Malakai 3
3
1 #
Mt 11:10; Aiy 40:3; Hag 2:7,9 Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, Afiyo, huno, nagaemo apa vekaʼnimo aliʼna atesugeno uno hogoteteno kaʼmo valino nategaiye. Ala kava neʼmo kahauya hutapa agesayafeʼmo lapauʼniya vekamo malage huno alopa mono noʼaleʼmo egaiye. Kotalakemo hu maleʼniya gelefeʼmo apa vekaʼamo egaiye. Afiyo, huno, egaiye.
2 #
Mal 4:1; Le 6:16-17 Egaiyaʼmonanafa ani esiya afinaʼmo haiya vayaʼmo afaʼa maigae. Agaemo afole aisigeʼapaeʼmo haiya vayaʼmo afaʼa he tiʼa maigae. Agaemo atafiʼmo siluva yafaʼmo kaeʼnagenoʼaeʼmo leno alagepa siluva yafaʼmo afole neʼaiya atakana huno afole aigiye. Agaemo sopuletiʼmo muki oʼaniʼya faiʼniya yaʼmo sese huʼnagenoʼaeʼmo aeno kalo nepaeya sopugana huno afole aigiye. 3#Aiy 1:25; 1 Pi 2:5Agaemo atafiʼmo siluva yafaʼmo kaesigeno leno alagepa siluva yafaʼmo afole aisiyafeʼmo yagaino neʼmaiya vekagana huno afole aigiye. Agaemo Livai nofi vayaʼmogi hosu kavaʼapimo aeno kalo paeno ataleteno alino alagepa huno apategaiye. Atafiʼmo goli yafaʼe siluva yafaʼeʼmo kaeʼnageno leno kalopaeno alagepa yafaʼamo afole neʼaiya kava huno alino alagepa huno apatesigeʼa fatago kavaʼmo nehuʼapaeʼmo Ala kava neʼmo ofalinimo amigae. 4#Mal 1:11Akeyaʼvilagamo alagepa ofalinimo amiʼnaya kava huʼa Yuta nofi vayaʼmogiʼe Yulusalemu taonifiʼmo maiʼnaya vayaʼmogiʼeʼmo alagepa ofalinimo amisageno Ala kava neʼmoʼa amuse huno apategaiye. 5#Sak 5:2-4; Ye 5:4Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, nagaemo emineʼna lapaopaleʼmo maiʼneʼna aliʼna fako huʼna lapategauve. Nagaemo hosu apaune vayaʼaifenagi kumai kavaʼmo nehaya vayaʼaifenagi, agoti huʼa apateʼapaeʼmo aigofe gemo nehaya vayaʼaifenagi aliʼyaʼmo afoʼamogimo aliʼyaʼapimo neʼaliya vayaʼmogi monimo lagauʼa neʼaliya vayaʼaifenagi kogu aʼne anagaʼmo humi apateteʼa moniʼapimo kumayaʼmo neʼaliya vayaʼaifenagi megusa mafaʼne anagaʼaitegamo hosu kavaʼmo nehaya vayaʼaifenagi alu kotegatiʼmo eʼnaya vayaʼmo aliʼa falu fala huʼa noʼapataya vayaʼaifenagi huʼna muki nehaya kavaʼapieʼmo agotileʼmo faigoko gemo huguve. Nagaefeʼmo koli huteʼa naiyafi oʼmaiʼnayaʼmofeʼmae, huno hapa paiʼniye.
Apakaemo Gotiʼmo ofalini oʼamiʼnaya kavafeʼmo huʼniya gemae
6 #
Lo 11:29; Avi 3:22 Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Yekopu nofi vayaʼmogitapae, huʼna, Nagaemo Ala kava neʼmoʼnamo kavaʼnimo ataleʼna aliʼna alu kavaʼmo afaʼa nosuvaʼmofeʼmo alagi aliʼna hano huʼna olapataleʼnovanageʼna afaʼa aliʼna hano huʼna olapatalegauve. 7#Ap 7:51; Sak 1:3Ani kavaʼmo huʼna maiʼnovaʼmonanafa lapakaemo lapakinago vayaʼmo maiʼnaya afinatetiʼmo mono kavaʼniyeʼmo huʼniya keʼaepa gemo ago amagitapa ataleme ataleme eʼnae. Nagaetegamo aitapa ataginetapa egeʼnao lapakaetegamo nagaemo aiʼna atagineʼna vino, huʼna lapa paiʼnovaʼmonanafa lapakaemo hutapaeʼmo, haiya kavaʼmo huta ataleta aita atagineta kagaetegamo visune, hutapa huʼnae. 8#Lo 13:7; Yas 7:11Mago vekamoʼmo Goti yaʼmo kumayaʼmo aligifiye. Kumayaʼmo oʼaligiyaʼmonanafa lapakaemo nagae yaʼmo ago kumayaʼmo aliʼnae, huʼna nehuvaʼmonanafa lapakaemo hutapaeʼmo, Na agufa yakamo kumayaʼmo aliʼnone, hutapa huʼnageʼnaeʼmo ofalinimo oʼnamiʼnae, huʼna huʼnove. 9#Hag 1:6,11Muki Yuta nofi vayaʼmogitapamo nagae yaʼmo kumayaʼmo aliʼnayanageʼna nagaemo lapa oʼmaegauvaʼmofeʼmo ani gemo huʼna huguve, alagepa hutapa oʼmaiyo, huʼna nehuve. 10#Mai 3:9-10; 2 Sit 31:10Lapakaemo noʼnifiʼmo neʼyaʼmo hanesiyafeʼmo muki ofalini hisaya yaʼmo alinitetapa mono nopiʼmo maleyo. Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Geʼnimo akame nehutapaeʼmo lama gemo huʼnofi, hutapa amalageka hutapa ageyo. Geʼnimo akame hisayana kokuʼnapi yasi kaʼmo yaki maleʼnisugeno ko aigekana huno aliʼna auleʼna lapatesuva yaʼmo lapakaeteʼmo eminesigetapa maleta havai tegayaʼmofeʼmo magoʼe hutapa malesaya yaʼmo ohanegaiye.
11 #
Yol 2:21-22
Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Lapa maesuvafeʼmo hoyafiʼmo haneʼniya neʼyatapimo neʼnaya kafa anagafeʼmo hapa paisugeʼa oʼnegae. Lapa maesuvafeʼmo nofi hoyatapififeʼmo asole alagamo ao, huʼna huguve. 12#Aiy 61:9Muki alu nofi vaya alu nofi vayaʼmogimo huʼapaeʼmo, Gotiʼa alino auleno apateʼniya vayane, huʼa hugae. Mopatapileʼmo maiʼnaya vayaʼmogimo apamogaga aigae.
13 #
Mal 2:17; Sam 10:11 Ala kava neʼmoʼnamo huʼnaeʼmo, Nagaefeʼmo himuʼnamu gemo huʼnae, huʼna huʼnogetapaeʼmo lapakaemo hutapaeʼmo, kagaefeʼmo haiya agufa himuʼnamu gemo huʼnone, hutapa huʼnageʼnaeʼmo, 14#Yop 21:14-15; Aiy 58:3lapakaemo aliʼyaʼnimo neʼaliya aliʼyafeʼmo, afa aliʼyaʼmo neʼalune, hutapa nehae. Mono keʼaepa geʼamo akame huʼnonaʼmonanafa akamelegaʼamo na agufa yaʼmo aligune. Ala kava neʼmoʼa muki vayaʼaiteʼmo yagaino neʼapateya vekamo aulagaleʼmo yulagefa aiʼnonaʼmonanafa na agufa yaʼmo aligune. 15#Yop 21:7-13; Sam 95:9Agaemo hosu kavaʼmo nehaya vayaʼmo alino asagauno neʼapateyaʼmofeʼmo hemenimo lagaemo hutaeʼmo, himuʼnamu kava nehaya vayaʼmo hapa neʼmae, huta nehune. He, Gotiʼa amalageka nehaya vayaʼmo hosu hanageke yaʼmo oʼaliʼa hanageke kavapatiʼmo afaʼa uʼnae, huta nehune.
16 #
Sam 66:16; 56:8 Inagi Ala kava nefeʼmo koli nehaya vayaʼmogimo ge huge afige huʼa maiʼnagenoʼaeʼmo Ala kava neʼmoʼa agetafo huno neʼafiye. Ala kava nefeʼmo koli huteʼa agiʼalefeʼmo apakesamo neʼafiya vayaʼaifeʼmo age okanino agesamo afisiyafeʼmo Ala kava neʼmo aulagaleʼmo mukufiʼmo avoʼmo kae maleʼnae. 17#Hat 19:5; Aiy 62:3Ala kava neʼmoʼa asole vayaʼaiteʼmo yagaino neʼapateya vekamoʼmo hunoʼaeʼmo, Mago vekamoʼmo hogote alagepa yaʼamo alopa moniletiʼmo miya nefaiya yaʼmo alino kesifiʼmo neʼmaleya kava huʼna nagaemo muki nofi vayapatiʼmo apavaleliʼneʼna aliʼna anupa huʼna apateteʼnaeʼmo apakaefeʼmo, lapakaemo nagaiʼni vayaʼmo maigae, huʼna hapa paiguve, huno huʼniye. Mago vekamoʼmo agaiʼa mafaʼnemoʼmo aliʼyaʼamo neʼaliya mafaʼnemo kayoʼmo oʼamino afaʼa agegeno neʼateya kava huʼna kayoʼmo oʼapamiʼna afaʼa apakegeʼna apategauve. 18#Sam 58:11; Iyi 44:23Ani afinaʼmo lapakaemo ani vayaʼmo apaketapa aeto hutetapaeʼmo, fatago vayaʼmae, hutapa apaketa aeto huge ani vayaʼmo hosu vayaʼmae, hutapa apaketa aeto huge Goti aliʼyaʼamo aliʼnaya vayaʼmae, hutapa apaketa aeto huge Goti aliʼyaʼamo oʼaliʼnaya vayaʼmae, hutapa apaketa aeto huge hugae, huno hapa paiʼniye.
Currently Selected:
Malakai 3: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
