Luka 19

Zezu də Zase

1Yaŋ Zezu agul a Zeriko, atoŋ kla awalaŋ gəla. 2Yaŋ ɗəf məs arya iya nan na Zase, daya net duwanɗe taya daka. 3Akayək tive kawla naway Zezu di, amma dəɓap kawlan ɓa vi maŋgərzlayi. 4Anzanək abe, apeŋgək aka korvoŋ vi kawlani, vi Zezu dədak al toŋgo. 5Adan Zezu agap amba korvoŋ, aslanək haran, apsən na: Zase agəm zuko apriki, vi dəpaŋ zu annekək nadaw eŋgil anok da. 6Zase nak agəmək zən apirike, atafək də zən neki. 7Adan ɗii awlanən vaska, aɗɗaŋgək wərwərə, aɓɗaŋ na: Yaŋ ambat wəsan eŋgil ana məs mambray da. 8Amma Zase aziwik aba Ɗəfdaya, amna: Ɗəfdaya wanuɗakan arya naw daka daka dit məzurayɗe. An ɗəf tay məs nəgəm zəga nan də vurum bo wanəmnda gan sən təl poɗo. 9Zezu apsən na: Wə koh atoŋguk eŋgiləŋ dəpaŋka, vi nan bo wətən Abrahammi. 10Wətən Ɗəf* ade na vi kawkayani, kaw koh gən an dəzə.

Wən məkpaŋga də sulay na meleŋge

(Matiye 25.14-30)

11Ɗii apprəmənək wəpel na Zezu, azet na məlĩ na Maŋgəlva go'oy nazani vi tay go'o naw gap a Zerusalem. Vini anah sit wən məkpaŋga maɓɓani. 12Amma ɗəf məs zemvit ɗii gakdakɗe ambatək aka dələv faraɗa kaw kay məlĩ adaka, kaw milyani. 13Ayek ɗii klaw səmbet gewleɗ nani apsitik sulay na meleŋge taka taka, apsit na: Məgəɗ terere dəndən hagap pay naza nawa. 14Amma ɗii nan azel nənka, asləŋgaŋgək masləŋɗə dərɓagani vi dənahaŋ gən na: Məŋglu na ɗəffəs ka məlĩ nam ɓa.

15Adan aɗinən ka məlĩya, adek aka dələv nani. Ayek gewleɗ nan məs apsit sulayɗe vi kawsən an məs arəhaŋ də terere. 16An dabəŋ adeke amna: Daya nawa sulayɗe nek awaŋgək klaw aketi. 17Daya nan apsən na: Lawi, gawla mogok kənani kəgəɗək wəza aka tələn də zəga suɗike, asok məlĩ aket walaŋ gəleɗe gugiriɗ klaw. 18Ma sula'ən adeke, amna: Daya nawa sulayɗe nok awaŋgək aket sle. 19Apsən na: Nok bo azəm məlĩ aka walaŋ gəleɗe gugiriɗ sle. 20Ɗəf maɓɓan bo adeke, amna: Daya nawa sulay nok yaŋka, nətərək adəv kesekese. 21Naw geslne aduwək suko, nəsənəka ɗəf tattuwãh kənani, wakə gəm zəga ko kəɗi zəga ɓa, wakəbələ ko kəslgə ɓa. 22Daya nan apsən na: Wanətaw kita akok də wəpel na moko, gawla mbrayen. Kəsənək ɗəf tattuwãh nani, wanəgəm zəga ko nəɗi zəga ɓa, wanəbələ ko nəslgə ɓa. 23Vi mi kəɗi su sulayɗe naw abaŋ ɓadi, kəta nəmilik na nirih na də riba ɓa sa? 24Məmoh sulay vani, məpsən ɗəffan dit sulayɗe klaw neki. 25Apsənən na: Ɗəfdaya, tay dit sulayɗe klaw. 26Nənah sukumko, kapsəni ɗəffan də zəga, amma ɗəffan tay də zəga ɓa an navan suɗike kaw gəməni. 27Məzuzel wən dəŋglaŋ nəzəm gən məlĩ aket ɓa, məkiye, məbey abawəŋka.

Zezu atoŋguk a Zerusalem

(Matiye 21.1-11 / Markus 11.1-11 / Zaŋ 12.12-19)

28Dərɓaga wəpeliska Zezu taya bet ɗiiyi, ambatək a Zerusalem. 29Adan agap go'o də Baytifage də Baytaniya, amaŋgava gərəm na hereme, Zezu asliŋgik gewleɗ nan sula, apsit na: 30Mədoŋ awalaŋ gəla ana bokum ndaka. An kə guluŋko, wakərəh tən bəlatək nat koruk tat minata məs ɗəf dəpeŋ ɗaah akat ɓa. Məpəlta, məkita. 31An ɗəf assohokumək na kami kədawpəltən di na, mənah səna: Wəray Ɗəfdaya taya zata. 32Masləŋɗe ambataŋka, arəhənək zigeɗ vet pak va Zezu anahsiti. 33Yaŋ apəltən korku, migilit koruk apsitin na: Vi mi kədawpəltən koruk di? 34Azlanənək na: Wəray Ɗəfdaya taya zata. 35Akitənək koruk sən Zezu, abasənək lukutɗe net akata apaŋ gənənək Zezu akata. 36Adan atəŋ wəmbata ɗii abasənək lukutɗe net aka tive. 37Adan azar aza Zerusalem dəka tive məs dədawprike səka gərəm na hereme, gewleɗ pak zit anneke, atəŋgaŋgək wəɗi ki Maŋgəlva, də wəlet daya daya, vi sokeneɗ məs awlaŋ pakə. 38Aɓɗaŋ na: Zezay aka məlĩ məs dəde də iya na Ɗəfdaya, zam a disiŋ gakdak aza Maŋgəlva an də day pakə.

39Farisiyenɗe* meɓɓet naweleŋgit ɗiiyi apsənən Zezu na: Mərbə zəga, anah sit gewleɗ nokuŋ dəɓətaŋ. 40Zezu azlanəka: Intat nah sukum, an aɓətaŋka, kuneŋgeŋ waɗiyaŋ geŋgere.

Zezu ahəm gənək Zerusalem

41Adan Zezu azar amaŋgava walaŋ gəla metiŋ, awlaka, ahəm gənəka. 42Amna: Va kəsənək nok van bo, awani zam nok pay nan di? Amma kakaŋka məɗamayi ama horoko kulana ɓa. 43Pay wade akoko, məzuzel kun wakdahaŋ kiko də gəbay ziti, wampanən moko, wahãslkun kəla təki pakə. 44Wazokuni, is dit kirtuk pakə. Appaŋ sukun na ko kuwən aka kuwən maɓɓan ɓa, vi kəsən pay məs Maŋgəlva ade wəbaah suk ɓa.

Zezu adəv gəla metiŋ naw zuliya*

(Matiye 21.12-17 / Markus 11.15-19 / Zaŋ 2.13-22)

45Zezu aguluk adəv gəla metiŋ naw zuliya, atəŋgək wərɓih məɗɗaŋ terere, 46apsit na: Məpprəma va an məverin laŋka: Gəla naw na gəla na zuliyi, amma kəɗɗanənək ka bətəŋ net məvoŋgoŋ tive.

47Tay wərban wən pay pak adəv gəla metiŋ naw zuliya. Ɗii gugiriɗ net mes dəlveŋge dit məsənaŋ zəga na ma henziŋ gəm ɗii tek tek naweleŋgiti. Akayaŋgək tive nawbayni. 48Amma aw sənən va adarmanən ɓa, vi ɗii pak tahəŋ wəgayaŋ də wəpprəm wəpel nani.

Currently Selected:

Luka 19: GDRNT85

Highlight

Copy