ᓭᑲᕒᐋᔭ 8
8
ᑳᑎᐯᒋᑫᒡ ᑮᐊᔓᑕᒫᑫᒡ ᐁᐐᑮᐌᓈᐱᑑᒡ ᒉᕒᐆᓴᓬᐊᒻ
1ᒦᑕᔥ ᐅᐅ ᓭᑲᕒᐋᔭ Zechariah ᑳᐃᑯᒡ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ᙮ 2ᒦ ᓴ ᐅᐌ ᐁᓂᒃ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᒋᐃᑭᑐᐗᒡ, ᐐᑫ ᓴ ᓂᒥᓴᐌᑖᓐ ᒋᑮ ᐐᒋᐊᒀᐸᓐ ᒉᕒᐆᓴᓬᐊᒥᕽ ᐁᔮᐙᒡ ᐋᓃᔥ ᐐᑫ ᓂᔕᐌᓂᒫᒃ᙮ ᐁᓵᑭᐊᒀ ᑕᔥ ᒦ ᐃ ᐌᒋ ᓂᔥᑭᐃᒥᒡ ᑳᔒᑫᓂᒥᑯᐙᒡ᙮ 3ᒦᑕᔥ ᐃᐃᒫ ᑫᔑ ᑮᐌᔮᓐ ᒉᕒᐆᓴᓬᐊᒥᕽ ᐁᐐ ᐃᔑᑖᔮᓐ᙮ ᒦᔥ ᑫᐃᒋᑳᑌᒃ ᑌᐺᐎ ᑭᒋ ᐆᑌᓇ ᑲᔦ ᑕᔥ ᑭᒋ ᐗᒋᐤ ᑌᐱᓇᐌᐎᓯᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᑕᐃᒋᑳᑌ ᑭᒋ ᐱᑾᑎᓈᕽ ᐁᑕᓀᑖᑯᓯᒡ ᑳᑎᐯᒋᑫᒡ᙮ 4ᒦᓇᐙ ᑕᔥ ᐊᑭᐌᓯᐗᒃ, ᑰᑯᒥᓈᓇᒃ ᑳᓴᑲᐅᐙᒡ ᐁᐲᒋ ᑭᒋ ᐊᔭᐋᐎᐙᒡ ᑕᓇᓇᒪᑕᐱᐗᒃ ᑫᐃᔑ ᒪᒦᑲᓈᐗᓂᓂᒃ ᒣᑴ ᒉᕒᐆᓴᓬᐊᒥᕽ᙮ 5ᐃᐃᒫ ᓴ ᑲᔦ ᒥᓯᐌ ᒦᑲᓈᑲᕽ ᑸᐎᓭᓴᒃ, ᐃᑴᓭᓴᒃ ᑲᔦ ᑕᐸᐹ ᐅᑕᒥᓄᐗᒃ᙮
6ᑳᐐᓐ ᐁᑕᑕᐌ ᐃᐃ ᑕᐃᔑᓭᓯᓅᓐ ᑕᐃᓀᑕᒨᒃ ᐃᑭ ᐯᒫᑎᓯᐙᒡ ᑳᐃᔥᑸᓄᐙᒡ ᓃᓐ ᐃᑕᔥ ᐐᓐ ᑳᐐᓐ ᐃᐃ ᓇᑫ ᓂᑲ ᐃᓀᑕᓰ᙮ 7ᓃᓐ ᓴ ᐱᑯ ᓂᑲ ᐱᒫᒋᐋᒃ ᓂᐱᒫᑎᓰᒪᒃ ᐯᐸᑳᓐ ᐊᑮᕽ ᑳᑮ ᐊᔨᔑᐎᓂᑣᐸᓐ ᐙᐸᓄᕽ ᐃᓇᑫ, ᑲᔦ ᑕᔥ ᓂᑳᐲᐊᓄᕽ ᐃᓇᑫᑲᒥᒃ᙮ 8ᓂᑲ ᐱᑮᐌᐎᓈᒃ ᒋᐱᑮᐌ ᐃᔑᑖᐙᒡ ᐅᐅᒫ ᒉᕒᐆᓴᓬᐊᒥᕽ᙮ ᓃᓐ ᓴ ᓂᑲ ᑎᐯᓂᒫᒃ᙮ ᒦᔥ ᒋᐅᑭᔐᒪᓂᑑᒥᒥᐙᒡ ᒋᑎᐯᓂᒪᒀ ᐁᑾᔭᒀᑎᓯᐗᒃ, ᑲᔦ ᑕᔥ ᐌᐌᓂ ᒋᑑᑕᐗᒀ᙮
9ᑕᑲ ᑕᔥ ᒪᔥᑲᐌᑕᒧᒃ! ᒦᐗᓐ ᐃᓴ ᐃᓂ ᐯᔑᑾᓐ ᐃᑭᑐᐎᓇᓐ ᑳᓅᑕᒣᒃ ᑳᑮ ᐃᑭᑐᐙᐸᓐ ᐅᑲᓅᑕᒫᑫᒃ ᐊᐲ ᑮᐅᓈᐱᑭᓂᑳᑌᒃ ᑫᔑ ᑮᐌ ᐸᑕᑭᑌᒃ ᑭᒋ ᐊᓇᒥᐁᐎᑲᒥᒃ᙮ 10ᐅᐅ ᓴ ᒋᑆ ᐃᔑᓭᑭᐸᓐ, ᑳᐐᓐ ᐊᐎᔭ ᑮᑌᐱᓭᓰ ᒋᑮ ᐊᓄᑮᐋᐸᓐ ᐊᐎᔭᓐ, ᑯᒫ ᑲᔦ ᐊᔭᐋᐎᔕᓐ᙮ ᑲᑭᓇ ᐄᑐᒃ ᐊᐎᔭ ᑮᓇᓃᓵᓀᑖᑯᓯ ᐃᐃ ᐊᐲ᙮ ᓃᓐ ᐃᑕᔥ ᐃᐃ ᑳᑮ ᑑᑕᐗᒀ ᒋᒫᒦᑖᑴᐁᓂᑎᐙᒡ᙮ 11ᑳᐐᓐ ᐃᑕᔥ ᐃᐃ ᓇᑫ ᓂᑲ ᑑᑕᐙᓰᒃ ᐅᑯ ᑳᐃᔥᑸᓄᐙᒡ ᐯᒫᑎᓯᐙᒡ ᐅᑖᓈᕽ ᑳᑮ ᑑᑕᐗᒀᐸᓐ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ 12ᑫᑎᑳᑌᒣᒃ ᐃᓴ ᑕᓂᑖᐎᑭᓅᓐ, ᔔᒥᓈᑎᑰᒃ ᑲᔦ ᑕᓂᑖᐎᑭᒋᑫᐗᒃ᙮ ᐐᑫ ᑲᔦ ᑕᒥᓄᑭᓅᓐ ᑫᑎᑳᑕᒣᒃ ᐊᑮᕽ, ᐐᑫ ᑲᔦ ᑕᓂᑖ ᑭᒥᐗᓐ᙮ ᒦ ᓴ ᐃᐃ ᓇᑫ ᑫᔑ ᔕᐌᓂᒪᒀ ᓂᐱᒫᑎᓰᒪᒃ ᐁᔥᑸᓄᐙᒡ᙮ 13ᐯᒫᑎᓯᔦᒃ ᐌᒌᔦᒃ ᒎᑕ ᐊᑮᕽ, ᑲᔦ ᑕᔥ ᑮᓇᐙ ᐃᔅᕒᐃᔭᓬ ᐊᑮᕽ! ᒦ ᓴ ᐃ ᐯᒥ ᐃᔑᒋᑫᐙᒡ ᑯᑕᒃ ᐯᒫᑎᓯᐙᒡ ᑮᒫᓀᓂᑎᐙᒡ ᐁᓂᑖᐃᑎᐙᒡ, ᐊᐯᔥ ᐃᔑ ᒫᔑᓭᔦᒃ ᑳᔑ ᓂᑖ ᒫᔑᓭᐙᒡ ᒎᑕ ᐊᑮᕽ, ᐃᔅᕒᐃᔭᓬ ᐊᑮᕽ ᑲᔦ ᐌᒌᐙᒡ᙮ ᓃᓐ ᐃᑕᔥ ᐃᑯ ᑭᑲ ᐱᒫᒋᐃᓂᓂᒻ᙮ ᒦᔥ ᐃᑭ ᒪᔭᑭᓯᐙᒡ ᐊᐎᔭᒃ ᑫᐊᔨᑎᐙᒡ, ᐊᐯᔥ ᐃᔑ ᒥᓄᓭᔦᒃ ᑳᔑ ᔕᐌᑖᑯᓯᐙᒡ ᐌᒌᐙᒡ ᒎᑕ ᐊᑮᕽ, ᑲᔦ ᑕᔥ ᐃᔅᕒᐃᔭᓬ ᐊᑮᕽ᙮ ᑫᑯ ᑕᔥ ᓭᑭᓯᑫᒃ, ᒪᔥᑲᐌᑕᒧᒃ!
14ᒦᔥ ᑳᐊᓂ ᐃᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᐊᐲ ᓴ ᑮᓂᔥᑭᐃᐙᐸᓐ ᑭᑫᑌᔭᐋᒥᐙᐸᓃᒃ ᒦ ᓴ ᐃ ᑳᑮ ᐅᓀᑕᒧᐗᒃ ᐋᓃᓐ ᑫᔑ ᐗᓯᑖᐎᓭᐙᒡ᙮ ᑳᐐᓐ ᐃᓴ ᓂᑮ ᐅᒋ ᐋᑌᑕᓰ ᐁᑮ ᑑᑕᐗᒀ ᑳᑮ ᐃᓀᑕᒧᐗᑭᐸᓐ᙮ 15ᐃᓇᔥᑫ ᑕᔥ ᓅᑯᒻ ᒦ ᐃ ᐁᔑ ᐅᓀᑕᒫᓐ ᐁᐐ ᒥᓄᑑᑕᐗᒀ ᐁᔮᐙᒡ ᒉᕒᐆᓴᓬᐊᒥᕽ, ᑲᔦ ᑕᔥ ᒎᑕ ᐊᑮᕽ᙮ ᑫᑯ ᑕᔥ ᓭᑭᓯᑫᒃ᙮ 16#Eph 4.25. ᒦᐗᓐ ᐃᑕᔥ ᐅᓄ ᑫᐃᔑᒋᑫᔦᒃ: ᑌᐺᒃ ᑮᑲᑲᓅᓂᑎᔦᒃ, ᑳᔑ ᑎᐹᑯᓂᑎᕽ ᑲᔦ ᑌᐺᐎᓐ ᐋᐸᒋᑑᒃ ᑫᐅᒋ ᐱᓵᓀᑕᒧᓈᓂᐗᕽ᙮ 17ᑫᑯ ᑲᔦ ᒪᒋ ᐅᓀᑕᑫᓐ ᑫᔑ ᒪᒋᑑᑕᐗᒡ ᑮᒋ ᐱᒫᑎᔅ! ᑫᑯ ᑮᐗᓂᒧᑫᓐ ᐋᓃᓐ ᑳᑮ ᐃᔑ ᐊᐱᒧᔭᓐ ᐊᐲ ᑮᑭᑐᔭᓐ᙮ ᒦ ᓴ ᐃᐌ ᐐᑫ ᑳᔒᑫᑕᒫᓐ, ᐃᑭᑐ ᑳᑎᐯᒋᑫᒡ᙮
18ᒦᑕᔥ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, 19ᐃᐃ ᓴ ᑳᐐᓯᓂᓯᕽ ᑮᐊᓇᒥᐋᕽ ᑭᐱᒪᑭᓱᐙᒡ ᐅᑯ ᑮᓯᓲᒃ, ᓃᐎᑮᓯᔅ, ᓈᓄᑮᓯᔅ, ᓃᔣᓱᑮᓯᔅ, ᒥᑖᓱᑮᓯᔅ ᑲᔦ ᐋᐱᒋ ᑕᑭᒋ ᒌᑲᑲᒥᑲᓐ ᐐᑾᑎᓈᓂᐗᕽ᙮ ᐐᑫ ᑕᒌᑫᑕᒨᒃ ᐯᒫᑎᓯᐙᒡ ᐌᒌᐙᒡ ᒎᑕ ᐊᑮᕽ᙮ ᒦᑕᔥ ᐁᔑᓈᑾᒃ ᒋᓵᑭᑑᔦᒃ ᑌᐺᐎᓐ, ᐱᓵᓂᑣᐎᓐ ᑲᔦ᙮
20ᒦᔥ ᐁᓂ ᐃᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᑭᑲ ᐅᑎᓵᐸᑖᒻ ᐃᓴ ᒋᐃᔑᓭᒃ ᐯᒫᑎᓯᐙᒡ ᐯᐸᑳᓂ ᐆᑌᓈᕽ ᒋᐱᐅᒋ ᑕᑯᔑᓄᐙᒡ ᒋᐲᔖᐙᒡ ᒉᕒᐆᓴᓬᐊᒥᕽ᙮ 21ᐅᐅ ᓴ ᑕᔥ ᑕᐊᔨᑎᐗᒃ ᐃᑭ ᐯᐸᑳᓐ ᐆᑌᓈᑳᕽ ᑫᐱ ᐊᔪᒌᐙᒡ, ᓃᓇᐎᓐᑦ ᐃᓴ ᓂᑎᔖᒥᓐ ᐁᐐ ᐊᐎ ᐊᓇᒥᐁᑕᐗᑭᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᐁᐐ ᑲᑴᒋᒪᑭᒡ ᒋᔕᐌᓂᒥᔭᒥᒡ᙮ ᐊᐤ, ᐊᐯᔪᒃ, ᐐᒌᐎᔑᓈᒻ᙮ 22ᑕᐹᑏᓄᐗᒃ ᐃᓴ ᑳᑕᓶᐙᓇᑭᓯᐙᒡ ᐊᐎᔭᒃ, ᐃᑭ ᑲᔦ ᑳᒪᔥᑲᐌᑖᑯᓯᐙᒡ ᐯᒫᑎᓯᐙᒡ ᑫᐲᔖᐙᒡ ᒉᕒᐆᓴᓬᐊᒥᕽ ᑭᒋ ᐆᑌᓈᕽ ᒋᐱ ᐊᑕᐊᓇᒥᐁᑕᐙᐙᒡ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ, ᒋᐱ ᑲᑴᒋᒫᐙᒡ ᑲᔦ ᒋᔕᐌᓂᒥᑯᐙᒡ᙮ 23ᒦ ᓴ ᐃ ᐊᐲ ᐃᔑ ᑮᔑᑲᒃ ᒥᑖᓱ 10 ᐃᓂᓂᐗᒃ ᐁᑕᓱ ᐊᔨᔑᑮᔗᐙᒡ, ᑳᐯᐸᑳᓂᓯᐙᒡ ᑫᓴᑮᑭᐱᓈᐙᒡ ᐅᑭᑭᔥᑭᑲᓂᓃᕽ ᐯᔑᒃ ᒎᐗᓐ ᒋᐃᓈᐙᒡ, ᑕᑲ ᓴ ᑭᑲ ᐐᒌᐎᑰ, ᐋᓃᔥ ᓂᓅᑖᒥᓐ ᑭᔐᒪᓂᑑ ᐁᐐᒌᐎᓀᒃ, ᒦ ᐃᐌᓂ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
Currently Selected:
ᓭᑲᕒᐋᔭ 8: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
