Luka 21

Va guluk na gəbay məs sahaŋ təpsən zəga sən Maŋgəlva

(Markus 12.41-44)

1Yaŋ Zezu aslan harani, awlek məs aryeɗ tahəŋ wəɗiyaŋ deleɗ adəv akoti net deleɗi. 2Awlətək guluk na gəbay məs sahaŋkə, təsgək koɓo sula tamə. 3Yaŋ anah na: Gesiŋ nədawnah sukum: Guluk məs sahaŋ kəŋkə, təɗiyək day kiyit ɗii pakə. 4Vi neti aɗiyaŋgək suɗike səza arya net an diiɗa, amma guluk kəŋkə, ko vi təsat məzuraykə, təɗiyək arya nat pak an məs təl zəm dəndən.

Zezu arbanək va adaɓzluwən gəla metiŋ naw zuliya*

(Matiye 24.1-2 / Markus 13.1-2)

5Yaŋ ɗii meɓɓet adawpeleŋ wənna gəla metiŋ naw zuliya, va mə bay sən gawla dit kuneŋge gəm dit zigeɗ məɗiyit sən Maŋgəlva. Zezu amna: 6Pay maɓɓan wade, an məs kulaŋgəŋ pak waɓəzlə, kuwən apəl na aka kuwən maɓɓan ɓa.

An dədazan dabəŋ ki wagrak dəlva

(Matiye 24.3-14 / Markus 13.3-13)

7Assohonənka: Ɗəfdaya dewɗe zigeɗis adaɗɗaŋ di? Mi narban na zigeɗis go'oŋ aza wəɗɗaŋ di?

8Zezu azlanka: Məzi zukum, vi al mbəɗokumən dərwa ɓa. Vi ɗii diiɗa wazoŋ də iya nawa, wanahaŋ na: Əntə Messiya* pay nan go'oy. Kədasbetin ɓa. 9An kəpprəmənək wənnalpa wəɓoŋ net ɗiiyi. Kədaw geslne'eŋ ɓa, vi say zigeɗis dəzoŋ gən dabəŋ, amma wəgrak dələv tay go'ləŋ ɓa. 10Yaŋ apsit na: Ɗii meɓɓet wagayaŋ dit ɗii meɓɓeti, məlĩ maɓɓan wakayaŋ məlĩ maɓɓani. 11Dəlva fuŋ waɓəl diiɗa gəm gbəgbaɗe waɗɗaŋ diiɗa də maaya wagəɗ a təki temtemi. Sə disiŋ adazoŋ zigeɗ na gəttaketi dit sokeneɗ diiɗa dədaɗɗaŋ.

12Amma daga dəɓəlaŋ ɓa, warum kuməni wazəm gukumən saha, wakukumən abet ɗiiyen dayaɗe net gəleɗe nawpel wənnet Yahuɗiyenɗe, was gokumən a daŋgay, wakukumən abet milyeŋge dit ɗii gugiriɗ na dəlva, vi wənnawa. 13Zigeɗis pak wazoŋ sukuməni vi kapsukum tive naɗɗa saydawa akawa. 14Mərma wənnan a mokrokum, kəda ɗumoŋ va kədawkohoŋ ɓa. 15Vi wanəpsukum mokum də maɗula, ha məzu zel kumən aɓapaŋ na wəbayaŋ ma də munokum ɓa də wə day kikum ɓa. 16Ya ko migil kum ɗit milmiŋgiɗ kum gəm hilfiŋgiɗ kum gəm bayneŋgiɗ kum wazəmən kikum, wabeyin ɗii meɓɓet diiɗa suwalaŋkum. 17Ɗii namba dələv pak wazelkuməni viwa. 18Amma ko muhur kikum taka azə naɓa. 19Də wəsok zukum wakukoh gitin zeŋgillekum.

Va məzla Zerusalem

(Matiye 24.15-21 / Markus 13.14-19)

20An kuleninik ɗii naw gay akaraŋgək ki Zerusalem, asna məsən kana wənnawzlan go'oy. 21Pay nani ɗiiyen na Zude dənzoŋ aket gərmeŋge, ɗiiyen na Zerusalem bo dəgilyoŋ, ɗiiyen nawra adamndoŋ awalaŋ gəla ɓa. 22Dəpas wakpaŋ pay na bonoy vi kagrak an məverin. 23Midi bonoy azet gil dədawayɗe dit məzu waɗɗaŋ pay nani. Vi wəzəm saha də wəda gədəv na Maŋgəlva wasan aket ɗiiyiŋki. 24Kaw beyti də kafahi, kawketi a daŋgay anet ɗii da pakə. Ɗii melekeɗ watafən Zerusalem hagap pay an net adagraka.

Wəziya na Wətən Ɗəffa*

(Matiye 24.29-31 / Markus 13.24-27)

25Zəga tay dəgil narban ara paya, ara təla ara ngərzla. Aka dəlva fuŋ bo geslne wasan azet ɗiiyi, ha asənən na an adaɗɗaŋ ɓa, wageslne'eŋ vi ɓaɓəlma məlpa dit vovolumɗe net iŋkile. 26Ɗii wamtaŋ vi geslne məs dəldazan aka dəlva, vi gakdakɗe na disiŋ waɓlaŋ. 27Pay nani wawlanən Wətən Ɗəf dazan aka slay buwən a disiŋ də sembe də gakdak nani. 28An zigeɗ atəŋgaŋgək wəzoŋ, mula lewlewi, məsla zukum, vi wəkoh nokum go'oy.

Wən məkpaŋga də sukoyo

(Matiye 24.32-35 / Markus 13.28-31)

29Zezu apel sitik wən məkpaŋga: Mula sukoyo dit wəleŋɗe pakə. 30An kulanənək andəfka kəsənənək na mənzi go'oy. 31Vaski, an kulanənək zigeɗiski, məsən kanna məlĩ na Maŋgəlva go'oy. 32Gesiŋ nədawnah sukum: Ɗiiyən mederet kakaŋka amtaŋ na zam sa zigeɗis dəɗaŋgən ɓa. 33Disiŋ də dəlva fuŋ pak wagrakaŋ, amma wəpel naw agrak na ɓa.

Məga zukum

34Məga zukum vi mokrokum adaɗum də wənna wəzəm ɓa, də wənna saa ɓa, də ula zəga na duniya ɓa, vi pay nan adazan akokum, mədəgbirzike ɓa. 35Vi wade aka dəlva fuŋ pak va zəva. 36Vi vaski məfɗaahə, məzuli pay pakə, vi kərəhaŋ gən sembe nawkoh səmet zigeɗ dədazoŋgis pakə, kə ziwəŋgin aba Wətən Ɗəffa.

37Kapaya Zezu tayərban zəga adəv gəla metiŋ naw zuliya* dəfəɗ bo tay voŋ aka gərəm məs adawyaŋ na gərəm na hereme. 38Də mompumo ɗii pak tay mbataŋ azan adəv gəla metiŋ naw zuliya vi kapprəm wən səmani.

Currently Selected:

Luka 21: GDRNT85

Highlight

Copy