Lomu 2

Gotiʼa agoti huno apatesiya kavafeʼmo huʼniya gemae

1 # Mt 7:1-2; Yo 8:7 Veʼnimogae, huʼna, kagaemo vayaʼai hosu kavaʼapimo agetekaeʼmo alika fako huka apatetekaeʼmo, hosu kavaʼmo nehae, huka nehukaeʼmo kagaikaʼefeʼmo ani gemo nehane. Magoke agufa hosu kavaʼmo nehanaʼmofeʼmae. Kagaemo hosu kavaʼmo nehae, huka nehana vekamogamo magoke agufa hosu kavaʼmo nehanaʼmofeʼmo ina lagamo maiʼnapigeka agotileʼmo he tika maiʼnekaeʼmo, nagaemo hosu kavaʼmo huʼnofi, huʼna oʼageʼnove, huka aeka ati okaegane. 2Gotiʼa ani kavaʼmo nehaya vayaʼmo alagi lama ge huno huʼnaya kavaʼapilefekeʼmo agoti huno apategaiye, huta ago afiʼnone. 3Veʼnimogae, huʼna, ani agufa kavaʼmo nehukaeʼmo ani kavaʼmo nehaya vayaʼmo alika fako huka apatetekaeʼmo, faiʼna kasalo paegauve, huka kagesamo neʼafipiye. 4#Ef 1:7; 2:9; 2 Pi 3:15Gotiʼa kagemi yaʼagana huno maleʼniya yapatiʼmo kagaetegamo lusi alagepa kavaʼmo huteno malage huno aipamo leno okateno yatala afinaʼmo afaʼa nekateyaʼmonanafa alagepa huka kagesa oʼafiʼneka afa kavane, huka kagesamo neʼafipiye. Gotiʼa kaipamo alika afe lesanafeʼmo kagaetegamo alagepa kavaʼmo nehiye, huka oʼafiʼnapiye. 5Kaipamo alika afe oleʼnanaʼmonanafa kaipamoʼmo lokiya vaiʼnigeka afaʼa maiʼnekaeʼmo Gotiʼa aipamo leno nekateya kayoʼmo alo huka maleme maleme neʼanagenoʼaeʼmo ko nesiye. Gotiʼa aipamo leno neʼapateyanageno vayaʼai apaulagaleʼmo alino alagepa huno agoti huno apatesiya afinaʼmo mani kayoʼmo kamigiye. 6#Mt 16:27; Yo 5:29; 2 Ko 5:10Gotiʼa muki vayaʼmogimo huʼnaya kavaʼmo anonaʼapilefeʼmo miyaʼapimo apamigiye. 7#2 Te 1:8Gotiʼa ha le konali yaʼapigi ala apakiʼapigi maige maige huʼa maisaya yaʼapigi huʼa alisayafeʼmo hapaʼye nehigeʼa alagepa kavaʼmo oʼataleʼa atafauʼa alagi huʼa maime maime neʼvisaya vayaʼmo alagepa huʼa maige maige huʼa maisaya yaʼapimo apamigiye. 8-9#Lo 1:16Apamigiyaʼmonanafa Gotifeʼmo kame huʼa ateteʼa lama geʼamo akame osuʼa hosu kavaʼmo akame nehaya vayaʼaifeʼmo aipamo leno neʼapateya kayoʼmo apamisigeʼa lusi kana yaʼmo alisageno apakafu kigiye. Ani agufa kavaʼmo muki hosu kavaʼmo nehisaya vayaʼaiteʼmo afole aigiye. Hogoteno Yu vayaʼaiteʼmo afole aiteno Yu nofi vayapatiʼmo oʼmaiʼnaya vayaʼaiteʼmo afole aigiye. 10Afole aigiyaʼmonanafa muki vayaʼmo alagepa kavaʼmo nehisaya vayaʼmogimo ha le konali yaʼapimo alige ala apakiʼapimo alige hisageno apaipamoʼmo falu hugiye. Hogoteʼa Yu vayaʼmogimo alitesageʼapaeʼmo Yu nofi vayapatiʼmo oʼmaiʼnaya vayaʼmogimo aligae. 11#Ef 6:9; 1 Pi 1:17Na kava hinageʼapaene. Gotiʼa amega apakufale kavatefeʼmo agesamo oʼafino muki vayaʼmo magoke aiyaya kavatetiʼmo alino fako huno neʼapate. 12Keʼaepa geʼamo oʼaliʼnisaya vayaʼmogi hosu kavaʼmo nehisagenoʼaeʼmo Gotiʼa agoti huno apateteno apamagisigeʼa faligayaʼmonanafa keʼaepa geʼaletiʼmo agoti huno oʼapategaiye. Keʼaepa geʼamo aliʼnaya vayaʼmogimo hosu kavaʼmo nehisagenoʼaeʼmo magoʼe huno keʼaepa geʼaletiʼmo agoti huno apategaiye. 13#Mt 7:21; 1 Yo 3:7Gotiʼa keʼaepa geʼamo fikumo afiʼnaya vayaʼaifeʼmo, naulagaleʼmo fatago vayaʼmo maiʼnae, huno nosifa keʼaepa geʼamo afiteʼa akame nehaya vayaʼaifekeʼmo, naulagaleʼmo fatago vayaʼmo maiʼnae, huno nehiye. 14#Ap 10:35Yu nofi vayapatiʼmo oʼmaiʼnaya vayaʼmogimo keʼaepa geʼamo oʼaliʼnayaʼmonanafa keʼaepa geʼamo akame nehagetaeʼmo, Goti keʼaepa geʼamo apaipafiʼmo haneʼniye, huta apakeʼnone. 15Apakaemo laipafiʼmo avoʼmo kae maleʼniya keʼaepa geʼamo haneʼniye, huʼa aliʼa apave neliye. Yuʼilaga vekaʼapimoʼa, mani kava hiyo, ina kava osiyo, huno hapa nepaiye. Apakaemo apakesa afiteʼapaeʼmo hosu kavaʼmo nehune, huʼa huge alagepa kavaʼmo nehune, huʼa huge nehae. 16#2 Ti 2:8Gotiʼa agoti huno apatesiya afinaʼmo alagepa faigoko geʼnilefeʼmo Yesu Kalaisitetiʼmo huʼa fala kiʼa neʼatalaya kavaʼapimo alino fako huno apategaiye.

Yu vayaʼmogi, mono kavatimoʼmo laha maegaiye, huʼa huʼnaya gemae

17 # Ye 2:19 Kagaemo, Yu vekamo maiʼnovanageno keʼaepa gemoʼa naha maegaiye, huka hutekaeʼmo, Goti vayaʼamo maiʼnove, huka nehane. 18Goti keʼaepa geʼamo aliʼa kaya maleʼnagekaeʼmo Gotiʼa hauʼniya kavaʼmo ageteka hogote alagepa kavafeʼmo, kanale kavane, huka nehane. 19-20#2 Ti 3:5,15; Mt 15:14; Lu 18:9Kagaemo hukaeʼmo, keʼaepa geʼamo ago afiʼnove. Afiteʼna nagaemo lama gemo aepaʼamo ago ageʼnove, huka nehane. Lole kagesamo oʼafika lokiya vaika kagesa afikaeʼmo, apaulagamo ali huʼnigeʼa alagepa kaʼmo oʼageʼa hani yapiʼmo neʼmaiya vayaʼmo ha le yaʼmo aliʼna neʼapamuve. Oʼafiʼnaya vayaʼmo aliʼna api aiʼna apateteʼna mafaʼnegana huʼa apakesa ohaneʼniya vayaʼmo aliʼna apaya neʼmalove, huka kagesamo neʼafine. 21#Sam 50:16-21; Mt 23:3-4He, alika apaya neʼmalanaʼmonanafa kagaikamo alika kaya noʼmalapiye. Kumayaʼmo oʼaliyo, huka aeka hakalo huka hapa nepainaʼmonanafa kumayaʼmo neʼalipiye. 22Kumai kavaʼmo osiyo, huka nehanaʼmonanafa kumai kavaʼmo nehapiye. Kagaemo aigofe gotiʼapimogifeʼmo alagi okahauʼniyaʼmonanafa Gotifeʼmo kagesamo afika koli nosapiye. 23Kagaemo hukaeʼmo, keʼaepa gemo afiʼnove, huteka kagikaleʼmo alika asaga nehanaʼmonanafa keʼaepa geʼamo ago amagika ataleteka Goti agiʼaleʼmo alika afepi neʼatane. 24#Aiy 52:5; Iyi 36:20Goti mukufiʼmo avoʼmo kae maleʼniya gemoʼa hunoʼaeʼmo, lapakaemo hosu kavaʼmo nehayaʼmofeʼmo Yu nofi vayapatiʼmo oʼmaiʼnaya vayaʼmogi Gotifeʼmo huʼa faipa huʼa neʼatae, huno huʼniye.

Apakufamo lagauʼnaya kavafeʼmo huʼniya gemae

25 # Yel 4:4; 9:25 Kagaemo keʼaepa geʼamo akame nehisanaʼmoʼmo kagufamo lagauʼnaya kavaʼmoʼa afaʼa kaha maegaiye. Keʼaepa geʼamo amagika neʼatalesanaʼmoʼmo kagufamo lagauʼnaya kavaʼmo ina agufa kavaʼmo haneʼniye. 26#Ga 5:6Mago vekamo agufamo lagauʼnisaya vekamoʼmo keʼaepa geʼamo akame nehisiyaʼmoʼmo Goti aulagaleʼmo apakufamo lagauʼnaya vayakana huno maigiye. 27Apakufamo olagauʼnageʼa afaʼa maiʼnaya vayaʼmogimo keʼaepa geʼamo akame nehisayaʼmoʼmo agoti huʼa kategae. Keʼaepa geʼamo ago aliʼnanageʼapaeʼmo kagufamo lagauʼnaya vekamogamo ani keʼaepa geʼamo ago amagika neʼatalanaʼmofeʼmo, hosu kavaʼmo huʼnane, huteʼa agoti huʼa kategae. 28-29#Loa 30:6; Yo 7:24; 8:39; Kl 2:11; 1 Ko 4:5; 2 Ko 10:18Lama ge Yu vekamoʼmo amega agufale Yu vekamo oʼmaiʼnifa aipafi Yu vekamo maiʼniye. Lama ge apakufamo lagauʼnaya kavaʼmo amega apakufale kavaʼmo ohaneʼnifa apaipafi kavaʼmo haneʼniye. Keʼaepa gemoʼa mani agufa aliʼyaʼmo afaʼa oʼaligiyaʼmonanafa Goti Aunemeʼamoʼmo apaipafiʼmo mani agufa aliʼyaʼmo afaʼa neʼaliye. Ma mopafi vayaʼmogimo lama ge Yu vekamo agiʼaleʼmo aliʼa asaga huʼa noʼatayaʼmonanafa Gotiʼa agiʼaleʼmo alino asaga huno neʼate.

Currently Selected:

Lomu 2: kyg2013

Highlight

Copy