Luka 24

Wəsilya na Zezu sətəki əmta

(Matiye 28.1-10 / Markus 16.1-8 / Zaŋ 20.1-10)

1Yaŋ də mompum pum na Alatə, gil nek ambataŋgək a magamasə, akanənək tursan məs akayaŋ. 2Arəhənək gərəm məslaŋgan sə magamasə. 3Atoŋgoŋguk adaka, amma dərəhən gəbay na Ɗəfdaya Zezu ɓa. 4Atapetik aka an məs dəgəɗə. Yaŋ ɗii sula arbanən zit azeti, tahəŋ də lukut azet məzu wiɗ diiɗa. 5Gil nek ageslne'eŋke, aɗamanənək hereti, amma ɗii net aɓɗaŋ na: Vi mi kədaw kayanən ɗəf madaran aweleŋgit ɗii mimtit di? 6Tayaŋ ɓa, asilke. Məɗumon məs apel daga adawsan aka dələv na Galile, amna: 7Say kapsəni Wətən Ɗəf* avet məɗɗaŋ mambray wakpaa'ən aka wəlaŋga məzliwrihe, wasil pay ma hoko'ən səki əmta.

8Yaŋ aɗumonən wənna Zezu. 9Yaŋ azaraŋ səza magamasə, ambataŋgək wənah sit gewleɗ klaw kiyit taka dit ɗii meɓɓet pak wənnet zigeɗiŋki. 10Ɗii məs dəzoŋ wənahaŋ ndəɗaŋgəŋ Mari na Magdala gəm Zannə gəm Mari ma Zakə, gəm gil məs dəda soŋ dənɗaŋ. 11Gewleɗ awlanənək wənnet gul wən ɗar mekeleŋ, dətafnən ɓa. 12Amma Piyer asilke, anzanka, ambatək a magamasə, aɓeke adaka, duwəl zəga ɓa, say boɗoko afuŋ. Yaŋ amndani agətək aka məs dəgəɗə.

Aka tive na Emawus

(Markus 16.12-13)

13Yaŋ, pay nani gewleɗ sula tahəŋ wəmbataŋ awalaŋ gəla na Emawus, faraɗayi gap kilometər klaw kiyən taka də Zerusalem. 14Tahəŋ wəsgaŋ meŋ aka wən məs dəgəɗ aka Zezu. 15Daga dəɓəlaŋ wəgrakən wəpelən ɓa, yaŋ Zezu agapək ambeti tay mbat dənɗaŋ. 16Awlanənka, amma zəga tay dətek daw sənənni. 17Zezu apsit na meŋ na mi kədawzəmaŋ də wədaw di? Yaŋ aziweŋ zit sirip. 18Yaŋ ɗəf taka məs adawyaŋ na Keliyopas azlan na: Malaka kənan a Zerusalem sa? Kəsən məs dəgəɗ adəv wəvoŋgəŋ ɓa sa? 19Assohotike: Mi dəgəɗ di? Yaŋ azlan sənən na: Məs dəgəɗ aka Zezu məs na Nazaret, məs kleŋ metiŋ, də sembeyi adivit wəzaɗe də wəpel aba Maŋgəlva də abet ɗii pakə. 20Ɗii gugiriɗ net məs dəlveŋge namə dit dayaɗe net ɗii namə azəmənək kini, atawaŋgək kita namta akani, a kpaa'ənək aka wəlaŋga məzliwrihe. 21Azam na wasan məzu koh git Israyelɗe. Amma də as pakə, pay hoku yaŋ dəpaŋka zigeɗ net aɗɗaŋ akani. 22Əmpa bo gil suwalaŋgəm atapamənka, na mom pumoŋ pum ambataŋgək a magamasə, 23dərəhən gəbay nan ɓa. Gil net amilyoŋko, anahaŋ səmənək na, maslayɗe arbanənək zit azeti, apsitin na madarani. 24Ɗii meɓɓet suwalaŋgəm ambataŋgək a magamasə, arəhənək zigeɗ net va gil anahaŋ amma ndən sən kiyən, dulanən ɓa.

25Yaŋ Zezu apsit na: Kay Zel məza tahəŋ də wətaf ɓa, dewɗe kədawtafnən an məs kleŋɗe anahaŋ di? 26Ya say an Messiya* azəmək sahayi kan dətoŋ gən adəv gakdak nan ɓa sa? 27Yaŋ apprəman sit an ɗerewelɗe apeleŋ akan pak daga ɗerewelɗe na Moyis ha ɗerewelɗe net məs kleŋɗe pakə.

28Yaŋ adawgapaŋ go'o də walaŋ gəla məs adawmbataŋ agəɗək va wətoŋgo. 29Ayanənək də wənah na: Asok də mənamə, vi pay tay ɓa, dəfɗi kana. Atoŋko kawsan dənɗaŋ. 30Yaŋ asan dənɗaŋ kawzəma, agimik dupeŋɗe, asokonək Maŋgəlva, arɗetike, apsitike. 31Yaŋ heret akolu, asənənka, amma azək səma hereti. 32Yaŋ anahaŋ awalaŋ zit na: Makram dəzla va offo daga adawpel səm aka tive, də wəpprəman səm wənna ɗerewelɗe net məs kleŋɗe nak ɓa sa?

33Pay nani yaŋ asilyoŋ, amilyoŋ a Zerusalem, arihinik gewleɗ klaw kiyit taka, akkalaŋgək dit ɗii məs dəda soŋ dənɗaŋ, 34tahəŋ wənahaŋ: Gesiŋ kpakə Ɗəfdaya asilke Simoŋ awlaka. 35Net bo anah sitinik an məs diri aka tive, va asənən Zezu pay arɗet dupeŋɗe.

Zezu arbanək zən azet gewleɗ nani

(Matiye 28.16-20 / Markus 16.14-18 / Zaŋ 20.19-23 / Wəza net Masləŋɗe 1.6-8)

36Yaŋ adan adawpelenən wənnani, ndən sən kiyən arbanək zən azeti, apsit na: Wasan zam azokum. 37Makret azlaka, ageslne'eŋke, azet na tuyayi awlaŋ. 38Amma apsit na: Vi mi kədaw geslne'eŋ di? Vi mi wəɗum vas asan a mokrokum munokum pak di? 39Mula vaw sula gəni də təllu sula gəni, əntə. Mərəŋguwa, mula, vi Əmpəs tay də sluw walla dit slesleŋɗe va kulanən nəsaw dəndən ɓa. 40Yaŋ adawnaha, arbanək van sula gəni də təllən sula gəni. 41Zit annekək sawɓa, agətaŋgək sawɓa, ha dəɓapaŋ wətaf nən tagay ɓa. Adan tahəŋ gərəŋ gərəŋ tagay, apsit na: Zəga naw zəm taya vokum aŋ sa? 42Akisənənək kilif məpsani. 43Aboŋguk səzani, ampərək ama hereti. 44Yaŋ amna: Aŋki məs nədawnah sukum daga nədaw saw də munokum naka. An məverin akaw adəv ma henziŋ na Moyis də ɗerewelɗe net məs kleŋɗe də gəlya na Davit pak dəsan gən gesiŋ. 45Yaŋ akol maɗuleti dəpprəmanən gən wənnet ɗerewelɗe, 46apsit na: Vaŋki va məverin: Messiya* wazəm saha, wasil səkəti əmta aka pay ma hoko'ən, 47vi dərbanən gən wənna tubi na viyan mambray dərbə gən azet ɗii pak də iya nani, dətəŋ daga sə Zerusalem. 48Munokum təsaydawa na wənnəŋka. 49Wanəslən sukum an məs Affu aynan wənnani. Amma məsoŋ awalaŋ gəla metiŋ ha an sembe na disiŋ adek akokum kana.

Wəpeŋ na Zezu a disiŋ

(Markus 16.19-20 / Wəza net Masləŋɗe 1.9-11)

50Yaŋ, Zezu agil suwalaŋ gəla metiŋ, akek kla Baytaniya. Aslanək van sula gəni, agəɗ sitik zəzaya. 51Daga daya adaw gəɗ sit zəzaya, awɗakək dənɗaŋ, apeŋgək a disiŋ. 52Net bo, dərɓaga azuliyaŋ sənənni, amndoŋguk a Zerusalem də wənneken ziti. 53Tahəŋ wəsbanən wəmbat adəv gəla metiŋ na zuli pay pakə, tahəŋ wəɗiyən ki Maŋgəlva, tahəŋ wə gakdakanəni.

Currently Selected:

Luka 24: GDRNT85

Highlight

Copy