Maki 7

Yu vayaʼmogi apakinago vayaʼaifeʼmo huʼniya gemae

(Mt 15:1-9)

1Falasi mono vayaʼe keʼaepa gemo avoʼmo kaeʼa aliʼa apaya neʼmalaya vayaʼeʼmo Yulusalemu kotegatiʼmo Yesutegamo eʼa aliʼa anupa huʼa maiʼnae. 2#Lu 11:38Maiʼneʼapaeʼmo apakayana mago Yesu geʼamo neʼafiya vayaʼmogi Yu mono gemo akame huʼa apayaʼmo sese osuʼneʼa neʼyaʼmo afaʼa aliʼa neʼnageʼa apaketeʼapaeʼmo, hosu kavaʼmo huʼnae, huʼa huʼnae. 3Falasi mono vayaʼe muki Yu vayaʼmogiʼeʼmo apakinago vayaʼai gemo akame hisayafeʼmo apayaʼmo sese osuʼnisayana neʼyaʼmo aliʼa oʼnegae. 4#Mt 23:25Maketi kumategatiʼmo eʼapaeʼmo apayaʼmo sese osuʼnisayana neʼyaʼmo aliʼa oʼnegae. Apakaemo apakinago vayaʼai keʼaepa gemo asole gemo akame huteʼakapuʼapigi samoʼapigiyuvapaʼapigi hipaʼapigi huʼa sese nehae. 5Falasi mono vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo ani kavafeʼmo Yesufeʼmo huʼapaeʼmo, Na kava higeʼa gekamo neʼafiya vayaʼmogi laginago vayaʼai keʼaepa gemo akame huʼa apayaʼmo sese osuʼneʼa neʼyaʼmo fiku aliʼa neʼnae, huʼa afi geʼnae. 6#Aiy 29:13Huʼa afi geʼnagenoʼaeʼmo, Aiyeyaʼa lapakaefeʼmo lama gemo Gotitegatiʼmo aliʼniye. Lapakaemo aeta ati nekaya vayane. Aiyeyaʼa hunoʼaeʼmo,

Ani vayaʼmogi apavayaʼaletikeʼmo nagiʼnileʼmo aliʼa asaga huʼa neʼnatayaʼmonanafa apaipaʼamoʼmo afagite haneʼniye. 7Nagaefeʼmo fikumo mono nehae. Vayaʼmogimo afisayafeʼmo ma mopafi vayaʼai keʼaepa gemo aliʼa apaya neʼmalae,

huno avoʼmo kae maleʼniye. 8Ani gelefeʼmo lapakaemo Goti keʼaepa gemo ataleta ma mopafi vayaʼai geʼapimo akame nehae. Akame hutetapa kapugi samogi muki yanagi huta sese nehae. 9Goti keʼaepa gemo ataleta lapakinago vayaʼai keʼaepa gemo akame hisayafeʼmo alagepa hutapa afiʼnae, huno huʼniye. 10#Hat 20:12; Hat 21:17; Loa 5:16Moseseʼa hunoʼaeʼmo, itatapi afotapimogi apakiʼapileʼmo alita asagautetapa apaiyafiʼmo maiyo. Mago vayaʼmogimo itaʼapimogifeʼmofi afoʼapimogifeʼmofi huʼa lifana gemo hapa paisayana kamitimo apamagigeʼapa faliyo, huno huʼniye. 11-12Huno huʼniyaʼmonanafa mago vekamoʼmo itaʼamofeʼmofi afoʼamofeʼmofi hunoʼaeʼmo, kaha maesiya kagemi yaʼnimo Gotina amisuva yakeʼmo haneʼniyanageʼna okamiguve, huno hisiyaʼmoʼmo lapakaemo, he, kanalene, huta hutetapaeʼmo, itaʼamoʼmofi afoʼamoʼmofi huno hana oʼmaegaiye, hutapa nehae. 13Ina gemo hutetapaeʼmo Goti gemo amagita ataletetapa lapakinago vayaʼai gemo akame nehae. Magoʼe hutapa ani agufa kavaʼmo nehae, huno huʼniye.

Vayaʼmo alino hosu huno neʼapateya kavafeʼmo huʼniya gemae

(Mt 15:10-20)

14Yesuʼa halate muki vayaʼaifeʼmo ge huʼnigeʼa eʼa aliʼa anupa huʼa maiʼnagenoʼaeʼmo, Geʼnimo afita aeto hiyo. 15#Ap 10:14-15Malaga haneʼnisiya yaʼmoʼa vayaʼai apakupafiʼmo uno lamisiyana vayaʼmo alino hosu huno oʼapategaiye. Oʼapategaiyaʼmonanafa apaipafatiʼmo eno haineno apavayafatiʼmo afole aisiya yaʼmokeʼmo vayaʼmo alino hosu huno apategaiye. 16Ge afisaya lapakesamo haneʼnisiyana ani gemo afiyo, huno hapa paiʼniye. 17Muki ve aʼnemo apatalenuno haino nopiʼmo maiʼnigeʼapaeʼmo geʼamo neʼafiya vayaʼmogi aeno kalafefa gemo huʼniya gemo aepaʼaeʼmo afi geʼnae. 18Afi geʼnagenoʼaeʼmo, lapakaeʼeʼmo afita aeto osuʼnafiye. Muki malaga haneʼniya yaʼmo nesageno uno lamino apakupafiʼmo hanesiyana alino hosu huno oʼapategaiye, hutapa oʼafiʼnafiye. 19Na kava higeno alino hosu huno oʼapategaiye. Apaipafiʼmo uno nolamifa apakupafikeʼmo haneʼnigeʼa aifamo leʼa neʼatalae. Ina kava huno muki neʼyaʼmo alino alagepa huno neʼate, huno hapa paiʼniye. 20Yesuʼa magoʼe gemo hunoʼaeʼmo, mago vekamoʼmo agaiʼa aipafatiʼmo haineno afole neʼaiya yaʼmokeʼmo agaiʼamo alino hosu huno neʼate. 21Apakufafiʼmo haneʼniya yaʼmo apaipafatiʼmo hosu apakesamo afole aige kumai kavaʼmo afole aige aʼmafaʼnemo alisaya kavaʼmo afole aige vayaʼmo nehapaya kavaʼmo afole aige 22kumaya alisaya kavaʼmo afole aige hapaʼye hisaya kavaʼmo afole aige muki agufa hosu kavaʼmo afole aige aigofe kavaʼmo afole aige ge oʼafiʼa kumai kavaʼmo nehaya kavaʼmo afole aige apaketeʼa apaipa kafamo nehapaya kavaʼmo afole aige huʼa faipa huʼa neʼapataya gemo afole aige himuʼnamu nehaya kavaʼmo afole aige negi nagi kavaʼmo afole aige nehiye. 23Muki ani agufa hosu kavaʼmo apaipafatiʼmo afole aiteno vayaʼmo alino hosu huno neʼapate, huno hapa paiʼniye.

Mago akanomoʼmo Yesufeʼmo agesamo afino fatago huʼniya gemae

(Mt 15:21-28)

24Yesuʼa mani kotetiʼmo ataleno Taiya taoniʼe Saitoni taoniʼeʼmo haneʼniya haopalegamo uʼniye. Uno mago nopiʼmo uno haino maiʼnenoʼaeʼmo mago vekamoʼmo hunoʼaeʼmo, Yesuʼa ani nopiʼmo eno maiʼniye, huno hisiyafeʼmo ohauʼniyaʼmonanafa ago ageʼnae. 25-26Mago akanomoʼmo Yesufeʼmo ava gemo afiteno enoʼaeʼmo aiyafiʼmo aleʼya faino ape huno maiʼniye. Ani aʼmo aʼmafaʼneʼamo aipafiʼmo hosu aune vekamo maiʼniye. Ani aʼmo Yu nofi akanomo oʼmaiʼnifa Galiki nofi aʼmo maiʼnigeno koʼamo Siliya Finisiya kotega haneʼniye. Agaemo Yesufeʼmo ina ge huno afigeʼniye, kahao keʼmo hovanagi hosu aune vekamo aʼmafaʼneʼnimo aipafatiʼmo alika hafaika atalo, huno ge huno afige afige huno maiʼnigenoʼaeʼmo, 27hogoteʼa mafaʼnemogimo neʼyaʼmo neʼa apamu hugae. Mafaʼnemogi neʼyapatiʼmo aliʼna kalamo apamisuvana kanale osugiye, huno huʼnigenoʼaeʼmo, 28Ala kava nene, huno, lama gemo huʼnanaʼmonanafa hiʼyalamuʼmo afeʼalumelagamo kalamo maiʼneʼa mafaʼnemogimo neʼyaʼmo neteʼa atalaya atupa neʼyaʼmo neʼnaya yane, huno huʼnigenoʼaeʼmo, 29ani gemo huʼnanaʼmofeʼmo nokalegamo afaʼa uvo. Hosu aune vekamo aʼmafaʼnekamo aipafatiʼmo ago ataleno uʼniye, huno ha paiʼniye. 30Ha paiʼnigeno noʼalegamo uno ageyana aʼmafaʼneʼamo hipaleʼmo afaʼa havaeno maiʼnigeno ageʼniye. Hosu aune vekamo aipafatiʼmo ago ataleno uʼniyaʼmofeʼmo afaʼa havaeno maiʼniye.

Yesuʼa mago vekamo agesa akaniʼnigeno age noʼaiya vekamo agesamo alino halo aiʼniya gemae

31 # Mt 15:29-31 Yesuʼa Taiya haopalegatiʼmo atalenuno Saitoni taonimo aeno aga senuno magoʼe huno naya loleʼa taonimo aeno aga senuno Galeliya ani kotuʼmo haopaleʼmo uno avaʼyi huʼniye. 32Mago vayaʼmogimo agesamo akaniʼnigeno alagepa huno agemo noʼaiya vekamo avaleliʼa Yesutega eʼapaeʼmo, kahao ke honanagi agufaleʼmo kayaʼmo maleka ato, huʼa afi geʼnagenoʼaeʼmo 33#Mk 5:23; Lu 4:40; 13:13Yesuʼa muki vayaʼmo anile apataleno ani vekamo agaiʼageʼmo avalelinuno ati yagaina ayatalatetiʼmo agesa katalapiʼmo aya vaiteno aviʼna heteno avenafuʼnaleʼmo ati yagaina ayatetiʼmo maleʼniye. 34#Mk 6:41; Yo 11:41Maleteno kokuʼnategamo alino maku huno ageteno avamusa aiteno agaiʼa gefatiʼmo hunoʼaeʼmo, efata ina ge huno aino halo aino, huno ha paiʼnigeno 35agesamo aino halo aiʼnigeno avenafuʼnaleʼmo atafauno maiʼniya yaʼmo ataleno uʼnigeno alagepa huno age aiʼniye. 36#Mk 1:43-45Yesuʼa hunoʼaeʼmo, ani kavafeʼmo ava ge huta hapa opaiyo, huno hapa paiʼniye. Magoʼe magoʼe gemo huno hapa paiʼniyaʼmonanafa oʼafiʼa magoʼe huʼa ava ge hulitata huʼa hapa paiʼnae. 37#Aiy 35:5Hapa paiʼnageʼa muki vayaʼmogi afiteʼa hapau aiteʼapaeʼmo, muki nehiya kavaʼamo alagepa kavaʼageʼmo nehiye. Apakesamo akaniʼniya vayaʼmo alino halo aino apatege apake noʼaiya vayaʼmo apake aisaya kavaʼmo huge nehiye, huʼa huʼnae.

Currently Selected:

Maki 7: kyg2013

Highlight

Copy