Apa 27

Ati vayaʼmogimo Poloʼa avaleliʼa Lomu taonifiʼmo uʼnaya gemae

1 # Ap 25:12 Itali kotegamo sipifiʼmo apavaleliʼa ugae, huʼa huteʼa Poloʼe mago kalavusi huʼa apateʼnaya vayaʼeʼmo apavaleliʼuʼa mago ati vayaʼaiteʼmo yagaino neʼapateya vekamo agiʼamo Yuliyasifeʼmo, yagaika apato, huʼa ha paiʼnae. Yuliyasiʼa hogote vekamo Sisa ati vayapati vekamo maiʼniye. 2#Ap 19:29Atalamitiya kotega sipimo eno haneʼnigeʼa Esiya kotegamo muki sipiʼamo uʼa avaʼyi nehaya taonifiʼmo ugefeʼmo nehagetaeʼmo ani sipifiʼmo uta haita maiteta mopamo ataleta anipiʼmo uʼnone. Alitakasiʼmo Tesalonaika taonifiʼmo Masetoniya kotega vekamo lagaeʼeʼmo magokepi lokaeno maiʼnigeta uʼnone. 3#Ap 24:23Egamo Saitoni taonifiʼmo uta avaʼyi huteta Yuliyasiʼa Polofeʼmo hunoʼaeʼmo, kagaemo kao vayaʼmo afaʼa uka apakegane. Mago kaha maesiya yaʼmo kamisageka aligane, huno ha paiʼnigeno Poloʼa mopafiʼmo uno lamiʼniye. 4Lagaemo ani taonifatiʼmo ataleta neʼunagenoʼaeʼmo visuna kategatiʼmo lusi kava huno yasimo alinineno aeno agoʼya faiʼnigeta Saipalasi ani agoʼnanenamoʼa aino hau vaiʼniya kateʼmo uʼnone. 5Uta Silisiya haopalega aniʼmo lakaeteta Pamifiliya haopalega aniʼmo lakaeta Maila taonifiʼmo Lisiya kotega taonifiʼmo uta avaʼyi huʼnone. 6Ani taonifiʼmo mago sipimo Alekasaniya kotega sipimo Itali kotega visiya sipimo haneʼnigeno ati vayaʼaiteʼmo yagaino neʼapateya vekamoʼmo agetenoʼaeʼmo lavalelino haino sipifiʼmo lateʼniye. 7-8Ani sipimoʼmo asole afinaʼmo vase vase huno uʼnigeta ayamufaime faime uʼnone. Uʼnigeta Naitasi taoni haopalega uta avaʼyi huteta anipiʼmo neʼunagenoʼaeʼmo yasimo alinino lagaetegamo eʼnigeta afaʼa oʼuʼnone. Ani kateʼmo ataleta Kiliti ani agoʼnanenamoʼa aino hau vaiʼniya kateʼmo uta Kiliti kotega mopamo atupamo agiʼamo Salamonigayagamo ayamufaime faime uta aeta agaseta uʼnone. Uta mago taonimo agiʼamo Fehevenesi taoniye agimo aepaʼamo sipimo kanale huno nehaneya kotegae. Ani kotegamo Lasiya taoni haopale haneʼnigeta uta avaʼyi huʼnone. 9Yatala afinaʼmo maite maite hulita neʼunageno Yu vayaʼai hopa afinaʼmo neʼyaʼmo mosiʼa neʼmaiya afinaʼmo ago hano huʼnigeno lusi kava huno yasimo neʼaliya afinaʼmo aniʼmo lakaesayafeʼmo hosu afinaʼmo afole aiʼniye. Afole aiʼniyaʼmofeʼmo Poloʼa hapa maesiyafeʼmo, 10#Ap 27:22Ma vayane, huno, Mani kotetiʼmo hemenimo ataleta visunana lusi kava huta hanageke yaʼmo aligune. Sipifiʼmo haneʼniya kagemi yaʼmo alino hosuge sipimo alino hosuge hisigeta vayaʼeʼmo faligune, huno hapa paiʼniyaʼmonanafa 11ati vayaʼaiteʼmo yagaino neʼapateya vekamoʼmo Poloʼa huʼniya gemo oʼafino sipileʼmo neʼaliya vekaʼe sipimo afoʼamoʼeʼmo huʼnaʼa gegeʼmo afiʼniye. 12Lusi kava huno yasimo neʼaliya afinaʼmo afole aiʼniyaʼmofeʼmo sipimo maleʼnaya yategamo alino hosuʼniye. Asole vayaʼmo sipifiʼmo maiʼnaya vayaʼmogi huʼapaeʼmo, yasimo neʼaliya afinaʼmogeta manileʼmo ataleta lakaetuta Finikisi taonifiʼmo uta avaʼyi hisunafeʼmo amalageka huta agegesune, huʼa huʼnae. Finikisi taonimoʼmo alopa agiʼamo Kiliti kotegamo yasi neʼaliya afinaʼmo sipimo aliniʼa oʼuʼa afaʼa neʼmaiya kotegamo haneʼniye.

Lusi kava huno yasimo aliʼniya gemae

13Mago yasimo lakamelegatiʼmo vase vase huno alinino neʼegeʼapaeʼmo, Hemenimo kanalenageta ge huʼnona kavaʼmo afaʼa hugune, huʼa apakesa afiteʼa sipimo aeʼa neʼatafaya yate nofiʼmo aliʼa vayu huʼa sipifiʼmo maleʼnageta Kiliti ani agoʼnanenamo agiʼnaleʼmo uʼnone. 14Uʼnonaʼmonanafa aise afinaʼmo utegeno lusi kava huno yasimo ani agoʼnanena kotegatiʼmo alinineno sipimo alino agoʼya faiʼnigeno sipimoʼa yasimo alinineʼniya kategamo oʼuʼniye. 15Afaʼa oʼuʼniyaʼmofeʼmo ataleta yasimo alinino neʼviya kategamo uʼnone. 16Mago aise ani agoʼnanenamo agiʼamo Koʼnagayaga ani agoʼnanenamoʼa aino hau vaiʼniya kateʼmo utetaeʼmo aise sipimo aeta vayu huʼnona sipimo lokiya kava huta nofiteʼmo alita vayu huta alita asagauta alopa sipifiʼmo nofi kita ateʼnonageno kanage osuno afaʼa haneʼniye. 17Vayaʼmogimo sipimo aino oʼatagisiyafeʼmo alopa nofiʼmo aliʼa anipatiʼmo faiʼa faleʼa aliʼa vayu huʼa sipimo akamelegamo kiʼa ateʼnae. Ani vayaʼmogimo huʼapaeʼmo, Fiku yanageno sipimo ani kahaepafiʼmo alino agoʼya failino ugiye, huʼa huteʼa lavolavo selimo aliʼa ataleʼnageno emineʼnigeno yasimoʼa sipimo alino agoʼya failino uʼniye. 18Lusi kava huno yasimo alige alige huno maiʼniyaʼmofeʼmo egamo mago kagemi yakoʼmo aliʼa anipiʼmo yaga auʼa ataleʼnageno asagauno aiʼniye. 19Olagaʼamo muki sipifi haneʼniya yakoʼamo seli nofiʼe yosaʼeʼmo aliʼa anipiʼmo yaga auʼa ataleʼnageno asagauno aiʼniye. 20Yatala afinaʼmo yegemo oʼagege kanefiʼmo oʼagege huta maiʼnonagenoʼaeʼmo lusi kava huno yasimo alige alige huno maiʼniye. Neʼaligeta lagesa afitaeʼmo falisunagenoʼaeʼmo laugosamo alagi lageso hugiye, huta lagesamo afiʼnone. 21Yatala afinaʼmo neʼyaʼmo oʼneʼa mosiʼa maiʼneʼapaeʼmo Poloʼa vayaʼai folagapiʼmo he tiʼnenoʼaeʼmo, Mani vayane, huno, Geʼnimo afitetapa Kiliti kotegamo alita oʼataleʼnonesinana mani agufa hanageke kavaʼmo afole oʼaisigeno muki yaʼmo afaʼa lageso osiyesine. 22#Ap 27:10,31Inagi koli osutapa lapaipamo alita lokiya vaitapa ateyo. Magoke vekamo alagi lageso osugifa sipiʼageʼmo lageso hugiye. 23Nagaemo Goti vekamo maiʼneʼna aliʼyaʼamo neʼaluva vekamo maiʼnogeno enisole vekaʼamo alino ateʼnigeno nagaetegamo emineʼniye. 24#Ap 23:11Agaemo, hunoʼaeʼmo, Polo, huno, Koli osuvo. Uka hogote ala vekamo Sisa aulagaleʼmo he tika maigane. Gotiʼa sipifiʼmo maiʼnaya vayaʼmo apavaleno kamiʼniye, huno naha paiʼniyaʼmofeʼmo 25koli osutapa lapaipamo alita lokiya vaitapa ateyo. Goti geʼaeʼmo nagesamo afiʼna fatago nehuvanageno naha paiʼniya gemo afole aigiye. 26#Ap 28:1Afole aigiyaʼmonanafa yasimoʼa sipimo alininuno ani agoʼnanena agiʼnaleʼmo yaga auno lategaiye, huno hapa paiʼniye.

27Yasimo aepa faino aliʼniya afinaʼmo lole salemo ago utegeno Etiliya aniteʼmo yasimo alinino uneno nehigeʼapaeʼmo haniʼilaga folaguʼmo sipifiʼmo aliʼyaʼmo neʼaliya vayaʼmogi huʼapaeʼmo, Ani agiʼnaleʼmo uno hogo nehiye, huʼa huteʼa 28mago kana huʼniya yaʼmo aliʼa nofi aeteʼa anipiʼmo yaga auʼa ataleʼnageno uno lamino avoʼmo kae maleʼnaya yaʼmo yatalaʼamo tuveti mita agufa yatala yaʼmo haneʼniye. Sipimo hogo kateʼmo uʼnigeʼa halate anipiʼmo aliʼa yaga auʼa ataleʼnageno fifitini agufa yatala yaʼmo haneʼniye. 29Apakaemo huʼapaeʼmo, yafaʼmoʼa sipimo aeno agoʼya faigiye, huʼa huteʼa sipimo aeʼa neʼatafaya yaʼmo loleʼe loleʼe yaʼmo sipi akamelegatiʼmo aliʼa ataleʼnageno anipiʼmo asagauno aiteno aeno hanino alagi huteno sipimo aeno atafauʼniye. Malage huno kotisiyafeʼmo nunumuʼmo huʼnae. 30Sipifiʼmo aliʼyaʼmo neʼaliya vayaʼmo sipimo ago ataleʼa visayafeʼmo aise sipimo nofi aeteʼa aliʼa ataleʼnageno anipiʼmo uno lamiʼniye. Lagaemo hutaeʼmo, sipimo aeʼa neʼatafaya yaʼmo agoʼyafatiʼmo aliʼa atalegae, huta lagesamo afisunafeʼmo huʼa lami malesayafeʼmo huʼnae. 31#Ap 27:22Inagi Poloʼa ati vayaʼaiteʼmo yagaino neʼapateya vekaeʼmo hunoʼaeʼmo, Sipifiʼmo aliʼyaʼmo neʼaliya vayaʼmo sipimo ataleʼa visagetapaeʼmo faitapa kasalo opaegae, huno ha paiʼnigeʼapaeʼmo 32ati vayaʼmogi aise sipileʼmo nofi kiʼa atafau maleʼnaya nofiʼmo heʼa hatagautalageno uʼniye.

33Ko aligefeʼmo huʼnigenoʼaeʼmo Poloʼa hunoʼaeʼmo, Lahapao ke hove, huno, Neʼyaʼmo afaʼa neyo lole salemo neʼyaʼmo oʼnetapa mositapa maiʼnae. 34#Mt 10:30Maiʼnayaʼmofeʼmo lokiya gemo huʼna lapa nepauve. Afaʼa maisayafeʼmo neʼyaʼmo neyo. Magoke lapayokaʼmo aino faino lageso osisiyana alagi afaʼa maigae, huno hapa paiteno 35#Mt 15:36; 1 Ti 4:4-5muki vayaʼai apaulagaleʼmo peleti mayamo aliʼneno Gotifeʼmo hao ke heno nunumuʼmo huteno akaya heno aepa faino neʼniye. 36Neʼnigeʼapaeʼmo apaipamoʼmo kanale huʼa ateteʼa mukiʼamogimo neʼyaʼmo neʼnae. 37Ani sipifiʼmo maiʼnona vayaʼmo tu hataleti seveti sigisiʼa vayaʼmo maiʼnone. 38Neʼyaʼmo neʼa apamu huteʼapaeʼmo sipimoʼmo kana osisiyafeʼmo viti kuʼmo aliʼa anipiʼmo yaga auʼa ataleʼnae.

Aniʼmoʼa sipimo aeno atagiʼniya gemae

39Kotilamiyapiʼmo sipifi aliʼyaʼmo neʼaliya vayaʼmogi mopamo oʼageʼnae. Agayana mago ani agoʼnanenafiʼmo ani kahaepamo haneʼnigeʼa ageteʼapaeʼmo, Sipimo alinituta ani kahaepaleʼmo malesunafeʼmo amalageka huta agegaune, huʼa huʼnae. 40Sipimo aeʼa neʼatafaya nofiʼmo heʼa hatagauʼa ataleteʼa akamelega aiʼa atagi neʼnaya yosale nofiʼmo hakalu heʼa ataleʼnae. Yasimoʼmo ani kahaepaleʼmo sipimo avalelino visiyafeʼmo sipi agoʼyafi selimo aliʼa asagauʼa nofi aeteʼa maleʼnae. 41Maleʼnagenoʼaeʼmo yasimoʼmo sipimo avalelino ani agiʼnaleʼmo oʼuʼnifa anipiʼmo mago yafa avemoʼmo atafauno alagi huno maiʼniye. Aniʼmoʼa sipimo akamelegamo aeno atagiʼniye. 42Ati vayaʼmogimo vegemo huʼapaeʼmo, Muki kalavusi vayaʼmo apamagisunageʼa faligae. Fiku yanageʼa mago vayaʼmo nagosa ailiʼuʼa apaune heʼa ugae, huʼa huʼnayaʼmonanafa 43ati vayaʼaiteʼmo yagaino neʼapateya vekamoʼmo Polo agufamo alino katino atesiyafeʼmo hunoʼaeʼmo, haʼao, huno hapa paitenoʼaeʼmo nagosa neʼaiya vayaʼaifeʼmo hunoʼaeʼmo, Anipiʼmo asagautapa aiteta nagosa aime aime utapa ani agiʼnaleʼmo avaʼyi hiyo, huno hapa paiteno 44#Ap 27:22-25mago nagosa noʼaiya vayaʼaifeʼmo hunoʼaeʼmo, Latapa yosamo sipimo aeno atagiʼniya yosaleʼmo maitetapa alinitapa viyo, huno laha paiʼnigeta mukiʼamogitamo ani agufa kavaʼmo huta ani agiʼnaleʼmo alagepa hututa avaʼyi huta hano huʼnone.

Currently Selected:

Apa 27: kyg2013

Highlight

Copy