Malakai 2
2
1 #
Hos 5:1
Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, mono hutapa neʼapataya vayaʼmogitapae, huʼna, Ani gemo lapa paiguve. 2#Mon 26:14-19; Sam 69:22Naginileʼmo alita asaga hutapa natesayafeʼmo geʼnimo afitetapa alita lapaipafiʼmo oʼmalesayaʼmoʼmo lokiya hosu lifanamo huʼna lapatesugeno lapakaeteʼmo hosu kavaʼmo afole aigiye. Nagaemo fiku lapa maeʼna lapamiʼnova yaʼmo aliʼna hosu huʼna atalegauve. Lapakaemo geʼnimo oʼafitapa ina agufa ge nehiye, hutapa nehayaʼmofeʼmo nagaemo fikumo lapa maeʼna lapamiʼnova yaʼmo ago aliʼna hosu huʼna ataleʼnove.
3 #
Mal 2:9
Afiyo, huʼna, Nagaemo lapakinago vayaʼaifeʼmo hosu kavaʼmo huʼnae, huʼna huteʼnaeʼmo ofalini afumo aifaʼamo aliʼna lapaugosafiʼmo faleʼna lapategauve. Apakaemo lapavaleliʼuʼa ofalini afumo aipaʼamo alinitutapa yaga autapa neʼatalaya yategamo yaga auʼa lapatalegae. Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, 4#Iyi 33:33; 44:15Ani kavaʼmo hisugetapa agetetapaeʼmo agaiʼageʼmo lokiya kavaʼmo hiyo, huno lokiya gemo huno laha paiʼniye, hutapa hugae. Nagaemo Livai nofi vayaʼeʼmo kotalakemo hu maleʼnova gemo hano osuno hanege hanege huno hanesiyafeʼmo mani gemo nehuve. 5#Nap 3:45; Hat 32:26-28Ala kava neʼmo asole vayaʼaiteʼmo yagaiʼna neʼapatova vekamoʼnamo huʼnaeʼmo, Agaeʼeʼmo kotalakemo hu maleʼnova geletiʼmo maige maige huʼa maisaya yaʼmo alisageno alino nanu aeno apatesigeʼnaeʼmo apakaeʼeʼmo magokepi lokaeʼna maiguve. Agaemo nagaefeʼmo koli huteno geʼnimo afisiyafeʼmo ani lole kavaʼmo agaeteʼmo aliʼna afole aiʼna ateʼnogeno koli huno geʼnimo akame huteno nagiʼnilefeʼmo naiyafi maiʼniye. 6#Sam 37:30; Iyi 44:23-24Agaemo lamage keʼaepa geʼnimo alino apaya maleʼniye. Alagepa huno alino fako huno apateʼniye. Agaemo nagaeʼeʼmo magokepi lokaeno umenitata huʼnigetaʼaeʼmo magoke laʼaipamo aliʼnoʼaʼmofeʼmo fatago kavaʼmo huʼniye. Agaemo asole vayaʼmo hosu kavategatiʼmo alino alagepa kateʼmo apaugosa huno apateʼnigeʼa uʼnae. 7#Loa 21:5; 2 Ko 5:20Mono huʼa neʼapataya vayaʼmo Ala kava neʼmo muki vayaʼaiteʼmo yagaino neʼapateya vekamo apa vayaʼamo maiʼnayaʼmofeʼmo ageʼnaya gemo aliʼa apaya malesaya vayaʼmae. Vayaʼmogimo apavayafatiʼmo hisaya keʼaepa geʼamo kahauya huʼa afisaya kavaʼmo haneʼniye. 8#Yel 18:15; Niy 13:29Ani kavaʼmo hisaya kavaʼmo haneʼniyaʼmonanafa ani alagepa kavaʼmo ago ataletetapa hosu kavaʼmo huʼnageʼapaeʼmo asole vayaʼmo ataleʼa apagoʼya faiteʼa asagauʼa aiʼnae. Livaiʼeʼmo magokepi hu maleʼnova kotalakemo alita hosu hutapa ataleʼnae, huʼna lapa nepauve. 9#1 Sam 2:30; Loa 1:17Lapakaemo geʼnimo akame osuge keʼaepa gelefeʼmo vayaʼaitegamo magoke agufa kavaʼmo osuge huʼnayaʼmofeʼmo muki vayaʼmogi apaulagaleʼmo hosu kavatapimo aliʼna apave liʼnogeʼa hosu lapakitapimo lapamiʼnae.
Isaleli vayaʼmogimo Gotiʼmo ataleʼnaya gemae
10 #
1 Ko 8:6; Yop 31:15 Muki vayaʼmogitamo magoke afotimoʼmo maiʼnifiye. Magoke Gotiʼa afa yatetiʼmo alo huno lateʼnifiye. Na kava higetapaeʼmo Gotiʼa afotimoʼmo apakinago vayaʼeʼmo magokepi hu maleʼniya kotalakemo amagita ataleteta konagatiyeʼmo aigofe kavaʼmo huʼnonageʼapaeʼmo ani kava huʼa konagaʼapiyeʼmo aigofe kavaʼmo nehae. 11#Esa 9:1-2; 2 Ko 6:14-18Yuta vayaʼmogimo Gotifeʼmo aigofe kavaʼmo huteʼa apametala huʼnae. Apakaemo muki Isaleli kotegaʼe Yulusalemu taonifiʼeʼmo alagi lusi hosu kavaʼmo huʼnae. Yuta vayaʼmogimo Ala kava neʼmo aote kavaʼamo veyalavemogi kavaʼmo aliʼa hosu huʼa ataleteʼa malaga vayaʼmo aigofe gotigitefeʼmo mono nehaya vayaʼmogi aʼmafaʼnemo aliʼnae. 12Malaga vayaʼmogi aʼmafaʼnemo aliʼnisaya vayaʼmogi Ala kava neʼmo ofalinimo amigayaʼmonanafa Ala kava neʼmoʼa mono noʼafatiʼmo alino hapafaino apatalegaiye.
13 #
Mai 15:8; Yel 6:20 Lapakaemo magoʼe hosu kavaʼmo nehae. Lapakaemo aʼnetapimo hapafaitapa apataleʼnageʼa aviʼyaʼmo huʼnageno apaunumoʼmo ofalini hiʼyalamuteʼmo uno lamino kotu maleʼnigenoʼaeʼmo Ala kava neʼmoʼa ofalinitapieʼmo amuse osuʼniyaʼmofeʼmo lapayapatiʼmo ofalinimo huʼnaya yaʼmo noʼaliye. 14#Mal 3:5; Mai 2:17Lapakaemo hosu kavaʼmo ago huʼnayaʼmonanafa na kava higenoʼaeʼmo ani kavaʼmo nehiye, hutapa nehae. Lapakaemo veyalave kotalakemo amagitapa ataletetapa neyatapileʼmo aliʼnaya aʼnemo hapafaitapa apataleʼnagenoʼaeʼmo Ala kava neʼmoʼa lapakaefeʼmo faigoko gemo huʼniyaʼmofeʼmae. Lapakaemo apakaeʼeʼmo magokepi kotalakemo ago hu maletageʼapaeʼmo ani aʼne anagaʼmo lapakaeʼeʼmo umenitata huʼnayaʼmonanafa halate hapafaitapa apataleʼnae. 15#Mt 19:4-5Gotiʼa magoke nofi vayaʼageʼmo mukiʼamo alo osuʼnifiye. Gotiʼa Aunemeʼaletiʼmo magoʼe nofi vayaʼmo agaiʼa nofi vayaʼmo maisayafeʼmo afaʼa alo hugiyaʼmonanafa lagaemo alo huʼniye. Na kava higenoʼaene. Lagaemo mafaʼnemo alita apatesunageʼa agaiʼa aote nofi vayaʼamo maisayafeʼmae. Gotiʼa ani kavaʼmo huʼniyaʼmofeʼmo lapaunelapameteʼmo alagepa hutapa yagaiʼnetapa neyatapileʼmo aliʼnaya aʼnetapiyeʼmo aigofe kavaʼmo hutetapa veyalave kotalakemo amagitapa oʼataleyo.
16 #
Mt 5:31-32; 19:6-8 Ala kava neʼmo Isaleli vayaʼmogi Gotiʼapimoʼmo muki vayaʼaiteʼmo yagaino neʼapateya vekamoʼmo hunoʼaeʼmo, Lapakaemo aʼnetapimo hapa faitapa neʼapatalaya kavafeʼmo alagi oʼnahauʼniye. Ani kavatetiʼmo kavetamo nehaya kavaʼmo afole neʼaigetapa aʼnetapimo neʼapamagiye. Ani hosu kavaʼmo afole neʼaiyaʼmofeʼmo lapaunelapameteʼmo alagepa hutapa yagaitapa atetetapa aʼnetapiyeʼmo aigofe kavaʼmo hutetapa veyalave kotalakemo amagitapa oʼataleyo.
Ala kava neʼmo afole aisiya afinaʼmo alagi hogo nehiye, huno huʼniya gemae
17 #
Aiy 43:22,24; 5:20 Lapakaemo hosu gemo huʼnagenoʼaeʼmo Ala kava neʼmoʼa alagaʼmo haeʼniye. Alagaʼmo haeʼniyaʼmonanafa lapakaemo hutapaeʼmo, Lagaemo haiya agufa gemo huʼnonagenoʼaeʼmo alagaʼmo haeʼniye, hutapa nehae. Lapakaemo hutapaeʼmo, Ala kava neʼmo aulagaleʼmo muki hosu kavaʼmo nehaya vayaʼmo alagepa vayaʼmo maiʼnae, hutapa huge hosu vayaʼaifeʼmo amuse huno neʼapate, hutapa huge alagepa huno alino fako huno neʼapateya Gotiʼmo haiyaʼalega maiʼniye, hutapa huge nehayaʼmofeʼmo alagaʼmo haeʼniye.
Currently Selected:
Malakai 2: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
