ᓭᑲᕒᐋᔭ 9
9
ᑮᐅᓈᑯᓂᑣ ᑳᐸᑳᓉᐙᓇᑭᓯᐙᒡ ᐯᔓ ᐁᔑᑖᐙᒡ
1 # Isa 17.1-3; Jer 49.23-27; Amo 1.3-5. ᒦ ᓴ ᐅᐌᓂ ᑳᑎᐯᒋᑫᒡ ᐁᑭᑐᒡ: ᐋᔕ ᐅᑮ ᐅᓀᑖᓐ ᐗᐃᔑ ᓇᓇᐊᑑᒡ ᐁᑕᕒᐊᒃ Hadrach ᐊᑭ, ᐃᐃᐌᓂ ᑲᔦ ᑭᒋ ᐆᑌᓇ ᑎᒫᔅᑲᔅ Damascus᙮ ᑳᐐᓐ ᐐᓐ ᐁᑕ ᐌᑕᑳᓀᓯᓂᒡ ᐃᔅᕒᐃᔭᓬᐄᕽ, ᐃᐃ ᓴ ᑯ ᑲᔦ ᑳᓃᑳᓀᑖᑾᓂᓂᒃ ᑭᒋ ᐆᑌᓇ ᓰᕒᐃᔭ Syria ᐊᑮᕽ ᑳᑎᐯᒋᑫᒡ ᐅᑎᐯᑖᓐ᙮ #Isa 23.1-18; Ezk 26.1—28.26; Joel 3.4-8; Amo 1.9,10; Mat 11.21,22; Luk 10.13,14. 2ᐃᐃ ᓴ ᑭᒋ ᐆᑌᓇ ᐁᒪᑦ Hamath ᑳᑎᐯᒋᑫᒡ ᐅᑎᐯᑖᓐ ᒌᑲᔭᐄ ᑳᐊᔮᒪᑲᒃ ᑭᒋ ᐆᑌᓇ ᐁᑕᕒᐊᒃ ᑳᐃᒋᑳᑌᒃ᙮ ᒦᔥ ᑲᔦ ᐯᔑᑾᓐ ᐁᔑ ᑎᐯᑕᕽ ᐃᓂ ᐆᑌᓇᐗᓐ, ᑕᔭᕒ Tyre ᓵᐃᑕᓐ Sidon ᐁᔑᓂᑳᑌᓂᑭᓐ, ᐋᓇᐐᓐ ᐃᑯ ᐁᓇᑲᒌᒪᑲᓂᓂᑭᓐ᙮ 3ᐃᐃ ᓴ ᑭᒋ ᐆᑌᓇ ᑕᔭᕒ ᐁᑕᑕᐌ ᓲᑭᒋᑳᑌ᙮ ᐐᑫ ᑲᔦ ᐹᑏᓄ ᐁᐅᑯᔑᕽ ᐙᐹᐱᑯ ᔔᓂᔮ ᐙᐱᒃ, ᐅᓵᐎ ᔔᓂᔮ ᐙᐱᒃ ᑲᔦ ᑖᐱᔥᑰ ᑳᑕᓯᕽ ᑳᐹᔥᑭᓀᓭᒃ᙮ 4ᑳᑎᐯᒋᑫᒡ ᐃᑕᔥ ᐅᑲ ᒪᑲᒫᓐ ᐁᔑ ᐌᓅᑎᓯᓂᒡ, ᑭᒋᑲᒦᕽ ᒋᔑ ᐸᑯᐲ ᐌᐱᓇᒪᐙᒡ᙮ ᒦᔥ ᐃᐃ ᑭᒋ ᐆᑌᓇ ᒋᐊᒀᑭᑌᒃ᙮ 5#Isa 14.29-31; Jer 47.1-7; Ezk 25.15-17; Joel 3.4-8; Amo 1.6-8; Zep 2.4-7. ᒦᑕᔥ ᐃᑭ ᐁᔮᐙᒡ ᐊᔥᑫᓬᐊᓐ Ashkelon ᐆᑌᓈᕽ ᐙᐸᑕᒧᐙᒡ ᐅᐅ ᒋᓭᑭᓯᐙᒡ᙮ ᐃᑭ ᑕᔥ ᑲᔦ ᑫᓴ Gaza ᐆᑌᓈᕽ ᐁᔮᐙᒡ ᐅᐅ ᐁᐙᐸᑕᒧᐙᒡ ᑕᐐᓴᑫᑕᒨᒃ᙮ ᐃᑭ ᑕᔥ ᑲᔦ ᐁᔮᐙᒡ ᐁᑲᕒᐊᓐ Ekron ᐆᑌᓈᕽ ᐁᔑ ᐊᐯᓂᒧᐙᐸᓐ ᐅᑲ ᓇᑲᓂᑯᓈᐙ᙮ ᐃᑭ ᑕᔥ ᐐᓐ ᐁᔮᐙᒡ ᑫᓴ ᐆᑌᓈᕽ ᑕᐅᑖᐱᓇᒪᐙᐗᒃ ᐅᑭᒋᐅᑭᒫᒥᐙᓐ᙮ ᐃᐃᐌ ᑕᔥ ᐐᓐ ᐆᑌᓇ ᐊᔥᑫᓬᐊᓐ ᑕᒪᔕᔥᒀ᙮ 6ᐃᐃᒫ ᑕᔥ ᐐᓐ ᐋᔥᑖᑦ Ashdod ᐆᑌᓈᕽ ᑕᐃᔑᑖᐗᒃ ᐯᒫᑎᓯᐙᒡ ᑳᐯᐸᑳᓂᓯᒡ ᐅᓃᑭᐃᑯᐙᐞ᙮ ᒦᔥ ᐁᑭᑐᒡ ᑳᑎᐯᒋᑫᒡ, ᐃᑭ ᑕᔥ ᐐᓐ ᐱᓬᐃᔅᑎᔭ Philistine ᐊᑮᕽ ᐌᒌᐙᒡ ᑕᑑᑕᐙᐗᒃ ᐐᑳ ᒦᓇᐙ ᒋᑭᒋ ᐃᓀᓂᑎᓱᓯᒀ᙮ 7ᑳᐐᓐ ᐃᑕᔥ ᐊᐗᔑᒣ ᐅᑲ ᒦᒋᓰᓈᐙ ᐐᔮᔅ ᒋᒥᔅᑸᐗᓂᓂᒃ ᑲᔦ ᑯᑕᒃ ᒦᒋᒻ ᑫᒪᑕ ᐊᒦᒋᐙᐸᓐ᙮ ᒥᓂᒃ ᐃᓴ ᑫᐱᒫᑎᓯᐙᒡ ᑖᓂ ᑎᓄᐎᐗᒃ ᓂᐱᒫᑎᓰᒪᒃ ᒎᑕ ᐊᑮᕽ ᒋᐅᒋ ᑎᐯᑖᑯᓯᐙᒡ᙮ ᒦᔥ ᑲᔦ ᐁᑲᕒᐊᓐ ᐆᑌᓈᕽ ᐌᒌᐙᒡ ᑕᐊᓂ ᑎᓄᐎᐗᒃ ᓂᐱᒫᑎᓰᒪᒃ ᑖᐱᔥᑰ ᒌᐸᔅ Jebusite ᑳᐃᓂᑣ ᑳᑮ ᑑᑕᒧᐙᒡ᙮ 8ᓂᑲ ᑲᓇᐌᑖᓐ ᐃᓴ ᓂᑕᑮᒻ ᑫᒋᓈᒡ ᐃᑯ ᒋᐸᐱᒥ ᐊᔮᓯᒀ ᑳᔒᑫᓂᒥᐙᒡ᙮ ᑳᐐᓐ ᒦᓇᐙ ᓂᐐ ᐸᑭᑎᓈᓰᒃ ᓂᐱᒫᑎᓰᒪᒃ ᐊᐗᔑᒣ ᒋᑲᒀᑕᑭᐃᑣ᙮ ᓂᑭᑫᑖᓐ ᐅᔕ ᐋᓃᓐ ᓂᐱᒫᑎᓰᒪᒃ ᐯᒥᔑ ᑲᒀᑕᑭᑑᐙᒡ᙮
ᐱᒌᓇᒃ ᑫᓂᑭᒋᐅᑭᒫᐎᒡ
9 # Mat 21.5; Jhn 12.15. ᐐᑫ ᑭᒋ ᒌᑫᑕᒧᒃ, ᓵᔭᓐ Zion ᐌᒌᔦᒃ᙮ ᔖᑯᐌᒃ ᑫᐊᐲᒋ ᒌᑫᑕᒣᒃ ᒉᕒᐆᓴᓬᐊᒥᕽ ᐌᒌᔦᒃ᙮ ᐃᓇᔥᑫ ᐙᐸᒥᒃ ᑭᑭᒋᐅᑭᒫᒥᐙ ᑭᐱ ᓈᓯᑳᑯᐙ! ᒦᔥ ᐌᒋ ᐲᔖᒡ ᐁᑮ ᐸᑭᓈᑫᒡ, ᐁᑮ ᔖᑰᒋᑣᒡ ᑲᔦ᙮ ᐋᐱᒋ ᓅᑳᑎᓯ, ᐁᐱᒥᐗᓈᓱᒡ ᐃᐃᒫ ᒫᔑᒥᑕᑎᒨᕽ, ᐁᐱᒥᐗᓈᓱᒡ ᐃᐃᒫ ᒫᔑᒥᑕᑎᒨᓯᕽ, ᒫᔑᒥᑕᑎᒻ ᐅᑑᔥᑲᔭᐋᓯᒪᓐ᙮ 10#Psa 72.8. ᒦᔥ ᐁᑭᑐᒡ ᑳᑎᐯᒋᑫᒡ, ᓂᑲ ᐅᑖᐱᓈᒃ ᒦᑳᓱᐎ ᐅᑖᐹᓈᑾᒃ ᐃᐃᒫ ᐃᔅᕒᐃᔭᓬᐃᑳᕽ᙮ ᓂᑲ ᐅᑖᐱᓈᒃ ᑲᔦ ᒥᑕᑎᒨᒃ ᐃᐃᒫ ᒉᕒᐆᓴᓬᐊᒥᕽ᙮ ᒥᑎᒀᐲᒃ ᑳᓂᑖ ᐋᐸᑎᓯᐙᒡ ᑮᒦᑳᑎᕽ ᑲᔦ ᑕᓂᔑᐗᓈᒋᐋᐗᒃ᙮ ᐊᐊ ᓴ ᑕᔥ ᑭᒋᐅᑭᒫ ᑕᐱᓵᓀᑖᑯᒋᑫ ᐱᓵᓐ ᒋᐐᒌᑎᓂᒡ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ᙮ ᐅᑎᐯᒋᑫᐎᓐ ᐃᓴ ᑕᐅᒋ ᒫᒋᓭᓂ ᐅᐅᒫ ᑭᒋᑲᒦᕽ ᐲᓂᔥ ᐌᑎ ᐁᔑ ᒪᒋᓭᓂᒃ ᐸᑳᓐ ᑭᒋᑲᒻ, ᐅᐅᒫ ᒋᐅᒋ ᒫᒋᓭᓂᒃ ᐃᔫᐸᕒᐁᑏᔅ Euphrates ᓰᐲᕽ ᐲᓂᔥ ᐌᑎ ᐁᔑ ᐗᔦᒀᑲᒥᑳᓂᒃ ᐊᑭ᙮
ᐁᑮᐌᐅᓇᓯᑣ ᑭᔐᒪᓂᑑ ᐅᐱᒫᑎᓰᒪᐞ
11 # Exo 24.8. ᒦᔥ ᐁᑭᑐᒡ ᑳᑎᐯᒋᑫᒡ, ᐃᐃ ᑕᔥ ᑳᑮ ᐃᔑ ᐊᔓᑕᒪᐎᓇᑰᑭᐸᓐ ᑳᑮ ᐅᒋ ᐋᔩᑕᒋᑳᑌᑭᐸᓐ ᐃᑕᔥ ᐅᒥᔅᑸᒥᐙᕽ ᐊᔭᐋᐎᔕᒃ ᑮᐸᑭᑎᓂᑣ, ᒦ ᓴ ᐃ ᑫᐅᒋ ᐋᐸᐅᑰᐎᓯᔦᒃ ᑳᔑ ᐊᓯᑰᔦᒃ ᑳᔑ ᐹᑌᒃ ᐙᓂᑳᓐ᙮ 12ᐱᑮᐌᒃ ᑮᓇᐙ ᑫᔮᐱ ᑳᐸᑯᓭᓂᒧᔦᒃ ᑳᑮ ᒫᒌᓂᑰᔦᑭᐸᓐ, ᒋᐱ ᐃᔑ ᑮᐌᔦᒃ ᑫᔑ ᐸᐹᒣᓂᒥᑰᓯᐌᒃ ᒦᓇᐙ᙮ ᒦᔥ ᐁᔑ ᐐᑕᒪᐎᓇᑰᒃ, ᓃᔣ ᐃᐃ ᒥᓂᒃ ᐁᐐ ᐃᔑ ᑮᐌ ᒦᓂᓇᑰᒃ᙮ 13ᑖᐱᔥᑰ ᓴ ᒥᑎᒀᐲᕽ ᓂᑲ ᐃᓈᐸᒋᐋᒃ ᐁᔮᐙᒡ ᒎᑕᑳᕽ᙮ ᐱᑾᑯᕽ ᐃᑕᔥ ᐐᓐ ᓂᑲ ᐃᓈᐸᒋᐋᒃ ᐁᔮᐙᒡ ᐃᔅᕒᐃᔭᓬᐃᑳᕽ᙮ ᑭᒋ ᒨᑯᒫᓂᕽ ᐃᑕᔥ ᐐᓐ ᓂᑲ ᐃᓈᐸᒋᐋᒃ ᐃᓂᓂᐗᒃ ᓵᔭᓂᕽ ᐌᒌᐙᒡ ᐊᐲ ᒦᑳᓇᒀ ᐃᓂᓂᐗᒃ ᐌᒌᐙᒡ ᑲᕒᐄᔅ Greece ᐊᑮᕽ᙮
14ᑳᑎᐯᒋᑫᒡ ᐃᓴ ᐃᔥᐱᒥᕽ ᐃᓇᑫ ᑕᔑᓈᑯᓯ ᐁᔑᐊᔮᓂᒡ ᐅᐱᒫᑎᓰᒪᐞ; ᑖᐱᔥᑰ ᑳᐙᑌᓭᒃ ᐃᓴ ᑕᐃᔑᓈᑾᓂᓂ ᐅᐱᑾᒃ ᐱᒧᒋᑫᒡ᙮ ᑳᒫᐗᒋ ᑎᐯᒋᑫᒡ ᐃᓴ ᐅᑲ ᓅᑖᑯᑑᓐ ᐅᐴᑖᒋᑲᓐ᙮ ᑭᒋᓅᑎᓄᕽ ᐃᓴ ᑕᐱᒥ ᐊᔮ ᒋᐱ ᐅᒌᒡ ᔖᐗᓄᕽ᙮ 15ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐃᓴ ᐅᑲ ᑲᓇᐌᓂᒫᐞ ᐅᐱᒫᑎᓰᒪᐞ, ᒦᔥ ᒋᔖᑰᒋᐋᓂᒡ ᑳᔒᑫᓂᒥᑯᓂᒡ᙮ ᑖᐱᔥᑰ ᓴ ᐅᑮᐗᔥᑴᐲᒃ ᑕᐃᓂᑖᑯᓯᐗᐞ ᔖᑯᐌᓂᒡ ᐁᑕᔑ ᒦᑳᑎᓈᓂᐗᓂᓂᒃ᙮ ᑖᐱᔥᑰ ᓴ ᒥᔅᑸ ᑳᐱᒥᒋᐗᕽ ᑮᓰᑭᓂᑳᑌᒃ ᐁᔑ ᐸᑭᑎᓈᓱᕽ ᒦ ᓴ ᐃ ᑫᑑᑕᐙᓂᒡ ᑳᔒᑫᓂᒥᑯᓂᒡ᙮ 16ᐊᐲ ᑕᔥ ᐃᐃ ᐅᒋᒋ ᑮᔑᑲᒃ, ᑳᑎᐯᒋᑫᒡ ᐅᔕ ᐅᑲ ᐱᒫᒋᐋᐞ ᐅᐱᒫᑎᓰᒪᐞ ᑖᐱᔥᑰ ᐅᑲᓇᐎ ᒫᓇᒑᓂᔑᐌ ᑳᔑ ᐱᒫᒋᐋᒡ ᐅᒫᓇᒑᓂᔑᒪᐞ ᑮᓇᓃᓵᓂᓯᓂᒡ᙮ ᑌᐺ ᓴ ᑕᐙᓭᓈᑯᓯᐗᐞ ᐅᑕᑮᒥᕽ ᑖᐱᔥᑰ ᐌᓂᔑᔑᒡ ᐊᓯᓐ ᑳᔑ ᒥᓄᓈᑯᓯᒡ ᐅᑭᒫᐙᓄᒀᓂᕽ᙮ 17ᒫᐗᒡ ᐃᑕᔥ ᐃᑯ ᑕᑭᒋ ᒥᓄᓈᑾᓐ, ᑕᑭᒋ ᐅᓂᔑᔑᓐ ᑲᔦ ᐃᐃ ᐊᑭ᙮ ᐃᑭ ᑕᔥ ᐌᔥᑳᑎᓯᐙᒡ ᑕᐅᒋ ᒪᔥᑲᐎᑭᐗᒃ ᒦᒋᐙᒡ ᒪᓅᒥᓐ, ᑲᔦ ᑕᔥ ᒥᓂᑴᐙᒡ ᔔᒥᓈᐳ᙮
Currently Selected:
ᓭᑲᕒᐋᔭ 9: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
