Luka 8

Gil məzəsoŋ də Zezu

1Yaŋ dərɓaga wən aska Zezu ambatək kəla aweleŋgit gəleɗe dit gəleɗe meɓɓeti, arbək wənna, anah sitik halabara nenek na məlĩ na Maŋgəlva. Gewleɗ nan klaw kiyit sula ambataŋgək dəndən. 2Gəm gil meɓɓet məs agilgin tuyeŋɗe səketi məs ambəl giti səka gbəgba' pak tahəŋ dəndən. Ndəɗaŋgəŋ Mari (məs adawyaŋ na Mari na Magdala), akən məs agilgit tuyeŋɗe buhul səkata. 3Zannet, guluk na Kuza gawla na məlĩ Herodə gəm Suzana dit gil meɓɓeti, məza baahaŋ sənən Zezu də arya neti.

Wən məkpaŋga na məzəslga

(Matiye 13.1-9 / Markus 4.1-9)

4Ɗii diiɗa daga suwalaŋ gəleɗe temtemi, akkalaŋgək aza Zezu. Yaŋ Zezu apel sit wən məkpaŋga: 5Məzense ambatka gulyo, vi kaw ndol haya. Adan adawndolən, zemve maɓɓan abətək aka tive, ɗii andapanənka, biŋgeɗ bo ayaɗənka. 6Zemve maɓɓan abətək aka soyomo. Yaŋ zemve nan agili, akələk go'ləŋgə, vi təki zəzay tayamban ɓa. 7Zemve maɓɓan əmpa abətək awalaŋ hogoy, agilke, hogoy azəm gənək saha. 8Amma maɓɓan abətək aka ba'arə, agilke, aɓayka, aɗika, kiyən taka pak aɗiyək səkat səkatə. Yaŋ Zezu abay ma wəpele, anah də wəlan daya daya na: Ɗəffan də sləman napprəma say dəpprəma.

Vi mi Zezu adawpel də wən məkpaŋga di?

(Matiye 13.10-17 / Markus 4.10-12)

9Yaŋ gewleɗ na Zezu assohonən wən məkpaŋga nan va aŋgəl wənaha. 10Yaŋ Zezu azlan sit na: Munokum nokum kərəhaŋgək wəsən wən məɗaman na məlĩ na Maŋgəlva, amma azet ɗii meɓɓet na say də wən məkpaŋga.

Vi tahəŋ wəziyən hereti, amma awlaŋ ɓa,

tahəŋ wəpprəməni, amma awsənən ɓa.

Zezu agil gənək kotak na wən məkpaŋga naslga naka

(Matiye 13.18-23 / Markus 4.13-20)

11Aŋki an wən məɗama aɗɗamə: Zemve ndəni wəpel na Maŋgəlva. 12Ɗii meɓɓet tahəŋ va zemve dəbət aba tive. An apprəmənək wəpel na Maŋgəlva, Ibilisa wade, wanda wəpel na Maŋgəlva sə mekreti, vi adawtafənən dəkohoŋ gən ɓa. 13Ɗii meɓɓeti tahəŋ va təki soyomo, an apprəmənək wənna, watafənən də wəneken ziti. Amma apanən na suwerit dənzoŋ gən ɓa, watafənən vi pay suɗike kaaka'ə. An wərak adeke wapanən wətaf neti. 14Zemve an dəbət awalaŋ hogoy tamə, tay va məzupprəmaŋ wənna, wapanən zigeɗ temtem də wəŋgla na arya də nenek na duniya wazəm gən saha na wənnaka, atərna wəray ɓa. 15Zemve an dəbət aka ba'arə tay va məzupprəmaŋ wənna Maŋgəlva, armanənək də mekret taka, wətər wəray net warban zən də wəza neti.

Wən məkpaŋga na pitirla

(Markus 4.21-25)

16Ɗəf tay nasɗa offo adəv pitirla kaw ɗup mosgoy akan ɓa, walla kaw ɗiyən ambet hargaŋgu ɓa. Amma waɗi atəki nawɗi pitirla, vi ɗii nawtoŋgoŋ pak dulanən gən məkasakən. 17Zəga an məɗama pak wasan appaka, wən məs məseske'en pak wapprəm appaka.

18Məzi zukum də wəpprəma. Ɗəffan də zəga avani warah akan diiɗa, amma məs saha an məs adawrəh suɗike kawtafni səvani.

Milmiŋgiɗin Zezu dət mani

(Matiye 12.46-50 / Markus 3.31-35)

19Yaŋ milmiŋgiɗin Zezu gəm mani azoŋko rəhənni, amma dərəhaŋ batam nagap azan ɓa vi ɗii diiɗaŋ. 20Ɗii apsənən na: Mok dit milmiŋgiɗuk tahəŋ appaka metekawluko. 21Amma yaŋ azlan na: Emma dit milmiŋgiɗwa ndəɗaŋgəŋ məpprəmaŋ wəpel na Maŋgəlva məzasbanən makret taka.

Zezu tay ɓitgit barkataŋ

(Matiye 8.23-27 / Markus 4.35-41)

22Yaŋ pay maɓɓani Zezu atoŋguk adəv bəlay dit gewleɗ nani, apsit na: Mədam dəgar ki məlpa. Ambataŋka. 23Adan asoŋ aka tive də bəlay, Zezu aleŋke. Go'ləŋ vemvil azoŋguk aket iŋkile, bəlay aknahək dit iŋkile, go'oŋ aza wəzaŋ. 24Yaŋ gewleɗ adoŋ amaŋgava Zezu afɗaahanəni, aɓɗaŋ na: Mərbə zəga, mərbə zəga, mənam tatə za.

Zezu asilke, ahayetik vemvilli dit vovolumɗe net iŋkile, aɓətaŋka. Geŋgere pak sləɓək agəɗə. 25Apsit gewleɗ nan na: ngay wətaf nokum kandi?

Amma geslne armeke, agətaŋka, aɓɗaŋ na: Ɗəf miyaŋ di? Vemvil dit iŋkile pak wəpprəmən manəŋ di.

Zezu ambəl gənək ɗəf də tuya akani

(Matiye 8.28-34 / Markus 5.1-20)

26Yaŋ azoŋ aka dələv na Gergasiyenɗe, dəgar ki pe'e na Galile. 27Zezu agilik sədəv bəlay, ɗəf də witemɗe taya awalaŋ gəla nani. Adeke, aləmək də Zezu. Ɗəf nan anziyək sawɓa məza aw gul lukut ɓa, awsan eŋgil ɓa, adivit magamasɗe adawsani. 28Adan awla Zezu, aŋgəzlək vamvəlla, apelik daya daya: Məsok də in di, Zezu, Wətən Maŋgəlva* an dəday pakə? Nəkamokuko, kəl daw zəmgu saha ɓa. 29Anah vas na: Vi Zezu aɗiyək wənnan witem dəgil gən səkani. Təl ɓəɓay adarmanən ɗəf mitemin vani wəɓruk tələn də van pak dit ngiyamɗe də wəkpa'ən dit sisele, vi də səki gəni, amma aspak anzletike, witem tay kan awra. 30Zezu assohonko: Mbari iya nok di? Yaŋ azlan na: Iya naw na ɗii mgboŋgu, vi tuyeŋɗe diiɗa dəkkalaŋ akani. 31Yaŋ tuyenɗe nek akkamanən Zezu vi adarɓihit ɓa, vi adawket adəv vov kpukpum ɓa.

32Ngaɓa net vedemɗe tahəŋ adaka, tahəŋ wətaɗaŋ aka mosorgo. Tuyeŋɗe nek akkamanənək Zezu, də doŋ gən aket vedemɗe neki, apan sitik tive. 33Yaŋ tuyeŋɗe nek agulyoŋ səka ɗəf naka, atoŋgoŋguk aket vedemɗe. Vedemɗe pak arɓəzlaŋka, alotoŋguk səka mabusgum an na disiŋ aret iŋkile a pe'e, azaŋgək adak pakə.

34Adan məzu teɗeŋɗe net vedemɗe awla nən an məs dəgəɗə anzoŋko, anahaŋ sitinik ɗii wənnan awalaŋ gəla də mapoho nan pakə. 35Ɗii ambataŋgək vi kawla an dəgəɗə. Azoŋguk aza Zezu, arəhənək ɗəf nak tuyeŋɗe agulyoŋguk səkani, tay tuŋgo amaŋgava Zezu, aguluk lukutu, maɗulan bo asəkika. Ageslne'eŋke. 36Ɗiiyen dulanən an məs dəgəɗə anah sitinik va ɗəf də witemɗe ambəllə. 37Ɗii naka dələv nan pak akkamanənək Zezu dəmbat gən səka dələv neti, vi a geslne'eŋgək sawɓa. Zezu atoŋguk adəv bəlay, ambatka. 38Ɗəf məs tuyeŋɗe agulyoŋ səkan naka, akamanənək Zezu dətaf gən dəsan gən dəndən. Zezu amil ginike, apsən na: 39Amndoko anok da, anah sit ɗii pak an məs Maŋgəlva agəɗ suk pakə. Ambatka, anah sitik ɗii nawalaŋ gəla pak an məs Zezu agəɗ səni.

Wətən Zayrus dət guluk

(Matiye 9.18-26 / Markus 5.21-43)

40Adan Zezu ade, ɗii diiɗa atafnənka, vi ndəɗaŋ pak tahəŋ wəganənni. 41Yaŋ ɗəf məs adawyaŋ na Zayrus daya na gəla nawpeln wənnet Yahudiyenɗe adek aza Zezu, akdukuk abani, akkamanək dəmbat gən eŋgil annanda. 42Vi wətən tat taka məs wəsva nat klaw kiyən sula, go'otə aza əmta.

Adan Zezu adawmbat adaka, ɗii ahaslanənka. 43Guluk maɓɓat tat adak də gbəgba' na zələha wəsva klaw kiyən sula. Təzanək zəga nat sit məkayaŋ miha pakə, amma tay məs dəɓap wəmbəl gət ɓa. 44Yaŋ təzar dərɓaga Zezu, tərəŋ gən maŋgava lukut nani. Go'ləŋgə wəzələh nat arsləka. 45Zezu assohko: Naway dərəŋgu di? Naway pak tay ənəhna əntə ɓa. Piyer amna: Mərbə zəga, ɗii akok sapsapə, tahəŋ wəhãslkuni, nok kənah gən əmpa na naway dərəŋgu di? 46Amma Zezu amna: Ɗəf tay dərəŋguwa, vi nəsənək aza zuwa sembe agulyoŋguk səzawa. 47Adan guluk tula təɓap na kaw ɗaman zət ɓa, tədeke, də wəkkere, təkdukuk abani, tənahək aweleŋgit ɗii pak an məs tərəŋ gən Zezu akani, va təmbəl səka gbəgba' nat go'u. 48Yaŋ Zezu apsət na: Wətuwa wətaf nok ambəl gukuko dok zamə.

49Daga Zezu dəɓəl wəgrak wəpel nan tagay ɓa, ɗəf siŋgil ana Zayrus da adeke, amna: Wətuk təmtəka, kədawyanən mərbə zəga ɓa. 50Amma adan Zezu apprəm vaska, apsən Zayrus na: Kədaw geslne ɓa, nok ataf kaaka'ə. 51Adan agap eŋgili, dəpan tive sit ɗii dətoŋgoŋ gən dəndən ɓa, say Piyer də Zaŋ də Zak gəm affət waŋkə gəm mata. 52Tahəŋ wə həmmaŋ, tahəŋ wəskaŋ morkoyo akat waŋ nakə. Zezu apsit na: Kədawhəmaŋ ɓa, waŋ təmtəɓa, wəleŋ tədaw leŋge. 53Awlanənək va dərwa vi asənənək na təmtəka. 54Amma yaŋ Zezu arma vata, anah də wəlan daya daya: Wakə, asili. 55Zeŋgillet amilik azata, təsilik go'ləŋgə. Yaŋ Zezu aɗi wənnan dəpsətən gən zəga təzəm gəni. 56Məgilit waŋ agətaŋka, amma Zezu apsit na, kədawnah sənən ɗəf wən məs dəgəɗəŋ ɓa.

Currently Selected:

Luka 8: GDRNT85

Highlight

Copy