ᒫᓬᐊᑳᐃ 3
3
1 # Mat 11.10; Mrk 1.2; Luk 1.76; 7.27. ᒦᑕᔥ ᐅᐅ ᐁᔑ ᓇᑴᑕᕽ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ, ᓂᐐ ᓃᑳᓂ ᐃᔑᓂᔕᐙ ᓴ ᓂᑎᐹᒋᒧᐎᓂᓃᒻ, ᒦ ᓴ ᐊᐌ ᑫᑾᔮᒋᑕᒪᐎᒡ ᐋᑎ ᑫᓂ ᐃᔖᐗᒃ᙮ ᑳᑎᐯᒋᑫᒡ ᓴ ᑕᔥ ᑳᓇᓈᑐᓀᐌᒃ, ᑕᓭᓴᑰᒋ ᑕᑯᔑᓐ ᐃᐃᒫ ᐅᑕᓇᒥᐁᐎᑲᒥᑯᕽ᙮ ᐊᐊ ᓴ ᓂᑎᐹᒋᒧᐎᓂᓃᒻ ᑳᐋᔅᑯᓂ ᐲᐁᒃ ᑫᐱᒥᐎᑑᒡ ᓂᑕᔓᑕᒫᑫᐎᓇᓐ ᑕᐱᑕᑯᔑᓐ᙮
2 # Joel 2.11; Rev 6.17. ᐊᐌᓀᓐ ᑕᔥ ᑫᑲᔥᑭᑑᐸᓐ ᒋᔖᐾᒡ ᐊᐲ ᐃ ᑮᔑᑲᓂᓂᒃ ᐱᑕᑯᔑᓂᓂᒡ? ᐊᐌᓀᓐ ᐃᑕᔥ ᑲᔦ ᑫᑲᔥᑭᑑᐸᓐ ᒋᓃᐸᐎᐸᓐ ᐊᐲ ᓈᑯᓯᓂᒡ? ᒦᔥ ᐃᓂ ᑫᐃᓀᑖᑯᓯᓂᒡ ᑎᐹᒋᒧᐎᓂᓂ ᑖᐱᔥᑰ ᐃᔥᑯᑌ ᑳᐯᑳᐱᑭᓱᐌᒪᑲᓂᓂᒃ, ᑮᓰᐲᑲᐃᑲᓇᓐ ᑲᔦ ᑳᐯᑳᐹᐗᔑᐌᓂᒡ᙮ 3ᑕᐱ ᐅᓇᐱ ᓴ ᑖᐱᔥᑰ ᑳᐃᔑᒋᑫᓂᒡ ᐲᐙᐱᑯᑫᐎᓂᓂᐗᓐ ᑮᓂᑭᓴᒥᓂᒡ, ᑳᐯᑳᐱᑭᓴᒥᓂᒡ ᐙᐹᐱᑯ ᔔᓂᔮ ᐙᐱᒃ᙮ ᒦᑕᔥ ᑳᑎᐯᒋᑫᒡ ᐅᑎᐹᒋᒧᐎᓂᓃᒪᓐ ᑫᑑᑕᐙᓂᒡ ᒋᐯᑭᐋᓂᒡ ᓬᐄᐹᐃᕽ Levi ᐌᑕᑳᓀᓯᓂᒡ ᑖᐱᔥᑰ ᑳᔑ ᐯᑳᐱᑭᓯᑳᑌᒃ ᐅᓵᐎ ᔔᓂᔮ ᐙᐱᒃ, ᐃᐃ ᑲᔦ ᐙᐹᐱᑯ ᔔᓂᔮ ᐙᐱᒃ᙮ ᒦ ᐃᒫ ᑫᐅᑎᓈᒡ ᐃᓂᓂᐗᐞ ᑫᐲᑕᒫᑯᒡ ᑳᑎᐯᒋᑫᒡ ᐸᑭᑎᓂᑫᐎᓇᓐ ᑎᓄ ᑫᒥᓍᐸᑕᕽ᙮ 4ᒦᑕᔥ ᐁᔑ ᐸᑭᑎᓂᑫᓂᒡ ᐯᒫᑎᓯᓂᒡ ᒎᑕ Judah ᐊᑮᕽ ᐌᒌᓂᒡ, ᒉᕒᐆᓴᓬᐊᒥᕽ Jerusalem ᑲᔦ, ᒋᒥᓍᐸᑕᕽ ᑌᐯᒋᑫᒡ ᑖᐱᔥᑰ ᐅᑖᓈᕽ ᑳᑮ ᐱᐃᔑ ᒥᓍᐸᑕᑭᐸᓐ᙮
5ᒦᑕᔥ ᐅᐅ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐁᑭᑐᒡ, ᐯᔓ ᑕᔥ ᑭᑲ ᓈᓯᑲᐎᓂᓂᒻ ᐌᐌᓂ ᒋᑎᐹᑯᓂᓇᑰᒃ᙮ ᔐᒫᒃ ᓴ ᑯ ᓂᐐ ᑎᐹᒋᒫᒃ ᑳᔑ ᐙᐸᒪᒀ ᑳᔑ ᒪᒫᔒᐙᒡ ᐃᑭ ᑳᒪᒫᑖᐎᒋᑫᐙᒡ ᑳᑮᒨᒋ ᐐᒌᐙᐙᒡ ᐸᑳᓐ ᐊᐎᔭᐞ ᐅᐐᑎᑫᒫᑲᓂᓂ ᑲᔦ, ᐃᑭ ᑲᔦ ᓅᒋᑯ ᑳᐃᓈᒋᒫᐙᒡ ᐊᐎᔭᐞ, ᐃᑭᐌᓂᐗᒃ ᑲᔦ ᑳᐗᔦᔑᒫᐙᒡ ᐅᑕᓄᑮᐞ ᐅᑲᔥᑭᒋᑫᐎᓂᓃᕽ, ᑳᐌᓵᓂᐋᐙᒡ ᑲᔦ ᑮᐙᒋᑴᐗᐞ, ᑸᐗᔑᔖᓇᐞ ᑲᔦ᙮ ᐸᑳᓐ ᑲᔦ ᑳᐅᒌᓂᒡ ᑳᐐᓐ ᓭᓯᒃ ᐅᑑᑕᐙᓯᐙᐙᐞ ᔑᒀᔥ ᓃᓐ ᑳᐐᓐ ᐋᐲᓐᒡ ᓂᑯᑖᓀᓂᒥᑯᓰᒃ, ᐃᑭᑐ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ᙮
ᑳᑎᐯᒋᑫᒡ ᒋᒦᓂᑎᐸᓐ ᐯᔑᒃ ᑫᑰᓂᓂ ᐁᑕᓱᒥᑖᒋᓂᓂᒃ
6ᓃᓐ ᐅᔕ ᑳᑎᐯᒋᑫᒡ, ᑳᐐᓐ ᐐᑳ ᓂᑖᒋ ᐊᔮᓰ᙮ ᒦᑕᔥ ᐃᐃ ᑮᓇᐙ ᒉᑲᐳᕽ Jacob ᐌᑕᑳᓀᓯᔦᒃ ᒪᔑ ᑳᐅᒋ ᓂᔑᐗᓈᒋᐃᑰᓯᐌᒃ᙮ 7ᐊᐸᓀ ᑯ ᑳᐊᑯ ᐊᔮᐙᒡ ᑭᑫᑌᔭᐋᒥᐙᐸᓃᒃ ᒦ ᓴ ᐃ ᐊᐲ ᑳᑮ ᐱᐅᒋ ᒫᒌ ᓇᑲᑕᒣᒃ ᓂᑎᑭᑐᐎᓇᓐ, ᑳᐐᓐ ᑲᔦ ᑭᑮ ᑲᓇᐌᑕᓰᒻ᙮ ᑕᑲ ᓴ ᑕᔥ ᐱᑮᐌ ᓈᓯᑲᐎᔑᒃ, ᑫᓃᓐ ᐃᑕᔥ ᑭᑲ ᑮᐌ ᓈᓯᑲᐎᓂᓂᒻ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
ᒦᑕᔥ ᐅᐅ ᐁᑭᑐᔦᒃ, ᐋᓃᓐ ᑕᔥ ᑫᔑ ᑮᐌ ᓈᓯᑳᑰᔭᓐ? 8ᐊᐎᔭ ᓇ ᑾᔭᒃ ᑕᑑᑕᒻ ᒋᑮᒨᑎᒫᐸᓐ ᑭᔐᒪᓂᑑᓐ? ᑮᓇᐙ ᐄᑐᒃ ᑳᑮᒨᑎᒥᔦᒃ! ᒦᑕᔥ ᐁᑭᑐᔦᒃ, ᐋᓃᓐ ᑕᔥ ᐁᔑ ᑮᒨᑎᒥᑰᔭᓐ? ᑭᑮᒨᑎᒥᒻ ᐯᔑᒃ ᑫᑰᓐ ᐁᑕᓱ ᒥᑖᒌᑭᓐ ᑫᑰᓇᓐ, ᐁᒪᓈ ᒦᔑᔦᒃ ᐸᑭᑎᓂᑫᐎᓇᓐ ᑫᑮ ᒦᔑᔦᑭᐸᓐ᙮ 9ᒦᑕᔥ ᐅᐅ ᑫᐃᔑᓭᔦᒃ ᒋᒫᔑᓭᔦᒃ ᑲᑭᓇ ᑳᑕᔑᔦᒃ ᐃᔅᕒᐃᔭᓬᐃᑳᕽ, ᐅᓵᒻ ᐋᓃᔥ ᑭᑮᒨᑎᒥᒻ᙮ 10#Lev 27.30; Num 18.21-24; Deu 12.6; 14.22-29; Neh 13.12. ᒥᓯᐌ ᐲᑑᒃ ᐃᐃ ᑳᐃᓇᑌᒃ ᒥᓂᒃ ᒋᐸᑴᓇᒪᐎᔦᒃ ᓂᑕᑖᓱᐎᑲᒥᑯᕽ, ᒋᐹᑏᓇᑎᕽ ᒦᒋᒻ ᓂᐙᑳᐃᑲᓂᕽ᙮ ᒦ ᓴ ᐅᐅᒫ ᐃᔑ ᐊᑕ ᑭᑫᓂᒥᔑᒃ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ ᑭᑲ ᐙᐸᑖᒻ ᑕᔥ ᒋᐹᑭᓇᒫᓐ ᑭᒋᑮᔑᑯᐎ ᐃᔥᒀᑌᒪᓐ, ᒋᓰᑭᓇᒪᐎᓇᑰᒃ ᔕᐌᑖᑯᓯᐎᓇᓐ, ᑳᐐᓐ ᑕᔥ ᑭᑲ ᑌᐸᔥᑭᓈᑑᓰᒻ ᒥᓂᒃ ᑫᒦᓂᓇᑰᒃ᙮ 11ᑳᐐᓐ ᓴ ᑕᔥ ᓂᑲ ᐸᑭᑎᓈᓰᒃ ᒪᓂᒎᔕᒃ ᒋᓂᔑᐗᓈᒋᑑᐙᒡ ᑭᑭᑎᑳᓂᐙᓐ᙮ ᐐᑫ ᑲᔦ ᑕᒪᒨᔥᑭᓀᑰᒋᓅᒃ ᔔᒥᓇᒃ ᑳᔑ ᑭᑎᑳᓀᒀ᙮ 12ᒦᑕᔥ ᑲᑭᓇ ᑯᑕᒃ ᐊᐎᔭᒃ ᑳᑕᓶᐙᓇᑭᓯᐙᒡ ᑭᑲᐃᑯᐙᒃ ᐁᔕᐌᑖᑯᓯᔦᒃ, ᐋᓃᔥ ᑭᑕᑮᐙ ᒫᐗᒡ ᐁᐅᓂᔑᔑᕽ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
ᑭᔐᒪᓂᑑ ᑮᐊᔓᑕᒫᑫᒡ ᐁᐐᑰᐹᑌᓂᒥᐌᒡ
13ᑮᓇᐙ ᑕᔥ ᐐᑫ ᓅᒋᑯ ᑭᑎᔑᒻ, ᐃᑭᑐ ᑳᑎᐯᒋᑫᒡ᙮
ᒦᔥ ᐁᑭᑐᔦᒃ, ᐋᓃᓐ ᑕᔥ ᓅᒋᑯ ᐁᔑᐃᑰᔭᓐ?
14ᐅᐅ ᐄᑐᒃ ᐁᑭᑐᔦᒃ, ᑳᐐᓐ ᐄᑐᒃ ᑫᑰᓐ ᓂᑎᓈᐸᒋᑑᓰᒥᓐ ᐅᐅ ᑳᐊᓄᑮᑕᐙᕽ ᑭᔐᒪᓂᑑ᙮ ᐌᑯᓀᓐ ᐃᑕᔥ ᑳᐅᑎᓯᔮᕽ ᐁᑮ ᑑᑕᒧᐙᕽ ᑳᔑ ᐊᑕᐌᑕᕽ, ᐊᓂᔖ ᑲᔦ ᐁᐸᐹ ᒫᓀᑕᒧᓈᑯᓯᔮᕽ ᒋᐙᐸᒥᔭᒥᓐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᒥᒌᓇᐌᓯᔮᕽ ᑳᑮ ᐃᔑ ᒪᒫᔒᔮᕽ᙮ 15ᓃᓇᐎᓐᑦ ᑕᔥ ᓂᑎᔑᓇᐙᓈᓂᒃ ᓇᐗᒡ ᐁᒥᓄᓭᐙᒡ ᐅᑯ ᑳᑭᒋ ᐃᓀᓂᑎᓱᐙᒡ᙮ ᑌᐺ ᓴ ᐃᑭ ᓅᒋᑯ ᑳᐃᔑᒋᑫᐙᒡ ᐁᑕᑕᐌ ᐌᓅᒋᓭᐗᒃ, ᑭᑎᑭᑑᒻ᙮ ᑳᑲᑴᒋᐋᐙᒡ ᑲᔦ ᑭᔐᒪᓂᑑᓐ ᑳᐐᓐ ᑫᑰᓂᓂ ᐃᔑᓭᓰᐗᒃ, ᐊᒦᐃ ᐁᑭᑐᔦᒃ᙮
16ᐐᓇᐙ ᑕᔥ ᑳᑯᑖᓀᓂᒫᐙᒡ ᑳᑎᐯᒋᑫᓂᒡ ᐁᑲᑲᓅᓂᑎᐙᒡ ᐅᑮ ᐱᓯᑖᑯᐙᓐ ᔑᒀᔥ ᐅᑮ ᓅᑖᑯᐙᓐ᙮ ᐁᓈᓴᒦᓂᒡ ᓴ ᐊᔮᓂ ᒪᓯᓇᐃᑲᓐ ᐁᔑ ᐅᔑᐲᐃᑳᑌᓂᑭᓐ ᐅᐐᓱᐎᓂᐙᓐ ᐃᑭ ᑳᑯᑖᓀᓂᒫᐙᒡ, ᑳᑭᑌᑕᒧᐙᒡ ᑲᔦ ᐅᑎᔑᓂᑳᓱᐎᓂᓂ ᑳᑎᐯᒋᑫᓂᒡ᙮ 17ᐅᐅ ᓴ ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᓃᓐ ᓴ ᓂᑲ ᑎᐯᓂᒫᒃ ᐊᐲ ᑮᔑᑲᓂᓂᒃ ᑳᐐ ᑾᔮᒋᐊᒀ ᓃᓐ ᐃᑯ ᐁᐐ ᑎᐱᓇᐌᐎᓯᔮᓐ᙮ ᓂᑲ ᑰᐹᑌᓂᒫᒃ ᓴ ᑕᔥ ᑖᐱᔥᑰ ᐃᓂᓂ ᑳᔑ ᑰᐹᑌᓂᒫᒡ ᐅᑯᓯᓴᓐ ᑳᐸᒦᑖᑯᒡ᙮ 18ᒦᑕᔥ ᓂᐱᒫᑎᓰᒪᒃ ᒋᓂᓯᑕᐌᓂᒫᐙᒡ ᐁᔑ ᐸᑳᓀᑖᑯᓯᓂᒡ ᑳᑾᔭᒀᑎᓯᓂᒡ ᐃᓂ ᑲᔦ ᒣᒑᑎᓯᓂᒡ᙮ ᐃᓂ ᑕᔥ ᑲᔦ ᐯᒦᑕᐙᓂᒡ ᑭᔐᒪᓂᑑᓐ, ᑲᔦ ᑕᔥ ᐃᓂ ᐯᒦᑕᐙᓯᓂᒃ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
Currently Selected:
ᒫᓬᐊᑳᐃ 3: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
