Luka 1
1
1Ɗəf gakdak Tewfilu:
Ɗii diiɗa agayaŋgək wəver zigeɗ məs dəɗaŋ awalaŋgmə. 2Averinik an məs məpprəm sə zet məs dulenin zigeɗis də hereti daga wətəŋ neti, məpsiti tive narban wənnani. 3Vi vaski naw nulak lewi naw tam nəsok zuwa wəkayan wənnan pak daga wətəŋ nani vi nərban sukgən də mabərki ziti, ɗəf gakdak Tewfilu. 4Nəɗɗa na vi kəsən gən gesiŋ an məs mərbanəŋka də an məs kəpprəmə.
Maslay arbanək uwa na Zaŋ
5Yaŋ pay Herodə asan məlĩ a Zude, ɗəf maɓɓan tay məs dələv* na Maŋgəlva, iya nan na Zakari, suwalaŋ ngaɓa net məs dəlveŋge Abiya. Iya nat ɗak nan na Elizabet, hilfit may Aron daya net məs dəlveŋge na Maŋgəlva. 6Sulegit pak ɗii təstəssəŋ aba Maŋgəlva. Tahəŋ wəsbanən wən məs Ɗəfdaya aɗiyə də ma henziŋ nan pak lewlewi. 7Amma dərəhaŋ muzliya ɓa, vi Elizabet ndarzlayək tə, ndəɗaŋ sulegit pak agalaŋka.
8Pay mbərən Zakari tayəɗɗa wəza na məs dələv* nan aba Maŋgəlva, vi pay na wəza na ngaɓa neti. 9Məs dəlveŋge asərəkaŋgək uɗakən wəza də piɗe nabalan aketi. Pay nani, abətək aka Zakari dəɗɗa gən wəza naw zla tursan aba Ɗəfdaya aka təki naw zla tursan adəv gəla metiŋ naw zuliya*. 10Daga adawzla tursan, ɗii tahəŋ wəzuliyaŋ appaka. 11Yas ləŋ, Zakari awlak maslay dəki adawzla tursan dəka van dəzəŋ ziwe. 12Adan awla vaska, ageslneke, maɗulan azlərwika. 13Amma maslay apsən na: Kəgeslne ɓa, Zakari, vi Maŋgəlva apprəmək wəzuli noko. Ɗak nok Elizabet watuwə wina, kelvan gən na Zaŋ. 14Zuk wannek sawɓa, ɗii wanekenən zit di'is pay nawa wiyən nani. 15Vi wasan ɗəf metiŋ aba Ɗəfdaya. Assə na mbazla net wəleŋɗe ɓa, walla mbazla maɓɓan məbay ɗəf ɓa. Waknahək də Əmpəs na Maŋgəlva daga sədəvət mani. 16Wamilgit Israyelɗe diiɗa aza Maŋgəlva Ɗəfdaya neti. 17Watoŋ aba Ɗəfdaya də sembe na məs kleŋ Eliyas, vi kawsleret kirin dit migilti, wakpeŋget ɗii meɓɓet dəsbanən gən Maŋgəlva, wən an məɗiyən pak wazaɓani vi wəzzo na Ɗəfdaya.
18Amma yaŋ Zakari apsən maslay na: Mbarmbari nədawsəŋgən na wagəɗ gesiŋ di? Vi naw nəgalək səkay, ɗak naw bo wəzva nat diiɗayi. 19Maslay azlan sənək na: Əntə Gabriyel aba Maŋgəlva nədawsawa vi kawgəɗ sən wəza. Ndən də slənwa, nəpel suk gən labara neneke. 20Amma kətaf wən məs dəgil sə mawəŋ ɓa, an pay nan agapka wənnəŋ wasan gesiŋ. Vi vaski wakəkpaŋ goryom, kəɓap na wəpel ɓa ha gap pay net zigeɗis adaɗɗaŋ.
21Pay nan bo ɗii tahəŋ wəganən Zakari. Agətaŋgək vi wəliya nan adəv gəla metiŋ naw zuliya*. 22Yaŋ agili dəɓap wəpel sit ɓa, asənənka awələk sokene adəv gəla metiŋ naw zuliya. Aslanək van wəgəɗ sit zəzaya, amma dəɓap kawpel ɓa.
23Yaŋ pay na wəza na Zakari agrak sədəv gəla metiŋ naw zuliya, ambat keŋgili annanda. 24Dərɓagan wəvoŋ suɗike, Elizabet ɗak nan təɗiyək daway, təɗɗamanək gap təla sle. 25Təmna: Awla an məs Ɗəfdaya agəɗ suwa. Atorik wil nat ndarzlayək sərawa.
Maslay arbanək uwa na Zezu
26Yaŋ də təla ma sləreni, Maŋgəlva aslənək maslay nan Gabriyel awalaŋ gəla məs adawyaŋ na Nazaret aka dələv na Galile. 27Aslənək azat waŋ gbuɓɓo, akən məs ɗəf adawyaŋ Zozef adaw kaya, gabet may Davit. Iya nat waŋ vatə Mari. 28Maslay adek azata, apsət na: Nəsɗokuko, nok kərahək mbəlembəle na Maŋgəlva. Ɗəfdaya tay disi. 29Wəsɗa nan akgrəŋgatək Mari, təɗumko va wənah mbari kandi. 30Maslay apsət na: Geslne aduk ɓa Mari, vi nok kərahək mbəlembəle na Maŋgəlva. 31Wakəɗi daway, wakuwə wiyən mizilin, kəlvan gən na Zezu. 32Wakpaŋ daya, kaw yani na Wətən Maŋgəlva* an dəday pakə. Maŋgəlva Ɗəfdaya waɗi ka məlĩya, va aɗi dəhən an Davitti. 33Wazəm məlĩ aket Israyelɗe ha faɗə, məlĩ nan agrak na ɓa.
34Mari təpsən na: Mbarmbari adaɗɗa vaskan yaŋ naw bo nəsən ɗəf mizilin ɓaŋ di?
35Maslay apsət na: Əmpəs Salala* wadekoko, sembe na Maŋgəlva an dəday pak wadekok va zeŋgille. Vi vaski wiyən məs kəl dawa, kaw yani na salala* gəm Wətən Maŋgəlva*. 36Elizabet mamndayoko dədawaytə, ko vi təgalə, may adawnahaŋ na ndarzlayək tə, amma kəkaŋ dədawaytə təla slire. 37Zəga tay məs na gbakan Maŋgəlva ɓa.
38Mari təmna: Balamək na Ɗəfdaya nani, dəgəɗ azaw va kənahə. Yaŋ maslay appata ambat səzata.
Mari təmbatək anat Elizabet da
39Dəpaske'e ləŋgə, Mari təsilke təmbatək də kakara awalaŋ gəla nak gərəm aka dələv na Zude. 40Tutoŋ keŋgil ana Zakari da, təsɗatək Elizabet. 41Səza Elizabet təpprəm wəsɗa nat Mari, wiyən atəŋgək wəɓla adəvta. Makrat Elizabet aknahək də Əmpəs Salala, 42yaŋ tənah dayadaya: Maŋgəlva aɗɗak zəzay akok daykiyit gil pakə, zəzay nan tay aka wiyən məs kəl dawaŋka. 43Naw nawa nan kan ma Ɗəfdaya naw təde gən annaw daŋ di? 44Vi səza nəpprəm wəsɗa noko, wiyən aɓələk sədəvu də wənneken zəni. 45Wakpaŋ zəzay azoko vi kətafək an Ɗəfdaya anah suko, wagəɗ va anahə.
Gəlya nat Mari
46Mari təmna:
Say nəgakdakan Ɗəfdaya,
47makraw aknahək də nenek na Maŋgəlva, məzu koh guwa.
48Aŋgələk ulət balamək nan məs aw gakdakatən ɓa.
Vaski daga kakaŋ ɗii pak wənahaŋ suwənna də zəzay na Maŋgəlva kənani,
49vi Maŋgəlva məs də sembe aɗɗe suwək zigeɗ məs dədayaŋgə.
Iya nan salalayi*,
50ula saha nan wasan aket məzu geslne'eŋ sənənni ha faɗə.
51Aɗɗek wəzeɗe diiɗa də sembe na vanni,
andolik məzu gakdakanən zit də wəɗum net pakə.
52Aprigitik milyeŋge səka mazaŋga neti,
aɗiyik en məs adaw gissetin a disiŋ.
53Abetik ɗiiyen də may də zigeɗ moggeti.
Arɓihik məs aryeɗi ambataŋgək vet mekeleŋ.
54Abaah sitik Israyelɗe məs məɗɗaŋ sənən wəza,
55vi dəsgət ki an anahsən dəhəm,
Abraham na, wapsit kirtin də son gən ha faɗə.
56Mari təsatək dət Elizabet gap təla hoku, yaŋ təmndat eŋgil annat da.
Uwa na Zaŋ məgəɗ baptem
57Adan pay nawa nat Elizabet agapə, tuwək wiyən mizilin. 58Megeŋgiɗta dit hilfiŋgidta apprəmənək na Ɗəfdaya agəɗ sətək mogoni, annekenənək zit dənta. 59Yaŋ wiyən agəɗ wəvoŋ buhul, yaŋ adoŋ wəskələn awra də wəpsən iya, aŋglaŋ wəlvanən na Zakari va iya nafəni. 60Amma man təmna: Awwo vaski ɓa, say iya nan dəsan Zaŋ. Ndəɗaŋ pak agətaŋka. 61Aɓɗaŋ na: Ɗəf tay ko taka də iya vas ambet hilfiŋgiɗuk ɓa.
62Yaŋ apeleŋ sənən affən də veti, vi kassohon na iya awani aŋgəl napsən wətən di. 63Zakari arban sitik dəpsənən gən wəlaŋga na ver akani. Yaŋ avere: Iya nan na Zaŋ. Ɗii pak agətaŋka. 64Daska'a ləŋ Zakari atəŋ wəpele, agakdakanək Maŋgəlva də wəlan dayadaya. 65Megeŋgiɗin pak ageslne'eŋgək sawɓa. Ha dələv na gərəm na Zude pak tay pel nən wennet labareɗeski. 66Məs dəpprəmən wənəs pak tahəŋ wəɗumonən pay pak: Winəŋ mambar adawsan di? Sembe na Ɗəfdaya tay dəndən kpakə.
Kleŋ na Zakari
67Zakari affən wiyən naka makran aknahək də Əmpəs Salala. Agəɗək kleŋ, amna:
68Gakdak aza Maŋgəlva, Ɗəfdaya net Israyelɗe
vi apanək zən viyit ɗii nani, akohgitke.
69Agil gənək ɗəf məs nawkoh gəm də sembe,
səza gabba məlĩ Davit gawla nani.
70Aŋki məs anah lahəŋ də met məs kleŋɗe en salala*.
71Amna wakoh gəm sə vet məzuzel məni,
may səvet məɗɗaŋ kotorok namə.
72Arbanək ula saha nan aket dəhiŋgiɗmə,
də wəɗumon wən minan daga far an salalaŋka.
73Vi Maŋgəlva asuway sənək dəhəm Abraham,
74wakoh gəm səvet məzuzel məni də sembe,
vi məgəɗ sən gən wəza məza də geslneɓa,
75Vi məsam gən ɗii nan təstəssə hagap wəsva nam pakə.
76Nok bo wətuwa, kaw yuki na məs kleŋ na Maŋgəlva
an dəday pakə vi wakəsok aba Ɗəfdaya vi kaw zaɓan tive nani.
77Warban sit ɗii nan na wakohgiti,
də wəviyan mambray neti.
78Maŋgəlva nam tay də ula saha adəvən diiɗa,
gəm də mogoni, waslən səm wəkasak nan daga sə disiŋ,
79vi də kasak gin ɗiiyen nara guzliyo dit ɗiiyen nara
zeŋgille namta, wadaw gən tələm aka tive na zamə.
80Zaŋ aɓayka, maɗulan bo tay diiɗa kana. Asanək awra ha gap pay arban zən abet ɗii na Israyel.
Currently Selected:
Luka 1: GDRNT85
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.
