Luka 2

Va Muwa Zezu

(Matiye 1.18-25)

1Yaŋ pay Agustus asan məlĩ na Roma aɗiyək wənnan də vereŋ gən iya net ɗii naka dələv na Roma pakə. 2Ndəni wəver madabəŋ an dəgəɗ gala Kiriniyus asan governer aka dələv na Siriya. 3Ɗii adoŋguk wəvere, naway pak awalaŋ gəla nani.

4Zozef tam asilik sə Nazeret dələv na Galile, ambatək aka dələv na Zude awalaŋ gəla na Betelihem, walaŋ gəla məs muwa məlĩ Davit, vi Zozef əlfa nan səza Davitti. 5Ambatka daka vi kaw vere, ndəni dət Mari, ɗak nan dədaway nakə. 6Adan adasoŋ adaka, təla nawa nat Mari agapka. 7Tuwək wiyən mizilin, tizi nata tətərək də lukutu, təvoŋ gənək adəv zəga nawzəmgit zigeɗi, vi dərəhaŋ təki atəki net melekeɗ ɓa.

Maslay akak halabara nan sit məzuteɗeŋɗe awra

8Yaŋ məzuteɗeŋɗe tahəŋ aka moya na dələv nani, tahəŋ wəgenin timeŋgiɗ net dəfɗa. 9Maslay na Ɗəfdaya arbanək zənna zeti, gakdak na Ɗəfdaya awiɗik aketi, ageslne'eŋgək sawɓa. 10Amma maslay apsit na: Kədaw geslne'eŋ ɓa, vi labara nenek nəki sukum, wan neken zit ɗii pakə. 11Dəfɗəŋki, muwa məzu koho vi kum awalaŋ gəla na Davit, ndəni Krestu Ɗəfdaya. 12Məpprəma zəga an narban sukum: Wakərəhən wiyən mətərən də lukutu, məvoŋ gən atəki nawzəm zəga net zigeɗi.

13Go'ləŋ metiŋgit net maslayɗe azoŋguk wəsapaŋ də maslay annaka, agakdakanənək Maŋgəlva, aɓɗaŋ na:

14Gakdak aza Maŋgəlva na disiŋ,

zam adek aka dəlva hagap azet ɗiiyen aŋgələ,

gəm məs dəŋgluwən Maŋgəlva veti.

Məzuteɗeŋɗe ambatəŋgək a Betelihem

15Yaŋ maslayɗe apetini, amndoŋ a disiŋ, məzuteɗeŋɗe apelenənək awalaŋ ziti: Mədamsa Betelihem mula gən zəga an məs Ɗəfdaya arban səməŋka. 16Agəmənək zit wəmbat adaka, arətənək Mari də Zozef gəm wiyən priŋge, məvoŋ gən adəv zəga nawzəm zəga net zigeɗi. 17Yaŋ awlanən wina, annəhənək an məs maslay anah sit aka wənna wina. 18Ɗiiyen dəpprəmən wən məs məzuteɗeŋɗe apeleŋgi, agətaŋgək sawɓa. 19Amma Mari tərmak wənnan pak a makrata, tatəɗum akani. 20Yaŋ məzuteɗeŋɗe amilyoŋ, tahəŋ wəgakdakanən Maŋgəlva də wəɗi kini, vi wən məs apprəmaŋ, an məs awlaŋ, vi as pak agəɗək va maslay anahsiti.

Askələnək Zezu awra, akanənək adəv gəla metiŋ naw zuliya*

21Yaŋ wəvoŋ buhul dərɓaga wənnani, pay agapək nawkan wəskələn awra də wəlvani, apsənənək iya Zezu, iya nan maslay dənah sət man daga təɓəl wəɗi daway ɓa.

22Yaŋ pay naɗɗa salala nat Mari agrakə va an ma henziŋ na Moyis anahə, migilin akanənək wiyən a Zerusalem, vi karban aba Ɗəfdaya, adəv gəla metiŋ naw zuliya. 23Vi ma henziŋ na Ɗəfdaya amna: Wiyən an tizi pak na Ɗəfdayayi. 24Aziyaŋka vi kaɗɗa sazlaga va Ɗəfdaya aɗi wənnani: Mukuɗuŋguleɗ sula walla mukuɗuŋguleɗ na maha sula.

25Ɗəf maɓɓan taya daka, iya nan na Simeyoŋ, ɗəf təstəssi, tay ɓesən Maŋgəlva, tay ga ɗəffan nawkoh git ɗii na Israyel. Əmpəs Salala tay dəni, 26arban sənəka amtəna ɓa, say an awlak Messiya* masləŋ na Ɗəfdaya. 27Əmpəs akak adəv gəla metiŋ naw zuliya. Pay nani migil Zezu akinənək vi kaɗɗa sən an məs ma henziŋ anah naɗɗa. 28Simeyoŋ aslanək wiyən aka vani. Aɗɗak soko sən Maŋgəlva, amna:

29Aw Ɗəfdaya an məs kənah nak agəɗək kakaŋ kana.

Apan balam nok dəmtə də zam kana.

30Vi haraw awlak wəkoh noko,

31an məs kəzaɓan viyit ɗii pakəŋka.

32Təki babarəŋka ndəni dədarbok azet ɗii naka dələv pakə,

wapsit gakdak sit ɗii nok Israyelɗe.

Kleŋ na Simeyoŋ

33Affəni dət ma Zezu vata agətaŋka adan apprəmən Simeyoŋ apel wən akan vaska. 34Simeyoŋ agəɗ sitik zəzaya, apsət Mari ma Zezu na: Maŋgəlva awelik winəŋka, vi dəsan gən tive naw zet ɗii diiɗa gəm nawkohgit ɗii diiɗa səmbet ɗii na Israyel. Wakpaŋ zəga narban aza Maŋgəlva an məs ɗii atafən na ɓa. 35Warban wəɗum net ɗii məɗamaŋka. Nok tamə gulku, wasok diiɗa aka wənnani.

Hana guluk məs kleŋkə

36Guluk maɓɓat tatə məs kleŋkə, iya nat na Hanna, wətən Fanuyel, zemvit may Asərtə. Təgalək sawɓa. Təɗiyək zil wəsva buhul daga səka goruk nata. 37Yaŋ zilit amtə, yaŋ təsat məzaɗi zil əmpa ɓa, hagap wəsva nat agəɗək kaklaw dədopoɗo kiyən poɗo. Tatə mbat adəv gəla metiŋ na zuli pay pakə, tatəgəɗ sən wəza sən Maŋgəlva dəfəɗ də kapay pakə, tatə se' meme də wəzuliya. 38Tədek dəpaska, təgəɗək soko sən Maŋgəlva, tənah sitik ɗii məzu ganən Maŋgəlva dəkoh gənəgən Zerusalem gəm wənna winəŋka.

Wəmnduwa a Nazaret

39Yaŋ migil Zezu agrakən wəɗɗa an ma henziŋ na Ɗəfdaya aɗi naɗɗa, amndoŋguk dəndən aka dələv na Galile, awalaŋ gəla net a Nazaret. 40Wiyən tay ɓaya, tay ɓəlan zəni, aknahək də wəpprəma. Maŋgəlva aɗɗak zəzay nan akani.

Zezu taya adəv gəla metiŋ naw zuliya*

41Aza wəsva pak migil Zezu tahəŋ wəmbataŋ a Zerusalem wədaɗɗa wəzləra na Paska*. 42Adan Zezu agəɗ wəsva klaw kiyən sula, ambataŋgək wəzləra naka va ɗayɗayə. 43Yaŋ wəzləra agrakə, yaŋkan adamndoŋgu, amma Zezu abewik dirɓe a Zerusalem, migilin də sənən ɓa. 44Azet na tay dit ɗiiyen dəmbataŋ dənɗaŋ. Adawaŋgək wəsɓəta taka, yaŋ atəŋgaŋ wəkayanən aweleŋgit milmiŋgiɗti dit bayneŋgiɗti. 45Amma dərəhnən ɓa, vi ni amndoŋ a Zerusalem wədaw kayani. 46Pay ma hoko'ən, arəhənək adəv gəla metiŋ naw zuliya. Tay tuŋgo aweleŋgit məsənaŋ zəga na ma henziŋ dit Yahudiyenɗe, tay əpprəm an adawpeleŋ, tay sohon meti. 47Ɗiiyen dəpprəmən wənnan pak agətaŋgək aka wəpprəm nani də wəzlan nan məs adawzlani. 48Yaŋ migilin awlanəni agətaŋgək sawɓa. Man təpsən na: Wətuwa vi mi kəgəɗ səm vaŋ di? In də affuk pak maɗulam azlərwiyək daw koyok sawɓa. 49Azlansitike amna: Vi mi kədaw kayawən di? Kəsənən na say nəsaw gən adəv gəla na əbba ɓa sa? 50Amma dəpprəmən an məs anah sit ɓa.

51Yaŋ Zezu amndan dənɗaŋ a Nazaret, apprəmək meti. Man tərmak wənnan pak amakrata də wəɗumon wənnan pay pakə. 52Zezu tay ɓaya wəpprəm nan bo tay mbat abe abe, neki aza Maŋgəlva dit ɗii pakə.

Currently Selected:

Luka 2: GDRNT85

Highlight

Copy