Apa 28

Poloʼa Moleta kotega ani agoʼnanenafiʼmo uno maiʼniya gemae

1Muki vayaʼamo ani agiʼnaleʼmo uta avaʼyi huta maiʼnonageʼapaeʼmo ani ani agoʼnanenamo agiʼamo Moleta kotegae huʼa agi aeʼa laha paiʼnageta afiʼnone. 2#2 Ko 11:27Ani Moleta kotega ve aʼnemogimo aliʼa falu fala huʼa lateteʼapaeʼmo koʼmo aiʼnigeno yasimo lahauʼnigeʼapaeʼmo atamo kaeʼa loto huʼa lateʼnae. 3Poloʼa mago aise ata hayamo alino atafiʼmo nekaegenoʼaeʼmo atamoʼmo leno amuko hauʼnigenoʼaeʼmo mago nagaloʼyavemo ani ata hayafatiʼmo eno ayapiʼmo hanino alagi huteno hanino mulekalale huteno maiʼniye. 4Maiʼnigeʼa Moleta kotega vayaʼmogimo ageteʼapaeʼmo, Ani vekamoʼmo mago vayaʼmo nehapaeya vekamo maiʼnegaiye. Anipatiʼmo faino kasalo paeʼniyaʼmonanafa mago gotiʼa alino fako huno neʼapateya gotiʼa hunoʼaeʼmo, faligiye, huno huʼniye, huʼa huʼnae. 5#Mk 16:18Poloʼa ayaʼmo aino sako ke huno aino valino ataleʼnigeno atafiʼmo asagauno aiʼnigeno Poloʼa afaʼa maiʼniye. 6#Ap 14:11Agufamo alino afu lesifi asagauno aiteno falisifi huʼa huteʼa ageʼa maiʼnae. Yatala afinaʼmo ageʼa maime maime uʼnayana agufaleʼmo mago kavaʼmo afole oʼaiʼnigeʼapaeʼmo apaipafiʼmo apakesamo afiʼapaeʼmo, Mago gotiʼa maiʼniye, huʼa apakesamo afiʼnae.

7Ani kotega mago mopamo ani agoʼnanenafiʼmo haneʼniya mopaleʼmo maiʼnaya vayaʼaiteʼmo yagaino neʼapateya vekamo agiʼamo Pamaliyasi mopamo haneʼniye. Pamaliyasiʼa lavalelinuno noʼafiʼmo lateʼnenoʼaeʼmo loleʼe magoʼe afinaʼmo alagepa huno yagaino lateʼnigeta maiʼnone. 8Pamaliyasi afoʼamoʼmo amuko kaita hauge aitoto aige huteno hipaʼaleʼmo havaeno maiʼniye. Poloʼa noʼafiʼmo uno haino agufaleʼmo ayaʼmo maleʼneno nunumuʼmo huno ateʼnigeno kaitaʼamo hageʼnigeʼa 9ageteʼapaeʼmo ani ani agoʼnanenafiʼmo maiʼnaya vayapatiʼmo muki kaita hapauʼniya vayaʼmo ete ete huʼnageno alino hapageno apateʼnigeʼapaeʼmo 10muki yaʼmo afaʼa laha maeʼa lamiʼnae. Lagaemo ugefeʼmo huʼnonageʼapaeʼmo muki yaʼmo oʼaliʼnona yatimo alinita visunafeʼmo alini eʼa sipifiʼmo lateʼnae.

Moleta kotegatiʼmo eta Lomu taonifiʼmo uta avaʼyi huʼnona gemae

11Lagaemo mani ani agoʼnanenafiʼmo haneʼniya taonifiʼmo loleʼe magoʼe kaimo maiteta Alekasani kotega sipimo agiʼamo alagoʼya gotiganiye, huʼa agi aeʼnaya sipimo mani ani agoʼnanenaleʼmo yasimo neʼaliya afinaʼmo haneʼniya sipifiʼmo uta haita maiteta uʼnone. 12Uta Silakusi taonifiʼmo avaʼyi huteta loleʼe magoʼe afinaʼmo maiʼnone. 13Maiteta ataleta sipifiʼmo aita vego huta Lisiyamu taonifiʼmo uta avaʼyi huʼnone. Egamo yasimoʼa sipimo alinino visiya agufa yasimo aliʼnigeta lole afinaʼmo Putiyoli taonifiʼmo uta avaʼyi huʼnone. 14Ani taonifiʼmo maiʼnaya konagatimogimo lagaefeʼmo huʼapaeʼmo, lagaeʼeʼmo maiyo, huʼa huʼnageta magoke salemo apakaeʼeʼmo maiteta apataleta Lomu taonifiʼmo visunafeʼmo uʼnone. 15Lava gemo huʼnaya gemo Lomu taonifi konagatimogimo afiteʼapaeʼmo Apiyasi maketi kumateʼmo neʼageta fotu hutetaeʼmo lavaleʼnageta magokepi neʼunageʼapaeʼmo nata vayaʼai noʼmo loleʼe magoʼe noʼmo haneʼniya yateʼmo magoʼe huʼa Lomu taonifi konagatimogimo neʼageta fotu huteta Poloʼa apaketenoʼaeʼmo Gotifeʼmo hao ke heteno aipamo alino lokiya vaino ateʼniye.

Lomu taonifiʼmo maiʼniya gemae

16 # Ap 24:23 Lagaemo Lomu taonifiʼmo uta avaʼyi huteta ati vayaʼaiteʼmo yagaino neʼapateya vekamoʼmo kalavusifiʼmo maiʼnaya vayaʼmo alu vekamo ati vayaʼaiteʼmo yagaino neʼapateya vekamoʼmo yagaino apatesiyafeʼmo apavalelinuno amiʼniye. Amiʼniyaʼmonanafa Poloʼa agaiʼageʼmo mago nopiʼmo afaʼa maigiye, huʼa ha paiʼnageno mago ati vekamoʼmo yagaino ateʼniye. 17#Ap 25:8Loleʼe magoʼe afinaʼmo utegeno Poloʼa Lomu taonifiʼmo Yu vayaʼaiteʼmo yagaiʼa neʼapataya vayaʼaifeʼmo ge huʼnigeʼa eʼa aliʼa anupa huʼa maiʼnagenoʼaeʼmo, Konagaʼnimogitapae, huno, Lagae vayaʼaifeʼmo huʼna faipa huʼna oʼapatege laginago vayaʼai geʼapimo amagiʼna oʼatalege huʼnovaʼmonanafa Yulusalemu taonifiʼmo kalavusi huʼa nateteʼa navaleliʼeʼa Lomu vayaʼai apayapiʼmo nateʼnae. 18#Ap 26:31Apakaemo loka huʼa ge huʼa nafigeʼapaeʼmo, Ani vekamoʼmo falisiya agufa hosu kavaʼmo osuʼniyanageta afaʼa hatu maeta atesunageno ugiye, huʼa huʼnayaʼmonanafa 19#Ap 25:11Yu vayaʼmogimo haʼao, huʼa huʼnayaʼmofeʼmo alu kaʼmo ohaneʼnigeʼna Sisaʼa agoti huno alino fako huno nategaiye, huʼna hapa paiʼnove. Yu vayaʼnimo agoti huʼna apatesuvafeʼmo nagesamo oʼafiʼnove. 20#Ap 24:15; 26:6-7Ani kavaʼmo afole aiʼniyaʼmofeʼmo lapaketeʼnaeʼmo ani gemo lapa paisuvafeʼmo huve. Isaleli vayaʼmogimo apavayagunagu huʼa agava maiʼnaya vekalefeʼmo kalavusi huʼa nateʼnageʼna hemenimo maiʼnove, huno hapa paiʼniye.

21Hapa paiʼnigeʼapaeʼmo, Yutiya kotegatiʼmo mago kava gemo huʼa avoʼmo kaeʼa olamiʼnae. Mago konagatimogi ani kotegatiʼmo hosu kava gemo huliʼeʼa laha opaiʼnae. 22#Ap 24:14Huliʼa oʼmeʼnayaʼmonanafa muki kotega maiʼnaya vayaʼmogimo alita fako hutapa lapaote maiʼnaya vayaʼmogitapaeʼmo hosu gemo nehae. Ani gemo afiʼnonaʼmofeʼmo ani kavafeʼmo kagesamo neʼafina gemo afigesune, huʼa ha paiʼnae. 23Ani gemo huteʼa Poloʼa mago afinaʼmo hapa paisiyafeʼmo lekana pai maleʼnaya afinaʼmo asole vayaʼmo Poloʼmo maiʼniya notegamo eʼnae. Poloʼa netepiʼmo aepa faino Gotiʼa neʼyagaiya kavaʼmo aepaʼaeʼmo ava gemo alino apaya malege aeno hakalo huno hapa paige huno maiʼniye. Agaemo Yesufeʼmo apakesamo afiʼa fatago hisayafeʼmo Mosese geʼe Gotitegati gemo alini eʼa aeʼa hakalo huʼa hapa nepaiya vayaʼai geʼapiʼefeʼmo apakesamo alino hapa paime hapa paime neʼegeno yegemo uno lamino faleʼniye. 24Mago vayaʼamogi lama gemo nehiye, huʼa apakesamo afiʼnayana mago vayaʼamogimo apakesamo afiʼa fatago osuʼnae. 25#Aiy 6:9-10; Mt 13:14Alu apakesa alu apakesamo afiteʼa ataleʼa uʼnae. Ataleʼa oʼuʼnagenoʼaeʼmo Poloʼa hogoteno hapa painoʼaeʼmo, Goti Aunemeʼamo aote Aunemeʼamoʼmo Aiyeyafeʼmo lama gemo ha paiʼnigeno Aiyeyaʼa lapakinago vayaʼaifeʼmo ani gemo hapa paiʼniye. Goti Aunemeʼamoʼmo ani gemo hunoʼaeʼmo, 26Kagaemo uka mani vayaʼaifeʼmo ani gemo huka hapa paiyo.

Lapakaemo afige afige hutapa maigayaʼmonanafa alagi afitapa aeto osugae. Agege agege hutapa maigayaʼmonanafa agetapa aeto osugae. 27Mani vayaʼmogimo negi nagi apaipa apakesamo haneʼnigeʼapaeʼmo apakesamo aliʼa akaniteʼa apaulagamo fali kaeʼa maiʼnae. Apakaemo apaulagamo afaʼa ageʼa aya okege apakesamo oʼafige apaipafatiʼmo oʼafige huteʼa aiʼa afe leʼa nagaetegamo oʼmesageʼna aliʼna alagepa huʼna oʼapatesuvafeʼmo ani agufa kavaʼmo huʼa maiʼnae, huno ha paiʼniye.

Goti Mukufiʼmo avoʼmo kae maleʼniye, huno Poloʼa hapa paiʼniye.

28 # Sam 67:2; Lu 3:6; Ap 13:46; 18:6 Poloʼa hapa paino hano nehunoʼaeʼmo, Ani gemo huʼniyaʼmofeʼmo alagi alagepa hutapa afiyo. Gotiʼa alu nofi vayaʼmo hapa maesiya gemo alino atesigeno visigeʼa afigae, huno hapa paiʼniye. 29Poloʼa ani gemo huno hapa paiʼnigeʼapaeʼmo Yu vayaʼmogi ge vaime vaime ataleʼa uʼnae. 30#Ap 28:16Lole kafugamo Poloʼa havaeno maisiyafeʼmo no aepa vekalemo miya faime faime eno maiʼnenoʼaeʼmo muki vayaʼmo agaetegamo eʼnaya vayaʼmo alino falu fala huno apateʼniye. 31#Ap 28:23Agaemo Gotiʼa neʼyagaiya kavafeʼmo ava gemo aeno hakalo huno hapa paige Ala kava neʼmo Yesu Kalaisifeʼmo ava gemo alino apaya malege huno maiʼniye. Vayaʼmogimo oʼatafauʼnayaʼmofeʼmo mago gemo fala okino muki geʼamo aeno hakalo huno hapa paino maiʼniye.

Currently Selected:

Apa 28: kyg2013

Highlight

Copy