. An ɗəf taka aŋgələk kawsan daya say dəsaŋ gən məgəɗ wəza nokum. 27Ɗəf taka suwalaŋ kum aŋgələk kawsan daya, say dəsaŋ gən balam nokum. 28Ko Wətən dəffa dəde vi ɗii dəɗɗaŋ sənəŋ gən wəza ɓa, amma vi dəgəɗ gən wəza sit ɗiiyi, apanək zeŋgillen vi kawkohgit ɗii diiɗa.

Daŋgerɗe akoloŋko

(Markus 10.46-52 / Luka 18.35-43)

29Adan agilyoŋ suwalaŋ gəla na Zeriko, ɗii diiɗa asbanənək Zezu. 30Daŋgerɗe sula tahəŋ aba tive, apprəmənək Zezu tay toŋgo, atəŋgaŋgək wənzla vamvəlla, aɓɗaŋ na: Aw Ɗəfdaya wətən Davitti*, awəl saha kamə. 31Yaŋ ɗii ahayetini dəɓətaŋ gəni. Amma anzlaŋgək vamvəl dayki laŋka aɓɗaŋ na: Ɗəfdaya, wətən Davitti, awəl saha kamə. 32Zezu aziwke, ayeke, assohotike: Mi kəŋglaŋ nəgəɗ sukum gən di? 33Azlanənək na: Ɗəfdaya vi haram duwəl gəni. 34Zezu awələk saha keti, arəŋ gənək hereti, go'ləŋgə heret daŋgerɗe sula akolko asbanənka.

Currently Selected:

Matiye 20: GDRNT85

Highlight

Copy