Lomu 1

1 # Ap 9:15; 13:2; Ga 1:15 Nagaemo Poloʼnamo Yesu Kalaisi aliʼyaʼamo neʼaluve. Agaemo apa vekaʼamo maiʼneʼna Goti alagepa faigoko geʼamo aeʼna hakalo huʼna hapa paisuvafeʼmo ago lekana paino natetenoʼaeʼmo nagaefeʼmo keya aeno ge huʼniye. 2#Lo 16:25-26; Ta 1:2Akeyaʼvilaga Gotiʼa agaetegati gemo alini eʼa aeʼa hakalo huʼa hapa nepaiya vayaʼmogi aote mukufiʼmo avoʼmo kae maleʼnaya geʼapimoʼa mani alagepa faigoko geʼalefeʼmo, afole aigiye, huno hapa paiʼniye. 3#Mt 22:42; Lo 9:5; 2 Ti 2:8Mani gemo mafaʼneʼamo Ala kava netimo Yesu Kalaisifeʼmo ava gemo haneʼniye. Agaemo ma mopafi maiʼniya kavatefeʼmo mago a kanomo Nevini aginagoʼamoʼa alino ateʼniye. 4#Ap 13:33Aote aunemeʼaʼe vekamo maiʼniya kavatefeʼmo Gotiʼa agaiʼa himamuʼaletiʼmo, faliʼniyatetiʼmo ago alino he tino atetenoʼaeʼmo, mafaʼneʼnimo maiʼniye, huno alino apave liʼniye. 5#Ap 26:16-18; Lo 15:18; Ga 2:7-9Gotiʼa agaetetiʼmo fikumo naha maeno namiteno Kalaisi agiʼalefeʼmo apa aliʼyaʼamo alisuvafeʼmo navaleno nateʼniye. Gotiʼa muki nofi vayaʼaifeʼmo akame hiyo, huno huʼniya geʼamo akame huʼa apakesamo afiʼa fatago hisayafeʼmo apa aliʼyaʼamo alisuvafeʼmo navaleno nateʼniye. 6Lapakaeʼeʼmo ani nofi vayapatiʼmo maiʼnageno Gotiʼa keya aeno ge huʼnigetapa eta Yesu Kalaisi vayaʼamo maiʼnae. 7#Nap 6:25-26; 1 Ko 1:2; 2 Ko 1:1; Ef 1:2Maiʼnayaʼmofeʼmo nagaemo muki Lomu taonifiʼmo maiʼnaya vayaʼmogitapaeʼmo Gotiʼa hau ayamopafiʼmo hauʼnigenoʼaeʼmo lapaote vayaʼamo maisayafeʼmo keya aeno ge huʼniya vayaʼamogitapaeʼmo mani avoʼmo nekaove. Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamiʼanageno lapaipamoʼmo falu hino.

Hao ke heno nunumuʼmo huno apateʼniya gemae

8 # 1 Te 1:8 Muki ma mopafi vayaʼmogimo lapakesamo afita fatago nehaya kavafeʼmo lapava gemo nehayaʼmofeʼmo hogoteʼna ani kavatefeʼmo Gotifeʼmo Yesu Kalaisitetiʼmo hao ke nehove. 9#Ef 1:16; Fl 1:8; 1 Te 2:5,10Nagaemo amega nagufaletiʼmo Goti aliʼyaʼamo oʼaliʼna naipafatiʼmo Goti mafaʼneʼamo alagepa faigoko geʼalefekeʼmo aliʼyaʼmo neʼaluve. Nagaemo nunumuʼmo huʼna hano osuʼnofa muki afinaʼmo nunumuʼmo huʼna nelapatove. Gotiʼa nageʼniyanageno he, nehiye, huno, naha maesiya gemo afaʼa lapa paigiye. 10#Ap 19:21; Lo 15:23,32Nagaemo yatala afinaʼmo lapakaetegamo ugefeʼmo nehuʼnaeʼmo, hemenimo kahauʼnisiyaʼmoʼmo visuva kaʼmo valika nato, huʼna nunumuʼmo nehuve. 11Nagaemo Goti Aunemeʼaletiʼmo fikumo alisaya yaʼmo lapamisugeno lokiya vaino lapatesigetapa atafauta alagi hutapa maisayafeʼmo uʼna lapakesuva naipamo nekaliye. 12Lapamiguve, huʼna huʼnovaʼmonanafa nagaeʼe lapakaeʼeʼmo magokepi lagesamo afita fatago nehunaʼmofeʼmo magokepi lokaeta maiʼneta naha maesageʼna lapa maegauve.

13 # Ap 19:21; Yo 15:16 Konagaʼnimogitapae, huʼna, mago gemo afisayafeʼmo nahauʼniyanagi lapakaemo alagepa hutapa afiyo. Muki afinaʼmo huʼnaeʼmo, uguve, huʼna nehuvaʼmonanafa lapakaetegamo visuva kaʼmo ago akani maleʼniye. Nagaemo Yu nofi vayapati oʼmaiʼnaya vayaʼaitegamo uʼna Goti geʼamo hakaleʼnogeno alagamo aeʼniya kava huʼna lapakaetegaʼeʼmo uʼna Goti geʼamo hakalesugeno alagamo aesiyafeʼmo neʼnahaiye. 14Gotiʼa namiʼniya anonaʼalefeʼmo Galiki nofi vayaʼaifenagi muki nofi vayaʼaifenagi afiʼnaya vayaʼaifenagi oʼafiʼnaya vayaʼaifenagi huʼna aeʼna hakalo huʼna hapa paiguve. 15Visuvafeʼmo Gotiʼa agaiʼa yaʼmo haneʼniyaʼmonanafa Lomu taonifiʼmo maiʼnaya vayaʼmogitapaeʼmo uʼna alagepa faigoko geʼamo aeʼna hakalo huʼna lapa paisuvafeʼmo nahauʼnigeʼna ago alo huʼna maiʼnove.

16 # Sam 119:46; Mk 8:38; 1 Ko 1:18-24; Ap 13:46 Na kava higeʼnaene. Kalaisifeʼmo alagepa faigoko geʼalefeʼmo navagage osuʼnigeʼna namogaga neʼauvaʼmofeʼmae. Gotiʼa ani gemo himamuʼaletiʼmo apakesamo afiʼa fatago nehaya vayaʼai apakufamo alino katino neʼapate. Hogoteno Yu nofi vayaʼaitegamo afole aitenoʼaeʼmo henagaʼamo alu nofi vayaʼaitegamo afole aiʼniye. 17#Lo 3:21-22; Ham 2:4Gotiʼa mani geletiʼmo agaiʼa fatago kavaʼamo ago alino apave liteno apakesamo afiʼa fatago nehaya kavatetiʼmo apakesamo afiʼa fatago nehaya vayaʼmo alino neʼapamiye. Ani kavatefeʼmo Goti mukufiʼmo avoʼmo kae maleʼnaya gemoʼa hunoʼaeʼmo, apakesamo afiʼa fatago nehaya kavatetiʼmo fatago vayaʼamo maiʼnayanageʼa alagepa huʼa maigae, huno hapa paiʼniye.

Muki vayaʼmogimo Gotiʼa apakameʼyamo amiʼnaya gemae

18 # Ef 5:6; Kl 3:6; 2 Te 2:12 Kokuʼnapatiʼmo Gotiʼa aipamo leno neʼapateya kavaʼamo alino apave neliye. Gotiʼa agaefeʼmo muki mono nosaya kavaʼe muki vayaʼaitegamo muki hosu kavaʼmo nehaya kavateʼefeʼmo aipamo leno neʼapate. Apakaemo hosu kavaʼapiletiʼmo lama geʼamo apaipafiʼmo haneʼniya lama geʼaleʼmo aliʼyaʼmo oʼalisiyafeʼmo aeʼa akaniʼa neʼatae. 19#Ap 14:15-17; 17:24-28Gotiʼa na agufa vekamo maiʼnofi huno apaipafiʼmo ago alino apave liʼnigeno ha le yategamo afole aiʼniyaʼmofeʼmae. 20#Yop 12:7-9; Sam 19:1; Hi 11:3Gotiʼa ma mopamo alo huʼniya afinatetiʼmo muki vayaʼmogi alo huʼniya yaʼamo ago ageme ageme eʼnae. Ageme ageme neʼeʼapaeʼmo apaulagaletiʼmo noʼagaya yaʼmo Gotiʼa hanege hanege huno hanesiya himamuʼamo ageteʼapaeʼmo, aeto agufa vekamo hogote vekamo alagi ago aeno lagaseʼniya vekamo maiʼniye, huʼa neʼagae. Neʼagayaʼmofeʼmo hosu kavaʼapimo aeʼa ati kaesayafeʼmo, alagi oʼageʼnone, huʼa afaʼa osugae. 21#Ef 4:17-18Muki vayaʼmogimo Gotiʼmo ago ageʼnayaʼmofeʼmo ala agiʼamo Gotiʼmo amisaya agufa agiʼamo oʼamige agaefeʼmo hao ke osege huʼa maiʼnae. Afa apakesageʼmo neʼafigeno apaipafiʼmo hani huʼniya kavaʼmo afole aiʼnigeʼapaeʼmo negi nagi kavaʼmo huʼa maiʼnae. 22#Yel 10:14; 1 Ko 1:20Apakaemo, afiteta ageʼnona vayaʼmo maiʼnone, huʼa nehuʼapaeʼmo negi vayaʼmo hamaleʼnae. 23#Loa 4:15-19; Sam 106:20Apakaemo maige maige huno neʼmaiya ha le konali Gotifekeʼmo mono osuʼa apakameʼyamo amiteʼa agae aimuʼyaleʼmo kasalisiya vayakana agufa auneʼagi namagana agufa auneʼagi afugana agufa auneʼagi nagaloʼyavegana agufa auneʼagi huʼa alo huʼa maleʼneʼa ani yatefekeʼmo mono huʼnae. 24#Ap 14:16Huʼnayaʼmofeʼmo Gotiʼa hosu kavaʼmo hisayafeʼmo magoʼe huno apatafauno oʼmaino afaʼa apakeno apataleʼnigeʼapaeʼmo hapauʼniya kavaʼmo huʼa kumai kavaʼmo huʼnae. Apavagage hisiya agufa kavakeʼmo huteʼa apakaiʼapi apakufamo aliʼa hosu huʼa atege vayaʼai apakufamo aliʼa hosu huʼa apatege huʼa maiʼnae. 25#Yel 13:25; 16:19; Lo 9:5Apakaemo lama geʼamo ataleteʼa lama ge Gotifeʼmo mono osuʼa ataleʼa agae aimuʼyaleʼmo aigofe gotiʼapimogitefekeʼmo mono huʼnae. Gotiʼa muki yaʼamo alo huʼniya vekaeʼmo mono osuge geʼamo oʼafige huteʼa apakaiʼapimo alo huʼnaya yatefekeʼmo mono huteʼapaeʼmo akame huʼnae. Huʼnayaʼmonanafa alo huʼniya vekamo muki afinaʼmo aliʼa auleʼa ateme ateme neʼvaya Gotiʼa maiʼniye. He, lama ge. 26Ani hosu kavaʼmo huʼnayaʼmofeʼmo Gotiʼa magoʼe huno apatafauno oʼmaiʼnifa afa apakeno apataleʼnigeʼapaeʼmo alagi hosu hapaʼye kavaʼmo huʼnae. Aʼne anagaʼapimogimo vele neʼmaiya kavaʼmo ataleʼa ani kavaʼmo aimuʼyaleʼmo aʼne apafalugiʼeʼmo aeto agufa hosu kavaʼmo huʼnae. 27#Mon 18:22; 20:13; 1 Ko 6:9Ani kava huʼa ve anagaʼmogiʼeʼmo aʼmo oʼaliʼa ve apafalugigeʼmo alisayafeʼmo lokiya apaipamo kaliʼnigeno apaipafatiʼmo atete hapauʼniye. Vemogimo vemo aliteʼapaeʼmo apavagage hisiya agufa kavaʼmo huteʼa Gotiʼmo ataleʼa hosu kavaʼmo anonaʼapilefeʼmo ani hosu miyaʼmo aliʼnae. 28Apakaemo Gotifeʼmo lama ge huʼa apakesa afisayafeʼmo ohapauʼniyaʼmofeʼmo Gotiʼa magoʼe huno apatafauno oʼmaiʼnifa afaʼa apakeno apataleʼnigeʼno hosu apaipa apakesakeʼmo alino he tino apateʼnigeʼa osisaya agufa kavaʼmo nehae. 29Muki alu hosu kava alu hosu kavanagi kumai kavanagi alagepa osu kavanagi ma mopafi yafeʼmo hapaʼye nehiya kavanagi apaini huʼa neʼapataya kavanagi huno apaipafiʼmo havaiteʼniye. Apaipa kafa nehapaya kavanagi vayaʼmo kamitimo neʼapamagiya kavanagi kaveta nehaya kavanagi aigofe gemo nehaya kavanagi hosu apaipa nekaliya kavanagi huno apaipafiʼmo havai teʼniye. 30Apakaemo hosu faigoko gemo huge vayaʼai apakiʼapileʼmo aliʼa afepi apatege Gotifeʼmo apaini huge hanageke yaʼmo apamiteʼa aliʼa apaiyafiʼmo apatege ala vayaʼmo maiʼnone, huʼa huge apakaiʼapi apakiʼapileʼmo aliʼa asaga huʼa atege apakesa afifi huʼa saufa hosu kavaʼmo huge itaʼapi afoʼapimogi geʼapimo oʼafige nehae. 31Apakaemo negi kavaʼmo huge hugune, huʼa nehaya gemo osuʼa atalege afamo anagaʼapieʼmo hapau apayamopafiʼmo ohapauge apaipamo falu huʼa oʼapatege hapau huʼa oʼapatege nehae. 32Gotiʼa fatago kavaʼaletiʼmo ani agufa kavaʼmo nehaya vayaʼmo agoti huno apatetenoʼaeʼmo, anonatapilefeʼmo lapamisugetapa alagi falisaya agufa kavaʼmo hutapa maiʼnae, huno ago hu maleʼniye. Apakaemo ani gemo ago afiʼnayaʼmonanafa ani hosu kavaʼageʼmo nosayaʼmonanafa magoʼe huʼa hosu kavaʼmo nehayana hosu kavaʼmo nehaya vayaʼaifeʼmo amuse huʼa neʼapatae.

Currently Selected:

Lomu 1: kyg2013

Highlight

Copy