Luka 20

Zezu səŋga rəh sembe nan di?

(Matiye 21.23-27 / Markus 11.27-33)

1Yaŋ pay maɓɓani Zezu tay ərban wən sit ɗii adəv gəla metiŋ naw zuliya*, anah sitik halabara neneke. Dayaɗe net mes dəlveŋge dit məsənaŋ zəga na ma henziŋ gəm ɗii gugiriɗe, 2azoŋko, assohonənka: Anah səmə də sembe na mi kədaɗɗe zigeɗiŋ di? Nawa dəpsuk sembe nan di? 3Zezu azlan sitik na: Naw van wanəssohokum wən taka. Mənah suwa: 4Naway dəslən Zaŋ məgəɗ baptem di? Maŋgəlva sa, walla ɗiiyi? 5Atəŋgaŋgək wəbay ma awalaŋ zit də wənah na: An mənahək na: Maŋgəlva, dəsləna, wasohomna: Ya vi mi kətafnən ɓa di? 6Amma an mənahək na ɗiiyən dəslənnəni, vas bo ɗii waskəmən dit kuneŋge, vi asəŋgənək Zaŋ məs kleŋgi. 7Yaŋ azlanən na: Məsən təki ade ɓa. 8Zezu apsit na: An vaski na naw van tam nənah sukum na məs sembe naɗɗe zigeɗis dəndən ɓa.

Wən məkpaŋga net məzən seŋ mbreyiti

(Matiye 21.33-46 / Markus 12.1-12)

9Dərɓagan ləŋ Zezu atəŋgək wəpel wən məkpaŋgaŋ sit ɗiiyi: Ɗəf agəɗək guli net wəleŋɗe, apanək avet məzən seŋ, ambatək malaka, anziyək dədaka. 10Yaŋ pay naw ɓu uwa net wəleŋɗe agapə, aslənək gawla nan azet məzən seŋ, vi dəpsənən gən haran nani səket wəleŋɗe. Amma məzən seŋ avər nənək masləŋ, amil gənənək van mekeleŋ məzapsən zəga ɓa. 11Affən guli net wəleŋɗe aslənək gawla nan maɓɓani, avərən kəmpa amil gənənək van mekeleŋ. 12Aslənək mohoko'it əmpa, aɗiyaŋ sənənək vamviya, arɓəh nənka. 13Affən guli net wəleŋɗe amna: Mbar nədaɗɗa di? Wanəslən wətu an nəŋgələ, nan wagakdakanəni. 14Amma adan məzən seŋ awlanəni, apeleŋgik awalaŋ zit na: Məzəm gəla yaŋ dəda zanəŋka, məbay səmə guli dəsan gən kanamə. 15Akanənək sə guli ama poho, abayənka.

Yaŋ Zezu assohu, vas na affən guli net wəleŋɗe madawgiɗ sit di? 16Wade, wabey məzən seŋgi, wappan guli nan avet ɗii meɓɓeti. Adan ɗii apprəmən vaska, aɓɗaŋ na agəɗ na vas ɓa. 17Amma Zezu awleke amna: Ya an məverin mbar aŋgəl wənah di?

Kunəŋ məs mərkaŋ gəla asgaŋgəŋka,

awla ndəni dəkpaŋ kuwən na sləma.

18Ko naway dəsbər səka gərəməŋka warah vamviya. An abətək aka ɗəf bo watakaɗ va kəppa.

Wən nafaɗ garama sən məlĩya

(Matiye 22.15-22 / Markus 12.13-17)

19Yaŋ məsənaŋ zəga na ma henziŋ dit ɗii gugiriɗ net Farisiyenɗe* aŋglaŋ wərmanən Zezu dəpaska, amma a geslene'eŋgək viyit ɗiiyi, asənənək pak wən məkpaŋgaŋ Zezu apeləŋ eketi. 20Atəŋgaŋgək wəga Zezu, asləŋgaŋgək ɗiiyi vi kaw ki sit an məs adaɗɗa. Ɗii net aɗɗanənək zit va ɗii tektekki, vi karma Zezu də wəssoho kapsit ɗii na governer. 21Assohonənka: Mərbə zəga, məsənək an kədarba, də an kədawpele as pak goŋgayi. Ɗii pak aslaŋgək daka daka azoko, is tatərban tive na Maŋgəlva də goŋga. 22Ma henziŋ atatək əpsən zomorgol sən məlĩ na Roma sa walla də tak ɓa? 23Zezu asənək vurum neti, apsit na: 24Mərban su sulay vani. Foto na naway də iya məverin akanəŋ di? Azlan nənək na: Na məlĩ na Romayi. 25Apsit na: Məmndagan sən an dəslə sən məlĩ na Roma, məpsən Maŋgəlva bo an dəslə səni. 26Dərəhaŋ wənnarman abet ɗii ɓa. Amma agətaŋgək aka wəzlan nani, aɓətaŋka.

Wəssoh aka wənna wəsilye net ɗii mimtiti

(Matiye 22.23-33 / Markus 12.18-27)

27Yaŋ ɗii meɓɓet səmbet Sadusiyenɗe. (Net tahəŋ wənahaŋ na Wasilya tay səka əmta ɓa.) Assohonənək Zezu: 28Mərbə zəga, Moyis aver səmək na: An ɗəf amtəka, apatək guluk nani tuwa ɓa, say məlmən dəzəm gəla zata, dəɗi sən gən zev məlməni. 29Kirin tahəŋ də məlma zit buhul. An daya akayək gulku, yaŋ amtə məza duwaŋ ɓa. 30Masula'it azəmək gəla azata, ma hoko'it bo azəmək gəla zata. 31Ha ndəɗaŋ buhul pak aɗitənka amtaŋgək məza ərəhaŋ kirin ɓa. 32Yaŋ guluk tam təmtə. 33Kaŋ as kana pay wəsilyo səkəti əmta na kawsat kaguluk na nawa səmbet kandi? Vi ndəɗaŋ buhul pak aɗitənka.

34Zezu azlan sitik na: Zel dit gul annaka dəlva wagəmən ziti. 35Amma ɗiiyen məs dəgapaŋ nawsilyoŋ səki əmta nasoŋ də zeŋgillet aka dələv an dəda zani, agəməna zit ɓa. 36Vi amtaŋ na əmpa ɓa. Wagulyoŋ va maslayɗe, wakpaŋgaŋ va kirtin Maŋgəlva vi asilyoŋgək səki əmta. 37Moyis anahək kotakə ɗii mimtit wasilyoŋ də zeŋgille. Atəki adawpel wənnet dezeze, amna: Ɗəfdaya Maŋgəlva na Abraham, Maŋgəlva na Isak, Maŋgəlva na Zakub. 38Maŋgəlva tay va Maŋgəlva net ɗii mimtit ɓa, amma Maŋgəlva net ɗii medereti, vi ɗii pak dəndən ada soŋ medereti. 39Ɗii meɓɓet səmbet məsənaŋ zəga na ma henziŋ aɓɗaŋ na: Mərbə zəga kəpelik mogoni. 40Geslne adek dassoh wən maɓɓani.

Messiya* gəm Davit

(Matiye 22.41-46 / Markus 12.35-37)

41Zezu apsit na: Mbari adawnahaŋ na Messiya Wətən Davitti* di? 42Vi Davit sən kiyən anahək adəv gəlya nan na:

Ɗəfdaya anahsən Ɗəfdaya naw na:

Asok aka va dəzəŋ nawa,

43hagap nəvoŋgiti gən məzu zel kun amba tulko.

44Davit ayak na Ɗəfdaya ya mbari Krestu ada kpaŋ wətən di?

Məsla zukum səzet məsənaŋ zəga na ma henziŋ

(Matiye 23.1-36 / Markus 12.38-40)

45Zezu apel sitik gewleɗ keret ɗii məzapprəmaŋ wənnan pakə, amna: 46Məga zukum səzet məsənaŋ zəga na ma henziŋ, məŋglaŋ wəbal də lukutɗe zezekɗe. Aŋlaŋ ɗii disɗetin gən agilet lumiɗi. Tay weleŋ təki nasa mogon day pak adəv gəla nawpel wənnet Yahudiyenɗe, atəki nawzəma, tahəŋ wəkayaŋ təki mogon naso. 47Tayəɗɗaŋ kuket aket gil net gəbayɗe, taŋ zəmən gəla neti, tayənziyaŋ diiɗa aka wəzuli neti vi ɗii duleniŋgən va ɗii na Maŋgəlva. Warəhaŋ kita an tatuwãha.

Currently Selected:

Luka 20: GDRNT85

Highlight

Copy