ᒫᓬᐊᑳᐃ 2
2
1ᑮᓇᐙ ᑕᔥ ᐊᓇᒥᐁᐎᑭᒫᒃ ᐅᐅ ᑭᑎᓈᑯᓂᓂᓂᒻ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ 2ᑮᔥᐱᓐ ᓴ ᐱᓯᑕᓯᐌᒃ, ᐃᓀᑕᓯᐌᒃ ᑲᔦ ᑭᑌᐃᐙᕽ ᒋᑮ ᑭᑌᑕᒣᑭᐸᓐ ᓂᐐᓱᐎᓐ, ᒦᔥ ᒋᒪᒐᑭᒥᓇᑰᒃ᙮ ᓂᑲ ᒪᒐᑭᑖᓇᓐ ᑲᔦ ᑫᑮ ᐅᒋ ᒥᓄᓭᔦᑭᐸᓐ! ᐋᔕ ᐄᑐᒃ ᓂᑮ ᒪᒐᑭᑖᓇᓐ, ᐅᓵᒻ ᐋᓃᔥ ᑳᐐᓐ ᑭᑎᓀᑕᓰᒻ ᒋᑮ ᑭᑌᓂᒥᔦᑭᐸᓐ᙮ 3ᒦᔥ ᐃᐃᐌ ᑳᐐ ᐅᒋ ᓇᓇᐊᓴᒀ ᑭᐲᐌᓰᒥᐙᒃ᙮ ᑮᓇᐙ ᑕᔥ ᐐᓐ ᐁᐐ ᔑᔔᔮᐱᓂᓇᑰᒃ ᐅᒨᐎᓂ ᐊᔭᐋᐎᔕᒃ ᑳᐸᑭᑎᓈᓱᔦᒃ᙮ ᑳᐃᔑᐎᒋᑳᑌᒃ ᒨᐎ, ᒦ ᐌᑎ ᑫᑮᓇᐙ ᑫᐃᔑ ᐌᐱᓂᑰᔦᒃ᙮ 4#Num 3.11-13. ᒦᑕᔥ ᒋᑭᑫᑕᒣᒃ ᓃᓐ ᐅᐅ ᓇᑫ ᐁᑮ ᐃᓈᑯᓂᓇᑰᒃ᙮ ᑳᐐᓐ ᑕᔥ ᑕᐅᒋ ᐲᑯᓂᑳᑌᓯᓅᓐ ᑳᑮ ᐃᔑ ᐊᔓᑕᒪᐗᒀᐸᓐ ᓬᐄᐹᐃᕽ ᐌᑕᑳᓀᓯᐙᒡ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
5 # Num 25.12. ᒦᔥ ᑳᑮ ᐃᓇᒀᐸᓐ ᐁᑮ ᐊᔓᑕᒪᐗᒀ ᐱᓵᓐ, ᐌᐌᓂ ᑲᔦ ᒋᑮ ᐱᒫᑎᓯᐙᐸᓐ᙮ ᒦ ᓴ ᐃᐌ ᓇᑫ ᑳᐃᔑ ᒦᓇᒀᐸᓐ ᒋᐅᒋ ᑭᑌᓂᒥᐙᐸᓐ᙮ ᑌᐺ ᑕᔥ ᓂᑮ ᑭᑌᓂᒥᑰᒃ ᐁᑮ ᑯᑖᓀᑕᒧᐙᒡ ᑲᔦ ᓂᐐᓱᐎᓐ᙮ 6ᑾᔭᒃ ᓴ ᑮᐃᔑ ᑭᑭᓄᐊᒫᑫᐗᒃ, ᑳᐐᓐ ᓅᒋᑯ ᑫᑰᓐ ᑮᑭᑭᓄᐊᒫᑫᓰᐗᒃ; ᐱᓵᓐ ᐃᓴ ᓇᑫ ᓂᑮ ᐃᔑ ᒥᓄ ᐐᒌᐎᑰᒃ, ᑾᔭᒃ ᐁᑮ ᐃᔑ ᐱᒫᑎᓯᐙᒡ᙮ ᓃᐱᐗᐞ ᑲᔦ ᐊᐎᔭᐞ ᐅᑮ ᐐᒋᐋᐙᐞ ᒋᑴᑮᓂᒡ ᒋᓇᑲᑕᒥᓂᒡ ᒪᒋᐃᔑᐌᐱᓯᐎᓐ᙮ 7ᒦᔥ ᑲᔦ ᐁᓇᓄᑮᐙᒡ ᐊᓇᒥᐁᐎᑭᒫᒃ ᒋᑭᑭᓄᐊᒫᑫᐙᐸᓐ ᑌᐺ ᒋᑭᑫᓂᒥᒥᓐᒡ ᑭᔐᒪᓂᑑᓐ᙮ ᐯᒫᑎᓯᓂᒡ ᒋᐊᑕ ᐙᐸᒥᑯᐙᐸᓐ ᐐᑭᑫᑕᒥᓂᒡ ᐁᔑ ᐊᑕᐌᑕᒧᐗᒃ ᐋᓃᔥ ᐐᓇᐙ ᐄᑐᒃ ᑳᐐᑕᒫᑫᐙᒡ ᐅᑎᐹᒋᒧᐎᓂᓂ ᑳᑎᐯᒋᑫᓂᒡ ᑳᒫᐗᒋ ᒪᔥᑲᐎᓰᓂᒡ᙮
8ᓅᑯᒻ ᐃᑕᔥ ᐐᓐ ᑮᓇᐙ ᐁᓇᒥᐁᐎᑭᒫᐎᔦᒃ ᑭᑮ ᓇᑲᑖᒻ ᑾᔭᒃ ᐃᔖᐎᓐ᙮ ᐁᔑ ᑭᑭᓄᐃᑫᔦᒃ ᓴ ᓃᐱᐗᐞ ᐅᒋ ᐱᓱᑫᔑᓅᒃ᙮ ᑭᑮ ᐲᑯᓈᒻ ᑳᑮ ᐊᔓᑕᒪᐗᑭᐸᓐ ᓬᐄᐹᐃ Levites ᑮᓇᐙ ᑳᑮ ᐅᑕᑳᓀᓯᔦᒃ᙮ 9ᒦᑕᔥ ᑳᐅᒋ ᑑᑕᐎᓇᑰᒃ ᒣᔥᑾᒡ ᒋᔒᑫᓂᒥᓀᒀ ᑲᑭᓇ ᐯᒫᑎᓯᐙᒡ, ᒋᓃᓭᓂᒥᓀᒀ ᑲᔦ, ᐅᓵᒻ ᐋᓃᔥ ᑳᐐᓐ ᑭᑑᑕᓰᒻ ᐁᔑ ᐊᑕᐌᑕᒫᓐ᙮ ᐊᐲ ᑲᔦ ᑮᑭᑭᓄᐊᒫᑫᔦᒃ ᐅᓇᔓᐌᐎᓐ ᑳᐐᓐ ᐯᔑᑾᓐ ᑭᑑᑕᐙᓯᐙᐙᒃ ᐊᐎᔭᒃ ᐁᑕᓱ ᐯᔑᑯᐙᒡ, ᐃᑭᑐ ᑳᑎᐯᒋᑫᒡ᙮
ᐯᒫᑎᓯᐙᒡ ᑌᐺ ᑮᑑᑕᐙᓯᒀ ᑭᔐᒪᓂᑑᓐ
10ᑳᐐᓐ ᐃᓇ ᑳᑕᔑᔭᕽ ᑭᐯᔑᑯᐋᓯᐙᓈᓐ ᐌᑌᑌᔭᕽ᙮ ᒥᒋ ᐯᔑᑯ ᑲᔦ ᑭᔐᒪᓂᑑ ᑳᑮ ᐅᔑᐃᓇᕽ? ᐌᑯᓀᓐ ᐃᑕᔥ ᐌᒋ ᐲᑯᓇᒪᕽ ᑳᑮ ᐃᔑ ᐊᔓᑕᒫᑎᔭᕽ ᐁᐋᓍᐸᑕᒪᕽ ᑭᔐᒪᓂᑑ ᑳᑮ ᐃᔑ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᓈᐸᓃᐞ᙮ 11ᐃᑭ ᓴ ᒎᑕ Judah ᐊᑮᕽ ᐌᒌᐙᒡ ᐅᑮ ᐲᑯᓈᓈᐙ ᑳᑮ ᐃᔑ ᐊᔓᑕᒪᐙᐙᑯᐸᓀᓐ ᑭᔐᒪᓂᑑᓐ, ᐐᑫ ᐁᑮ ᑭᒋ ᑲᒀᓂᓴᑭᒋᑫᐙᑯᐸᓀᓐ ᐃᐃᒫ ᒉᕒᐆᓴᓬᐊᒥᕽ Jerusalem, ᒥᓯᐌ ᑲᔦ ᐃᐃᒫ ᐃᔅᕒᐃᔭᓬ ᐊᑮᕽ᙮ ᐅᐐᓀᑖᑯᑑᓈᐙ ᑲᔦ ᑭᒋ ᐊᓇᒥᐁᐎᑲᒥᑯᓂ ᑳᑎᐯᒋᑫᓂᒡ ᑳᓵᑭᑑᓂᒡ᙮ ᐃᓂᓂᐗᒃ ᓴ ᐅᐐᑎᑫᒫᐙᐞ ᐃᑴᐗᐞ ᐁᓇᒥᐁᑕᐙᓂᒡ ᒪᔭᑭ ᒪᓂᑑᐞ᙮ 12ᐊᐊ ᓴ ᑕᔥ ᐃᓂᓂ ᐅᐅ ᑳᐃᔑᒋᑫᒡ ᑳᑎᐯᒋᑫᓂᒡ ᐅᑲ ᐅᒋ ᓵᑭᒋᓂᔕᐅᑰᓐ ᐁᔑ ᑲᐯᔑᓂᒡ ᐃᔅᕒᐃᔭᓬᐊᐞ᙮ ᑳᐐᓐ ᑲᔦ ᒦᓇᐙ ᐐᑳ ᑕᐸᑭᑎᓈᓰ ᒋᐐᑑᑳᓱᒡ ᑮᐸᑭᑎᓈᓲᑕᒪᐎᒥᓐᒡ ᑳᑎᐯᒋᑫᓂᒡ ᑳᒫᐗᒋ ᒪᔥᑲᐎᓰᓂᒡ᙮
13ᒦᑕᔥ ᑲᔦ ᐅᐅ ᐁᔑᒋᑫᔦᒃ᙮ ᑭᓯᐲᒀᓂᐙᓐ ᓴ ᒥᓯᐌ ᐁᐃᓈᔑᑲᐎᑭᓐ ᑳᔑ ᐸᑭᑎᓈᓲᑕᒪᐎᓐᒡ ᑳᑎᐯᒋᑫᒡ ᐁᒪᐎᔦᒃ, ᐁᑭᒋ ᐃᓉᑳᓱᔦᒃ ᑲᔦ᙮ ᐅᓵᒻ ᐋᓃᔥ ᑳᐐᓐ ᐊᐗᔑᒣ ᐅᐱᓯᔅᑫᑕᓰᓇᓐ ᒋᑮ ᐅᑖᐱᓇᑭᐸᓐ ᐸᑭᑎᓂᑫᐎᓇᓐ ᑳᐲᑕᒪᐌᒃ᙮ 14ᒦᔥ ᐅᐅ ᐁᔑ ᑲᑴᑗᔦᒃ, ᐌᑯᓀᓐ ᐃᑕᔥ ᐌᒋ ᐅᑖᐱᓇᓯᒃ ᑭᐸᑭᑎᓂᑫᐎᓂᓈᓐ? ᐅᓵᒻ ᐋᓃᔥ ᑭᑮ ᐲᑯᓇᒧᐙᓐ ᑳᑮ ᐃᔑ ᐊᔓᑕᒪᐗᑎᐸᓐ ᑭᐐᐤ ᑳᑮ ᐐᑎᑫᒪᑎᐸᓐ ᑮᐅᔥᑳᑎᓯᔭᓐ! ᒦ ᐄᑐᒃ ᐊᐊ ᑫᑮ ᐅᐐᒌᐙᑲᓂᔭᐸᓐ ᔖᑰᒡ ᐃᑕᔥ ᑭᑮ ᐲᑯᓈᓐ ᑳᑮ ᐃᔑ ᐊᔓᑕᒪᐗᑎᐸᓐ᙮ ᑭᔐᒪᓂᑑ ᐃᑕᔥ ᐁᑮ ᑲᓇᐙᐸᒥᒃ ᑮᐊᔓᑕᒪᐎᒪᒡ ᑌᐺ ᐁᐐ ᑑᑕᐎᒪᒡ᙮ 15ᑭᔐᒪᓂᑑ ᐄᑐᒃ ᑭᑮ ᐃᔑᐃᒃ ᑭᐐᔭᐎᕽ ᑭᑕᒑᑯᕽ ᑲᔦ ᒋᐯᔑᑴᑖᑯᓰᒥᒪᒡ ᐃᓂ ᑭᐐᐗᓐ᙮ ᐌᑯᓀᓂᓂ ᑕᔥ ᐅᐅ ᐌᒋ ᐃᔑᒋᑫᒡ? ᒦ ᓴ ᐃ ᒋᐊᔮᐎᒣᒃ ᐊᐱᓅᒌᔕᐞ ᐐᓐ ᐁᐐ ᑎᐱᓇᐌᐎᓯᒡ᙮ ᐊᔮᒀᒥᓯᒃ ᐃᑕᔥ ᐁᑕᔑᔦᒃ ᐊᐎᔭ ᒋᐲᑯᓇᓯᒃ ᐁᔑ ᐊᔓᑕᒪᐙᒡ ᐐᐗᓐ᙮ 16ᒦᔥ ᐅᐅ ᐁᓂ ᐃᑭᑐᒡ ᑳᑎᐯᒋᑫᒡ ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ, ᓂᔒᑫᑖᓐ ᐌᐱᓂᑎᐎᓐ᙮ ᓂᔒᑫᑖᓐ ᓴ ᐃᐃᓇᑫ ᐊᐎᔭ ᑮᔑ ᑰᐹᒋᐋᒡ ᐐᐗᓐ᙮ ᑲᓇᐌᓂᑎᓱᓐ ᐃᑕᔥ ᒋᐲᑯᓇᓯᐗᓐ ᑳᑮ ᐃᔑ ᐊᔓᑕᒪᐗᒡ ᑌᐺ ᐁᐐ ᑑᑕᐗᒡ ᑭᐐᐤ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
ᑳᐐᑎᐹᑯᓂᑫᐎᑮᔑᑲᒃ ᐋᔕ ᐁᐯᔓᓈᑾᒃ
17ᑭᑎᑭᑐᐎᓂᐙᕽ ᓴ ᑭᑑᒋ ᐊᔦᑯᐋᐙ ᑳᑎᐯᒋᑫᒡ᙮ ᔖᑰᒡ ᑕᔥ ᒦ ᐃ ᐁᑭᑐᔦᒃ, ᐋᓃᓐ ᐃᑕᔥ ᐃᓈ ᐁᔑ ᐊᔦᑯᐊᑭᒡ? ᐅᐅ ᐄᑐᒃ ᑭᑎᑭᑐᒻ, ᑳᑕᓱ ᐯᔑᑯᒡ ᓴ ᐊᐎᔭ ᓅᒋᑯ ᑳᐃᔑᒋᑫᒡ ᐅᑑᓂᔑᔑᐌᓂᒥᑰᓐ ᑳᑎᐯᒋᑫᓂᒡ, ᐐᑫ ᑕᔥ ᐃᑯ ᑲᔦ ᐅᒥᓍᐸᒥᑰᓐ, ᑭᑎᓈᐙᒃ᙮ ᒦᔥ ᑲᔦ ᐁᑭᑐᔦᒃ, ᐋᓃᑎ ᑕᔥ ᐃᓈ ᐁᔮᒡ ᑭᔐᒪᓂᑑ ᐌᐌᓂ ᑳᐃᓈᑯᓂᐌᒡ᙮
Currently Selected:
ᒫᓬᐊᑳᐃ 2: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
