ᓭᑲᕒᐋᔭ 11
11
ᑮᔖᑰᒋᐃᑣ ᑳᑲᒀᓂᓴᑭᓯᐙᒡ ᑭᒋᐅᑭᒫᒃ
1ᑮᓐ ᓬᐁᐸᓇᓐ Lebanon, ᐱᓵᓐ ᐹᑭᓯᑑᓐ ᑭᑎᔥᒀᑌᒪᓐ ᐃᔥᑯᑌᕽ ᒋᐅᒋ ᒑᑳᑭᓱᐙᒡ ᑭᑮᔥᑳᑎᑯᒪᒃ᙮ 2ᔑᒀᑾᒃ, ᑭᒋ ᒪᐎᒃ᙮ ᑮᔥᑳᑎᑰᒃ ᐅᔕ ᑮᑲᐎᓭᐗᒃ, ᒥᑎᑰᒃ ᑫᒋ ᐃᓀᑖᑯᓯᐙᐸᓐ ᐁᑮ ᓂᔑᐗᓈᒋᐃᑣ ᐄᓴᓐ᙮ ᐅᒃ ᑎᓄᐙᑎᑰᒃ ᐁᔮᔦᒃ ᐯᔕᓐ Bashan ᐊᔮᐎᓂᕽ, ᒪᐎᒃ, ᐃᐃ ᐁᔑ ᓅᐱᒦᐗᑭᐸᓐ ᐐᑫ ᐁᑮ ᐸᔥᑯᑲᐃᑳᑌᒃ᙮ 3ᐃᑭ ᓴ ᑕᔥ ᐌᑭᒫᑲᑖᑫᐙᒡ ᐅᒋ ᒪᐎᐗᒃ ᐁᒫᓀᑕᒧᐙᒡ ᐋᓃᔥ ᑳᐐᓐ ᐊᐗᔑᒣ ᑭᒋ ᐃᓀᑖᑯᓯᓰᐗᒃ᙮ ᐃᓇᔥᑫ ᓅᑕᐎᑾᒃ ᐅᔥᑭ ᒥᔑᐱᔑᐗᒃ ᐁᓀᑭᒧᓅᑖᑯᓯᐙᒡ; ᐋᓃᔥ ᐁᔑᑖᐙᐸᓐ ᑳᔑ ᓴᑭᑯᐹᓂᒃ ᒌᑭ ᓰᐱᕽ ᒞᕒᑕᓐ Jordan ᑮᓂᔑᐗᓈᒋᒋᑳᑌᓂ᙮
ᓃᔑᓐ ᐅᑲᓇᐎᒫᓇᒑᓂᔑᐌᒃ ᐁᑕᔑᒥᑣ
4ᒦᔥ ᑳᑎᐯᒋᑫᒡ ᓂᑭᔐᒪᓂᑑᒻ ᐁᑭᑐᒡ, ᐃᔑᒋᑫᑳᓲᓐ ᑖᐱᔥᑰ ᐅᑲᓇᐎ ᒫᓇᒑᓂᔑᐌ ᑳᐃᔑᐎᓈᒡ ᐅᒫᓇᒑᓂᔑᒪᐞ ᑫᔑ ᓂᓯᒥᓐᒡ᙮ 5ᐃᑭ ᓴ ᑕᔥ ᐁᑖᐌᐙᒡ ᐃᐃ ᒫᓇᒑᓂᔕᐞ ᐅᓂᓵᐙᐞ, ᑳᐐᓐ ᑫᑰᓐ ᐃᔑ ᓇᓇᐊᓵᓰᐗᒃ᙮ ᐃᑭ ᑕᔥ ᐐᓐ ᑳᑮ ᐊᑖᐙᑫᐙᒡ ᐃᐃ ᒫᓇᒑᓂᔕᐞ ᒦ ᐃ ᐁᑭᑐᐙᒡ, ᑕᒦᑴᒋᐌᓂᒫ ᑳᑎᐯᒋᑫᒡ ᐁᐌᓅᑎᓯᔮᓐ! ᑳᐐᓐ ᐃᓴ ᑲᓇᑫ ᐅᑰᐹᑌᓂᒥᑯᓰᐙᐞ ᑌᐯᓂᒥᑯᐙᒡ᙮
6ᒦᔥ ᐁᑭᑐᒡ ᑳᑎᐯᒋᑫᒡ, ᑳᐐᓐ ᐃᑕᔥ ᐃᑕᐙ ᐊᐎᔭ ᓂᐐ ᑰᐹᓯᓇᐙᓰ ᐅᐅᒫ ᐊᑮᕽ᙮ ᓃᓐ ᓴ ᐱᑯ ᓂᑲ ᑑᑕᐙᒃ ᑲᑭᓇ ᐯᒫᑎᓯᐙᒡ ᒋᐌᓵᓂ ᑎᐯᓂᒥᑯᐙᒡ ᐌᑭᒫᑲᑖᑫᓂᒡ᙮ ᒦᐗᐞ ᐃᑕᔥ ᐅᐅ ᑫᑌᑕᑯ ᓂᔑᐗᓈᒋᑑᓂᒡ ᐅᐅ ᐊᑮᓂ, ᑳᐐᓐ ᐃᑕᔥ ᑲᓇᑫ ᐊᐎᔭ ᓂᐐ ᐱᒫᒋᐋᓰ᙮
7ᒦᔥ ᓃᓐ ᓭᑲᕒᐋᔭ Zechariah ᑳᑮ ᐊᓄᑮᐃᐙᒡ ᐃᑭ ᐁᑖᐌᐙᒡ, ᐁᑖᐙᑫᐙᒡ ᑲᔦ ᒫᓇᒑᓂᔕᐞ᙮ ᓃᓐ ᐃᑕᔥ ᓂᑮ ᓈᓈᑲᒋᐋᒃ ᒫᓇᒑᓂᔕᒃ ᑳᐐ ᓂᓯᑣᐸᓐ᙮ ᓃᔑᓐ 2 ᒥᑎᑰᓐ ᓂᑮ ᐅᑖᐱᓈᓇᓐ: ᐯᔑᒃ ᐃᐃ ᒥᑎᒃ ᒥᓉᓂᒥᑰᐎᔅ ᐁᑮ ᐃᔑᓂᑳᑕᒫᓐ, ᐃᐃ ᑕᔥ ᑯᑕᒃ ᐐᒌᑎᐎᓐ ᓂᑮ ᐃᔑᓂᑳᑖᓐ᙮ ᓃᓐ ᐃᑕᔥ ᓂᑮ ᑲᓇᐌᓂᒫᒃ ᒫᓇᒑᓂᔕᒃ᙮ 8ᐯᔑᑯ ᑮᓯᔅ ᐃᑕᔥ ᐁᐊᓂ ᐃᔑᓭᒃ ᓂᑮ ᐊᓂ ᐴᓂ ᔕᔒᐱᓇᐌᔅ, ᒦᔥ ᑳᑮ ᑮᔥᑭᓇᒀ ᑯᑕᒃ ᓂᓯᓐ 3 ᑳᑮ ᔒᑫᓂᒥᐙᒡ ᐅᑲᓇᐎ ᒫᓇᒑᓂᔑᐌᒃ᙮ 9ᒦᔥ ᑳᐃᑭᑐᔮᓐ ᑫᓇᐌᓂᒪᒀ ᒫᓇᒑᓂᔕᒃ, ᑳᐐᓐ ᐃᓴ ᐊᐗᔑᒣ ᓂᐐ ᑎᓄᐎᓰ ᐅᑲᓇᐎ ᒫᓇᒑᓂᔑᐌ ᐁᐐ ᐴᓂ ᓈᓈᑲᒋᐃᓇᑰᒃ᙮ ᑕᑲ ᐃᑭ ᑳᐐ ᓂᐳᐙᐸᓐ ᐱᓵᓐ ᑕᓂᐳᐗᒃ᙮ ᐃᑭ ᑳᐐ ᓂᓯᑣᐸᓐ ᐱᓵᓐ ᑕᓂᓵᐗᒃ᙮ ᐃᑭ ᑕᔥ ᑫᐃᔥᑯᓭᐙᒡ ᐱᓵᓐ ᑕᒑᑭᐃᑎᐗᒃ᙮ 10ᒦᔥ ᑳᑮ ᐅᑖᐱᓇᒫᓐ ᓂᒥᑎᑯᒻ ᒥᓉᓂᒥᑰᐎᔅ ᐁᔑᓂᑳᑌᒃ ᐁᑮ ᐴᑯᓇᒫᓐ᙮ ᒦᔥ ᐁᑮ ᐲᑯᓇᒫᓐ ᑳᑎᐯᒋᑫᒡ ᑳᑮ ᐃᔑ ᐊᔓᑕᒪᐙᑯᐸᓐ ᐃᐃ ᑲᑭᓇ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ᙮ 11ᒦᔥ ᐁᑮ ᐴᓂᓭᒃ ᐃᐃ ᐊᔓᑕᒫᑫᐎᓐ ᐃᐃ ᐊᐲ ᐁᑮᔑᑲᒃ᙮ ᒦᑕᔥ ᐃᑭ ᐁᑖᐌᐙᒡ, ᐁᑖᐙᑫᐙᒡ ᑲᔦ ᒫᓇᒑᓂᔕᐞ ᐁᑲᓇᐙᐸᒥᐙᒡ, ᐅᑮ ᑭᑫᑖᓈᐙ ᐄᓴᓐ ᑳᑎᐯᒋᑫᓂᒡ ᐁᐅᒋ ᑮᑭᑐᓂᒡ ᐃᐃᒫ ᑳᑮ ᐃᔑᒋᑫᐗᒃ᙮ 12#Mat 27.9,10. ᒦᑕᔥ ᑳᐃᓇᒀ, ᑮᔥᐱᓐ ᐃᓀᑕᒣᒃ, ᑎᐸᐊᒪᐎᔑᒃ᙮ ᑮᔥᐱᓐ ᐃᑕᔥ ᐐᑎᐸᐊᒪᐎᓯᐌᒃ, ᐱᓵᓂᑯ ᑲᓇᐌᓂᒥᒃ᙮ ᒦᔥ ᑳᐃᔑ ᒦᔑᐙᒡ ᓂᓯᒥᑕᓇ 30 ᐙᐹᐱᑯ ᔔᓂᔮᓴᐞ ᐁᑮ ᑎᐸᐊᒪᐎᐙᒡ᙮
# Mat 26.15. 13ᒦᑕᔥ ᑳᑎᐯᒋᑫᒡ ᑳᑮ ᑲᓅᔑᒡ, ᐋᐸᑭᑕᒧᐤ ᐊᐊ ᐅᑑᓈᑲᓂᑫ᙮ ᒦᔥ ᑳᐃᔑ ᐲᑎᑲᓇᒃ ᐊᐊ ᓂᓯᒥᑕᓇ 30 ᐙᐹᐱᑯ ᔔᓂᔮᔅ ᐁᑮ ᐋᐸᑭᑕᒪᐗᒃ ᐅᑑᓈᑲᓂᑫ ᑭᒋ ᐊᓇᒥᐁᐎᑲᒥᑯᕽ᙮ ᑭᒋ ᓃᐱᐗᐞ ᓂᑮ ᐃᓀᑕᒻ ᐃᐃ ᒥᓂᒃ ᑳᑮ ᐊᐲᑌᓂᒥᐙᒡ᙮ 14ᒦᑕᔥ ᑳᑮ ᐴᑯᓇᒫᓐ ᑯᑕᒃ ᓂᒥᑎᑯᒻ ᐐᒌᑎᐎᓐ ᐁᔑᓂᑳᑌᒃ᙮ ᒦᔥ ᐁᑮ ᐋᓇᐌᐗᕽ ᐁᔑ ᐐᒌᑎᐙᐸᓐ ᒎᑕ ᐊᑮᕽ, ᑲᔦ ᑕᔥ ᐃᔅᕒᐃᔭᓬ ᐊᑮᕽ ᐌᒌᐙᒡ᙮
15ᒦᔥ ᑳᑎᐯᒋᑫᒡ ᑳᐃᔑᒡ, ᒦᓇᐙ ᓴ ᐃᔑᑫᑳᓲᓐ ᑖᐱᔥᑰ ᑎᓄ ᐅᑲᓇᐎ ᒫᓇᒑᓂᔑᐌ ᑳᑲᑮᐹᑎᓯᒡ᙮ 16ᒦᑕᔥ ᐁᑮ ᐊᓴᒃ ᐅᑲᓇᐎ ᒫᓇᒑᓂᔑᐌ ᐊᑮᕽ ᑫᑲᓇᐌᓂᒫᒡ ᓂᒫᓇᒑᓂᔑᒪᐞ, ᑳᐐᓐ ᐅᐐᒋᐋᓰᐞ ᒫᓇᒑᓂᔕᐞ ᑳᐐ ᓂᓯᒥᓐᒡ᙮ ᑳᐐᓐ ᑲᔦ ᐅᓇᓈᑐᓀᐙᓰᐞ ᐌᓂᔑᓂᓂᒡ, ᑳᐐᓐ ᒋᐐ ᐊᑕᐎᐋᒡ ᑳᐐᓴᑫᑕᒥᓂᒡ, ᑳᐐᓐ ᑲᔦ ᐅᑕᔕᒫᓰᐞ ᐃᐃ ᑳᔖᐾᓂᒡ᙮ ᑌᑾᒡ ᐃᑕᔥ ᒦ ᐃᒫ ᐌᑕᑕᕽ ᐌᓂᔑᔑᓂᓂᒃ ᐐᔮᔅ, ᐁᒪᓂᐱᑕᒪᐙᒡ ᐅᐗᓇᓯᑎᓂ᙮ 17ᐋᐱᒋ ᑕᑭᒋ ᒫᔑᓭ ᐊᐊ ᐅᑲᓇᐎ ᒫᓇᒑᓂᔑᐌ ᑫᑮᐹᑎᓯᒡ, ᐁᑮ ᐌᐱᓈᒡ ᒫᓇᒑᓂᔕᐞ᙮ ᒦᑳᓱᐎᓐ ᐃᓴ ᐅᑲ ᑌᑕᑯ ᔖᑰᒋᐃᑯᓐ ᒋᒪᔥᑲᐎᓰᓯᒃ᙮ ᐅᓂᒃ ᑕᐹᑌᓂ, ᐅᔥᑮᔑᒃ ᐁᔮᓂᒃ ᐃᓇᑫ ᐅᑭᒋᓂᑮᕽ ᑳᐐᓐ ᑕᐙᐱᐙᑫᓰ᙮
Currently Selected:
ᓭᑲᕒᐋᔭ 11: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
