Luka 18

Wən məkpaŋga nat guluk na gəbay de arkali

1Yaŋ Zezu apel sit wən məkpaŋga vi də sənən gən na say dəzuliyaŋ gən pay pakə məza wəpan ɓa. 2Apsit na: Ɗəf tay awalaŋ gəla mətaw kitayi awãy Maŋgəlva ɓa awãy ɗii ɓa pakə. 3Ga gəbay tat awalaŋ gəla nan məzəzat azan pay pakə, tatənah sən na: Aɗɗa su kita nawəŋ də ɗəf məzu zel wəŋka. 4Amma mətaw kita aɓoŋko də wənnata, ha anzika, amma dərɓagan aɗumuk amakrani: Ko vi naw na geslne sən Maŋgəlva ɓa, nawãy wənnet ɗii ɓa, 5amma guluk kəŋ tatə ki mawa, wanəɗɗa sət kita nata, vi tə dazat wəzlaɓan su maɗulaw zaya ɓa. 6Yaŋ Ɗəfdaya aməs wənah na: Məpprəm va ɗəf mbrayen mətaw kitas a anahə. 7Vas na Maŋgəlva agəɗ na təstəs go'ləŋ sit ɗii məs aweli, məzaw həmmaŋ sənən dəfəɗ də kapay pak ɓa sa? 8Intatə nah sukum, wagəɗ sit təstəs go'ləŋ. Amma an Wətən Ɗəf* adek na, warah wətaf aka dəlva fuŋ sa?

Wən məkpaŋga aka Farisiyen də duwan

9Yaŋ Zezu apel wən məkpaŋga maɓɓan əmpa, vi məzulanən zit va ɗii təstəssə, də wəzelet ɗii meɓɓeti: 10Ɗii sula tahəŋ wəmbataŋ adəv gəla metiŋ naw zuliya*, vi kawzuliya, taka Farisiyen, taka bo duwani. 11Farisiyen aziwke, azuliyək amakran vaska: Aw Maŋgəlva nəgəɗ sukuk soko vi əntat va ɗii meɓɓet ɓa, va meheleŋɗe, də sənaŋ goŋga ɓa, məɗɗaŋ mana'a, walla bo va duwan nəŋ ɓa. 12Intatə se' meme adəv pay buhul pak təl sula, əntatə gəm məklaw na zəga an nərah pakə. 13Duwan bo aziwik faraɗa, dəɗum naw slan haran a disiŋ ɓa, amma tayərga makrani, amna: Aw Maŋgəlva awəl saha akawa əntə ɗəf məs də mambraya. 14Intatə nah sukum, nan arahək an Maŋgəlva aŋgələ, yaŋ amndan eŋgil annanda, amma Farisiyen dərah an məs Maŋgəlva aŋgəl ɓa. Vi ko naway də gakdakan zəni kaw gəsani ko naway də gəsan zəni, kaw gakdakani.

Zezu aɗɗak zəzay aket kirin memeɗeŋɗe

(Matiye 19.13-15 / Markus 10.13-16)

15Yaŋ aki sənən kirin muzliyiɗ sən Zezu də rəŋgiti gəni, amma adan gewleɗ awlanən vaska, ahayetinik məzu kiyən kirini. 16Zezu ayeke, amna: Məppet kirin memeɗeŋɗe dəzoŋ azawa. Kədawtekin ɓa, vi məlĩ na Maŋgəlva tay viyit kirin zemvit eŋki. 17Gesiŋ nədawnah sukum: Ko naway an dətaf məlĩ na Maŋgəlva va wiyən muzliya ɓa, atoŋ na adak ɓa.

Ɗəf məs arya

(Matiye 19.16-30 / Markus 10.17-31)

18Yahudiyen maɓɓan tay daya, assohonək Zezu: Mərbə zəga mogoni, mi nədaɗɗa nərah gən zeŋgille məza agrak ɓa di? 19Zezu azlan səna: Vi mi kənah su na mogok kenani di? Say ɗəf takayi mogoni, Maŋgəlvayi. 20Kəsinik ma henziŋɗe: Kələɗɗa mana'a ɓa, kədaw bay gəbay ɓa, kədawhal ɓa, kədaɗɗa saydawa na tepelke ɓa, agakdakan affuk dət moko. 21Es pak nərmek wənnet daga nəsaw muzliya. 22Adan Zezu apprəm vaska, apsən na: Apəl sukuk zəga taka əmpa: Avəl zəga nok pakə. Apsit məs sahaŋɗe, asna akərah arya məzaɓan a disiŋ. Asna kəde gən wəsbawkana. 23Adan apprəm wəpel vaska, makran asanka, vi məs aryayi sawɓa. 24Zezu awlak vaska, amna: Tuwãhi məs arya dətoŋ gən məlĩ na Maŋgəlva. 25Ɗəɗaah zlogomo watoŋ dəmba batal ki məs arya wətoŋ məlĩ na Maŋgəlva. 26Məzəpprəmən wənnan aɓɗaŋ na: An vaski na naway nakoh di? 27Zezu azlanka: An tuwãh azet ɗiiyi, aza Maŋgəlva tay tuwãh ɓa. 28Yaŋ Piyer amna: Yaŋ naməŋ məppetik zigeɗ pakə, məsbokuko. 29Zezu apsit na: Gesiŋ nədawnah sukum, ko naway dəppan gəla nani, walla guluk nani, walla milmiŋgiɗin, walla migilin, walla kirtini, vi wənna məlĩ na Maŋgəlva. 30Warah dayki as də pay nan an kakaŋka, pay an dədazan bo warah zeŋgille məza agrak na ɓa ha faɗə.

Zezu arbanək wəmta nan ma hoko'ən də wəsilya sətəki əmta

(Matiye 20.17-19 / Markus 10.32-34)

31Yaŋ Zezu aye gewleɗ klaw kiyit sula, apsit na: Yaŋ mənam tatə mbat a Zerusalem, an məs kleŋɗe avereŋ aka Wətən Ɗəf* pak wagrak adaka. 32Vi kappani avet ɗii məs dəsənən Maŋgəlva ɓa wanahaŋ wən azani, waranənni, watufoŋ mefɗe akani, 33warganən də ɗoŋgroŋɗe, wabayəni. Amma pay ma hoko'ən wasil səkəti əmta. 34Amma dəpprəmən an məs Zezu adawpel akan ɓa.

Zezu ambəl gənək daŋgar

(Matiye 20.29-34 / Markus 10.46-52)

35Adan Zezu azar aza Zeriko, daŋgar maɓɓan tay tuŋgo aba tive, tayəŋgla zəga. 36Yaŋ apprəm na ɗii tahəŋ wətoŋgoŋ, assohko mi dəgəɗ di? 37Apsənən na: Zezu məs na Nazaret məzu toŋgo. 38Aɗiyək geŋgere: Zezu Wətən Davit* awəl saha kawa. 39Ɗiiyen nabe ahayanənka: Vi dəsan gən ɓatə. Amma aɗiyək geŋger dayki laŋka: Wətən Davit awəl saha kawa. 40Zezu aziwke, aɗi sitik wənan sit ɗii də kiyən gən azani. Yaŋ daŋgar azar azani, Zezu assohonəka: 41Mi kəŋgəl nəgəɗ suku gən di? Azlanka: Mərbə zəga akol su harawa. 42Zezu apsən na: Akolu, wətaf nok akoh gukuko. 43Go'ləŋ haran akolko, asbanək Zezu, tay gakdakan Maŋgəlva. Ɗii məs dulanən pak aɗiyənək ki Maŋgəlva.

Currently Selected:

Luka 18: GDRNT85

Highlight

Copy