Luka 23
23
Zezu aba Pilatu
(Matiye 27.1-2,11-14 / Markus 15.1-5 / Zaŋ 18.28-38)
1Yaŋ asilyaŋ pakə, akanən Zezu aba Pilatu. 2Atəŋ gənək əwəlini aɓɗaŋ na: Mərəhək ɗəffəŋ tay nah sit ɗii də ɓoŋgoŋ gəni, tay tak ɗii dapsənən zomorgol sən məlĩ na Roma, tay nah na ndən sən kiyən na Messiyayi* məlĩyi. 3Pilatu assohonək vaska: Əstə məlĩ net Yahudiyenɗe sa? Zezu apsən na: Vaski. 4Pilatu apsit ɗii gugiriɗ net məs dəlveŋge dit ɗii pakə: Nərah mbrayen aza ɗəffəŋ ɓa. 5Amma yaŋ asɓanən wənnani, aɓɗaŋ na: Tay ɓoŋgit ɗii də wərban sit wən aka dələv net pakə, atəŋ daga səka dələv na Galile hagap aka dələv na Zude ha kakaŋka tayaŋka.
Akanənək Zezu aba Herodə
6Adan Pilatu apprəm adawpelin wənna Galile, assohonəka ɗəffəŋ məs Galileyi sa? 7Adan apprəm na səka dələv na Herodə ade, aslənək aba Herodə, vi pay nani Herodə taya Zerusalem. 8Adan Herodə awla Zezu, annekenək zən diiɗa, vi anziyək də man akan kawlani, vi apprəmək məs adawpeleŋ akani, azana wawla Zezu daɗɗa sokene maɓɓani. 9Assohonək wəssoh diiɗa, amma Zezu dəzlan sən ko wən taka ɓa. 10Ɗii gugiriɗ net məs dəlveŋge dit məsənaŋ zəga na ma henziŋ tahəŋ adaka. Awəliyənək də sembe. 11Herodə dit sozeɗ pak anahaŋgək wən azani. Dərɓaga apeleŋ wən azani, agul sənək lukut mogoni, amil gənənək aza Pilatu. 12Pay nani Herodə arəmək bayna də Pilatu, vi laŋ awslereŋ ɓa.
Mətawi kita namta aka Zezu
(Matiye 27.15-26 / Markus 15.6-15 / Zaŋ 18.39—19.16)
13Pilatu akkeletik ɗii gugiriɗ net məs dəlveŋge dit ɗii gugiriɗ net ɗiiyi dit ɗii pakə. 14Apsit na: Kəki suwənək ɗəffəŋka kə nahaŋgək na tay ɓoŋgit ɗiiyi. Ya, nəssohonək abokum, nərah mbrayen azan net zigeɗ məs kə wəliyən aket ɓa. 15Herodə bo dərah mbrayen azan ɓa vi ni amil gən azamə. Ya ɗəffəŋ dəgəɗ mbrayen gala nawbayən ɓa. 16Vini wanərga wanəpani. 17[Vi dewle Pilatu wapəl mədaŋgay taka pay na wəzləra na Paska* pakə.] 18Atəŋgaŋgək wənzlaŋ vamvəl də sembe, ndəɗaŋ pak: Abay ɗəffəŋka appan səm Barabbas. 19Ɗəf nan mugulən a daŋgay vi tay ɓoŋgit ɗii awalaŋ gəla, gəm wəbay gəbaya. 20Pilatu apel sitik əmpa vi aŋgəl kappan Zezu. 21Aɗiyaŋgək giŋger daya daya: Məkpaa'a aka wəlaŋga məzliwrihe. Məkpaa'a aka wəlaŋga məzliwrihe. 22Pilatu anah sitik ma hoko'ən: Mbrayen mi agəɗ di? Nərah mbrayen azan gala nawbayən ɓa. Wanərga asna kappani. 23Amma asɓanənək wənnani, aɗiyaŋgək geŋgere diiɗa, aŋglaŋ dəkpaa'ən gən Zezu aka məzliwrihe. Giŋgere net adayək kini. 24Pilatu atafək wəɗɗa sit an akayaŋ. 25Apanək ɗəf məs muɓoŋgit ɗii məbay gəbaya an məs assohoŋ naka apsitik Zezu dəɗɗanən gən an aŋglaŋ.
Məkpa'ni Zezu aka wəlaŋga məzliwrihe
(Matiye 27.32-34 / Markus 15.21-32 / Zaŋ 19.17-27)
26Yaŋ adan adawkanən Zezu, ɗəf tay məKirene, məs adawyaŋ na Simoŋ, tay zan sə guliyo, armanənka. Dəslan sən gən məzliwrihe dədaw gən dərɓaga Zezu.
27Ɗii diiɗa asbanənka dit gili, məzu həmaŋ də wəska morkoyo ambrani. 28Zezu akpaŋganək haran aketi, amna: Gil na Zerusalem, kədaw həmaŋ viyu ɓa. Məhəm gən ki zukum dit kirtukum. 29Vi pay wade wanahaŋ na: Wənek wasan azet ndarzlayɗe məs duwaŋ ɗaah ɓa, dit bideɗ məs məweɗti ɗaah ɓa. 30Asna wanahaŋ sitin gərmeŋge na: Məɓəsl akamə! Wanahaŋ sitin mosorgeɗe na: Məɗamamə! 31Vi an aɗɗeninik zigeɗis vas aza wəlaŋga mədəkan na, mi nawtakən daɗɗan aza wəlaŋga məklakan di?
32Pay nani akaŋgək zel sula məɗɗaŋ mambray vi kaw beyit də Zezu. 33Yaŋ agapaŋ atəki adawyaŋ na bəbər kiya, akpaa'ənək adaka, dit məɗɗaŋ mambray sula nek pakə, taka dəka van dəzəŋ, taka dəka van zlaɓay. 34Zezu amna: Affuwa, aviyansiti, vi dəsəŋgən məs adaɗɗaŋ ɓa. Awɗakanənək lukut nan awaleŋgit də wəska saasa. 35Ɗii tahəŋ də ziweŋ adaka vi kawla. Ɗii gugiriɗ net Yahudiyenɗe anahaŋgək wən azani, aɓɗaŋ na: Wakoh git ɗiiyi, dəkoh gən ki zən kanɗa, an ndəni Messiya* məs Maŋgəlva a weli kana. 36Sozeɗ bo anahaŋgək wən azani, azaraŋgək azani, apsənənək zəga naw saa ɓaɓlaka, aɓɗaŋ na: 37An əstə məlĩ net Yahudiyenɗena, akoh gən ki zuko. 38Avereŋgək a disiŋ ki məzliwrihe məs akpaa'ənən akan na: Ɗəffəŋki məlĩ net Yahudiyenɗe.
39Ɗəf taka səmbet məɗɗaŋ mambray məkpaa'ən dəndən aranəka, amna: Ya əstə Messiya* ɓa sa? Akoh gən zuk kana kə koh gəm gəni. 40Amma ma sula'ən ahayyanəka, amna: Nok kaw geslne sən Maŋgəlva ɓa sa? Awla nok bo istat adəv kita vanani. 41Nam kam kita nam aslək aza mambray namə, amma nan dəgəɗ mambray ɓa. 42Yaŋ apsən Zezu na: Kəɗum gən akawa pay kəgap adəv məlĩ noko. 43Zezu azlan sənək na: Gesiŋ nədawnah suko, dəpaŋka wakəsok də in adəv məlĩ nawa.
Wəmta na Zezu
(Matiye 27.45-56 / Markus 15.33-41 / Zaŋ 19.28-30)
44-45Yaŋ dəpaska tətaŋ payi, amma guzli titir agəɗək aka dələv pak hagap ler hoku. Pay asərətka, gabaga dəɗaman təki adəv gəla metiŋ na zuli aŋgarək səka dadakən daga sə disiŋ ha a fuŋ. 46Zezu aslanək wəlan də sembe, amna: Aw Affuwa, nəpanək əmpəs naw avoko. Dərɓaga wəpelɗeski, amtəka. 47Adan daya net sozeɗ na Roma awla məs dəgəɗə, agakdakanək Maŋgəlva, amna: Ɗəffəŋ kpak ɗəf təstəssi. 48Ɗii məs dəzoŋ ngaɓa neti vi kawla pakə, adan awlanən məs dəgəɗə, tahəŋ wərganən mekreti. 49Bayneŋgiɗ Zezu, dit gil məs dədasbanən daga sə Galile pak tahəŋ ziw ziw ulanən an məs dədaɗɗa.
Va andəkən Zezu
(Matiye 27.57-61 / Markus 15.42-47 / Zaŋ 19.38-42)
50Yaŋ ɗəf tay iya nan na Zozef, ɗəf mogoni, təstəssi. 51Də sler dit ɗii adəv kuket net ɓa, də wəza net ɓa. Ɗəf na Arimatiyayi, dələv net Yahudiyenɗe, tay ga wəziya na məlĩ na Maŋgəlva. 52Ambatək aza Pilatu, assohonək gəbay na Zezu. 53Apri gənək səka məzliwrihe. Atərək də boɗoko avoŋ gənək adəv magamas an məso'ən adəv milɓe məs məndəki ɗaah ɗəf adak tagay ɓa. 54Dəpas na pay nan go'oy də pay naffete*.
55Gil dəmbataŋ də Zezu daga sə Galile ambataŋgək də Zozeffi, awlanənək magamasə, awlanənək va məvoŋ gən gəbay na Zezu. 56Amilyeŋke akayaŋgək wəleŋɗe məs məŋginti gəm tursan.
Yaŋ affeteŋ pay an naffete, va ma henziŋ anahə.
Currently Selected:
Luka 23: GDRNT85
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.
