Maki 8

Yesuʼa fo tauseniʼa vayaʼaina neʼyaʼmo apamiʼniya gemae

(Mt 15:32-39)

1Aise afinaʼmo utegeʼa halate asole vayaʼmo eʼa aliʼa anupa huʼa maiʼnae. Neʼyaʼapimo hano huʼnigeno Yesuʼa geʼamo neʼafiya vayaʼaifeʼmo ge huʼnigeʼa eʼnagenoʼaeʼmo, 2#Mk 6:34-44muki vayaʼmo nagaegiʼeʼmo loleʼe magoʼe afinaʼmo lokaeʼa maiʼnageno neʼyaʼapimo ohaneʼniyaʼmofeʼmo nahau huʼna neʼapatove. 3Mago vayaʼamo afagitegatiʼmo eʼnayaʼmofeʼmo neʼyaʼmo oʼapamiʼna noʼapilegamo fiku aliʼna apatesugeʼa visayategamo uʼa kategamo apaunena aisigeʼa asagauʼa aigae, huno hapa paiʼniye. 4Huno hapa paiʼnigeʼapaeʼmo geʼamo neʼafiya vayaʼmogi huʼapaeʼmo, kaʼme kotegamo eta maiʼnonaʼmofeʼmo muki vayaʼaina apamisuna neʼyaʼmo haiyatetiʼmo aligune, huʼa afi geʼnagenoʼaeʼmo, 5na magi peleti mayamo aliʼnae, huno apafi geʼnigeʼapaeʼmo, seveniʼa peleti mayamo haneʼniye, huʼa ha paiʼnae. 6Agaemo muki vayaʼaifeʼmo hapa painoʼaeʼmo, mopaleʼmo maiyo, huno huteno seveniʼa peleti mayamo alino Gotifeʼmo hao ke heteno lo aeno geʼamo neʼafiya vayaʼaina apamiʼnigeʼa aliʼa apamiʼnae. 7Agaemo aise agufa noyame aliʼnaya noyamemo aliʼneno alino auleno ateteno geʼamo neʼafiya vayaʼaifeʼmo, alita apamiyo, huno hapa paiʼniye. 8Muki vayaʼamogimo neʼa apamu huteʼa neʼya atupaʼamo aliʼa seveniʼa hona yuvapafiʼmo maleʼa havai teʼnae. 9Fo tauseniʼa agufa vayaʼmogimo neʼnae. Netageno alino apateʼnigeʼa uʼnae. 10Utageno geʼamo neʼafiya vayaʼeʼmo sipifiʼmo uʼa haiʼa maiteʼa Nalamanuta haopalegamo uʼnae.

Falasi mono vayaʼmogi huʼapaeʼmo noʼagona aune kavaʼmo alika lave liyo, huʼa huʼnaya gemae

(Mt 16:1-4)

11 # Mt 12:38 Mago Falasi vayaʼmo Yesutega eʼa mago geletiʼmo aepa faiʼa kaveta huʼnae. Huʼapaeʼmo, kokuʼnategatiʼmo noʼagona lokiya kavaʼmo alika lave ligeta ageno, huʼa amalageka huʼa ge huʼa afigeʼnae. 12-13#Lu 11:29Yesuʼa avamusa aitenoʼaeʼmo, na kava higeʼa hemeni afinaʼmo maiʼnaya vayaʼmogi huʼapaeʼmo noʼagona lokiya kavaʼmo alika lave liyo, huʼa nehae. Alagi lama gemo lapa nepauve, huno, nagaemo mago aune kavaʼmo hemeni afinaʼmo maiʼnaya vayaʼaina aliʼna apave oliguve, huno hapa paiteno apataleno halate sipifiʼmo uno haino maiteno mugagayaga faligamo lakaeno uʼniye.

Helotiʼe Falasi vayaʼmogiʼeʼmo nehaya kavafeʼmo huʼniya gemae

(Mt 16:5-12)

14Geʼamo neʼafiya vayaʼmogimo peleti mayaeʼmo apake kaniʼnigeʼa oʼaliʼa uʼnageno sipifiʼmo magoke peleti mayatomo haneʼniye. 15#Lu 12:1Yesuʼa lokiya ge hunoʼaeʼmo, alagepa huta kava yagaiyo. Falasi vayaʼai peleti mayafiʼmo aeno apafu neleya yaʼe Heloti akame vayaʼamogi peleti mayafiʼmo aeno apafu neleya yaʼefeʼmo ehetapiye, huno hapa paiʼnigeʼapaeʼmo 16apakaiʼapimo ge huge afige huʼapaeʼmo, peleti mayatimo ohaneʼniyaʼmofeʼmo ani ge hiye, huʼa huʼnagenoʼaeʼmo 17#Mk 6:52Yesuʼa huʼnaya gemo ago afiʼniyaʼmofeʼmo ina gemo hunoʼaeʼmo, na kava higetapa peleti mayamo oʼaliʼnaya kavafeʼmo ge huge afige nehae. Huʼnova kavaʼmo ageta aeto osuta maime maime eta hemeniʼeʼmo ageta aeto osuʼnafiye. Lokiya lapaipamo haneme haneme eno hemeniʼeʼmo ani lapaipamo haneʼnifiye. 18#Yel 5:21; Mk 4:12; Ap 28:26Lapaulagamo haneʼniyaʼmonanafa oʼageʼnafiye. Lapakesamo haneʼniyaʼmonanafa oʼafiʼnafiye. Huʼnova kavafeʼmo ago lapake kaniʼnifiye. 19#Mk 6:41-44Nagaemo faefuʼa peleti mayamo aliʼna akaya heʼna faefu tauseniʼa vayaʼaina apamiʼnogetapaeʼmo atupaʼamo alita na magi hona yuvapafiʼmo maletapa havai teʼnae, huno apafi geʼnigeʼapaeʼmo, tuolofuʼae, huʼa huʼnae. 20#Mk 8:6-9Nagaemo seveniʼa peleti mayamo aliʼna akaya heʼna fo tauseniʼa vayaʼaina apamiʼnogetapaeʼmo atupaʼamo alita na magi hona yuvapafiʼmo maleta havai teʼnae, huno apafi geʼnigeʼapaeʼmo, seveniʼae, huʼa huʼnae. 21Agaemo hunoʼaeʼmo, ageme ageme eta maiʼnayana hemeniʼeʼmo oʼageʼnafiye, huno ge huno apafi geʼniye.

Yesuʼa Metasaita taonifiʼmo uno aulaga ali huʼniya vekamo alino ayakeno ateʼniya gemae

22Apakaemo uʼa Metasaita taonifiʼmo avaʼyi huʼnageʼapaeʼmo mago vayaʼmogi aulagamo ali huʼniya vekamo avaleliʼa Yesutega eʼapaeʼmo, kahao ke honanagi agaeteʼmo kayaʼmo malo, huʼa huʼnageno 23ani aulaga ali huʼniya vekamo ayate alino avalelino taoni malaga uʼniye. Uno aulagalateʼmo aviʼna heteno ayatalaʼmo maletenoʼaeʼmo, mago yaʼmo ageʼnapiye, huno afi geʼniye. 24Afi geʼnigeno alino maku huno agetenoʼaeʼmo, apakovana vayaʼmo yosagana huʼa maiʼneʼa umenitata nehae, huno huʼnigeno 25halate ayatalaʼmo aulagalateʼmo maleʼnenoʼaeʼmo, alika maku huka ago, huno huʼnigeno aulagalaʼmo ageno yaketeno muki yaʼmo alagepa huno ageʼniye. 26#Mk 7:36Yesuʼa noʼalega alino atetenoʼaeʼmo, ukaeʼmo taonifiʼmo uka ohaika taonifiʼmo maiʼnisaya vayaʼaifeʼmo hapa opaiyo, huno ha paiʼniye.

Pitaʼa Yesufeʼmo, Kalaisigamo maiʼnane, huno huʼniya gemae

(Mt 16:13-20; Lu 9:18-21)

27Yesuʼe geʼamo neʼafiya vayaʼeʼmo Sisaliya Filipai haopalegamo muki haneʼniya taoniʼafiʼmo ugefeʼmo kategamo neʼuʼapaeʼmo, vayaʼmogimo nagaefeʼmo huʼapaeʼmo, ina laʼnae, huʼa nehae, huno apafi geʼnigeʼapaeʼmo, 28#Mk 6:15Mago vayaʼamogi kagaefeʼmo huʼapaeʼmo, Yoniʼa aniʼmo faleno neʼapateya vekamo maiʼniye, huʼa huge mago vayaʼamogi huʼapaeʼmo, Ilaiyaʼa maiʼniye, huʼa huge mago vayaʼamogi huʼapaeʼmo, Gotitegati gemo alini eʼa aeʼa hakalo huʼa hapa nepaiya vayapati vekamo maiʼniye, huʼa huge nehae, huʼa ha paiʼnae. 29#Yo 6:68-69; Mk 9:9Ha paiʼnagenoʼaeʼmo, Ina ge huʼa nehayaʼmonanafa lapakaemo nagaefeʼmo ina laʼnae, hutapa nehae, huno apafi geʼnigeno Pitaʼa hunoʼaeʼmo, Gotiʼahunoʼaeʼmo, Kalaisi vekamo aliʼna atesugeno emineno ma mopafatiʼmo afole aigiye, huno huʼniya vekamo Kalaisigamo maiʼnane, huno ha paiʼniye. 30Huno ha paiʼnigeno Yesuʼa hunoʼaeʼmo, ina laʼnamofi hutapa mago vekaeʼmo ha opaiyo, huno hapa paiʼniye.

Yesuʼa hunoʼaeʼmo, faliteʼna halate he tiguve, huno huʼniya gemae

(Mt 16:21-28; Lu 9:22-27)

31Ani afinaʼmo Yesuʼa aepa faino alino apaya malenoʼaeʼmo, Vemo mafaʼnemoʼmo muki alu kana ya alu kana yaʼmo aliʼnisigeʼapaeʼmo vayatama vayanagi mono huʼa neʼapataya vayaʼaiteʼmo yagaiʼa apateʼnaya vayanagi keʼaepa gemo avoʼmo kaeʼa aliʼa apaya neʼmalaya vayanagi huʼa apakameʼyamo amiʼnisageʼapaeʼmo kamitimo amagisageno faliteno loleʼe magoʼe afinaʼmo utesigeno halate he tigiye, huno hapa paiʼniye. 32Yesuʼa ani gemo huno afole aino hapa paiʼnigeno Pitaʼa amasage huno avalelinuno ge haunoʼaeʼmo, ani agufa hosu kateʼmo visanafeʼmo kagesa oʼafiyo, huno huʼnigeno 33aino afe leno geʼamo neʼafiya vayaʼaina apakeʼneno Pitafeʼmo ge haunoʼaeʼmo, Sataniyo, huno, atalekeka nakamelegamo uvo. Gotiʼa agesamo afiʼniya kavafeʼmo kagesamo oʼafiʼnapa ma mopafi vayaʼmogi apakesamo neʼafiya kavafeʼmo kagesa neʼafine, huno ha paiʼniye. 34#Mt 10:38-39Agaemo muki vayaʼe geʼamo neʼafiya vayaʼefeʼmo ge huʼnigeʼa eʼnageno hapa painoʼaeʼmo, ina lagimo nakame hugefe huʼnisafi apakaiʼapimo hapauʼniya kavafeʼmo haʼao, huʼa huteʼa ataleʼa malipu yosaʼapimo aliʼa kofiliʼa nakame hiyo. 35Ina lagimo ma mopafiʼmo alagepa huʼa maige maige huʼa maisaya kavateʼmo yagaiʼa apateʼa maiʼnisafi falisagenoʼaeʼmo alagepa huʼa neʼmaiya kavaʼapimo alagi hano hugiye. Ina lagimo nagaetefenagi alagepa faigoko geʼnilefenagi huʼa alagepa huʼa maiʼnaya kavaʼapimo ataleʼnisayana alagepa huʼa maisaya yaʼapimo aligae. 36Mago vekamoʼmo muki ma mopafi yaʼamo alino hano huʼniyaʼmonanafa agupi mafaʼnemo afela hesiyaʼmoʼmo akamelegati magoʼe yaʼmo aliʼnifiye. Haʼao, oʼaliʼnifa hogote yaʼmo ago ataleʼniye. 37Agupi mafaʼnemo afela hisiyaʼmoʼmo na agufa miyatetiʼmo halate miya faino aligiye. 38#Mt 10:33Hemeni afinaʼmo maiʼnaya vayaʼmogi anauʼapimoʼmo ataleʼa kumai heʼa neʼvaya aʼnegana huʼa maiʼnae. Ani vayapatiʼmo ina lagimo nagaeʼe geʼnileʼefeʼmo apavagage nehisifigeno Vemo mafaʼnemoʼmo Afoʼamotegatiʼmo ha le konali yaʼamo aliteno apaote enisole vayaʼaʼeʼmo eminenoʼaeʼmo apakaefeʼmo avagage hugiye, huno hapa paiʼniye.

Currently Selected:

Maki 8: kyg2013

Highlight

Copy