ᒫᓬᐊᑳᐃ 1
1
1ᒦ ᓴ ᐅᐌᓂ ᑎᐹᒋᒧᐎᓐ ᒫᓬᐊᑳᐃ ᑳᑮ ᐊᓅᓂᑯᒡ ᑳᑎᐯᒋᑫᓂᒡ ᒋᐐᑕᒪᐙᒡ ᐃᔅᕒᐃᔭᓬᐊᐞ᙮
ᑳᑎᐯᒋᑫᒡ ᐁᔑᓵᑭᐋᒡ ᐃᔅᕒᐃᔭᓬᐊᐞ
2 # Rom 9.13. ᒦ ᓴ ᐅᐌᓂ ᑳᑎᐯᒋᑫᒡ ᐁᓈᒡ ᐅᐱᒫᑎᓰᒪᐞ, ᒨᔕᒃ ᓴ ᑭᐱ ᓵᑭᐃᓂᓂᒻ!
ᒦᔥ ᐅᐅ ᐁᑯᒡ, ᐋᓃᓐ ᐃᑕᔥ ᐃᓈ ᐃᓇᑫ ᐁᔑ ᓵᑭᐃᔮᕽ?
ᒦᔥ ᐅᐅ ᐁᔑ ᓇᑴᑕᕽ, ᐃᓇᔥᑫ ᐄᔂ Esau, ᐊᐊ ᑲᔦ ᒉᑲᑉ Jacob ᐋᓇᑮᐅᐐᒋᑭᐌᑎᐙᒡ, ᒉᑲᑉ ᓴ ᑳᑮ ᓵᑭᐊᒃ᙮ #Isa 34.5-17; 63.1-6; Jer 49.7-22; Ezk 25.12-14; 35.1-15; Amo 1.11,12; Oba 1-14. 3ᓂᑮ ᔒᑫᓂᒫ ᑕᔥ ᐐᓐ ᐄᔂ᙮ ᒦᔥ ᑳᑮ ᐃᔑᑖᐗᒃ ᐅᑕᑮᒻ ᐯᐲᑾᑎᓈᓂᒃ ᒋᓂᔑᐗᓈᓯᓈᑾᓂᓂᒃ᙮ ᑫᑎᐱᓇᐌᐎᓯᒡ ᑲᔦ ᑕᐃᓀᑖᑾᓂᓂ ᐱᑾᑕᑲᒥᑯᕽ ᐊᔭᐋᐎᔕᐞ ᐁᑕ ᑫᔑᐊᔮᓂᒡ᙮ ᒦ ᓴ ᐅᐅ ᑳᐃᑭᑐᒡ ᑳᑎᐯᒋᑫᒡ᙮
4ᒥᓴᐙ ᑯ ᐄᑕᒻ Edom ᐌᒌᐙᒡ ᐃᑭᑐᐙᒡ, ᐋᓇ ᓴ ᐐᓐ ᓂᑑᑌᓈᒥᓈᓂᓐ ᐁᑮ ᓂᔑᐗᓈᒋᒋᑳᑌᑭᓐ, ᔖᑰᒡ ᓴ ᓂᑲ ᑮᐌ ᐅᔑᑑᒥᓐ!
ᒦᑕᔥ ᐅᐅᐌᓂ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᑭᑐᒡ, ᒥᓴᐙ ᑯ ᑮᐌ ᐅᔑᑑᐙᒡ, ᓃᓐ ᓴ ᓂᑲ ᐲᑯᐱᑖᐙᓇᓐ᙮ ᒦᔥ ᑫᐃᔑᓂᑳᓂᑯᐙᒡ ᐯᒫᑎᓯᓂᒡ, ᒪᒋᐊᑭ, ᐯᒫᑎᓯᐙᒡ ᑳᓀᐱᒋ ᓂᔥᑫᓂᒥᑯᐙᒡ ᑳᑎᐯᒋᑫᓂᒡ᙮
5ᑮᓇᐙ ᓴ ᐃᔅᕒᐃᔭᓬᐊᒃ ᑳᑎᓄᐎᔦᒃ ᑎᐱᓇᐌ ᐅᐅ ᑭᑲ ᐙᐸᑖᒻ, ᒦᔥ ᐅᐅ ᑫᐃᑭᑐᔦᒃ, ᑳᑎᐯᒋᑫᒡ ᑭᑌᑖᑯᓯ ᐌᑎ ᑲᔦ ᐄᓴᓐ ᓵᑭᒐᔭᐄ ᐃᔅᕒᐃᔭᓬᐃᑳᕽ᙮
ᐁᑭᒋᓅᒋᐃᑣ ᐊᓇᒥᐁᐎᑭᒫᒃ
6ᐃᑭ ᑕᔥ ᐊᓇᒥᐁᐎᑭᒫᒃ ᐅᐅ ᐅᑎᔑ ᑲᓅᓂᑯᐙᓐ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ, ᐅᑯᓯᓯᒫ ᓴ ᐅᑭᑌᓂᒫᓐ ᐅᑌᑌᓐ, ᐯᒦᑖᑫᒡ ᑲᔦ ᐅᑯᑖᓀᓂᒫᓐ ᐅᑑᑭᒫᒪᓐ᙮ ᑮᔥᐱᓐ ᓴ ᑌᐺ ᐌᑌᑌᒫᐎᐙᓀᓐ, ᐌᑯᓀᓐ ᐃᑕᔥ ᐌᒋ ᑭᑌᓂᒥᑰᓯᐙᓐ? ᑮᔥᐱᓐ ᑲᔦ ᑌᐺ ᐌᑭᒫᐎᐙᓀᓐ, ᐋᓃᓐ ᐃᑕᔥ ᐌᒋ ᑯᑖᓀᓂᒥᑰᓯᐙᓐ? ᑮᓇᐙ ᐅᔕ ᐁᓇᒥᐁᐎᑭᒫᐎᔦᒃ ᑭᑖᓍᐸᒥᒻ᙮
ᒦᔥ ᐁᑭᑐᔦᒃ, ᐋᓃᓐ ᐃᑕᔥ ᐃᓇᑫ ᐁᔑ ᐋᓍᐸᒥᑰᔭᓐ?
7ᒦᔥ ᐅᐅᐌ ᑳᐃᔑᒋᑫᔦᒃ, ᑭᐸᑭᑎᓈᒻ ᐄᑐᒃ ᒦᒋᒻ ᑳᐋᓇᐌᒋᑳᑌᒃ ᑳᔑ ᐸᑭᑎᓈᓱᕽ᙮
ᒦᔥ ᑲᔦ ᐁᑭᑐᔦᒃ, ᐋᓃᓐ ᐃᑕᔥ ᐃᓇᑫ ᐁᔑ ᑭᑌᓂᒥᑰᓯᐗᓐ?
ᒦ ᐄᑐᒃ ᐁᑭᑐᔦᒃ, ᑳᑎᐯᒋᑫᒡ ᐅᐸᑭᑎᓈᓱᐎᓈᐱᒃ ᐁᐋᓇᐌᒋᑳᑌᓂᒃ᙮ 8#Deu 15.21. ᑭᒪᒋᑑᑖᒻ ᓴ ᐊᐲ ᑳᐲᓀᒀ ᐊᔭᐋᐎᔕᒃ ᑳᐙᐱᓯᒀ, ᑳᒫᑭᓯᐙᒡ ᑲᔦ ᑳᐋᑯᓯᐙᒡ ᑮᐐ ᐸᑭᑎᓈᓱᔦᒃ᙮ ᑕᑲ ᐐᓐ ᐌᑭᒫᐙᑎᓯᒡ ᑯᒋ ᒦᓂᒃ ᐃᐃ, ᑰᓂᑫ ᑭᑖ ᒥᓍᐸᒥᑯᐙ? ᑰᓂᑫ ᑲᔦ ᐌᐌᓂ ᑭᑖ ᑑᑖᑯᐙ?
9ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᓴ ᐅᐅ ᐊᓂ ᐃᑭᑐ, ᑕᑲ ᑕᔥ ᑲᑴᒋᑑᒃ ᒋᑲᑴᒋᒣᒃ ᑭᔐᒪᓂᑑ ᒋᒥᓄᑑᑕᐎᓇᕽ᙮ ᑰᓂᑫ ᑕᔥ ᐃᓈ ᑭᑖ ᓇᐁᓂᒥᑯᐙ ᐃᐃ ᓇᑫ ᐁᐃᔑ ᐸᑭᑎᓇᒪᐌᒃ᙮ 10ᐊᐯᔥ ᐃᓈ ᐃᑕᐙ ᐯᔑᒃ ᑳᑕᔑᔦᒃ ᑭᐸᐊᕽ ᑭᒋ ᐊᓇᒥᐁᐎᑲᒥᑯ ᐃᔥᒀᑌᒻ, ᐊᓂᔖ ᒋᐴᑕᐌᓯᐌᒃ ᑫᑰᓐ ᐁᐃᓀᑖᑾᓯᓄᒃ ᐃᐃᒫ ᑳᔑ ᐸᑭᑎᓈᓱᕽ᙮ ᑳᐐᓐ ᓴ ᑭᒥᓍᐸᒥᓯᓅᓂᓂᒻ᙮ ᑳᐐᓐ ᑲᔦ ᓂᐐ ᐅᑖᐱᓇᓰᓇᓐ ᑳᐸᑭᑎᓈᓲᑕᒪᐎᔦᒃ᙮ 11ᐁᔑ ᐊᔮᐙᒡ ᑯᑕᒃ ᑳᐱᒫᑎᓯᐙᒡ ᑳᐅᒋ ᒨᑲᐊᕽ ᑮᓯᔅ, ᐲᓂᔥ ᑳᓂᔑ ᐸᑭᔑᒧᒡ ᓂᐐᓱᐎᓐ ᑕᑭᒋ ᐃᓀᑖᑾᓐ᙮ ᒥᓯᐌ ᑲᔦ ᓂᑲ ᒥᓈᓴᒫᑰ ᓂᐐᓱᐎᓐ ᐅᒋ, ᓂᑲ ᐸᑭᑎᓇᒫᑰ ᑲᔦ ᑫᒥᓍᐸᑕᒫᓐ ᐸᑭᑎᓈᓱᐎᓐ᙮ ᐋᐱᒋ ᓴ ᑕᑭᒋ ᐃᓀᑖᑾᓐ ᓂᐐᓱᐎᓐ ᒣᑴᔭᐄ ᐁᔑᐊᔮᐙᒡ ᐯᑳᓉᐙᓇᑭᓯᐙᒡ ᐯᒫᑎᓯᐙᒡ᙮ 12ᑮᓇᐙ ᑕᔥ ᑳᑭᑌᓂᒥᓯᐌᒃ ᐁᐃᑭᑐᔦᒃ, ᑳᑎᐯᒋᑫᒡ ᓴ ᐅᐸᑭᑎᓈᓱᐎᓈᐱᒃ ᐃᓴ ᓈ ᐋᓇᐌᑖᑾᓂᓂ, ᒦᒋᒻ ᑲᔦ ᐋᓇᐌᑖᑾᓂᓂ᙮ 13ᒦᔥ ᑲᔦ ᐁᑭᑐᔦᒃ, ᐁᑕᑕᐌ ᓴ ᓈ ᐐᔭᑭᔥᑫᑖᑾᓐ, ᒦᔥ ᑲᔦ ᐁᒥᑭᒋᐃᔦᒃ ᐁᒫᓀᓂᒥᔦᒃ᙮ ᑮᐸᑭᑎᓇᒪᐎᔦᒃ ᑲᔦ ᑭᐲᓈᐙᒃ ᐊᔭᐋᐎᔕᒃ ᑳᑮ ᑮᒨᑎᓈᑲᓂᐎᐙᒡ, ᑯᒫ ᑲᔦ ᑳᐋᑯᓯᐙᒡ, ᑯᒫ ᑲᔦ ᑳᒫᑭᓯᐙᒡ᙮ ᑰᓂᑫ ᑕᔥ ᐃᓈ ᓂᑖ ᐅᑖᐱᓈᓐ ᑳᒦᔑᔦᒃ᙮ 14ᑕᐋᓇᐌᐎᓯ ᓴ ᑳᑲᔦᓂᓯᒡ ᑳᐸᑭᑎᓇᒪᐎᒡ ᒫᓇᒑᓂᔕᓐ ᑳᐲᑯᓈᑯᓯᓂᒡ, ᐁᐊᔮᐙᒡ ᐃᑕᔥ ᐌᓂᔑᔑᓂᒡ ᐋᐯ ᒫᓇᒑᓂᔕᓐ᙮ ᑮᐃᑭᑑᐸᓐ ᐄᑐᒃ ᐁᑮ ᐊᔓᑕᑭᐸᓐ ᐁᐐ ᐸᑭᑎᓇᒪᐎᒡ ᐃᓂ ᐋᐯ ᒫᓇᒑᓂᔕᓐ᙮ ᓃᓐ ᐄᑐᒃ ᒫᐗᒡ ᑭᒋᐅᑭᒫ, ᓂᐐᓱᐎᓐ ᑲᔦ ᑯᑖᓀᒋᑳᑌ ᒥᓯᐌ ᐁᔑᐊᔮᐙᒡ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮
Currently Selected:
ᒫᓬᐊᑳᐃ 1: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
