Luka 22
22
Kuket narma Zezu
(Matiye 26.1-5 / Markus 14.1-2 / Zaŋ 11.45-53)
1Yaŋ pay nawzləra dit dupeŋɗe məza woɗo ɓa, məs adawyaŋ na Paska* go'oy wəzani. 2Ɗii gugiriɗ net məs dəlveŋge dit məsənaŋ zəga na ma henziŋ akayaŋgək kuket nawbay Zezu, amma tahəŋ wə geslne'eŋ sitin ɗiiyi.
Zuda azəmək ki Zezu
(Matiye 26.14-16 / Markus 14.10-11)
3Yaŋ Satan atoŋ amakra Zuda məs adawyaŋ na Iskariyot, məs suweleŋgit gewleɗ klaw kiyit sula. 4Zuda ambatka, aslerik dit ɗii gugiriɗ net məs delveŋge gəm dit ɗii gugiriɗ net sozeɗ məgaŋ gəla metiŋ naw zuliya*, aka wənna kuket narma Zezu. 5Annekenənək ziti, aslereŋgək kapsən deleɗi. 6Dərɓaga wəsler neti, Zuda akayək tive narma Zezu də haɗama ɗii adaw sənən ɓa.
Wəzaɓan zəga nawzəm na Paska*
(Matiye 26.17-25 / Markus 14.12-21 / Zaŋ 13.21-30)
7Pay wəzləra net dupeŋɗe məza wuɗo ɓa, məs nawtaw wəla məsgəla na Paska. 8Zezu aslənək Piyer də Zaŋ, apsit na: Mədoŋ məzaɓan zəga nawzəm na Paska, məzəm gəni. 9Assohnənka: Aŋga kəŋgəl məzaɓan gən zəga nawzəm vandi? 10Azlansitike məpprəma, an kətoŋgoŋguk awalaŋ gəla metiŋ, wakəlmaŋ də ɗəf dazan sə məlpa də hinziw akani. Məsban ha eŋgil an adawtoŋ pakə, 11mənah səna: Mərbə zəga amna ngay gəla nawzəm way na Paska naw dit gewleɗ naw di? 12Warban sukum gəla metiŋgin, məɓayən, dit zigeɗ pak məzaɓet adəvən, məzeɓet zigeɗ pak adaka. 13Adoŋko, arəhənək zigeɗ pak va Zezu anahsiti, azaɓanənək dupeŋɗe na Paska.
Way an salala*
(Matiye 26.26-30 / Markus 14.22-26 / 1 Korintiyen 11.23-25)
14Adan pay nan agəɗə, Zezu atəŋgək wəzəm dit masləŋɗe. 15Apsit na: Nəŋgələk nəzəm gən way na Paska* də munokum sawɓa nəzəm gən saha dərɓagani. 16Intatə nah sukum nəzəm na ɗaah ɓa ha say an məɗama nan arbanək zən adəv məlĩ na Maŋgəlva. 17Agimik mbel nani, asokonək Maŋgəlva, amna: Məgim mbeliŋki muɗeketi awalaŋ zukum, 18ya əntatə nah sukum abeska nəsə na ɗaah mbazla net wəleŋɗe ɓa say an məlĩ na Maŋgəlva adeke. 19Dərɓagani agəmək dupeŋ, asokonək Maŋgəlva, arɗanəka, apsitike amna: Aŋki gəɓa zuwa [məpsən vikum, məɗɗa vi kəɗumonən gən wənnawa. 20Vaski bo agəm zəga naw saa dərɓaga dupeŋ, apsitike, amna: Zəga naw saaŋka ndəni winan wən meleketeni, an məs Maŋgəlva aɗi də mbel nawa, məs dənzoŋ vikum.]
21Amma yaŋ, ɗəf nawzəm Kiyu tay zəm də in aŋka. 22Wagəɗə Wətən Ɗəf* wamtə va Maŋgəlva a zaɓanni, amma wakpaŋ bonoy aza ɗəf dəl zəm kiyən. 23Atəŋgaŋgək wəssohon ziti, naway səmbet naɗɗan kandi.
Naway nawsan daya di?
24Yaŋ wəbay ma agəɗ awalaŋ zit mesliŋɗe aka wənna naway naw san daya di. 25Zezu apsit na: Milyeŋge net ɗii də məza zəm məlĩ neti, dit migil sembe aŋglaŋ ɗii diyenən gən na məɗɗaŋ wəza mogoni. 26Amma nokum, vaski ɓa, say an dəgəs suwalaŋkum ndəni dədawsan daya, daya bo dəsan məgəɗ wəza. 27Yo naway daya di, məs dəsan wəzəm sa, walla məgəɗ sən wəza? Məs dəsan wəzəməŋki ɓa sa? Vi vaski əntatə awalaŋ kum va məgəɗ wəza.
28Munokum tat də in pay pak adəv wəsla nawa. 29Nəɗi sukumək məlĩya va Affu aɗi suwa. 30Wakə zəmaŋ, wakə saaŋ atəki naw saa zəga naw adəv məlĩ nawa, wakəsoŋ aket mazeŋgeɗ na məlĩya, wakə tawaŋ kita aket ma əlfa net Israyelɗe klaw kiyit sula.
Zezu də Piyer
(Matiye 26.31-35 / Markus 14.27-31 / Zaŋ 13.36-38)
31Ɗəfdaya amna: Simoŋ, Simoŋ apprəma, Satan assohuk sembe kaɓlokum, kaw seŋgerkum va adaw seŋgereŋ haya, vi kawɗeket keselme də haya. 32Amma nəkkamək viko, vi wətaf nok adagrak ɓa. Pay kəl tubiya wakisɓet milmiŋgiɗko. 33Piyer apsən na: Daya, əntatə zaɓan zu nawmbat disi, ko a daŋgay, ko ha atəki namta. 34Zezu apsən Piyer na: Intatə nah suko ha gap gəmnda dəɓəl əhəm paah man taka ɓa wakə nah na kəsənu ɓa təl hoku.
Gabal net deleɗi, zəga nawzəm aka tive, gəm kafahi
35Yaŋ Zezu apsit na: Pay nəslən kum məza deleɗ ɓa məza zəga nawzəm aka tive ɓa, məza hensek ɓa, zəga tay də pəl sukum sa? Aɓɗaŋ na ko suɗike də pəl səm ɓa. 36Apsit na: Amma kakaŋ na vaski ɓa. Ɗəffan dit deleɗi di gime, ɗəf də zəga nawzəm aka tive də gəma. Ɗəf məs tay də kafahi ɓa, də vəl lukut nani dəlbaah gən kafahi. 37Nədawnah sukum na vi an məverin akaw na say dəsan gən gesiŋ: Məŋɗani aweleŋgit məɗɗaŋ mambraya. Vi an məverin akaw pak tayə zani. 38Aɓɗaŋ na: Ɗəfdaya, kafahiɗ yeŋ sula. Apsit na: Məkki.
Zezu azuliyək a Gesemane
(Matiye 26.36-46 / Markus 14.32-42)
39Adan Zezu agili, ambatək aka gərəm na hereme va an asərəkə. Gewleɗ nan asbanənka. 40Yaŋ agap atəki nani, apsit na: Məkkaman Maŋgəlva vi kədawtoŋgoŋ adəv wərak ɓa. 41Yaŋ ambat səzet faraɗa nan va wəskan kuna, akdukuk takparani, azulika amna: 42Əbba, an kəŋgəlka azar gən bonoy naw saaŋ səzawa, amma an məs nəŋgəl adaɗɗa ɓa, say an kəŋgələ. 43[Yaŋ maslay sə disiŋ arban zən azani vi kasɓani. 44Adan wəɗum assanək sawɓa, azuliyək də sembe, hanza nan akpaŋgək va mbel məzimaŋ aka dəlva fuŋ.]
45Dərɓaga azuliyə, asilke, adek azet gewleɗi, arihik məleŋgti vi zit sirippi. 46Apsit na: Vi mi kəleŋgeŋ di? Məsili, məkaman Maŋgəlva vi kədawtoŋgoŋ adəv mambraya.
Va armanən Zezu
(Matiye 26.47-56 / Markus 14.43-50 / Zaŋ 18.3-11)
47Adan Zezu adawpel tagay ɗii azoŋko. Zuda məs naweleŋgit gewleɗ klaw kiyit sula akiyike. Azarək aza Zezu aɓeke akani (va ɗii net adaɗɗaŋ). 48Zezu apsən na: Zuda də wəɓe akani kəl zəm ki Wətən Ɗəf* sa? 49Adan məzəsoŋ də Zezu awlanən məs dədaŋgla wəɗɗa, aɓɗaŋ na: Ɗəfdaya məbil də kafahi naməŋ sa? 50Ɗəf taka səmbet abələk gawla na daya net məs dəlveŋge, atawək sləman dəka van dəzəŋ. 51Amma Zezu amna: Məppani məkə. Arəŋ gənək sləma ɗəf naka anzaɗ sənka.
52Ɗərɓagani Zezu anah sitik ɗii gugiriɗ net məs dəlveŋge dit ɗii dayaɗe net məgaŋ gəla metiŋ naw zuliya*, dit ɗii gugiriɗ dəzoŋ wərma nəni: Kəzoŋ də kafahiɗi dit zleŋɗe, vi kawrəmu va məvoŋ tive sa? 53Intatə də munokum pay pak adəv gəla naw zuliya kərəm wən ɓa. Amma aŋki pay nokum də sembe na guzliyo.
Va Piyer anah na dəsən Zezu ɓa
(Matiye 26.57-58,69-75 / Markus 14.53-54,66-72 / Zaŋ 18.12-18,25-27)
54Yaŋ dərɓaga arman Zezu, akanənək eŋgil ana daya net məs dəlveŋgeda, Piyer asbanək faraɗa. 55Armanənək offo adaŋla daka, asoŋguk amani. Piyer bo asanək awaleŋti. 56Waŋ goruk, məgəɗ wəza adəv gəla nani tulak taya maŋgava offo, harat akan sek tulaka, təmna: Ɗəffəŋ pak asanək də Zezu. 57Piyer azelenik wənnani, amna: Nəsən ɗəffəs ɓa wakə. 58Dərɓagan suɗike ɗəf maɓɓan awlaka, amna: Nok bo istat dit ɗii veti. Amna: Kaya ɗəffa, əntat aret ɓa. 59Dərɓagan va ler taka ɗəf maɓɓan asənəka, amna: Nəsənəka, ɗəffəŋ asanək dəni, vi məs Galileyi. 60Piyer azlanəka: Ɗəffa nəsən an va kədawnah ɓa. Daga dəgrak wəpel ɓa gəmnda ahəmka. 61Ɗəfdaya akpaŋganək harani awlak Piyer. Yaŋ aɗumon wən məs Ɗəfdaya anahsən laŋ nak na: Daga gəmnda dəɓəl həm paah man taka ɓa wakə nah na nəsənuk ɓa təl hoku. 62Piyer agilke, ahəmək dit sin en tuwãh diiɗa.
Anahaŋgək wən azani də wərgani
(Matiye 26.67-68 / Markus 14.65)
63Yaŋ ɗiiyen məs dərmanən Zezu anahaŋgək wən azani, arganənka. 64Azəɗaŋgək zəga akani, assohonənka: Asəna naway dərguk di? 65Anahaŋgək wən azan də wən temtemi.
Zezu taya ba kita
(Matiye 26.59-66 / Markus 14.55-64 / Zaŋ 18.19-24)
66Adan təki adaŋgə, ɗii gugiriɗ net Yahudiyenɗe dit dayaɗe net məs dəlveŋge gəm məsənaŋ zəga na ma henziŋ, akkalaŋka, akiyənək Zezu aba wəsler an metiŋgin neti. 67Aɓɗaŋ na: An əstə Messiya* anah səmə. Zezu azlansitike: An nənah sukumək na: Kətafənən na ɓa. 68An nəssohokumək bo kəzlanən na ɓa. 69Abeŋka Wətən Ɗəf* wasan aka va dəzəŋ na Maŋgəlva məs də sembe. 70Ndəɗaŋ pak aɓɗaŋ na: Nok na Wətən Maŋgəlva* kənan sa? Azlan sitike vaski. 71Yaŋ aɓɗaŋ na: Wəray nam tay nassoh saydawa əmpa sa? Mənam sən kiyəm məpprəmək səmani.
Currently Selected:
Luka 22: GDRNT85
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.
