Luka 7

Zezu ambəl gənək gawla na daya net sozeɗi

(Matiye 8.5-13)

1Adan Zezu agrak wəpel wən sit ɗiiyi, ambatək a Kafarnahum. 2Daya net sozeɗ na Roma gawla nan məs aŋgəl tay də gbəgba' go'i namta. 3Yaŋ daya net sozeɗ nak apprəm wənna Zezu, aslinik ɗii gugiriɗ net Yahudiyenɗe azani vi kakamani dəde gən wəmbəl gən gawla nani. 4Azoŋko aza Zezu, akkamanənək sawɓa, aɓɗaŋ na Ɗəffəŋka, aslək kə baah sən gəni 5vi aŋgluwik ɗii namə, ndən dərka gəla nawpel wənnamə. 6Yaŋ Zezu ambat dənɗaŋ Adan agap go'o də gəla, daya net sozeɗ naka aslinik bayneŋgiɗin apsənən na Mərbə zəga kəyan zuk ɓa, vi nəgap ɗəf kətoŋ gən annawda ɓa. 7Vi vaski nulak zuna nəgap nawmbat amaŋgavok ɓa. Apel wən taka kaaka'ə gawla naw wambəllə. 8In sən kiyu amba təlit ɗii gugiriɗ naw nani, naw van tamə sozeɗ tahəŋ amba təlwa. An nənah sənək aŋka doko wambatə. An nənah sənək andaka bo ade wade. An nənahək na gawla nawa aɗɗa vana waɗɗa. 9Adan Zezu apprəm wənəska, agətka. Yaŋ akpaŋgə, appsit məzəsba nən na: Ko aweleŋgit Israyelɗe nərah ɗaah ɗəf də wətaf vaŋ ɓa. 10Yaŋ masləŋɗe amilyoŋko eŋgil ana daya net sozeɗ da arəhənək gawla ambəlka.

Zezu asil gənək wətət ga gəbaya

11Yaŋ Zezu ambat awalaŋ gəla məs adawyaŋ na Nayin. Gewleɗ nan dit ɗii diiɗa ambataŋgək dəndən. 12Adan agap gbah a memeŋle na walaŋ gəla nani, yaŋ ɗii adawslanən ɗəf məmtən kadaw ndəkən. Ɗəf məmtən van wətət ga gəbayi, ndəni taka vaska vata. Ɗii nawalaŋ gəla nan tahəŋ diiɗa dənta. 13Adan Ɗəfdaya awləta awələk saha kata amna kədawhəm ɓa. 14Yaŋ ambatə arəŋgən zəga an adaw slanən ɗəf van dənnəŋka. Ɗii məzu slanən aziweŋke. Zezu amna: Gawla, əntatə nah suko: Asili 15Ɗəf məmtən asilke, asanka, atəŋgək wəpele. Zezu apsətək mani. 16Ɗii pak ageslne'eŋke, agakdakanənək Maŋgəlva, aɓɗaŋ na: Məs kleŋ metiŋgin arbanək zən awalaŋmə, Maŋgəlva adek wəbaah sit ɗii nani. 17Halabara na Zezu atrayək aka dələv na Zude dit dəlveŋge pakə.

Masləŋɗe na Zaŋ məgəɗ baptem

(Matiye 11.2-19)

18Yaŋ gewleɗ na Zaŋ anah sənən wənnan pakə. Yaŋ Zaŋ aye ɗii sula suweleŋgit gewleɗ nan neki. 19Aslinik aza Ɗəfdaya, dəsohonən gəni: Əstə an məsəna wadeŋ sa? Walla məga ɗəf maɓɓani? 20Yaŋ azoŋ aza Zezu, apsənən na: Zaŋ məgəɗ baptem də slənəm azoko, məssohok gəni: Əstə an məsəna wade nak sa, walla mə ga ɗəf maɓɓani? 21Dəpaska Zezu ambəl gitik məs gbəgbaɗe diiɗa də gbəgba' temtemi, akohgitik ɗii meɓɓet səmet tuyeŋɗe mbrayti, akoluk heret deŋgerɗe. 22Yaŋ azlan sit masləŋɗe na Zaŋ nek na: Mədoŋ mənah sən Zaŋ an kulaŋ an kəpprəmaŋ: Deŋgerɗe tahəŋ ulaŋ, vədelɗe tahəŋ wədawaŋ, məs kokoleɗ ambəlaŋka, goryomɗe tahəŋ wəpprəmaŋ, ɗii mimtit asilyoŋko, məs sahaŋɗe tamə məpel siti Wən Neneke. 23Zəzay aza ko naway məs dəpan wətaf nan ɓa.

24Adan mesliŋɗe na Zaŋ ambataŋ Zezu atəŋgək wəpel wənna Zaŋ sit ɗiiyi amna: Mi kəduwaŋ ula awra di? Ngav an səmnya adaɓlan sa? Awwo vaski ɓa. 25Ya mi kəduwaŋ ula kan di? Ɗəf məgul lukutɗe moget sa? Məguloŋ lukutɗe mogeti, məs aryeɗi, ameŋgle net milyeŋge da adasoŋ. 26Ya mi kəduwaŋ ula kandi? Məs kleŋ sa? Intatə nah sukum: Gesiŋ, aŋki dədayki məs kleŋ. 27Vi Zaŋgi an məs ɗerewel apel akani:

Maŋgəlva amna: Yaŋ əntatə slən masləŋ naw aboko,

vi dəzaɓan gən tive viko.

28Gesiŋ nədawnah sukum: Ɗəf tay məwan dayki Zaŋ də gakdak ɓa, amma ɗəffan muzliya adəv məlĩ na Maŋgəlva ndəni dədayki Zaŋ də gakdaka.

29Ɗii dit duwanɗe pak apprəmənək na Maŋgəlva an təstəssi, atafnənka, Zaŋ aɗɗa sitik baptem. 30Amma Farisiyenɗe* dit məsənaŋ zəga na ma henziŋ, dəŋgereŋ wətaf wəŋgla na Maŋgəlva ɓa, aɓoŋgoŋgək dawtaf baptem sə va Zaŋ.

31Yaŋ Zezu anah əmpa na: Dəmi nədawsla ɗiiyen kakaŋ kiŋ di? Va mədəŋga agilyoŋ di? 32Agilyoŋguk va kirin məsoŋ aɗawrak na walaŋ gəla, tahəŋ wiyanən ziti, tahəŋ wənahaŋ na: Məfon sukumək gozloro, ya kəskəlaŋ ɓa. Məya sukumək gəlya naw həmma ya kəhəmmaŋ ɓa. 33Vi Zaŋ məgəɗ baptem adeke awzəm zəga nawzəm maɓɓan ɓa, aw saa biya net wəleŋɗe ɓa, amma kəɓɗaŋ na mitemni. 34Wətən Ɗəf* adeke, tay zəma, tay saa, kəɓɗaŋ na məza zəma, məza saa biya net wəleŋɗe, baynet duwanɗe dit ɗii ɗəɗerɗeyi. 35Amma wəsən na Maŋgəlva arbanək zən mogon azet ɗii dətafnən pakə.

Zezu taya na Simoŋ Farisiyenda

36Yaŋ Farisiyen maɓɓan aya Zezu vi kawzəm dəni. Zezu ambatək eŋgil ana Farisiyenda naka, asanək kan kawzəma. 37Guluk maɓɓat məs mambray tatə awalaŋ gəla nani. Adan təpprəm na Zezu tay zəm eŋgil ana Simoŋ Farisiyenda, təkiyək bəbər na tursan. 38Təziwik dərɓaga Zezu amba təlni. Tatəhəma, ha təlɓanək təl Zezu dit sin nata, yaŋ təkəlɓit də muhur-kita, tətuwəɗək vat azani təgba sənək tursan azani. 39Adan Farisiyen məs dəya Zezu awla vaska, aɗumuk amakrani: Va ɗəffəŋ məs kleŋgi, wasən kəta guluk məzaw rəŋgən kəŋkə də mambray tə. 40Yaŋ Zezu atəŋ wəpele, apsən Simoŋ na: Wən tay nədaŋgla wənah suko. Simoŋ azlan sənək na: Apele mərbə zəga. 41Zezu amna: Ɗəf maɓɓan taysbet ɗii sula aka dəmən. Ɗəffan takaŋka suleyɗe na təbəs səkat sle. Ɗəf maɓɓan tam suleyɗe na təbəs kaklaw sle. 42Yaŋ dəɓapən wəfaɗən ɓa, apan sitike, ndəɗaŋ sulagit pak na naway dəŋglu maɓɓan daydi? 43Simoŋ amna nulak na ɗəffan dəppan nəŋki day. Zezu apsən na: Kəsənək goŋga nani. 44Yaŋ Zezu akpaŋgan haran akat guluk nakə, apsən Simoŋ na: Kulətək guluk kəŋ sa? Nədek eŋgil anok da, kəvay iŋkile nawɗa tələw ɓa, amma nata təlɓanək də sin nata, təɗɗanək də muhur-kita. 45Kəvoŋ gən kiyuk azaw ɓa, amma nata daga nəde anokda, təpan wəpayan tələw ɓa. 46Kəpay sən mel na tursan sən kiyu ɓa, amma nata, təgba sənək tursan sən təlwa. 47Vi vaski əntatə nah sukum: Wəŋgla natəŋ diiɗaŋka ndən dərban mambray nat diiɗayi ya avika. Amma məs məviyan suɗike, wəŋgla nan tam bo suɗike. 48Yaŋ Zezu apsət guluk nak na: Mambrayɗe nok aviyaŋka. 49Məzawzəmaŋ dəndən atəŋgaŋgək wəɗumoŋ amakreti. Aɓɗaŋ na: Naway aŋ məviyan mambrayəŋ di? 50Amma Zezu apsət guluk nak na: Wətaf nok akoh gukuko, dok zamə.

Currently Selected:

Luka 7: GDRNT85

Highlight

Copy