Luka 6

Zezu gəm pay naffete*

(Matiye 12.1-8 / Markus 2.23-28)

1Yaŋ pay naffet na Zezu atoŋguk kla dəv guli na alkamari (zev hay neti) dit gewleɗ nani. Gewleɗ nan anzlaŋ kiyən taka taka, asurotənək aza veti, ampərənka. 2Farisiyenɗe* meɓɓet apsitin na: Vi mi kədaɗɗaŋ zəga an məs ma henziŋ dəpan tive naɗɗan pay naffet ɓa di? 3Zezu azlan sitike: Kəŋɗanən ɗaah ɓa sa an məs Davit dit ɗii nan aɗɗaŋ pay mbərən, yaŋ maay adawdet ɓa sa? 4Atoŋguk adəv gəla na Maŋgəlva, agəmək memteke məs məɗiyit vi Maŋgəlva, azəməka, apsitik ɗii nani, azəmnənka, ko vi ma henziŋ nam atak ɗii meɓɓet dawzəməni, say məs dəlveŋge kaaka'ə. 5Zezu aməsək wənah na: Wətən Ɗəffi* affən pay naffete.

Ɗəf məs van məmtəni

(Matiye 12.9-14 / Markus 3.1-6)

6Yaŋ pay naffet* maɓɓan əmpa, Zezu atoŋguk adəv gəla nawpel wənnet Yahudiyenɗe atəŋgək wərba wənna. Ɗəf məs van dəzəŋ məmtən taya daka. 7Məsənaŋ zəga na ma henziŋ dit Farisiyenɗe* tahəŋ wəganən Zezu kuzuŋ wambəl gən ɗəffəŋ pay naffete, vi dərəhaŋ gən tive naw ɗi sən dolgoy. 8Amma Zezu asənək wəɗum neti. Apsən ɗəf məs van məmtən nak na: Asili, aziw aweleŋgit ɗiiyiŋki. Ɗəf nak asilke, aziwke. 9Yaŋ Zezu apsit na: Nəssohokum: Mi ma henziŋ nam apsəm tive naɗɗan pay naffet di? Wəɗɗa mogon sa, walla wəɗɗa mbrayen? Wəkoho gən zeŋgille ɗəf sa, walla wəzani? 10Awlek pakə, yaŋ apsən ɗəf nak na: Appar voko. Apparəka, ambəlka. 11Ɗii meɓɓet gidivit adək sawɓa, aslereŋgək aka an adaɗɗaŋ sənən Zezu.

Va Zezu awel masləŋɗe klaw kiyit sula

(Matiye 10.1-4 / Markus 3.13-19)

12Yaŋ pay nani Zezu apeŋgək aka gərma vi kawzuli ya avoŋguk kim akawzuli sən Maŋgəlva. 13Yaŋ təki adaŋgə, ayek gewleɗ nani, awelik klaw kiyit sula suweleŋgiti, ayek na masləŋɗe. 14Simoŋ (məs apsən iya na Piyer) gəm məlmən Andre, Zak gəm Zaŋ gəm Filipi gəm Bartolomi, 15Matiye gəm Tomas gəm Zak wətən Alfa, Simoŋ (məs adawyaŋ na məkay wəgil git ɗii nan səka balam). 16Zudas wətən Zak gəm Zudas Iskariyot an məs dələ zəm ki Zezu.

Zezu arbək wən sit ɗiiyi də wəmbəl git məs gbəgbaɗe

(Matiye 4.23-25)

17Yaŋ Zezu aprik səka gərəm nak dənɗaŋ, yaŋ aziw atəki ɗawrakə, ɗiiyen dətaf nən tahəŋ diiɗa adaka. Ɗii diiɗa məs naka dələv na Zude pakə gəm ɗii na Zerusalem gəm ɗii naka məlpa ndəɗaŋgəŋ ɗii na Tirus gəm ɗii na Sidon pak tahəŋ adaka. 18Azoŋguk vi kapprəm wəpel nani, gəm vi kaw mbəl git səka gbəgba' neti. Ɗii məs tuyeŋɗe adawzəm gitin saha azoŋko, ambəlgitke. 19Ɗii pak aŋglaŋ wərəŋ gənəni, vi ni sembe agulyoŋ səzani, ambəl git ɗii pakə.

Zəzay də wəraya

(Matiye 5.1-12)

20Adan Zezu awle gewleɗ nani, amna:

Wakpaŋ azokum zəzaya, munokum məzurayɗe,

vi məlĩ na Maŋgəlva nokumi.

21Wakpaŋ azokum zəzaya munokum məs maay adawda kakaŋka,

vi nokum wakə baŋ ba'ə.

Wakpaŋ azokum zəzaya, munokum məzu həmmaŋ kakaŋka,

vi wakə masaŋ ba'ə.

22Wakpaŋ azokum zəzaya, an ɗii azel kumənko, andol kumənko, arokumənko azelekumənko vi wənna Wətən Ɗəffa*. 23Mənekenzukum, məɗələ, vi riba nokum tay gukum metiŋgin a disiŋ. Vi dəhiŋgiɗit vas aɗɗaŋ sitin məs kleŋɗe laŋka.

24Amma wakpaŋ azokum bonoy, munokum, məs aryeɗi,

vi kərəhaŋgək zam nokum.

25Wakpaŋ azokum bonoy, munokum məzu baŋ kakaŋka,

maay wadukum ba'ə.

Wakpaŋ azokum bonoy, munokum məzu masaŋ kakaŋka,

wa kəhəmmaŋ də wəska morkoyo ba'ə.

26Wakpaŋ azokum bonoy, an ɗii anah sukumənək na mogoni,

vi vas dəhiŋgiɗit anah sitin məs kleŋɗe məwaŋ wənna.

Wəŋgla net məzuzeleŋ

(Matiye 5.38-48; 7.12a)

27Intatə nah sukum, munokum məzapprəmən wəpel nawa: Məŋglu məzu zelkuməni, məgəɗ mogon sit məɗɗaŋ hire nokum. 28Məgəɗsit zəzay sit məzu raygukuməni. Məzuli viyit məzu zəm gukumən saha. 29An ɗəf avərkuk aka tapaslayuk dahãh, akpaŋgan sən an dahãh əmpa. An ɗəf agəmək lukut metiŋgin noko, kəl takən daw gəmət akən muzliyək ɓa. 30Ko mi ɗəf assoh pak apsəni. An ɗəf agəmək zəga noko, kədawkayan ɓa. 31An məs kəŋglaŋ ɗii dəɗɗanən sukumən gən nəŋka, məɗɗa sit ɗii tamə.

32An munokum tatəŋgluwin ɗiiyen dəŋglu kuməni, zəga na soko awan kədawgaŋ əmpa di? Ko ɗii məɗɗaŋ mambray pak tahəŋ əŋgluwin ɗiiyen dəŋgluwini. 33An munokum tatə ɗaŋ mogon sit ɗii məɗɗaŋ sukumən mogon na zəga na soko awan kədawgaŋ kan di? Ko məɗɗaŋ mambray pak vaska daɗɗaŋ. 34An munokum tatə zəm gitin ɗiiyen məs kədawrəhaŋ laha siveti, zəga na soko awan kədawgaŋ kan di? Ko məɗɗaŋ mambray pak tahəŋ wəzəm gitin məɗɗaŋ mambraya, vi dəɗɗaŋ sitin gən tamə. 35Amma məŋliw məzu zel kuməni məgəɗ sit mogoni məza wəɗum na wanərahə ɓa. Wakərəhaŋ riba diiɗa, wakəkpaŋgaŋ kirtin Maŋgəlva an dəday pakə. Vi ɗəf mogoni azet ɗii mogeti dit məɗɗaŋ mambray pakə. 36Məsoŋ də ula saha va Affukum asan məwəl saha.

Kədawtaw kita aket ɗii meɓɓet ɓa

(Matiye 7.1-5)

37Kədawtawaŋ kita aket ɗii meɓɓet ɓa, Maŋgəlva bo ataw na kita akokum ɓa. Kədazlbenin ɗii də kita ɓa Maŋgəlva bo azlbukum na də kita ɓa. Məviyan sit mambray net ɗiiyi Maŋgəlva bo waviyan sukum mambray nokum. 38Məpsit ɗii meɓɓeti, Maŋgəlva wapsukum, zəga naw sla zəgaŋka mogoni, aslak paah setete, azi sukumək adəv ziba na lukut nokuməŋ metiŋginiŋka. Yaŋ zəga məs kədawslenin ɗii dəndənnəŋka, dəndəni Maŋgəlva adawslukum.

39Zezu apel sitik wən məkpaŋga əmpa: An daŋgar tay əkdəh daŋgar, sulegit pak abətaŋ na adəv vov ɓa sa? 40Məzu yagan zəga a day na ki məzərban sən ɓa, amma məzu yagan zəga an agrakək wəyagan zəga wagap va məzərban səni.

41Vi mi kədawla kevile ara məlmuk di, amma nok kan kaɗum aka wəlaŋga narok ɓa di? 42Mbari kəɓap wənah sən məlmuk na: Məlmuwa appawa nəgəm suk kevile səroko, amma nokna kawla wəlaŋga sərok ɓana vi mi di? Muluvuluvu, agəm wəlaŋga sərok tagay, kuwəl gən mogoni, asna kə gəm gən kevile səra məlmuko.

Wəlaŋga də uwa nani

(Matiye 7.16-20; 12.33-35)

43Wəlaŋga mogon awə na kirtin mbreyit ɓa, wəlaŋga mbrayen awə na kirtin moget ɓa. 44Wəlaŋga pak kaw səni də uwa nani. Kaw ɓuhi sukoyo səka gedirge ɓa, kaw ɓuhi uwa na vin səka dezeze ɓa. 45Ɗəf mogon wagil gən zəga mogon səki wəzaɓan sə makranəŋ bo mogoni. Ɗəf mbrayen, wagil gən mambray səki məs azaɓan amkranəŋka. Vi ma ɗəf wapel an makra ɗəf aɗamə.

Gəleɗe sula

(Matiye 7.24-27)

46Vi mi kədawyuwənna Ɗəfdaya, Ɗəfdaya di? Amma kaɗɗanən an məs nənah sukum ɓaŋ di? 47Wanərban sukum ɗəffan dədezawa, məzəpprəm wənnawa, məzər mani, va naway agil di. 48Agilik va ɗəf mərkə gəla, aso'ək vov nan kpumu aɗiyək gabban aka milɓe. Iŋkile azoŋko aziweŋke amba gəla naka, amma dəɓəsl ɓa, vi mərkani mogoni. 49Amma məs apprəm wəpel naw ɓa məza arman ɓa, agilik va ɗəf mərkə gəla aka membike, məza wəso vov nan ɓa. Adan iŋkile azoŋ amba gəla naka go ləŋgə aɓəslək pakə.

Currently Selected:

Luka 6: GDRNT85

Highlight

Copy