ᓭᑲᕒᐋᔭ 12
12
ᐁᑮᑕᔑᑌᒃ ᐋᓃᓐ ᑫᔑᐱᒫᒋᒋᑳᑌᒃ ᒉᕒᐆᓴᓬᐊᒻ
1ᒦᑕᔥ ᐅᐅ ᑳᑎᐯᒋᑫᒡ ᐁᓈᒋᒫᒡ ᐃᔅᕒᐃᔭᓬ ᐊᑮᕽ ᐌᒌᓂᒡ᙮ ᑳᑎᐯᒋᑫᒡ ᐄᑐᒃ ᑳᑮ ᑕᔗᑮᑲᑰᑑᒡ ᐋᓴᒥᑮᔑᒃ, ᐐᓐ ᑲᔦ ᑳᑮ ᐅᓇᑑᒡ ᐊᑮᓂ, ᐐᓐ ᑲᔦ ᑳᑮ ᒦᓈᒡ ᐃᓂᓂᐗᓐ ᐊᒑᑾᓐ ᑫᐅᒋ ᐱᒫᑎᓯᓂᒡ᙮ 2ᒦᔥ ᐅᐅᐌ ᐁᑭᑐᒡ, ᒦ ᓴ ᐃ ᑫᐃᔑᑑᔮᓐ ᐆᑌᓇ ᒉᕒᐆᓴᓬᐊᒻ ᑖᐱᔥᑰ ᔔᒥᓈᐳ ᑳᒨᔥᑭᓀᐲᒃ ᒥᓂᒀᑲᓂᕽ᙮ ᐃᐃ ᑕᔥ ᐯᒫᑎᓯᓂᒡ ᐙᑳᔭᐄ ᐁᔑᑖᓂᒡ, ᒦ ᐃᒫ ᑫᐅᒋ ᑮᐗᔥᑴᐲᓂᒡ ᒋᐊᓂ ᐋᔮᔔᑲᓀᓂᒡ᙮ ᐊᐲ ᑕᔥ ᑲᔦ ᐙᑳᔥᑲᒥᓂᒡ ᒦᑳᑕᒥᓂᒡ ᒉᕒᐆᓴᓬᐊᒻ, ᒦ ᓴ ᐃ ᐯᔑᑾᓐ ᑲᑭᓇ ᐆᑌᓇᐗᓐ ᑫᑑᒋᑳᑌᑭᓐ ᐃᐃᒫ ᐁᔮᑭᓐ ᒎᑕ ᐊᑮᕽ᙮ 3ᐃᐃ ᑕᔥ ᐊᐲ ᐃᔑ ᑮᔑᑲᒃ ᐱᐊᑕ ᒦᑳᑕᒧᐙᒡ ᒉᕒᐆᓴᓬᐊᒻ ᐃᑭ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ, ᐊᔩᒋ ᒪᔥᑲᐗᓯᓃᕽ ᐃᓴ ᓂᑲ ᐃᔑᑑᓐ ᒉᕒᐆᓴᓬᐊᒻ᙮ ᐊᐌᓀᓐ ᐃᑕᔥ ᐃᑯ ᑫᑲᑴ ᐗᑲᐎᐱᑑᒡ ᑕᐅᒋᒫᑭᓯ ᐃᐃᒫ᙮ 4ᒦᔥ ᐃᐃ ᐊᐲ ᑫᐗᐙᓀᑕᒥᓂᒡ ᐅᒥᑕᑎᒨᒥᐙᐞ, ᑲᔦ ᑕᔥ ᑫᑑᑕᐎᒪᒃ ᐯᒥᐗᓀᐸᐃᑯᓂᒡ ᒋᐗᓈᓂᒥᓯᓂᒡ᙮ ᐌᐌᓂ ᓴ ᓂᐐ ᓈᓈᑲᒋᐋᒃ ᐯᒫᑎᓯᐙᒡ ᐁᔮᐙᒡ ᒎᑕ ᐊᑮᕽ᙮ ᒦᔥ ᐙᑑᑕᐎᒪᒃ ᐅᒥᑕᑎᒨᒥᓂ ᑳᔒᑫᓂᒥᑯᐙᒡ ᒋᐙᐱᓯᓂᒃ᙮ 5ᒦᑕᔥ ᑳᓃᑳᓂᓯᐙᒡ ᒎᑕ Judah ᐊᑮᕽ ᐁᔮᐙᒡ ᑫᐃᑭᑐᐙᒡ, ᐁᑕᑕᐌ ᓲᑫᑖᑯᓯᐗᒃ ᐯᒫᑎᓯᐙᒡ ᐁᔮᐙᒡ ᒉᕒᐆᓴᓬᐊᒥᕽ Jerusalem ᐋᓃᔥ ᑳᑎᐯᒋᑫᓂᒡ ᑳᒫᐗᒋ ᒪᔥᑲᐎᓰᓂᒡ ᐅᑭᔐᒪᓂᑑᒥᐙᓐ ᐅᒪᔥᑲᐎᓰᐃᑯᐙᓐ᙮
6ᒦᔥ ᐃᐃ ᐊᐲ ᑳᓃᑳᓂᓯᐙᒡ ᒎᑕ ᐊᑮᕽ ᑫᐃᔑᐊᒀ ᑖᐱᔥᑰ ᐃᔥᑯᑌ ᑳᐱᔅᑲᓀᒃ ᓅᐱᒦᕽ, ᑲᔦ ᐃᐃᒫ ᑮᓂ ᐹᑌᑭᓐ ᑮᐃᔥᒀ ᐊᑎᑌᑭᓐ ᐸᐌᔑᑲᓂᒥᓈᑎᑰᓐ᙮ ᒦ ᐃᐌ ᓇᑫ ᑫᔑ ᓂᔑᐗᓈᒋᐋᐙᒡ ᐁᔮᓂᒡ ᐙᑳᔭᐄ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ᙮ ᐃᑭ ᓴ ᑕᔥ ᐯᒫᑎᓯᐙᒡ ᐁᔮᐙᒡ ᐃᐃᒫ ᒉᕒᐆᓴᓬᐊᒥᕽ ᑳᐐᓐ ᑫᑰᓐ ᑕᔑ ᐗᓯᑖᐎᓭᓰᐗᒃ᙮
7ᓃᓐ ᓴ ᑳᑎᐯᒋᑫᔮᓐ ᓂᑲ ᒦᓈᒃ ᒎᑕ ᐁᔮᐙᒡ ᓂᑕᒻ ᒋᔖᑰᒋᑣᐙᒡ᙮ ᒦᔥ ᐃᐃ ᑳᔑ ᑭᑌᑖᑯᓯᐙᒡ ᑌᐱᑎᕽ David ᐌᑕᑳᓀᓯᐙᒡ ᐃᑭ ᑲᔦ ᐁᔮᐙᒡ ᐃᐃᒫ ᐆᑌᓈᕽ ᒉᕒᐆᓴᓬᐊᒥᕽ ᐊᐗᔑᒣ ᒋᑭᒋ ᐃᓀᑖᑯᓯᓯᒀ ᑯᑕᒃ ᐃᐃᒫ ᐁᔮᐙᒡ ᒎᑕ ᐊᑮᕽ᙮ 8ᐃᐃ ᓴ ᐊᐲ ᑮᔑᑲᒃ ᑳᑎᐯᒋᑫᒡ ᐅᑲ ᓈᑕᒪᐙᐞ ᐁᔮᓂᒡ ᐃᐃᒫ ᒉᕒᐆᓴᓬᐊᒥᕽ᙮ ᒥᓴᐙ ᑯ ᒫᐗᒡ ᑳᒪᒉᑖᑯᓯᓂᒡ ᐊᐎᔭᐞ ᐁᔮᓂᒡ ᐃᐃᒫ ᒣᑴᔭᐄ ᑕᔑ ᓲᑫᑖᑯᓯᐗᐞ ᑖᐱᔥᑰ ᑌᐱᑎᕽ᙮ ᒦᔥ ᑲᔦ ᐃᑭ ᑌᐱᑎᕽ ᐌᑕᑳᓀᓯᐙᒡ ᑭᔐᒪᓂᑑᒃ ᑕᐃᓀᑖᑯᓯᐗᒃ, ᑖᐱᔥᑰ ᑳᑎᐯᒋᑫᒡ ᐅᑌᒐᓬᐃᒪᓐ ᑳᓃᑳᓃᑕᒫᑫᓂᒡ᙮ 9ᒦᔥ ᐃᐃ ᐊᐲ ᑮᔑᑲᒃ ᒋᒑᑭᐊᒀ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᑫᐱ ᒦᑳᑕᒧᐙᒡ ᐆᑌᓇ ᒉᕒᐆᓴᓬᐊᒻ᙮
10 # Jhn 19.37; Rev 1.7. ᐃᑭ ᓴ ᑌᐱᑎᕽ ᐌᑕᑳᓀᓯᐙᒡ ᐃᑭ ᑲᔦ ᑯᑕᒃ ᐁᔑᑖᐙᒡ ᐃᐃᒫ ᒉᕒᐆᓴᓬᐊᒥᕽ ᓂᐐ ᓰᑭᓇᒪᐙᒃ ᒋᒨᔥᑭᓀᔥᑳᑯᐙᒡ ᐊᒑᑾᓐ ᑫᐅᒋ ᑰᐹᓯᓈᑫᐙᒡ, ᑲᔦ ᑫᐅᒋ ᓂᑖ ᐊᓇᒥᐋᐙᒡ᙮ ᒦᑕᔥ ᒋᑲᓇᐙᐸᒫᐙᒡ ᑳᑮ ᐸᔑᐸᐗᐙᒡ ᐁᑮ ᓂᓵᐙᒡ᙮ ᐅᑲ ᒪᐎᒫᐙᓐ ᐃᑕᔥ ᑖᐱᔥᑰ ᐊᐎᔭᒃ ᑳᔑ ᒪᐎᒫᐙᒡ ᒣᒋ ᐯᔑᑯᓂᒡ ᐊᐱᓅᒌᔕᓐ᙮ ᐐᑫ ᓴ ᑕᑭᒋ ᒪᐎᐗᒃ ᑖᐱᔥᑰ ᑳᔑ ᒪᐎᒥᓐᒡ ᓂᑕᒻ ᓀᑖᐎᑭᒡ ᑸᐎᓭᔅ ᑮᐃᔥᒀ ᐱᒫᑎᓯᒡ᙮ #Mat 24.20; Rev 1.7. 11ᐃᐃ ᓴ ᐊᐲ ᑮᔑᑲᒃ ᐋᐱᒋ ᑕᑭᒋ ᒪᐎᓈᓂᐗᓐ ᐃᐃᒫ ᒉᕒᐆᓴᓬᐊᒥᕽ ᑖᐱᔥᑰ ᑳᑮ ᐃᔑ ᒪᐎᓈᓂᐗᑭᐸᓐ ᐌᑎ ᐊᔮᐎᓂᕽ ᐁᑖᑦ ᕒᐃᒪᓐ Hadad-Rimmon ᐁᒋᑳᑌᒃ ᑳᔑ ᐊᔮᒃ ᐁᔑ ᑕᑕᒀᒃ ᒣᑭᑑ Megiddo ᐁᒋᑳᑌᒃ᙮ 12ᑲᑭᓇ ᑕᔥ ᐃᑯ ᐁᔦᑕᓶᐙᓇᑭᓯᐙᒡ ᓀᓈᐗᒡ ᐁᔑ ᐊᔨᓇᐌᑎᐙᒡ ᑕᔑ ᐊᔪᑯ ᒪᐎᐗᒃ ᐃᐃᒫ ᐊᑮᕽ᙮ ᐃᑴᐗᒃ ᐯᐸᑳᓐ ᐁᑮ ᑕᔑ ᒪᐎᐙᒡ, ᐃᓂᓂᐗᒃ ᑲᔦ᙮ ᒦᐗᒃ ᐃᑕᔥ ᐃᑭ ᑌᐱᑎᕽ ᐌᑕᑳᓀᓯᐙᒡ, ᐃᑭ ᑲᔦ ᓀᑕᓂᕽ Nathan ᐌᑕᑳᓀᓯᐙᒡ, 13ᐃᑭ ᑲᔦ ᓬᐄᐹᐃᕽ Levi ᐌᑕᑳᓀᓯᐙᒡ, ᐃᑭ ᑲᔦ ᔑᒥᐋᐃ Shimei ᐌᑕᑳᓀᓯᐙᒡ, 14ᐃᑭ ᑕᔥ ᑲᔦ ᑯᑕᒃ ᐯᐯᔑᑴᐙᓐ ᑳᐊᔪᑕᑳᓀᓯᐙᒡ ᒋᒪᐎᐙᒡ᙮
Currently Selected:
ᓭᑲᕒᐋᔭ 12: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
