Maki 9

1 # Mk 13:30 Huno hapa paitenoʼaeʼmo, Alagi lama gemo lapa nepauve, huno, hemenimo maiʼnaya vayapatiʼmo mago vayaʼamo ofaliʼneʼa Gotiʼa yagaino apateʼniya kavaʼmo himamuʼaletiʼmo alino afole aino atesigeʼa agegae, huno hapa paiʼniye.

Kalaisiʼa aeto agufa agufamo alino ha maleʼniya gemae

(Mt 17:1-13; Lu 9:28-36)

2-3Sigisiʼa afinaʼmo utegeno Yesuʼa Pitaʼagi Yemisiʼagi Yoniʼagi huno apavalelinuno yatala avefiʼmo apakaiʼapigeʼmo uʼa haiʼnae. Haiʼa maiʼneʼapaeʼmo agayana Yesuʼa aeto agufa agufamo aliʼnigeno apaulagaleʼmo kukenaʼalegatiʼmo aeno lata late huteno yaveyaveʼage huʼniye. Mago ma mopafi vekamo kukenaʼamo sese hisigenoʼaeʼmo ani agufa yaveyave osisiya agufa kavaʼmo huʼniye. 4Apakaemo anakayana Ilaiyaʼe Moseseʼeʼmo afole aiteʼana Yesuʼeʼmo ge huge afige huʼa maiʼnae. 5Pitaʼa hunoʼaeʼmo, Tisao, huno, manile maiʼnonageno kanale huʼniye. Loleʼe magoʼe hage noʼmo kigune. Kagae noʼmo kite Mosese noʼmo kite Ilaiya noʼmo kite hugune, huno ha paiʼniye. 6Lusi kava huʼa koli huʼa maiʼnayaʼmofeʼmo Pitaʼa na agufa gemo hugufi, huno agesa oʼafino fiku gemo huʼniye. 7#Mt 3:17; 2 Pi 1:17-18; Loa 18:15; Ap 3:22Huʼnigeno hiyaʼmo kino apati kaeʼnigeno ani hiyapatiʼmo mago gemo hunoʼaeʼmo, ani vekaeʼmo nahau nayamopafiʼmo neʼnahaiya mafaʼneʼnimo maiʼniyanagi geʼamo afiyo, huno hapa paiʼniye. 8Malage huno muki haopalegamo aeno ha leʼnigeʼa ageʼnayana lole vekalaʼmo oʼanakeʼnafa Yesuʼa agaiʼageʼmo maiʼnigeʼa ageʼnae. 9#Mt 12:16; Mk 8:30Aveletiʼmo ataleʼa uʼa nelamiʼapaeʼmo Yesuʼa hunoʼaeʼmo, ageʼnaya kavafeʼmo ava ge hutapa hapa opaita maime maime neʼvigenoʼao Vemo mafaʼnemo kanolufatiʼmo he tisiya afinakeʼmo ava ge huta hapa paiyo, huno hapa paiʼniye. 10Ani gemo afiteʼapaeʼmo mago vayaʼaifeʼmo ava ge huʼa hapa opaiʼa apakaiʼapigeʼmo kanolufatiʼmo he tisiya kavafekeʼmo ge huge afige huʼa maiʼnae. 11Apakaemo Yesufeʼmo huʼapaeʼmo, na kava higeʼa keʼaepa gemo aliʼa apaya neʼmalaya vayaʼmogi huʼapaeʼmo, Ilaiyaʼa hogoteno afole aitesigenoʼae, huʼa huʼnae, huʼa afigeʼnagenoʼaeʼmo, 12#Mal 4:5; Sam 22:1-18; Aiy 53:3He, Ilaiyaʼa muki kavaʼmo alino api aino atesiyafeʼmo hogoteno afole aigiyaʼmonanafa na kava higenoʼaeʼmo, Vemo mafaʼnemoʼmo muki alu kana ya alu kana yaʼmo aliʼnisigeʼapaeʼmo, ina agufa vekamo maiʼniye, huʼa huteʼa agiʼaleʼmo aliʼa afepi ategae, huno avoʼmo kae maleʼniye. 13#Mt 11:14Lapa nepauvaʼmonanafa Ilaiyaʼa ago afole aiʼnigeʼapaeʼmo agaetegamo hapauʼniya kavaʼmo huʼa ago amagiʼnae. Goti mukufiʼmo avoʼmo kae maleʼniya gemoʼa ani kavafeʼmo huʼniye, huno hapa paiʼniye.

Yesuʼa hosu aune vekamo aipafiʼmo maiʼniya mafaʼnemo alino alagepa huno ateʼniya gemae

(Mt 17:14-21; Lu 9:37-43)

14Apakaemo geʼamo neʼafiya vayaʼaitegamo eʼa apakeʼnayana asole vayaʼmogimo faiʼa vego huʼa apateʼnageʼa keʼaepa gemo avoʼmo kaeʼa aliʼa apaya neʼmalaya vayaʼeʼmo ke vaiʼnageʼa apakeʼa maiʼnae. 15Ani muki vayaʼmogimo Yesuʼa eʼnigeʼa ageteʼa hapau aiteʼa malage huʼa nagu nagu huʼa uʼa ke amamaeʼnae. 16Agaemo hunoʼaeʼmo, na agufa kavafeʼmo apakaeʼeʼmo ge huge afige hutapa maiʼnae, huno apafi geʼnigenoʼaeʼmo 17asole vayapatiʼmo magoke vekamoʼmo Yesu geʼaleʼmo aeno atagaina huno ha painoʼaeʼmo, Tisao, huno, hosu aune vekamoʼmo ve mafaʼneʼnimo avayamo alino akani maleʼnigeʼnaeʼmo kagaetegamo avaleliʼna neʼove. 18Hosu aune vekamoʼmo muki haopalega umenitata nehiyategamo atafauno alino mopafi yaga auno ateʼnigeno aviʼnaʼmoʼa avayafatiʼmo huʼnigeno avepiʼmo hanineno alagi huteno agufamo alino lokiya vaiteno neʼmaiye. Nagaemo gekamo neʼafiya vayaʼaifeʼmo, ani hosu aune vekamo alita hafaita ataleyo, huʼna huʼnovaʼmonanafa aliʼa oʼataleʼnae, huno ha paiʼniye. 19Ha paiʼnigenoʼaeʼmo, ma mopafiʼmo hemeni afinaʼmo maiʼnaya vayanagi lapakesamo afita fatago nosaya vayanagi huʼna huʼnaeʼmo, na magi afinaʼmo lapakaeʼeʼmo maiguve. Na magi afinaʼmo lapakaeʼeʼmo maiʼneʼna kana yaʼmo alige alige huʼna maiguve. Nagaetegamo avalelita eyo, huno hapa paiʼniye. 20Apakaemo agaetegamo ani mafaʼnemo avaleliʼa neʼagenoʼaeʼmo hosu aune vekamoʼmo Yesuna agetenoʼaeʼmo malage huno alino agoʼya faino ataleʼnigeno hafosamoʼa apamagiʼnigeʼapaeʼmo nehaya agufa kavaʼmo huteno mopafiʼmo asagauno aino heleve heleve huteno aviʼnaʼmoʼa avayafatiʼmo huʼniye. 21Yesuʼa afoʼamofeʼmo hunoʼaeʼmo, haiya afinatetiʼmo ani kavaʼmo huʼniye, huno afi geʼnigenoʼaeʼmo, aise mafaʼne maiʼniya afinatetiʼmo ani kavaʼmo aepa faino haume eno hemenimo nehaiye. 22Agaemo kamitimo amagisiyafeʼmo muki afinaʼae afinaʼaeʼmo amagino atafiʼe anipiʼeʼmo neʼate. Mago kavaʼmo lagaetegamo afaʼa huguvekaeʼmo kahau huka lateteka laha mao, huno huʼnigenoʼaeʼmo 23#Mt 21:21; Mk 11:23Yesuʼa hunoʼaeʼmo, kagaemo kagesamo afika fatago hisanaʼmoʼmo kanalene. Agesa afino fatago hisiya vekamoʼmo muki kavaʼmo afaʼa hugiye, huno huʼnigeno 24#Lu 17:5malage huno ani mafaʼnemo afoʼamoʼmo aulagafatiʼmo aunumo emineʼnigeno alopa gefatiʼmo hunoʼaeʼmo, Ala kava nene, huno, Nagesamo afiʼna fatago huʼnovaʼmonanafa nagesa afiʼna fatago osuʼnovanagi afaʼa naha mao, huno huʼniye. 25Yesuʼa apakeyana asole vayaʼmo apakaetegamo nagu nagu huʼa eʼnageno apaketeno hosu aune vekaeʼmo hunoʼaeʼmo, agesamo alika akani maleteka avayamo ge osisiyafeʼmo alika akanika ateʼnana hosu aune vekamo aipafatiʼmo emikeka kaune heka uteka halate eka haikeka aipafiʼmo oʼmaiyo, huno lokiya ge huno huʼniye. 26#Mk 1:26Huno huʼnigeno hosu aune vekamo kage kage huteno alino agoʼya faino ataleʼnigeno ani mafaʼnemo hafosamoʼa apamagiʼnigeʼaeʼmo nehaya agufa kavaʼmo huge huge huʼnigeno hosu aune vekamo ataleno uʼniye. Ani mafaʼnemo faligekana huno maiʼnigeʼapaeʼmo asole vayaʼmogi huʼapaeʼmo ago faliʼniye, huʼa huʼnayaʼmonanafa 27Yesuʼa ha maeno ayateʼmo alino he tino ateʼniye. 28Yesuʼa atalenuno haino nopiʼmo maiʼnigeʼa geʼamo neʼafiya vayaʼageʼmo maiʼneʼapaeʼmo, na kava higeta hosu aune vekamo afaʼa alita hafaita oʼataleʼnone, huʼa afi geʼnagenoʼaeʼmo, 29neʼyaʼmo mosiʼnetapa nunumuʼmo nehaya kavatetikeʼmo ani agufa hosu aune vekamo afaʼa alita hafaita atalegae, huno hapa paiʼniye.

Yesuʼa halate hunoʼaeʼmo faliteʼna he tiguve, huno huʼniya gemae

(Mt 17:22-23; Lu 9:43-45)

30-31 # Mk 8:31; 10:32-34; Yo 7:1 Apakaemo ani kotetiʼmo ataleʼuʼa Galeliya kotegamo aeʼa aga seʼa uʼnae. Yesuʼa geʼamo neʼafiya vayaʼageʼmo alino apaya maleʼniyaʼmofeʼmo mago vayaʼmogi Yesuʼa eno maiʼniye, huʼa huteʼa esayafeʼmo ohauʼniye. Alino apaya malenoʼaeʼmo, Vemo mafaʼnemo avaleliʼuʼa vayaʼai apayapiʼmo apamisageʼa kamitimo amagigae. Amagisageno falitenoʼaeʼmo loleʼe magoʼe afinaʼmo utesigeno halate he tigiye, huno hapa paiʼniye. 32#Lu 9:45; 18:34Apakaemo alino apaya maleʼniya gemo aepaʼamo alagepa huʼa afiʼa aeto osuʼapaeʼmo loka huʼa afi gesayafeʼmo koli huʼnae.

Ina laʼmo hogote vekamo maiʼniye, huno huʼniya gemae

(Mt 18:1-5; Lu 9:46-48)

33Apakaemo Kapeneyamu taonifiʼmo uʼa avaʼyi huteʼa nopiʼmo uʼa haiʼa maiʼneʼapaeʼmo Yesuʼa geʼamo neʼafiya vayaʼaifeʼmo hunoʼaeʼmo, kategamo neʼetapaeʼmo na agufa gemo hutetapa ge vaiʼnae, huno apafi geʼniye. 34Kategamo neʼeʼapaeʼmo, lagaepatiʼmo ina laʼmo hogote vekamo maiʼniye, huʼa huteʼa ge vaiʼnayaʼmofeʼmo Yesuʼa apafi geʼnigeʼapaeʼmo geʼaleʼmo aeʼa atagaina huʼa ge osuʼnae. 35#Lu 22:24; Mt 20:25-27; Mk 10:43-44Yesuʼa fai maiʼneno tuolofuʼa vayaʼmo geʼamo neʼafiya vayaʼaifeʼmo ge huʼnigeʼa eʼnagenoʼaeʼmo, lapakaepatiʼmo mago vekamoʼmo hogote vekamo maigesuve, huno huʼnisiya vekamoʼmo hogote vekamo maisiyafeʼmo henaga vekagana huno maiʼneno muki vayaʼaiteʼmo kayo kayo vekaʼapimo maino, huno hapa paiʼniye. 36Hapa paiteno mago aise mafaʼnemo vayaʼai apaulagaleʼmo alino he tino ateʼniye. Ateteno ani mafaʼnemo anu kiʼneno hapa painoʼaeʼmo, 37#Mt 10:40Ina lagimo ani agufa mafaʼnemo aliʼa falu fala huʼa neʼatesafi ina kava huʼa aliʼa falu fala huʼa neʼnatae. Aliʼa falu fala huʼa neʼnataya vayaʼmogi ina kava huʼa alino nateʼnigeʼna emiʼneʼnova vekaʼeʼmo aliʼa falu fala huʼa nelaʼataʼae, huno hapa paiʼniye.

Yesuʼa, mago vekamo kametimo oʼmaiʼnisiyana vayatimo maiʼniye, huno huʼniya gemae

(Lu 9:49-50)

38 # Nap 11:27-29 Yoniʼa agaefeʼmo hunoʼaeʼmo, Tisao, huno, ageʼnonana mago vekamoʼmo kagikaletiʼmo hosu apaune vayaʼaina alino hapa faino neʼapatalegeta ageʼnone. Lagaepati vekamo oʼmaiʼniyaʼmofeʼmo ani kava osuka afaʼa atalo, huta huʼnone, huno ha paiʼniye. 39#1 Ko 12:3Yesuʼa hunoʼaeʼmo, haʼao, hutapa oʼateyo. Mago vekamoʼmo nagiʼniletiʼmo noʼagaya aune kavaʼmo nehisiyaʼmoʼmo nagiʼnilefeʼmo huno faipa huno oʼnategaiye. 40#Mt 12:30; Lu 11:23Mago vekamoʼmo kame huno nolatesiyaʼmoʼmo lao vekamo maiʼniye. 41#Mt 10:42Lama gemo lapa nepauve, huno, mago vekamoʼmo lapaketenoʼaeʼmo, Kalaisi vayaʼamo maiʼnae, huno agesa afiteno nagiʼnilefeʼmo kapufi aniʼmo hefino lapamisiyana miyaʼamo aligiye, huno hapa paiʼniye.

Hosu kavaʼmo hisayafeʼmo apayate neʼaliya kavafeʼmo huʼniya gemae

(Mt 18:6-9; Lu 17:1-2)

42Huno hapa paitenoʼaeʼmo, Mago vekamoʼmo ani agufa aise mafaʼnemoʼmo nagaefeʼmo agesa afino fatago nehiya mafaʼnemoʼa hosu kavaʼmo hisiyafeʼmo ayateʼmo aliʼnisiyana lusi hanageke yaʼmo aligiye. Aligiyaʼmonanafa hogoteno ayateʼmo oʼaliʼnisigeʼapaeʼmo atafauʼao alopa yafateʼmo nofi aeteʼa lugoʼafiʼmo aeteʼa alini uʼa solovala anipiʼmo yaga auʼa atalesagenoʼaeʼmo aise hanageke yaʼmo aligiye. 43#Mt 5:30Inagi lapayaʼmoʼa hosu kavaʼmo hisayafeʼmo alino he tino nelapatesigetapaeʼmo heta hatagauta ataleyo. Magoke lapayaʼmo haneʼnisiyana maige maige hutapa maisayategamo uta haita maisayana kanale hugiye. Lole lapayaʼmo haneʼnisiyana alagi yu oseno lege lege huno neʼmaiya ata kopiʼmo uta lamita maisayana hosugiye.

44Ata kopiʼmo muki afinaʼmo hagifamogimo ofaliʼa apakufafiʼmo negayaʼmofeʼmo atamo alagi yu osegaiye.

45Lapaiyaʼmoʼmo hosu kavaʼmo hisayafeʼmo alino he tino nelapatesigetapaeʼmo heta hatagauta ataleyo. Magoke lapaiyamo haneʼnisiyana maige maige hutapa maisayategamo uta haitapa maisayana kanale hugiyaʼmonanafa lole lapaiyamo haneʼnisiyana alagi yu oseno lege lege huno neʼmaiya ata kopiʼmo uta lamita maisayana hosugiye.

46Ata kopiʼmo muki afinaʼmo hagifamogimo apakufafiʼmo negayaʼmofeʼmo atamo alagi yu osegaiye.

47 # Mt 5:29 Lapaulagamoʼmo hosu kavaʼmo alino he tino nelapatesigetapaeʼmo alita katita ataleyo. Magoke lapaulagamo haneʼnisiyana maige maige hutapa maisayategamo uta haita maisayana kanale hugiyaʼmonanafa lole lapaulagamo haneʼnisiyana alagi yu oseno lege lege huno neʼmaiya ata kopiʼmo uta lamita maisayana hosugiye.

48 # Aiy 66:24 Ata kopiʼmo muki afinaʼmo hagifamogimo apakufafiʼmo negayaʼmofeʼmo atamo alagi yu osegaiye.

49Neʼyateʼmo hagemo nefalaya agufa kava huno muki vayaʼai apakufaleʼmo ata legaiye. Ina kava huʼa Gotina neʼamiya yateʼmo hagemo falegaiye. 50#Mt 5:13; Lu 14:34; Kl 4:6Hagemo kanale yaʼmo haneʼniyaʼmonanafa haga nehiya yaʼamo hano hisigeʼapaeʼmo haiya kava huʼa halate haga yaʼamo aliʼa hamaleʼa atesageno haga hugiye. Lapaipafiʼmo hagekana huno haneʼnisigetapa magoke lapaipa lapakesamo aliteta alagepa hutapa magokepi lokaeta maiyo, huno hapa paiʼniye.

Currently Selected:

Maki 9: kyg2013

Highlight

Copy