Matiye 19

Wərba na Zezu aka wənnawɗak dət gulku

(Markus 10.1-12)

1Adan Zezu agrak wəpeləŋka, apanək dələv na Galile, ambatka aka dələv na Zude dəgar ki məlpa na Zordan. 2Ɗii diiɗa asbanənka, ambəlgitik məs gbəgbaɗe neti.

3Ɗii səmbet Farisiyenɗe* azoŋko zani vi karman də wənna mani. Assohonənka:

Ma henziŋ apanək tive sən ɗət narɓəh guluk viyan dəgəɗ pak sa? 4Azlansitike: Kəŋɗanən an məverin ɓa sa? Daga wətəŋ nani Maŋgəlva aɗɗak ɗəf mizilin dət gulku. 5Yaŋ amna: Vi vaski ɗəf wapan affən dət man pakə, wasapaŋ dət goni, wakpaŋgaŋ gəɓa zit taka. Akpaŋgaŋ na ɗii sula əmpa ɓa, amma gəɓa zit taka. 6Vaski asoŋ na sula əmpa ɓa, amma wakpaŋgaŋ gəɓa zit taka. Vi vaski zəga məs Maŋgəlva asapani, ɗəf adawɗakan ɓa. 7Farisiyenɗe* assohonənka: An vaski na, vi mi Moyis aɗi wənnan na ɗəf dəpsət gən ɗerewel sət ɗak nan an arɓəhtək di? 8Zezu azlan sitik na: Moyis apsukum tive narɓəh gil nokum na vi mokrokum ɓəlli. Amma daga wətəŋ nani tay vasɓa. 9Əntatə nah sukum: An ɗəf arɓəhtək goni, an vi arəmət daɗɗa mana'ayi ɓa, an akayək guluk maɓɓata agəɗək mana'a.

10Gewleɗ nan aɓɗaŋ na: An wən na ɗəf dət guluk tay vas na, ɗəɗaah ɗəf adaw kay guluk ɓa. 11Zezu azlan sit na: Ɗii pak dədasbanən wərbas ɓa, say ɗiiyen Maŋgəlva apsit sembe. 12Wən tay temtem dədah tak ɗii daw kay gulku: Ɗii meɓɓet tahəŋ zit tay ɓa daga sədəvit meti, ɗii meɓɓet tahəŋ mərgeti, ɗii meɓɓeti awkayaŋ gil ɓa vi məlĩ na Maŋgəlva. Ɗəffan naw ɓap wətaf wərba nani dətafa.

Zezu aɗɗak zəzay aket kirin memeɗeŋɗe

(Markus 10.13-16 / Luka 18.15-17)

13Yaŋ ɗii aki sənən kirin memeɗeŋɗe sən Zezu, vi dəɗi gən van aketi, dəzuli gən aketi, amma gewleɗ nan atekinik ɗii daw kiti. 14Yaŋ Zezu apsit na: Məpet kirin memeɗeŋɗe dəzoŋ azawa, kətek nən ɓa, vi məlĩ na Maŋgəlva tay viyit kirinen veŋki. 15Agəɗ sitik zəzay də wəɗi van aketi, yaŋ asil səkəti nani ambatka.

Ɗəf məs arya

(Markus 10.17-31 / Luka 18.18-30)

16Yaŋ ɗəf maɓɓan ade aza Zezu, assohoni: Wəza mogon awani nədaɗɗa nərah gən zeŋgille an məza agrak na ɓa di? 17Zezu anah sənək na: Vi mi kəssohon zəga mogon di? Zəga mogon tay ɓa, say tətakay mogoni. An mokaka zeŋgille məza agrak na ɓa, say asbet mehenziŋɗeŋki. 18Assohonək Zezu, mehenziŋɗe awet di? Zezu azlan sənək na: Kədawbay gəbay ɓa, kələɗɗa mana'a ɓa, kədawhal ɓa, kədawa wən aka ɗəf ɓa, 19agakdakan affuk dət moko, aŋglu meggok va kəŋglu ki zuko. 20Gawla nak amna: Me henziŋɗe es pak nəŋɗetike nərmak wənneti, awan dəpəl su naɗɗa kan di? 21Zezu apsən na: An kəŋgələk wəsok salala, dokə vəl arya nok pakə, apsit deleɗ nan sit muzurayɗe, vas na wakərah zəga nan məzaɓan a disiŋ. Asna kəde gən wəsbaw kana. 22Adan gawla apprəm wəpel vaska, ambatka, makran asanka vi arya nan tay diiɗa sawɓa.

23Zezu anah sit gewleɗ nan na: Gesiŋ nədawnah sukum, tuwãhi məs arya dətoŋ gən məlĩ na Maŋgəlva. 24Əntatə nah sukum əmpa: Ɗəɗaah zlogomo watoŋ dəmba batal ki məs arya wətoŋ məlĩ na Maŋgəlva. 25Adan gewleɗ nan apprəmənən vaska, agətaŋka, aɓɗaŋ na: Haya, an vaski na naway nawkoh di? 26Zezu asəŋletike, amna: Azet ɗiiyi wərəh nan tuwãyi, amma aza Maŋgəlva wərəh nan tay tuwãh ɓa.

27Yaŋ Piyer anahsən na: Yaŋ nam pak məpanək zəga nam pak mənam tatəsboko, kawsan səm mbar kandi? 28Zezu apsit na: Gesiŋ nədawnah sukum. Pay Wətən Ɗəf* adawsan aka mazaŋga na gakdak nani aka dələv meleketeni, munokum məzəsbawən klaw kikum sulaŋ wakəsoŋ də ina aket mezeŋgeɗ na məlĩ klaw kiyit sula vi kawtaw kita aka ma əlfa net Israyelɗe klaw kiyit sula. 29Ko mədəŋgaŋ dəpanən gəla neti milmiŋgiɗit mezeŋgilleketi, dit muguluŋgiti dit migilti dit kirtiti gəm gulyeŋɗe neti viwa, warəhən təl səkatə, warəhaŋ zeŋgille məza agrak na ɓa'e. 30Amma ɗii diiɗa en nabe kakaŋka wakpaŋgaŋ dərɓe, ɗii diiɗa en na dərɓe kakaŋka, wakpaŋgaŋ ɗii nabe.

Currently Selected:

Matiye 19: GDRNT85

Highlight

Copy